೬. ಮೇಘಙ್ಗಪಞ್ಹೋ

೬. ‘‘ಭನ್ತೇ ನಾಗಸೇನ, ‘ಮೇಘಸ್ಸ ಪಞ್ಚ ಅಙ್ಗಾನಿ ಗಹೇತಬ್ಬಾನೀ’ತಿ ಯಂ ವದೇಸಿ, ಕತಮಾನಿ ತಾನಿ ಪಞ್ಚ ಅಙ್ಗಾನಿ ಗಹೇತಬ್ಬಾನೀ’’ತಿ? ‘‘ಯಥಾ, ಮಹಾರಾಜ, ಮೇಘೋ ಉಪ್ಪನ್ನಂ ರಜೋಜಲ್ಲಂ ವೂಪಸಮೇತಿ, ಏವಮೇವ ಖೋ, ಮಹಾರಾಜ, ಯೋಗಿನಾ ಯೋಗಾವಚರೇನ ಉಪ್ಪನ್ನಂ ಕಿಲೇಸರಜೋಜಲ್ಲಂ ವೂಪಸಮೇತಬ್ಬಂ. ಇದಂ, ಮಹಾರಾಜ, ಮೇಘಸ್ಸ ಪಠಮಂ ಅಙ್ಗಂ ಗಹೇತಬ್ಬಂ.

‘‘ಪುನ ಚಪರಂ, ಮಹಾರಾಜ, ಮೇಘೋ ಪಥವಿಯಾ ಉಣ್ಹಂ ನಿಬ್ಬಾಪೇತಿ, ಏವಮೇವ ಖೋ, ಮಹಾರಾಜ, ಯೋಗಿನಾ ಯೋಗಾವಚರೇನ ಮೇತ್ತಾಭಾವನಾಯ ಸದೇವಕೋ ಲೋಕೋ ನಿಬ್ಬಾಪೇತಬ್ಬೋ. ಇದಂ, ಮಹಾರಾಜ, ಮೇಘಸ್ಸ ದುತಿಯಂ ಅಙ್ಗಂ ಗಹೇತಬ್ಬಂ.

‘‘ಪುನ ಚಪರಂ, ಮಹಾರಾಜ, ಮೇಘೋ ಸಬ್ಬಬೀಜಾನಿ ವಿರುಹಾಪೇತಿ, ಏವಮೇವ ಖೋ, ಮಹಾರಾಜ, ಯೋಗಿನಾ ಯೋಗಾವಚರೇನ ಸಬ್ಬಸತ್ತಾನಂ ಸದ್ಧಂ ಉಪ್ಪಾದೇತ್ವಾ ತಂ ಸದ್ಧಾಬೀಜಂ ತೀಸು ಸಮ್ಪತ್ತೀಸು ರೋಪೇತಬ್ಬಂ, ದಿಬ್ಬಮಾನುಸಿಕಾಸು ಸುಖಸಮ್ಪತ್ತೀಸು ಯಾವಪರಮತ್ಥನಿಬ್ಬಾನಸುಖಸಮ್ಪತ್ತಿ. ಇದಂ, ಮಹಾರಾಜ, ಮೇಘಸ್ಸ ತತಿಯಂ ಅಙ್ಗಂ ಗಹೇತಬ್ಬಂ.

‘‘ಪುನ ಚಪರಂ, ಮಹಾರಾಜ, ಮೇಘೋ ಉತುತೋ ಸಮುಟ್ಠಹಿತ್ವಾ ಧರಣಿತಲರುಹೇ ತಿಣರುಕ್ಖಲತಾಗುಮ್ಬಓಸಧಿವನಪ್ಪತಯೋ ಪರಿರಕ್ಖತಿ, ಏವಮೇವ ಖೋ, ಮಹಾರಾಜ, ಯೋಗಿನಾ ಯೋಗಾವಚರೇನ ಯೋನಿಸೋ ಮನಸಿಕಾರಂ ನಿಬ್ಬತ್ತೇತ್ವಾ ತೇನ ಯೋನಿಸೋ ಮನಸಿಕಾರೇನ ಸಮಣಧಮ್ಮೋ ಪರಿರಕ್ಖಿತಬ್ಬೋ, ಯೋನಿಸೋ ಮನಸಿಕಾರಮೂಲಕಾ ಸಬ್ಬೇ ಕುಸಲಾ ಧಮ್ಮಾ. ಇದಂ, ಮಹಾರಾಜ, ಮೇಘಸ್ಸ ಚತುತ್ಥಂ ಅಙ್ಗಂ ಗಹೇತಬ್ಬಂ.

‘‘ಪುನ ಚಪರಂ, ಮಹಾರಾಜ, ಮೇಘೋ ವಸ್ಸಮಾನೋ ನದಿತಳಾಕಪೋಕ್ಖರಣಿಯೋ ಕನ್ದರಪದರಸರಸೋಬ್ಭಉದಪಾನಾನಿ ಚ ಪರಿಪೂರೇತಿ ಉದಕಧಾರಾಹಿ, ಏವಮೇವ ಖೋ, ಮಹಾರಾಜ, ಯೋಗಿನಾ ಯೋಗಾವಚರೇನ ಆಗಮಪರಿಯತ್ತಿಯಾ ಧಮ್ಮಮೇಘಮಭಿವಸ್ಸಯಿತ್ವಾ ಅಧಿಗಮಕಾಮಾನಂ ಮಾನಸಂ ಪರಿಪೂರಯಿತಬ್ಬಂ. ಇದಂ, ಮಹಾರಾಜ, ಮೇಘಸ್ಸ ಪಞ್ಚಮಂ ಅಙ್ಗಂ ಗಹೇತಬ್ಬಂ. ಭಾಸಿತಮ್ಪೇತಂ, ಮಹಾರಾಜ, ಥೇರೇನ ಸಾರಿಪುತ್ತೇನ ಧಮ್ಮಸೇನಾಪತಿನಾ –

‘‘‘ಬೋಧನೇಯ್ಯಂ ಜನಂ ದಿಸ್ವಾ, ಸತಸಹಸ್ಸೇಪಿ ಯೋಜನೇ;

ಖಣೇನ ಉಪಗನ್ತ್ವಾನ, ಬೋಧೇತಿ ತಂ ಮಹಾಮುನೀ’’’ತಿ.

ಮೇಘಙ್ಗಪಞ್ಹೋ ಛಟ್ಠೋ.