೪೩೮. ದದ್ದರಜಾತಕಂ (೧೨)

೧೦೫. ಯೋ ತೇ ಪುತ್ತಕೇ ಅಖಾದಿ, ದಿನ್ನಭತ್ತೋ ಅದೂಸಕೇ;

ತಸ್ಮಿಂ ದಾಠಂ ನಿಪಾತೇಹಿ, ಮಾ ತೇ ಮುಚ್ಚಿತ್ಥ ಜೀವತೋ.

೧೦೬. ಆಕಿಣ್ಣಲುದ್ದೋ ಪುರಿಸೋ, ಧಾತಿಚೇಲಂವ ಮಕ್ಖಿತೋ;

ಪದೇಸಂ ತಂ ನ ಪಸ್ಸಾಮಿ, ಯತ್ಥ ದಾಠಂ ನಿಪಾತಯೇ.

೧೦೭. ಅಕತಞ್ಞುಸ್ಸ ಪೋಸಸ್ಸ, ನಿಚ್ಚಂ ವಿವರದಸ್ಸಿನೋ;

ಸಬ್ಬಂ ಚೇ ಪಥವಿಂ ದಜ್ಜಾ, ನೇವ ನಂ ಅಭಿರಾಧಯೇ.

೧೦೮. ಕಿನ್ನು ಸುಬಾಹು ತರಮಾನರೂಪೋ, ಪಚ್ಚಾಗತೋಸಿ ಸಹ ಮಾಣವೇನ;

ಕಿಂ ಕಿಚ್ಚಮತ್ಥಂ ಇಧಮತ್ಥಿ ತುಯ್ಹಂ, ಅಕ್ಖಾಹಿ ಮೇ ಪುಚ್ಛಿತೋ ಏತಮತ್ಥಂ.

೧೦೯. ಯೋ ತೇ ಸಖಾ ದದ್ದರೋ ಸಾಧುರೂಪೋ, ತಸ್ಸ ವಧಂ ಪರಿಸಙ್ಕಾಮಿ ಅಜ್ಜ;

ಪುರಿಸಸ್ಸ ಕಮ್ಮಾಯತನಾನಿ ಸುತ್ವಾ, ನಾಹಂ ಸುಖಿಂ ದದ್ದರಂ ಅಜ್ಜ ಮಞ್ಞೇ.

೧೧೦. ಕಾನಿಸ್ಸ ಕಮ್ಮಾಯತನಾನಿ ಅಸ್ಸು, ಪುರಿಸಸ್ಸ ವುತ್ತಿಸಮೋಧಾನತಾಯ;

ಕಂ ವಾ ಪಟಿಞ್ಞಂ ಪುರಿಸಸ್ಸ ಸುತ್ವಾ, ಪರಿಸಙ್ಕಸಿ ದದ್ದರಂ ಮಾಣವೇನ.

೧೧೧. ಚಿಣ್ಣಾ ಕಲಿಙ್ಗಾ ಚರಿತಾ ವಣಿಜ್ಜಾ, ವೇತ್ತಾಚರೋ ಸಙ್ಕುಪಥೋಪಿ ಚಿಣ್ಣೋ;

ನಟೇಹಿ ಚಿಣ್ಣಂ ಸಹ ವಾಕುರೇಹಿ [ವಾಕರೇಹಿ (ಪೀ. ಸೀ. ನಿಯ್ಯ), ವಾಗುರೇಹಿ (?)], ದಣ್ಡೇನ ಯುದ್ಧಮ್ಪಿ ಸಮಜ್ಜಮಜ್ಝೇ.

೧೧೨. ಬದ್ಧಾ ಕುಲೀಕಾ [ಕುಲಿಙ್ಕಾ (ಸೀ. ಪೀ.)] ಮಿತಮಾಳ್ಹಕೇನ, ಅಕ್ಖಾ ಜಿತಾ [ಅಕ್ಖಾಚಿತಾ (ಸೀ. ಅಟ್ಠ.)] ಸಂಯಮೋ ಅಬ್ಭತೀತೋ;

ಅಬ್ಬಾಹಿತಂ [ಅಪ್ಪಹಿತಂ (ಸೀ. ಸ್ಯಾ.), ಅಬ್ಬೂಹಿತಂ (ಪೀ. ಸೀ. ನಿಯ್ಯ)] ಪುಬ್ಬಕಂ [ಪುಪ್ಫಕಂ (ಸೀ. ಸ್ಯಾ.)] ಅಡ್ಢರತ್ತಂ, ಹತ್ಥಾ ದಡ್ಢಾ ಪಿಣ್ಡಪಟಿಗ್ಗಹೇನ.

೧೧೩. ತಾನಿಸ್ಸ ಕಮ್ಮಾಯತನಾನಿ ಅಸ್ಸು, ಪುರಿಸಸ್ಸ ವುತ್ತಿಸಮೋಧಾನತಾಯ;

ಯಥಾ ಅಯಂ ದಿಸ್ಸತಿ ಲೋಮಪಿಣ್ಡೋ, ಗಾವೋ ಹತಾ ಕಿಂ ಪನ ದದ್ದರಸ್ಸಾತಿ.

ದದ್ದರಜಾತಕಂ ದ್ವಾದಸಮಂ.

ನವಕನಿಪಾತಂ ನಿಟ್ಠಿತಂ.