೪೩೭. ಪೂತಿಮಂಸಜಾತಕಂ (೧೧)

೯೬. ನ ಖೋ ಮೇ ರುಚ್ಚತಿ ಆಳಿ, ಪೂತಿಮಂಸಸ್ಸ ಪೇಕ್ಖನಾ;

ಏತಾದಿಸಾ ಸಖಾರಸ್ಮಾ, ಆರಕಾ ಪರಿವಜ್ಜಯೇ.

೯೭. ಉಮ್ಮತ್ತಿಕಾ ಅಯಂ ವೇಣೀ, ವಣ್ಣೇತಿ ಪತಿನೋ ಸಖಿಂ;

ಪಜ್ಝಾಯಿ [ಪಜ್ಝಾತಿ (ಸೀ. ಪೀ.), ಪಜ್ಝಾಯತಿ (ಸೀ. ನಿಯ್ಯ)] ಪಟಿಗಚ್ಛನ್ತಿಂ, ಆಗತಂ ಮೇಣ್ಡ [ಮೇಳ (ಸೀ. ಪೀ.)] ಮಾತರಂ.

೯೮. ತ್ವಂ ಖೋಸಿ ಸಮ್ಮ ಉಮ್ಮತ್ತೋ, ದುಮ್ಮೇಧೋ ಅವಿಚಕ್ಖಣೋ;

ಯೋ ತ್ವಂ [ಸೋ ತ್ವಂ (ಸ್ಯಾ.)] ಮತಾಲಯಂ ಕತ್ವಾ, ಅಕಾಲೇನ ವಿಪೇಕ್ಖಸಿ.

೯೯. ನ ಅಕಾಲೇ ವಿಪೇಕ್ಖೇಯ್ಯ, ಕಾಲೇ ಪೇಕ್ಖೇಯ್ಯ ಪಣ್ಡಿತೋ;

ಪೂತಿಮಂಸೋವ ಪಜ್ಝಾಯಿ [ಪಜ್ಝಾತಿ (ಸೀ. ಪೀ.), ಪಜ್ಝಾಯತಿ (ಸೀ. ನಿಯ್ಯ)], ಯೋ ಅಕಾಲೇ ವಿಪೇಕ್ಖತಿ.

೧೦೦. ಪಿಯಂ ಖೋ ಆಳಿ ಮೇ ಹೋತು, ಪುಣ್ಣಪತ್ತಂ ದದಾಹಿ ಮೇ;

ಪತಿ ಸಞ್ಜೀವಿತೋ ಮಯ್ಹಂ, ಏಯ್ಯಾಸಿ ಪಿಯಪುಚ್ಛಿಕಾ [ಪುಚ್ಛಿತಾ (ಸ್ಯಾ. ಕ.)].

೧೦೧. ಪಿಯಂ ಖೋ ಆಳಿ ತೇ ಹೋತು, ಪುಣ್ಣಪತ್ತಂ ದದಾಮಿ ತೇ;

ಮಹತಾ ಪರಿವಾರೇನ [ಪರಿಹಾರೇನ (ಸ್ಯಾ.)], ಏಸ್ಸಂ [ಏಸಂ (ಸೀ. ಪೀ.)] ಕಯಿರಾಹಿ [ಕಯಿರಾಸಿ (ಪೀ.)] ಭೋಜನಂ.

೧೦೨. ಕೀದಿಸೋ ತುಯ್ಹಂ ಪರಿವಾರೋ, ಯೇಸಂ ಕಾಹಾಮಿ ಭೋಜನಂ;

ಕಿಂನಾಮಕಾ ಚ ತೇ ಸಬ್ಬೇ, ತಂ [ತೇ (ಸೀ. ಸ್ಯಾ. ಪೀ.)] ಮೇ ಅಕ್ಖಾಹಿ ಪುಚ್ಛಿತಾ.

೧೦೩. ಮಾಲಿಯೋ ಚತುರಕ್ಖೋ ಚ, ಪಿಙ್ಗಿಯೋ ಅಥ ಜಮ್ಬುಕೋ;

ಏದಿಸೋ ಮಯ್ಹಂ ಪರಿವಾರೋ, ತೇಸಂ ಕಯಿರಾಹಿ [ಕಯಿರಾಸಿ (ಪೀ.)] ಭೋಜನಂ.

೧೦೪. ನಿಕ್ಖನ್ತಾಯ ಅಗಾರಸ್ಮಾ, ಭಣ್ಡಕಮ್ಪಿ ವಿನಸ್ಸತಿ;

ಆರೋಗ್ಯಂ ಆಳಿನೋ ವಜ್ಜಂ [ವಚ್ಛಂ (?)], ಇಧೇವ ವಸ ಮಾಗಮಾತಿ.

ಪೂತಿಮಂಸಜಾತಕಂ ಏಕಾದಸಮಂ.