೭. ವಂಸಙ್ಗಪಞ್ಹೋ

೭. ‘‘ಭನ್ತೇ ನಾಗಸೇನ, ‘ವಂಸಸ್ಸ ಏಕಂ ಅಙ್ಗಂ ಗಹೇತಬ್ಬ’ನ್ತಿ ಯಂ ವದೇಸಿ, ಕತಮಂ ತಂ ಏಕಂ ಅಙ್ಗಂ ಗಹೇತಬ್ಬ’’ನ್ತಿ? ‘‘ಯಥಾ, ಮಹಾರಾಜ, ವಂಸೋ ಯತ್ಥ ವಾತೋ, ತತ್ಥ ಅನುಲೋಮೇತಿ, ನಾಞ್ಞತ್ಥಮನುಧಾವತಿ, ಏವಮೇವ ಖೋ, ಮಹಾರಾಜ, ಯೋಗಿನಾ ಯೋಗಾವಚರೇನ ಯಂ ಬುದ್ಧೇನ ಭಗವತಾ ಭಾಸಿತಂ ನವಙ್ಗಂ ಸತ್ಥು ಸಾಸನಂ, ತಂ ಅನುಲೋಮಯಿತ್ವಾ ಕಪ್ಪಿಯೇ ಅನವಜ್ಜೇ ಠತ್ವಾ ಸಮಣಧಮ್ಮಂ ಯೇವ ಪರಿಯೇಸಿತಬ್ಬಂ. ಇದಂ, ಮಹಾರಾಜ, ವಂಸಸ್ಸ ಏಕಂ ಅಙ್ಗಂ ಗಹೇತಬ್ಬಂ. ಭಾಸಿತಮ್ಪೇತಂ ಮಹಾರಾಜ ಥೇರೇನ ರಾಹುಲೇನ –

‘‘‘ನವಙ್ಗಂ ಬುದ್ಧವಚನಂ, ಅನುಲೋಮೇತ್ವಾನ ಸಬ್ಬದಾ;

ಕಪ್ಪಿಯೇ ಅನವಜ್ಜಸ್ಮಿಂ, ಠತ್ವಾಪಾಯಂ ಸಮುತ್ತರಿ’’’ನ್ತಿ.

ವಂಸಙ್ಗಪಞ್ಹೋ ಸತ್ತಮೋ.