೩. ಕುಸಲಾಕುಸಲಬಲವತರಪಞ್ಹೋ

೩. ‘‘ಭನ್ತೇ ನಾಗಸೇನ, ಕತಮಂ ಅಧಿಮತ್ತಂ ಬಲವತರಂ ಕುಸಲಂ ವಾ ಅಕುಸಲಂ ವಾ’’ತಿ? ‘‘ಕುಸಲಂ, ಮಹಾರಾಜ, ಅಧಿಮತ್ತಂ ಬಲವತರಂ, ನೋ ತಥಾ ಅಕುಸಲ’ನ್ತಿ. ‘‘ನಾಹಂ, ಭನ್ತೇ ನಾಗಸೇನ, ತಂ ವಚನಂ ಸಮ್ಪಟಿಚ್ಛಾಮಿ ‘ಕುಸಲಂ ಅಧಿಮತ್ತಂ ಬಲವತರಂ, ನೋ ತಥಾ ಅಕುಸಲ’ನ್ತಿ, ದಿಸ್ಸನ್ತಿ, ಭನ್ತೇ ನಾಗಸೇನ, ಇಧ ಪಾಣಾತಿಪಾತಿನೋ ಅದಿನ್ನಾದಾಯಿನೋ ಕಾಮೇಸುಮಿಚ್ಛಾಚಾರಿನೋ ಮುಸಾವಾದಿನೋ ಗಾಮಘಾತಿಕಾ ಪನ್ಥದೂಸಕಾ ನೇಕತಿಕಾ ವಞ್ಚನಿಕಾ, ಸಬ್ಬೇ ತೇ ತಾವತಕೇನ ಪಾಪೇನ ಲಭನ್ತಿ ಹತ್ಥಚ್ಛೇದಂ ಪಾದಚ್ಛೇದಂ ಹತ್ಥಪಾದಚ್ಛೇದಂ ಕಣ್ಣಚ್ಛೇದಂ ನಾಸಚ್ಛೇದಂ ಕಣ್ಣನಾಸಚ್ಛೇದಂ ಬಿಲಙ್ಗಥಾಲಿಕಂ ಸಙ್ಖಮುಣ್ಡಿಕಂ ರಾಹುಮುಖಂ ಜೋತಿಮಾಲಿಕಂ ಹತ್ಥಪಜ್ಜೋತಿಕಂ ಏರಕವತ್ತಿಕಂ ಚೀರಕವಾಸಿಕಂ ಏಣೇಯ್ಯಕಂ ಬಳಿಸಮಂಸಿಕಂ ಕಹಾಪಣಿಕಂ ಖಾರಾಪತಚ್ಛಿಕಂ ಪಲಿಘಪರಿವತ್ತಿಕಂ ಪಲಾಲಪೀಠಕಂ ತತ್ತೇನಪಿ ತೇಲೇನ ಓಸಿಞ್ಚನಂ ಸುನಖೇಹಿಪಿ ಖಾದಾಪನಂ ಜೀವಸೂಲಾರೋಪನಂ ಅಸಿನಾಪಿ ಸೀಸಚ್ಛೇದಂ, ಕೇಚಿ ರತ್ತಿಂ ಪಾಪಂ ಕತ್ವಾ ರತ್ತಿಂ ಯೇವ ವಿಪಾಕಂ ಅನುಭವನ್ತಿ, ಕೇಚಿ ರತ್ತಿಂ ಕತ್ವಾ ದಿವಾ ಯೇವ ಅನುಭವನ್ತಿ, ಕೇಚಿ ದಿವಾ ಕತ್ವಾ ದಿವಾ ಯೇವ ಅನುಭವನ್ತಿ, ಕೇಚಿ ದಿವಾ ಕತ್ವಾ ರತ್ತಿಂ ಯೇವ ಅನುಭವನ್ತಿ, ಕೇಚಿ ದ್ವೇ ತಯೋ ದಿವಸೇ ವೀತಿವತ್ತೇ ಅನುಭವನ್ತಿ, ಸಬ್ಬೇಪಿ ತೇ ದಿಟ್ಠೇವ ಧಮ್ಮೇ ವಿಪಾಕಂ ಅನುಭವನ್ತಿ. ಅತ್ಥಿ ಪನ, ಭನ್ತೇ ನಾಗಸೇನ, ಕೋಚಿ ಏಕಸ್ಸ ವಾ ದ್ವಿನ್ನಂ ವಾ ತಿಣ್ಣಂ ವಾ ಚತುನ್ನಂ ವಾ ಪಞ್ಚನ್ನಂ ವಾ ದಸನ್ನಂ ವಾ ಸತಸ್ಸ ವಾ ಸಹಸ್ಸಸ್ಸ ವಾ ಸತಸಹಸ್ಸಸ್ಸ ವಾ ಸಪರಿವಾರಂ ದಾನಂ ದತ್ವಾ ದಿಟ್ಠಧಮ್ಮಿಕಂ ಭೋಗಂ ವಾ ಯಸಂ ವಾ ಸುಖಂ ವಾ ಅನುಭವಿತಾ ಸೀಲೇನ ವಾ ಉಪೋಸಥಕಮ್ಮೇನ ವಾ’’ತಿ?

‘‘ಅತ್ಥಿ, ಮಹಾರಾಜ, ಚತ್ತಾರೋ ಪುರಿಸಾ ದಾನಂ ದತ್ವಾ ಸೀಲಂ ಸಮಾದಿಯಿತ್ವಾ ಉಪೋಸಥಕಮ್ಮಂ ಕತ್ವಾ ದಿಟ್ಠೇವ ಧಮ್ಮೇ ತೇನೇವ ಸರೀರದೇಹೇನ ತಿದಸಪುರೇ ಸಮನುಪ್ಪತ್ತಾ’’ತಿ [ಯಸಮನುಪತ್ತಾತಿ (ಸೀ. ಪೀ.)]. ‘‘ಕೋ ಚ ಕೋ ಚ ಭನ್ತೇ’’ತಿ? ‘‘ಮನ್ಧಾತಾ, ಮಹಾರಾಜ, ರಾಜಾ, ನಿಮಿ ರಾಜಾ, ಸಾಧೀನೋ ರಾಜಾ, ಗುತ್ತಿಲೋ ಚ ಗನ್ಧಬ್ಬೋ’’ತಿ.

‘‘ಭನ್ತೇ ನಾಗಸೇನ, ಅನೇಕೇಹಿ ತಂ ಭವಸಹಸ್ಸೇಹಿ ಅನ್ತರಿತಂ, ದ್ವಿನ್ನಮ್ಪೇತಂ ಅಮ್ಹಾಕಂ [ದೀಪಿತಂ, ಅಮ್ಹಾಕಮ್ಪೇತಂ (ಕ.)] ಪರೋಕ್ಖಂ, ಯದಿ ಸಮತ್ಥೋಸಿ ವತ್ತಮಾನಕೇ ಭವೇ ಭಗವತೋ ಧರಮಾನಕಾಲೇ ಕಥೇಹೀ’’ತಿ? ‘‘ವತ್ತಮಾನಕೇಪಿ, ಮಹಾರಾಜ, ಭವೇ ಪುಣ್ಣಕೋ ದಾಸೋ ಥೇರಸ್ಸ ಸಾರಿಪುತ್ತಸ್ಸ ಭೋಜನಂ ದತ್ವಾ ತದಹೇವ ಸೇಟ್ಠಿಟ್ಠಾನಂ ಅಜ್ಝುಪಗತೋ, ಸೋ ಏತರಹಿ ಪುಣ್ಣಕೋ ಸೇಟ್ಠೀತಿ ಪಞ್ಞಾಯಿ, ಗೋಪಾಲಮಾತಾ ದೇವೀ ಅತ್ತನೋ ಕೇಸೇ ವಿಕ್ಕಿಣಿತ್ವಾ ಲದ್ಧೇಹಿ ಅಟ್ಠಹಿ ಕಹಾಪಣೇಹಿ ಥೇರಸ್ಸ ಮಹಾಕಚ್ಚಾಯನಸ್ಸ ಅತ್ತಟ್ಠಮಕಸ್ಸ ಪಿಣ್ಡಪಾತಂ ದತ್ವಾ ತದಹೇವ ರಞ್ಞೋ ಚನ್ದಪಜ್ಜೋತಸ್ಸ [ಉದೇನಸ್ಸ (ಸೀ. ಪೀ.)] ಅಗ್ಗಮಹೇಸಿಟ್ಠಾನಂ ಪತ್ತಾ. ಸುಪ್ಪಿಯಾ ಉಪಾಸಿಕಾ ಅಞ್ಞತರಸ್ಸ ಗಿಲಾನಭಿಕ್ಖುನೋ ಅತ್ತನೋ ಊರುಮಂಸೇನ ಪಟಿಚ್ಛಾದನೀಯಂ ದತ್ವಾ ದುತಿಯದಿವಸೇ ಯೇವ ರೂಳ್ಹವಣಾ ಸಞ್ಛವೀ [ಸಚ್ಛವೀ (ಸೀ. ಪೀ.)] ಅರೋಗಾ ಜಾತಾ. ಮಲ್ಲಿಕಾ ದೇವೀ ಭಗವತೋ ಆಭಿದೋಸಿಕಂ ಕುಮ್ಮಾಸಪಿಣ್ಡಂ ದತ್ವಾ ತದಹೇವ ರಞ್ಞೋ ಕೋಸಲಸ್ಸ ಅಗ್ಗಮಹೇಸೀ ಜಾತಾ. ಸುಮನೋ ಮಾಲಾಕಾರೋ ಅಟ್ಠಹಿ ಸುಮನಪುಪ್ಫಮುಟ್ಠೀಹಿ ಭಗವನ್ತಂ ಪೂಜೇತ್ವಾ ತಂ ದಿವಸಂ ಯೇವ ಮಹಾಸಮ್ಪತ್ತಿಂ ಪತ್ತೋ. ಏಕಸಾಟಕೋ ಬ್ರಾಹ್ಮಣೋ ಉತ್ತರಸಾಟಕೇನ ಭಗವನ್ತಂ ಪೂಜೇತ್ವಾ ತಂ ದಿವಸಂ ಯೇವ ಸಬ್ಬಟ್ಠಕಂ ಲಭಿ, ಸಬ್ಬೇಪೇತೇ, ಮಹಾರಾಜ, ದಿಟ್ಠಧಮ್ಮಿಕಂ ಭೋಗಞ್ಚ ಯಸಞ್ಚ ಅನುಭವಿಂಸೂ’’ತಿ.

‘‘ಭನ್ತೇ ನಾಗಸೇನ, ವಿಚಿನಿತ್ವಾ ಪರಿಯೇಸಿತ್ವಾ ಛ ಜನೇ ಯೇವ ಅದ್ದಸಾಸೀ’’ತಿ. ‘‘ಆಮ, ಮಹಾರಾಜಾ’’ತಿ. ‘‘ತೇನ ಹಿ, ಭನ್ತೇ ನಾಗಸೇನ, ಅಕುಸಲಂ ಯೇವ ಅಧಿಮತ್ತಂ ಬಲವತರಂ, ನೋ ತಥಾ ಕುಸಲಂ. ಅಹಞ್ಹಿ, ಭನ್ತೇ ನಾಗಸೇನ, ಏಕದಿವಸಂ ಯೇವ ದಸಪಿ ಪುರಿಸೇ ಪಸ್ಸಾಮಿ ಪಾಪಸ್ಸ ಕಮ್ಮಸ್ಸ ವಿಪಾಕೇನ ಸೂಲೇಸು ಆರೋಪೇನ್ತೇ, ವೀಸಮ್ಪಿ ತಿಂಸಮ್ಪಿ ಚತ್ತಾಲೀಸಮ್ಪಿ ಪಞ್ಞಾಸಮ್ಪಿ ಪುರಿಸಸತಮ್ಪಿ ಪುರಿಸಸಹಸ್ಸಮ್ಪಿ ಪಸ್ಸಾಮಿ ಪಾಪಸ್ಸ ಕಮ್ಮಸ್ಸ ವಿಪಾಕೇನ ಸೂಲೇಸು ಆರೋಪೇನ್ತೇ. ನನ್ದಕುಲಸ್ಸ, ಭನ್ತೇ ನಾಗಸೇನ, ಭದ್ದಸಾಲೋ ನಾಮ ಸೇನಾಪತಿಪುತ್ತೋ ಅಹೋಸಿ. ತೇನ ಚ ರಞ್ಞಾ ಚನ್ದಗುತ್ತೇನ ಸಙ್ಗಾಮೋ ಸಮುಪಬ್ಯೂಳ್ಹೋ ಅಹೋಸಿ. ತಸ್ಮಿಂ ಖೋ ಪನ, ಭನ್ತೇ ನಾಗಸೇನ, ಸಙ್ಗಾಮೇ ಉಭತೋ ಬಲಕಾಯೇ ಅಸೀತಿಕಬನ್ಧರೂಪಾನಿ ಅಹೇಸುಂ, ಏಕಸ್ಮಿಂ ಕಿರ ಸೀಸಕಬನ್ಧೇ ಪರಿಪಾತೇ [ಪರಿಪುಣ್ಣೇ (ಸಬ್ಬತ್ಥ)] ಏಕಂ ಕಬನ್ಧರೂಪಂ ಉಟ್ಠಹತಿ, ಸಬ್ಬೇಪೇತೇ ಪಾಪಸ್ಸೇವ ಕಮ್ಮಸ್ಸ ವಿಪಾಕೇನ ಅನಯಬ್ಯಸನಂ ಆಪನ್ನಾ. ಇಮಿನಾಪಿ, ಭನ್ತೇ ನಾಗಸೇನ, ಕಾರಣೇನ ಭಣಾಮಿ ಅಕುಸಲಂ ಯೇವ ಅಧಿಮತ್ತಂ ಬಲವತರಂ, ನೋ ತಥಾ ಕುಸಲ’’ನ್ತಿ.

‘‘ಸುಯ್ಯತಿ, ಭನ್ತೇ ನಾಗಸೇನ, ಇಮಸ್ಮಿಂ ಬುದ್ಧಸಾಸನೇ ಕೋಸಲೇನ ರಞ್ಞಾ ಅಸದಿಸದಾನಂ ದಿನ್ನ’’ನ್ತಿ? ‘‘ಆಮ, ಮಹಾರಾಜ, ಸುಯ್ಯತೀ’’ತಿ. ‘‘ಅಪಿ ನು ಖೋ, ಭನ್ತೇ ನಾಗಸೇನ, ಕೋಸಲರಾಜಾ ತಂ ಅಸದಿಸಂ ದಾನಂ ದತ್ವಾ ತತೋನಿದಾನಂ ಕಞ್ಚಿ ದಿಟ್ಠಧಮ್ಮಿಕಂ ಭೋಗಂ ವಾ ಯಸಂ ವಾ ಸುಖಂ ವಾ ಪಟಿಲಭೀ’’ತಿ [ಪಟಿಲಭತೀತಿ (ಕ.)]? ‘‘ನ ಹಿ, ಮಹಾರಾಜಾ’’ತಿ. ‘‘ಯದಿ, ಭನ್ತೇ ನಾಗಸೇನ, ಕೋಸಲರಾಜಾ ಏವರೂಪಂ ಅನುತ್ತರಂ ದಾನಂ ದತ್ವಾಪಿ ನ ಲಭಿ [ನ ಲಭತಿ (ಕ.)] ತತೋನಿದಾನಂ ಕಞ್ಚಿ ದಿಟ್ಠಧಮ್ಮಿಕಂ ಭೋಗಂ ವಾ ಯಸಂ ವಾ ಸುಖಂ ವಾ, ತೇನ ಹಿ, ಭನ್ತೇ ನಾಗಸೇನ, ಅಕುಸಲಂ ಯೇವ ಅಧಿಮತ್ತಂ ಬಲವತರಂ, ನೋ ತಥಾ ಕುಸಲ’’ನ್ತಿ.

‘‘ಪರಿತ್ತತ್ತಾ, ಮಹಾರಾಜ, ಅಕುಸಲಂ ಖಿಪ್ಪಂ ಪರಿಣಮತಿ, ವಿಪುಲತ್ತಾ ಕುಸಲಂ ದೀಘೇನ ಕಾಲೇನ ಪರಿಣಮತಿ, ಉಪಮಾಯಪಿ, ಮಹಾರಾಜ, ಏತಂ ಉಪಪರಿಕ್ಖಿತಬ್ಬಂ. ಯಥಾ, ಮಹಾರಾಜ, ಅಪರನ್ತೇ ಜನಪದೇ ಕುಮುದಭಣ್ಡಿಕಾ ನಾಮ ಧಞ್ಞಜಾತಿ ಮಾಸಲೂನಾ [ಮಾಸಪೂರಾ (ಕ.)] ಅನ್ತೋಗೇಹಗತಾ ಹೋತಿ, ಸಾಲಯೋ ಛಪ್ಪಞ್ಚಮಾಸೇಹಿ ಪರಿಣಮನ್ತಿ, ಕಿಂ ಪನೇತ್ಥ, ಮಹಾರಾಜ, ಅನ್ತರಂ ಕೋ ವಿಸೇಸೋ ಕುಮುದಭಣ್ಡಿಕಾಯ ಚ ಸಾಲೀನಞ್ಚಾ’’ತಿ? ‘‘ಪರಿತ್ತತ್ತಾ, ಭನ್ತೇ, ಕುಮುದಭಣ್ಡಿಕಾಯ, ವಿಪುಲತ್ತಾ ಚ ಸಾಲೀನಂ. ಸಾಲಯೋ, ಭನ್ತೇ ನಾಗಸೇನ, ರಾಜಾರಹಾ ರಾಜಭೋಜನಂ, ಕುಮುದಭಣ್ಡಿಕಾ ದಾಸಕಮ್ಮಕರಾನಂ ಭೋಜನ’’ನ್ತಿ. ‘‘ಏವಮೇವ ಖೋ, ಮಹಾರಾಜ, ಪರಿತ್ತತ್ತಾ ಅಕುಸಲಂ ಖಿಪ್ಪಂ ಪರಿಣಮತಿ, ವಿಪುಲತ್ತಾ ಕುಸಲಂ ದೀಘೇನ ಕಾಲೇನ ಪರಿಣಮತೀ’’ತಿ.

‘‘ಯಂ ತತ್ಥ, ಭನ್ತೇ ನಾಗಸೇನ, ಖಿಪ್ಪಂ ಪರಿಣಮತಿ, ತಂ ನಾಮ ಲೋಕೇ ಅಧಿಮತ್ತಂ ಬಲವತರಂ, ತಸ್ಮಾ ಅಕುಸಲಂ ಬಲವತರಂ, ನೋ ತಥಾ ಕುಸಲಂ. ಯಥಾ ನಾಮ, ಭನ್ತೇ ನಾಗಸೇನ, ಯೋ ಕೋಚಿ ಯೋಧೋ ಮಹತಿಮಹಾಯುದ್ಧಂ ಪವಿಸಿತ್ವಾ ಪಟಿಸತ್ತುಂ ಉಪಕಚ್ಛಕೇ ಗಹೇತ್ವಾ ಆಕಡ್ಢಿತ್ವಾ ಖಿಪ್ಪತರಂ ಸಾಮಿನೋ ಉಪನೇಯ್ಯ, ಸೋ ಯೋಧೋ ಲೋಕೇ ಸಮತ್ಥೋ ಸೂರೋ ನಾಮ. ಯೋ ಚ ಭಿಸಕ್ಕೋ ಖಿಪ್ಪಂ ಸಲ್ಲಂ ಉದ್ಧರತಿ ರೋಗಮಪನೇತಿ, ಸೋ ಭಿಸಕ್ಕೋ ಛೇಕೋ ನಾಮ. ಯೋ ಗಣಕೋ ಸೀಘಸೀಘಂ ಗಣೇತ್ವಾ ಖಿಪ್ಪಂ ದಸ್ಸಯತಿ, ಸೋ ಗಣಕೋ ಛೇಕೋ ನಾಮ. ಯೋ ಮಲ್ಲೋ ಖಿಪ್ಪಂ ಪಟಿಮಲ್ಲಂ ಉಕ್ಖಿಪಿತ್ವಾ ಉತ್ತಾನಕಂ ಪಾತೇತಿ, ಸೋ ಮಲ್ಲೋ ಸಮತ್ಥೋ ಸೂರೋ ನಾಮ. ಏವಮೇವ ಖೋ, ಭನ್ತೇ ನಾಗಸೇನ, ಯಂ ಖಿಪ್ಪಂ ಪರಿಣಮತಿ ಕುಸಲಂ ವಾ ಅಕುಸಲಂ ವಾ, ತಂ ಲೋಕೇ ಅಧಿಮತ್ತಂ ಬಲವತರ’’ನ್ತಿ.

‘‘ಉಭಯಮ್ಪಿ ತಂ, ಮಹಾರಾಜ, ಕಮ್ಮಂ ಸಮ್ಪರಾಯವೇದನೀಯಮೇವ, ಅಪಿ ಚ ಖೋ ಅಕುಸಲಂ ಸಾವಜ್ಜತಾಯ ಖಣೇನ ದಿಟ್ಠಧಮ್ಮವೇದನೀಯಂ ಹೋತಿ, ಪುಬ್ಬಕೇಹಿ, ಮಹಾರಾಜ, ಖತ್ತಿಯೇಹಿ ಠಪಿತೋ ಏಸೋ ನಿಯಮೋ ‘ಯೋ ಪಾಣಂ ಹನತಿ, ಸೋ ದಣ್ಡಾರಹೋ…ಪೇ… ಯೋ ಅದಿನ್ನಂ ಆದಿಯತಿ…ಪೇ… ಯೋ ಪರದಾರಂ ಗಚ್ಛತಿ…ಪೇ… ಯೋ ಮುಸಾ ಭಣತಿ…ಪೇ… ಯೋ ಗಾಮಂ ಘಾತೇತಿ…ಪೇ… ಯೋ ಪನ್ಥಂ ದೂಸೇತಿ…ಪೇ… ಯೋ ನಿಕತಿಂ ಕರೋತಿ…ಪೇ… ಯೋ ವಞ್ಚನಂ ಕರೋತಿ, ಸೋ ದಣ್ಡಾರಹೋ ವಧಿತಬ್ಬೋ ಛೇತ್ತಬ್ಬೋ ಭೇತ್ತಬ್ಬೋ ಹನ್ತಬ್ಬೋ’ತಿ. ತಂ ತೇ ಉಪಾದಾಯ ವಿಚಿನಿತ್ವಾ ವಿಚಿನಿತ್ವಾ ದಣ್ಡೇನ್ತಿ ವಧೇನ್ತಿ ಛಿನ್ದನ್ತಿ ಭಿನ್ದನ್ತಿ ಹನನ್ತಿ ಚ, ಅಪಿ ನು, ಮಹಾರಾಜ, ಅತ್ಥಿ ಕೇಹಿಚಿ ಠಪಿತೋ ನಿಯಮೋ ‘ಯೋ ದಾನಂ ವಾ ದೇತಿ, ಸೀಲಂ ವಾ ರಕ್ಖತಿ, ಉಪೋಸಥಕಮ್ಮಂ ವಾ ಕರೋತಿ, ತಸ್ಸ ಧನಂ ವಾ ಯಸಂ ವಾ ದಾತಬ್ಬ’ನ್ತಿ; ಅಪಿ ನು ತಂ ವಿಚಿನಿತ್ವಾ ವಿಚಿನಿತ್ವಾ ಧನಂ ವಾ ಯಸಂ ವಾ ದೇನ್ತಿ, ಚೋರಸ್ಸ ಕತಕಮ್ಮಸ್ಸ ವಧಬನ್ಧನಂ ವಿಯಾ’’ತಿ? ‘‘ನ ಹಿ, ಭನ್ತೇ’’ತಿ. ‘‘ಯದಿ, ಮಹಾರಾಜ, ದಾಯಕಾನಂ ವಿಚಿನಿತ್ವಾ ವಿಚಿನಿತ್ವಾ ಧನಂ ವಾ ಯಸಂ ವಾ ದದೇಯ್ಯುಂ, ಕುಸಲಮ್ಪಿ ದಿಟ್ಠಧಮ್ಮವೇದನೀಯಂ ಭವೇಯ್ಯ, ಯಸ್ಮಾ ಚ ಖೋ, ಮಹಾರಾಜ, ದಾಯಕೇ ನ ವಿಚಿನನ್ತಿ ‘ಧನಂ ವಾ ಯಸಂ ವಾ ದಸ್ಸಾಮಾ’ತಿ, ತಸ್ಮಾ ಕುಸಲಂ ನ ದಿಟ್ಠಧಮ್ಮವೇದನೀಯಂ. ಇಮಿನಾ, ಮಹಾರಾಜ, ಕಾರಣೇನ ಅಕುಸಲಂ ದಿಟ್ಠಧಮ್ಮವೇದನೀಯಂ, ಸಮ್ಪರಾಯೇವ ಸೋ ಅಧಿಮತ್ತಂ ಬಲವತರಂ ವೇದನಂ ವೇದಯತೀ’’ತಿ. ‘‘ಸಾಧು, ಭನ್ತೇ ನಾಗಸೇನ, ತವಾದಿಸೇನ ಬುದ್ಧಿಮನ್ತೇನ ವಿನಾ ನೇಸೋ ಪಞ್ಹೋ ಸುನಿಬ್ಬೇಠಿಯೋ, ಲೋಕಿಕಂ, ಭನ್ತೇ ನಾಗಸೇನ, ಲೋಕುತ್ತರೇನ ವಿಞ್ಞಾಪಿತ’’ನ್ತಿ.

ಕುಸಲಾಕುಸಲಬಲವತರಪಞ್ಹೋ ತತಿಯೋ.