೭. ಕುಮ್ಭವಗ್ಗೋ

೧. ಕುಮ್ಭಙ್ಗಪಞ್ಹೋ

೧. ‘‘ಭನ್ತೇ ನಾಗಸೇನ, ‘ಕುಮ್ಭಸ್ಸ ಏಕಂ ಅಙ್ಗಂ ಗಹೇತಬ್ಬ’ನ್ತಿ ಯಂ ವದೇಸಿ, ಕತಮಂ ತಂ ಏಕಂ ಅಙ್ಗಂ ಗಹೇತಬ್ಬ’’ನ್ತಿ? ‘‘ಯಥಾ, ಮಹಾರಾಜ, ಕುಮ್ಭೋ ಸಮ್ಪುಣ್ಣೋ ನ ಸಣತಿ, ಏವಮೇವ ಖೋ, ಮಹಾರಾಜ, ಯೋಗಿನಾ ಯೋಗಾವಚರೇನ ಆಗಮೇ ಅಧಿಗಮೇ ಪರಿಯತ್ತಿಯಂ ಸಾಮಞ್ಞೇ ಪಾರಮಿಂ ಪತ್ವಾ ನ ಸಣಿತಬ್ಬಂ, ನ ತೇನ ಮಾನೋ ಕರಣೀಯೋ, ನ ದಬ್ಬೋ [ದಪ್ಪೋ (ಸೀ.)] ದಸ್ಸೇತಬ್ಬೋ, ನಿಹತಮಾನೇನ ನಿಹತದಬ್ಬೇನ ಭವಿತಬ್ಬಂ, ಉಜುಕೇನ ಅಮುಖರೇನ ಅವಿಕತ್ಥಿನಾ. ಇದಂ, ಮಹಾರಾಜ, ಕುಮ್ಭಸ್ಸ ಏಕಂ ಅಙ್ಗಂ ಗಹೇತಬ್ಬಂ. ಭಾಸಿತಮ್ಪೇತಂ, ಮಹಾರಾಜ, ಭಗವತಾ ದೇವಾತಿದೇವೇನ ಸುತ್ತನಿಪಾತೇ –

‘‘‘ಯದೂನಕಂ ತಂ ಸಣತಿ, ಯಂ ಪೂರಂ ಸನ್ತಮೇವ ತಂ;

ಅಡ್ಢಕುಮ್ಭೂಪಮೋ [ರಿತ್ತಕುಮ್ಭೂಪಮೋ (ಸೀ.)] ಬಾಲೋ, ರಹದೋ ಪೂರೋವ ಪಣ್ಡಿತೋ’’’ತಿ.

ಕುಮ್ಭಙ್ಗಪಞ್ಹೋ ಪಠಮೋ.

೨. ಕಾಳಾಯಸಙ್ಗಪಞ್ಹೋ

೨. ‘‘ಭನ್ತೇ ನಾಗಸೇನ, ‘ಕಾಳಾಯಸಸ್ಸ [ಕಾಳಹಂಸಸ್ಸ (ಕ.)] ದ್ವೇ ಅಙ್ಗಾನಿ ಗಹೇತಬ್ಬಾನೀ’ತಿ ಯಂ ವದೇಸಿ, ಕತಮಾನಿ ತಾನಿ ದ್ವೇ ಅಙ್ಗಾನಿ ಗಹೇತಬ್ಬಾನೀ’’ತಿ? ‘‘ಯಥಾ, ಮಹಾರಾಜ, ಕಾಳಾಯಸೋ ಸುಪೀತೋ [ಸುಥಿತೋ (ಕ.)] ವಮತಿ [ವಹತಿ (ಸ್ಯಾ. ಕ.)], ಏವಮೇವ ಖೋ, ಮಹಾರಾಜ, ಯೋಗಿನೋ ಯೋಗಾವಚರಸ್ಸ ಮಾನಸಂ ಯೋನಿಸೋ ಮನಸಿಕಾರೇನ [ಯೋನಿಸೋ ಮನಸಿಕಾರೇ (ಸೀ. ಸ್ಯಾ. ಕ.)] ಅಪೀತಂ ವಮತಿ. ಇದಂ, ಮಹಾರಾಜ, ಕಾಳಾಯಸಸ್ಸ ಪಠಮಂ ಅಙ್ಗಂ ಗಹೇತಬ್ಬಂ.

‘‘ಪುನ ಚಪರಂ, ಮಹಾರಾಜ, ಕಾಳಾಯಸೋ ಸಕಿಂ ಪೀತಂ ಉದಕಂ ನ ವಮತಿ, ಏವಮೇವ ಖೋ, ಮಹಾರಾಜ, ಯೋಗಿನಾ ಯೋಗಾವಚರೇನ ಯೋ ಸಕಿಂ ಉಪ್ಪನ್ನೋ ಪಸಾದೋ, ನ ಪುನ ಸೋ ವಮಿತಬ್ಬೋ ‘ಉಳಾರೋ ಸೋ ಭಗವಾ ಸಮ್ಮಾಸಮ್ಬುದ್ಧೋ, ಸ್ವಾಕ್ಖಾತೋ ಧಮ್ಮೋ, ಸುಪ್ಪಟಿಪನ್ನೋ ಸಙ್ಘೋ’ತಿ. ‘ರೂಪಂ ಅನಿಚ್ಚಂ, ವೇದನಾ ಅನಿಚ್ಚಾ, ಸಞ್ಞಾ ಅನಿಚ್ಚಾ, ಸಙ್ಖಾರಾ ಅನಿಚ್ಚಾ, ವಿಞ್ಞಾಣಂ ಅನಿಚ್ಚನ್ತಿ ಯಂ ಸಕಿಂ ಉಪ್ಪನ್ನಂ ಞಾಣಂ, ನ ಪುನ ತಂ ವಮಿತಬ್ಬಂ. ಇದಂ, ಮಹಾರಾಜ, ಕಾಳಾಯಸಸ್ಸ ದುತಿಯಂ ಅಙ್ಗಂ ಗಹೇತಬ್ಬಂ. ಭಾಸಿತಮ್ಪೇತಂ, ಮಹಾರಾಜ, ಭಗವತಾ ದೇವಾತಿದೇವೇನ –

‘‘‘ದಸ್ಸನಮ್ಹಿ ಪರಿಸೋಧಿತೋ [ಪರಿಸೋಧಿಕೇ (ಸೀ. ಕ.)] ನರೋ, ಅರಿಯಧಮ್ಮೇ ನಿಯತೋ ವಿಸೇಸಗೂ;

ನಪ್ಪವೇಧತಿ ಅನೇಕಭಾಗಸೋ, ಸಬ್ಬಸೋ ಚ ಮುಖಭಾವಮೇವ ಸೋ’’’ತಿ.

ಕಾಳಾಯಸಙ್ಗಪಞ್ಹೋ ದುತಿಯೋ.

೩. ಛತ್ತಙ್ಗಪಞ್ಹೋ

೩. ‘‘ಭನ್ತೇ ನಾಗಸೇನ, ‘ಛತ್ತಸ್ಸ ತೀಣಿ ಅಙ್ಗಾನಿ ಗಹೇತಬ್ಬಾನೀ’ತಿ ಯಂ ವದೇಸಿ, ಕತಮಾನಿ ತಾನಿ ತೀಣಿ ಅಙ್ಗಾನಿ ಗಹೇತಬ್ಬಾನೀ’’ತಿ? ‘‘ಯಥಾ, ಮಹಾರಾಜ, ಛತ್ತಂ ಉಪರಿ ಮುದ್ಧನಿ ಚರತಿ, ಏವಮೇವ ಖೋ, ಮಹಾರಾಜ, ಯೋಗಿನಾ ಯೋಗಾವಚರೇನ ಕಿಲೇಸಾನಂ ಉಪರಿ ಮುದ್ಧನಿ ಚರೇನ ಭವಿತಬ್ಬಂ. ಇದಂ, ಮಹಾರಾಜ, ಛತ್ತಸ್ಸ ಪಠಮಂ ಅಙ್ಗಂ ಗಹೇತಬ್ಬಂ.

‘‘ಪುನ ಚಪರಂ, ಮಹಾರಾಜ, ಛತ್ತಂ ಮುದ್ಧನುಪತ್ಥಮ್ಭಂ ಹೋತಿ, ಏವಮೇವ ಖೋ, ಮಹಾರಾಜ, ಯೋಗಿನಾ ಯೋಗಾವಚರೇನ ಯೋನಿಸೋ ಮನಸಿಕಾರುಪತ್ಥಮ್ಭೇನ ಭವಿತಬ್ಬಂ. ಇದಂ, ಮಹಾರಾಜ, ಛತ್ತಸ್ಸ ದುತಿಯಂ ಅಙ್ಗಂ ಗಹೇತಬ್ಬಂ.

‘‘ಪುನ ಚಪರಂ, ಮಹಾರಾಜ, ಛತ್ತಂ ವಾತಾತಪಮೇಘವುಟ್ಠಿಯೋ ಪಟಿಹನತಿ, ಏವಮೇವ ಖೋ, ಮಹಾರಾಜ, ಯೋಗಿನಾ ಯೋಗಾವಚರೇನ ನಾನಾವಿಧದಿಟ್ಠಿಪುಥುಸಮಣಬ್ರಾಹ್ಮಣಾನಂ [ಮಹಾವಾತ (ಕ.)] ಮತವಾತತಿವಿಧಗ್ಗಿಸನ್ತಾಪಕಿಲೇಸವುಟ್ಠಿಯೋ ಪಟಿಹನ್ತಬ್ಬಾ. ಇದಂ, ಮಹಾರಾಜ, ಛತ್ತಸ್ಸ ತತಿಯಂ ಅಙ್ಗಂ ಗಹೇತಬ್ಬಂ. ಭಾಸಿತಮ್ಪೇತಂ, ಮಹಾರಾಜ, ಥೇರೇನ ಸಾರಿಪುತ್ತೇನ ಧಮ್ಮಸೇನಾಪತಿನಾ –

‘‘‘ಯಥಾಪಿ ಛತ್ತಂ ವಿಪುಲಂ, ಅಚ್ಛಿದ್ದಂ ಥಿರಸಂಹಿತಂ;

ವಾತಾತಪಂ ನಿವಾರೇತಿ, ಮಹತೀ ಮೇಘವುಟ್ಠಿಯೋ.

‘‘‘ತಥೇವ ಬುದ್ಧಪುತ್ತೋಪಿ, ಸೀಲಛತ್ತಧರೋ ಸುಚಿ;

ಕಿಲೇಸವುಟ್ಠಿಂ ವಾರೇತಿ, ಸನ್ತಾಪತಿವಿಧಗ್ಗಯೋ’’’ತಿ.

ಛತ್ತಙ್ಗಪಞ್ಹೋ ತತಿಯೋ.

೪. ಖೇತ್ತಙ್ಗಪಞ್ಹೋ

೪. ‘‘ಭನ್ತೇ ನಾಗಸೇನ, ‘ಖೇತ್ತಸ್ಸ ತೀಣಿ ಅಙ್ಗಾನಿ ಗಹೇತಬ್ಬಾನೀ’ತಿ ಯಂ ವದೇಸಿ, ಕತಮಾನಿ ತಾನಿ ತೀಣಿ ಅಙ್ಗಾನಿ ಗಹೇತಬ್ಬಾನೀ’’ತಿ? ‘‘ಯಥಾ, ಮಹಾರಾಜ, ಖೇತ್ತಂ ಮಾತಿಕಾಸಮ್ಪನ್ನಂ ಹೋತಿ, ಏವಮೇವ ಖೋ, ಮಹಾರಾಜ, ಯೋಗಿನಾ ಯೋಗಾವಚರೇನ ಸುಚರಿತವತ್ತಪ್ಪಟಿವತ್ತಮಾತಿಕಾಸಮ್ಪನ್ನೇನ ಭವಿತಬ್ಬಂ. ಇದಂ, ಮಹಾರಾಜ, ಖೇತ್ತಸ್ಸ ಪಠಮಂ ಅಙ್ಗಂ ಗಹೇತಬ್ಬಂ.

‘‘ಪುನ ಚಪರಂ, ಮಹಾರಾಜ, ಖೇತ್ತಂ ಮರಿಯಾದಾಸಮ್ಪನ್ನಂ ಹೋತಿ, ತಾಯ ಚ ಮರಿಯಾದಾಯ ಉದಕಂ ರಕ್ಖಿತ್ವಾ ಧಞ್ಞಂ ಪರಿಪಾಚೇತಿ, ಏವಮೇವ ಖೋ, ಮಹಾರಾಜ, ಯೋಗಿನಾ ಯೋಗಾವಚರೇನ ಸೀಲಹಿರಿಮರಿಯಾದಾಸಮ್ಪನ್ನೇನ ಭವಿತಬ್ಬಂ, ತಾಯ ಚ ಸೀಲಹಿರಿಮರಿಯಾದಾಯ ಸಾಮಞ್ಞಂ ರಕ್ಖಿತ್ವಾ ಚತ್ತಾರಿ ಸಾಮಞ್ಞಫಲಾನಿ ಗಹೇತಬ್ಬಾನಿ. ಇದಂ, ಮಹಾರಾಜ, ಖೇತ್ತಸ್ಸ ದುತಿಯಂ ಅಙ್ಗಂ ಗಹೇತಬ್ಬಂ.

‘‘ಪುನ ಚಪರಂ, ಮಹಾರಾಜ, ಖೇತ್ತಂ ಉಟ್ಠಾನಸಮ್ಪನ್ನಂ ಹೋತಿ, ಕಸ್ಸಕಸ್ಸ ಹಾಸಜನಕಂ ಅಪ್ಪಮ್ಪಿ ಬೀಜಂ ವುತ್ತಂ ಬಹು ಹೋತಿ, ಬಹು ವುತ್ತಂ ಬಹುತರಂ ಹೋತಿ, ಏವಮೇವ ಖೋ, ಮಹಾರಾಜ, ಯೋಗಿನಾ ಯೋಗಾವಚರೇನ ಉಟ್ಠಾನಸಮ್ಪನ್ನೇನ ವಿಪುಲಫಲದಾಯಿನಾ ಭವಿತಬ್ಬಂ, ದಾಯಕಾನಂ ಹಾಸಜನಕೇನ ಭವಿತಬ್ಬಂ, ಯಥಾ ಅಪ್ಪಂ ದಿನ್ನಂ ಬಹು ಹೋತಿ, ಬಹು ದಿನ್ನಂ ಬಹುತರಂ ಹೋತಿ. ಇದಂ, ಮಹಾರಾಜ, ಖೇತ್ತಸ್ಸ ತತಿಯಂ ಅಙ್ಗಂ ಗಹೇತಬ್ಬಂ. ಭಾಸಿತಮ್ಪೇತಂ, ಮಹಾರಾಜ, ಥೇರೇನ ಉಪಾಲಿನಾ ವಿನಯಧರೇನ –

‘‘‘ಖೇತ್ತೂಪಮೇನ ಭವಿತಬ್ಬಂ, ಉಟ್ಠಾನವಿಪುಲದಾಯಿನಾ;

ಏಸ ಖೇತ್ತವರೋ ನಾಮ, ಯೋ ದದಾತಿ ವಿಪುಲಂ ಫಲ’’’ನ್ತಿ.

ಖೇತ್ತಙ್ಗಪಞ್ಹೋ ಚತುತ್ಥೋ.

೫. ಅಗದಙ್ಗಪಞ್ಹೋ

೫. ‘‘ಭನ್ತೇ ನಾಗಸೇನ, ‘ಅಗದಸ್ಸ ದ್ವೇ ಅಙ್ಗಾನಿ ಗಹೇತಬ್ಬಾನೀ’ತಿ ಯಂ ವದೇಸಿ, ಕತಮಾನಿ ತಾನಿ ದ್ವೇ ಅಙ್ಗಾನಿ ಗಹೇತಬ್ಬಾನೀ’’ತಿ. ‘‘ಯಥಾ, ಮಹಾರಾಜ, ಅಗದೇ ಕಿಮೀ ನ ಸಣ್ಠಹನ್ತಿ, ಏವಮೇವ ಖೋ, ಮಹಾರಾಜ, ಯೋಗಿನಾ ಯೋಗಾವಚರೇನ ಮಾನಸೇ ಕಿಲೇಸಾ ನ ಸಣ್ಠಪೇತಬ್ಬಾ. ಇದಂ, ಮಹಾರಾಜ, ಅಗದಸ್ಸ ಪಠಮಂ ಅಙ್ಗಂ ಗಹೇತಬ್ಬಂ.

‘‘ಪುನ ಚಪರಂ, ಮಹಾರಾಜ, ಅಗದೋ ದಟ್ಠಫುಟ್ಠದಿಟ್ಠಅಸಿತಪೀತಖಾಯಿತಸಾಯಿತಂ ಸಬ್ಬಂ ವಿಸಂ ಪಟಿಹನತಿ, ಏವಮೇವ ಖೋ, ಮಹಾರಾಜ, ಯೋಗಿನಾ ಯೋಗಾವಚರೇನ ರಾಗದೋಸಮೋಹಮಾನದಿಟ್ಠಿವಿಸಂ ಸಬ್ಬಂ ಪಟಿಹನಿತಬ್ಬಂ. ಇದಂ, ಮಹಾರಾಜ, ಅಗದಸ್ಸ ದುತಿಯಂ ಅಙ್ಗಂ ಗಹೇತಬ್ಬಂ. ಭಾಸಿತಮ್ಪೇತಂ, ಮಹಾರಾಜ, ಭಗವತಾ ದೇವಾತಿದೇವೇನ –

‘‘‘ಸಙ್ಖಾರಾನಂ ಸಭಾವತ್ಥಂ, ದಟ್ಠುಕಾಮೇನ ಯೋಗಿನಾ;

ಅಗದೇನೇವ ಹೋತಬ್ಬಂ, ಕಿಲೇಸವಿಸನಾಸನೇ’’’ತಿ.

ಅಗದಙ್ಗಪಞ್ಹೋ ಪಞ್ಚಮೋ.

೬. ಭೋಜನಙ್ಗಪಞ್ಹೋ

೬. ‘‘ಭನ್ತೇ ನಾಗಸೇನ, ‘ಭೋಜನಸ್ಸ ತೀಣಿ ಅಙ್ಗಾನಿ ಗಹೇತಬ್ಬಾನೀ’ತಿ ಯಂ ವದೇಸಿ, ಕತಮಾನಿ ತಾನಿ ತೀಣಿ ಅಙ್ಗಾನಿ ಗಹೇತಬ್ಬಾನೀ’’ತಿ? ‘‘ಯಥಾ, ಮಹಾರಾಜ, ಭೋಜನಂ ಸಬ್ಬಸತ್ತಾನಂ ಉಪತ್ಥಮ್ಭೋ, ಏವಮೇವ ಖೋ, ಮಹಾರಾಜ, ಯೋಗಿನಾ ಯೋಗಾವಚರೇನ ಸಬ್ಬಸತ್ತಾನಂ ಮಗ್ಗುಪತ್ಥಮ್ಭೇನ ಭವಿತಬ್ಬಂ. ಇದಂ, ಮಹಾರಾಜ, ಭೋಜನಸ್ಸ ಪಠಮಂ ಅಙ್ಗಂ ಗಹೇತಬ್ಬಂ.

‘‘ಪುನ ಚಪರಂ, ಮಹಾರಾಜ, ಭೋಜನಂ ಸಬ್ಬಸತ್ತಾನಂ ಬಲಂ ವಡ್ಢೇತಿ, ಏವಮೇವ ಖೋ, ಮಹಾರಾಜ, ಯೋಗಿನಾ ಯೋಗಾವಚರೇನ ಪುಞ್ಞವಡ್ಢಿಯಾ ವಡ್ಢಿತಬ್ಬಂ. ಇದಂ, ಮಹಾರಾಜ, ಭೋಜನಸ್ಸ ದುತಿಯಂ ಅಙ್ಗಂ ಗಹೇತಬ್ಬಂ.

‘‘ಪುನ ಚಪರಂ, ಮಹಾರಾಜ, ಭೋಜನಂ ಸಬ್ಬಸತ್ತಾನಂ ಅಭಿಪತ್ಥಿತಂ, ಏವಮೇವ ಖೋ, ಮಹಾರಾಜ, ಯೋಗಿನಾ ಯೋಗಾವಚರೇನ ಸಬ್ಬಲೋಕಾಭಿಪತ್ಥಿತೇನ ಭವಿತಬ್ಬಂ. ಇದಂ, ಮಹಾರಾಜ, ಭೋಜನಸ್ಸ ತತಿಯಂ ಅಙ್ಗಂ ಗಹೇತಬ್ಬಂ. ಭಾಸಿತಮ್ಪೇತಂ, ಮಹಾರಾಜ, ಥೇರೇನ ಮಹಾಮೋಗ್ಗಲ್ಲಾನೇನ –

‘‘‘ಸಂಯಮೇನ ನಿಯಮೇನ, ಸೀಲೇನ ಪಟಿಪತ್ತಿಯಾ;

ಪತ್ಥಿತೇನ ಭವಿತಬ್ಬಂ, ಸಬ್ಬಲೋಕಸ್ಸ ಯೋಗಿನಾ’’’ತಿ.

ಭೋಜನಙ್ಗಪಞ್ಹೋ ಛಟ್ಠೋ.

೭. ಇಸ್ಸಾಸಙ್ಗಪಞ್ಹೋ

೭. ‘‘ಭನ್ತೇ ನಾಗಸೇನ, ‘ಇಸ್ಸಾಸಸ್ಸ ಚತ್ತಾರಿ ಅಙ್ಗಾನಿ ಗಹೇತಬ್ಬಾನೀ’ತಿ ಯಂ ವದೇಸಿ, ಕತಮಾನಿ ತಾನಿ ಚತ್ತಾರಿ ಅಙ್ಗಾನಿ ಗಹೇತಬ್ಬಾನೀ’’ತಿ? ‘‘ಯಥಾ, ಮಹಾರಾಜ, ಇಸ್ಸಾಸೋ ಸರೇ ಪಾತಯನ್ತೋ ಉಭೋ ಪಾದೇ ಪಥವಿಯಂ ದಳ್ಹಂ ಪತಿಟ್ಠಾಪೇತಿ, ಜಣ್ಣುಅವೇಕಲ್ಲಂ ಕರೋತಿ, ಸರಕಲಾಪಂ ಕಟಿಸನ್ಧಿಮ್ಹಿ ಠಪೇತಿ, ಕಾಯಂ ಉಪತ್ಥದ್ಧಂ ಕರೋತಿ, ದ್ವೇ ಹತ್ಥೇ ಸನ್ಧಿಟ್ಠಾನಂ ಆರೋಪೇತಿ, ಮುಟ್ಠಿಂ ಪೀಳಯತಿ, ಅಙ್ಗುಲಿಯೋ ನಿರನ್ತರಂ ಕರೋತಿ, ಗೀವಂ ಪಗ್ಗಣ್ಹಾತಿ, ಚಕ್ಖೂನಿ ಮುಖಞ್ಚ ಪಿದಹತಿ, ನಿಮಿತ್ತಂ ಉಜುಂ ಕರೋತಿ, ಹಾಸಮುಪ್ಪಾದೇತಿ ‘ವಿಜ್ಝಿಸ್ಸಾಮೀ’ತಿ, ಏವಮೇವ ಖೋ, ಮಹಾರಾಜ, ಯೋಗಿನಾ ಯೋಗಾವಚರೇನ ಸೀಲಪಥವಿಯಂ ವೀರಿಯಪಾದೇ ಪತಿಟ್ಠಾಪೇತಬ್ಬಂ, ಖನ್ತಿಸೋರಚ್ಚಂ ಅವೇಕಲ್ಲಂ ಕಾತಬ್ಬಂ, ಸಂವರೇ ಚಿತ್ತಂ ಠಪೇತಬ್ಬಂ, ಸಂಯಮನಿಯಮೇ ಅತ್ತಾ ಉಪನೇತಬ್ಬೋ, ಇಚ್ಛಾ ಮುಚ್ಛಾ ಪೀಳಯಿತಬ್ಬಾ, ಯೋನಿಸೋ ಮನಸಿಕಾರೇ ಚಿತ್ತಂ ನಿರನ್ತರಂ ಕಾತಬ್ಬಂ, ವೀರಿಯಂ ಪಗ್ಗಹೇತಬ್ಬಂ, ಛ ದ್ವಾರಾ ಪಿದಹಿತಬ್ಬಾ, ಸತಿ ಉಪಟ್ಠಪೇತಬ್ಬಾ, ಹಾಸಮುಪ್ಪಾದೇತಬ್ಬಂ ‘ಸಬ್ಬಕಿಲೇಸೇ ಞಾಣನಾರಾಚೇನ ವಿಜ್ಝಿಸ್ಸಾಮೀ’ತಿ. ಇದಂ, ಮಹಾರಾಜ, ಇಸ್ಸಾಸಸ್ಸ ಪಠಮಂ ಅಙ್ಗಂ ಗಹೇತಬ್ಬಂ.

‘‘ಪುನ ಚಪರಂ, ಮಹಾರಾಜ, ಇಸ್ಸಾಸೋ ಆಳಕಂ ಪರಿಹರತಿ ವಙ್ಕಜಿಮ್ಹಕುಟಿಲನಾರಾಚಸ್ಸ ಉಜುಕರಣಾಯ. ಏವಮೇವ ಖೋ, ಮಹಾರಾಜ, ಯೋಗಿನಾ ಯೋಗಾವಚರೇನ ಇಮಸ್ಮಿಂ ಕಾಯೇ ಸತಿಪಟ್ಠಾನಆಳಕಂ ಪರಿಹರಿತಬ್ಬಂ ವಙ್ಕಜಿಮ್ಹಕುಟಿಲಚಿತ್ತಸ್ಸ ಉಜುಕರಣಾಯ. ಇದಂ, ಮಹಾರಾಜ, ಇಸ್ಸಾಸಸ್ಸ ದುತಿಯಂ ಅಙ್ಗಂ ಗಹೇತಬ್ಬಂ.

‘‘ಪುನ ಚಪರಂ, ಮಹಾರಾಜ, ಇಸ್ಸಾಸೋ ಲಕ್ಖೇ ಉಪಾಸೇತಿ, ಏವಮೇವ ಖೋ, ಮಹಾರಾಜ, ಯೋಗಿನಾ ಯೋಗಾವಚರೇನ ಇಮಸ್ಮಿಂ ಕಾಯೇ ಉಪಾಸಿತಬ್ಬಂ. ಕಥಂ ಮಹಾರಾಜ ಯೋಗಿನಾ ಯೋಗಾವಚರೇನ ಇಮಸ್ಮಿಂ ಕಾಯೇ ಉಪಾಸಿತಬ್ಬಂ? ಅನಿಚ್ಚತೋ ಉಪಾಸಿತಬ್ಬಂ, ದುಕ್ಖತೋ ಉಪಾಸಿತಬ್ಬಂ, ಅನತ್ತತೋ ಉಪಾಸಿತಬ್ಬಂ, ರೋಗತೋ…ಪೇ… ಗಣ್ಡತೋ…ಪೇ… ಸಲ್ಲತೋ…ಪೇ… ಅಘತೋ…ಪೇ… ಆಬಾಧತೋ…ಪೇ… ಪರತೋ…ಪೇ… ಪಲೋಕತೋ…ಪೇ… ಈತಿತೋ…ಪೇ… ಉಪದ್ದವತೋ…ಪೇ… ಭಯತೋ…ಪೇ… ಉಪಸಗ್ಗತೋ…ಪೇ… ಚಲತೋ…ಪೇ… ಪಭಙ್ಗುತೋ…ಪೇ… ಅದ್ಧುವತೋ…ಪೇ… ಅತಾಣತೋ…ಪೇ… ಅಲೇಣತೋ…ಪೇ… ಅಸರಣತೋ…ಪೇ… ರಿತ್ತತೋ…ಪೇ… ತುಚ್ಛತೋ…ಪೇ… ಸುಞ್ಞತೋ…ಪೇ… ಆದೀನವತೋ…ಪೇ… ವಿಪರಿಣಾಮಧಮ್ಮತೋ…ಪೇ… ಅಸಾರತೋ …ಪೇ… ಅಘಮೂಲತೋ…ಪೇ… ವಧಕತೋ…ಪೇ… ವಿಭವತೋ…ಪೇ… ಸಾಸವತೋ…ಪೇ… ಸಙ್ಖತತೋ…ಪೇ… ಮಾರಾಮಿಸತೋ…ಪೇ… ಜಾತಿಧಮ್ಮತೋ…ಪೇ… ಜರಾಧಮ್ಮತೋ…ಪೇ… ಬ್ಯಾಧಿಧಮ್ಮತೋ…ಪೇ… ಮರಣಧಮ್ಮತೋ…ಪೇ… ಸೋಕಧಮ್ಮತೋ…ಪೇ… ಪರಿದೇವಧಮ್ಮತೋ…ಪೇ… ಉಪಾಯಾಸಧಮ್ಮತೋ…ಪೇ… ಸಂಕಿಲೇಸಧಮ್ಮತೋ…ಪೇ… ಏವಂ ಖೋ, ಮಹಾರಾಜ, ಯೋಗಿನಾ ಯೋಗಾವಚರೇನ ಇಮಸ್ಮಿಂ ಕಾಯೇ ಉಪಾಸಿತಬ್ಬಂ. ಇದಂ, ಮಹಾರಾಜ, ಇಸ್ಸಾಸಸ್ಸ ತತಿಯಂ ಅಙ್ಗಂ ಗಹೇತಬ್ಬಂ.

‘‘ಪುನ ಚಪರಂ, ಮಹಾರಾಜ, ಇಸ್ಸಾಸೋ ಸಾಯಂ ಪಾತಂ ಉಪಾಸತಿ. ಏವಮೇವ ಖೋ, ಮಹಾರಾಜ, ಯೋಗಿನಾ ಯೋಗಾವಚರೇನ ಸಾಯಂ ಪಾತಂ ಆರಮ್ಮಣೇ ಉಪಾಸಿತಬ್ಬಂ. ಇದಂ, ಮಹಾರಾಜ, ಇಸ್ಸಾಸಸ್ಸ ಚತುತ್ಥಂ ಅಙ್ಗಂ ಗಹೇತಬ್ಬಂ. ಭಾಸಿತಮ್ಪೇತಂ, ಮಹಾರಾಜ, ಥೇರೇನ ಸಾರಿಪುತ್ತೇನ ಧಮ್ಮಸೇನಾಪತಿನಾ –

‘‘‘ಯಥಾ ಇಸ್ಸಾಸಕೋ ನಾಮ, ಸಾಯಂ ಪಾತಂ ಉಪಾಸತಿ;

ಉಪಾಸನಂ ಅರಿಞ್ಚನ್ತೋ [ನ ರಿಚ್ಛನ್ತೋ (ಸೀ. ಕ.)], ಲಭತೇ ಭತ್ತವೇತನಂ.

‘‘‘ತಥೇವ ಬುದ್ಧಪುತ್ತೋಪಿ, ಕರೋತಿ ಕಾಯುಪಾಸನಂ;

ಕಾಯುಪಾಸನಂ ಅರಿಞ್ಚನ್ತೋ, ಅರಹತ್ತಮಧಿಗಚ್ಛತೀ’’’ತಿ.

ಇಸ್ಸಾಸಙ್ಗಪಞ್ಹೋ ಸತ್ತಮೋ.

ಕುಮ್ಭವಗ್ಗೋ ಸತ್ತಮೋ [ಇತೋ ಪರಂ ರಾಜಙ್ಗಪಞ್ಹಾದಿಕಾ ಅಟ್ಠತಿಂಸ ಪಞ್ಹಾ ವಿನಟ್ಠಾ, ಯೇಹಿ ತಾ ದಿಟ್ಠಾ,§ತೇಹಿ ನೋ ಆರೋಚೇತಬ್ಬಾ ಪುನ ಮುದ್ದಾಪನಕಾಲೇ ಪಕ್ಖಿಪನತ್ಥಾಯಾತಿ (ನ, ಬು, ಸ)].

ತಸ್ಸುದ್ದಾನಂ –

ಕುಮ್ಭೋ ಚ ಕಾಳಾಯಸೋ ಚ, ಛತ್ತಂ ಖೇತ್ತಞ್ಚ ಅಗದೋ;

ಭೋಜನೇನ ಚ ಇಸ್ಸಾಸೋ, ವುತ್ತಂ ದಾನಿ ವಿದೂಹೀತಿ.

ಓಪಮ್ಮಕಥಾಪಞ್ಹೋ ನಿಟ್ಠಿತೋ.