೮. ಚಾಪಙ್ಗಪಞ್ಹೋ

೮. ‘‘ಭನ್ತೇ ನಾಗಸೇನ, ‘ಚಾಪಸ್ಸ ಏಕಂ ಅಙ್ಗಂ ಗಹೇತಬ್ಬ’ನ್ತಿ ಯಂ ವದೇಸಿ, ಕತಮಂ ತಂ ಏಕಂ ಅಙ್ಗಂ ಗಹೇತಬ್ಬ’’ನ್ತಿ? ‘‘ಯಥಾ, ಮಹಾರಾಜ, ಚಾಪೋ ಸುತಚ್ಛಿತೋ ನಮಿತೋ [ಮಿತೋ (ಸೀ. ಪೀ. ಕ.)] ಯಾವಗ್ಗಮೂಲಂ ಸಮಕಮೇವ ಅನುನಮತಿ ನಪ್ಪಟಿತ್ಥಮ್ಭತಿ, ಏವಮೇವ ಖೋ, ಮಹಾರಾಜ, ಯೋಗಿನಾ ಯೋಗಾವಚರೇನ ಥೇರನವಮಜ್ಝಿಮಸಮಕೇಸು ಅನುನಮಿತಬ್ಬಂ ನಪ್ಪಟಿಫರಿತಬ್ಬಂ. ಇದಂ, ಮಹಾರಾಜ, ಚಾಪಸ್ಸ ಏಕಂ ಅಙ್ಗಂ ಗಹೇತಬ್ಬಂ. ಭಾಸಿತಮ್ಪೇತಂ, ಮಹಾರಾಜ, ಭಗವತಾ ದೇವಾತಿದೇವೇನ ವಿಧುರ [ಪುಣ್ಣಕ] ಜಾತಕೇ –

‘‘‘ಚಾಪೋವೂನುದರೋ ಧೀರೋ, ವಂಸೋ ವಾಪಿ ಪಕಮ್ಪಯೇ [ಚಾಪೋ ವಾ ನುನ ಮೇ ಧೀರೋ, ವಂಸೋವ ಅನುಲೋಮಯಂ (ಸೀ. ಪೀ. ಕ.)];

ಪಟಿಲೋಮಂ ನ ವತ್ತೇಯ್ಯ, ಸ ರಾಜವಸತಿಂ ವಸೇ’’’ತಿ.

ಚಾಪಙ್ಗಪಞ್ಹೋ ಅಟ್ಠಮೋ.