೪೩೬. ಸಮುಗ್ಗಜಾತಕಂ (೧೦)

೮೭. ಕುತೋ ನು ಆಗಚ್ಛಥ ಭೋ ತಯೋ ಜನಾ, ಸ್ವಾಗತಾ ಏಥ [ಸ್ವಾಗತಂ ಏತ್ಥ (ಸೀ. ಪೀ.)] ನಿಸೀದಥಾಸನೇ;

ಕಚ್ಚಿತ್ಥ ಭೋನ್ತೋ ಕುಸಲಂ ಅನಾಮಯಂ, ಚಿರಸ್ಸಮಬ್ಭಾಗಮನಂ ಹಿ ವೋ ಇಧ.

೮೮. ಅಹಮೇವ ಏಕೋ ಇಧ ಮಜ್ಜ ಪತ್ತೋ, ನ ಚಾಪಿ ಮೇ ದುತಿಯೋ ಕೋಚಿ ವಿಜ್ಜತಿ;

ಕಿಮೇವ ಸನ್ಧಾಯ ತೇ ಭಾಸಿತಂ ಇಸೇ, ‘‘ಕುತೋ ನು ಆಗಚ್ಛಥ ಭೋ ತಯೋ ಜನಾ’’.

೮೯. ತುವಞ್ಚ ಏಕೋ ಭರಿಯಾ ಚ ತೇ ಪಿಯಾ, ಸಮುಗ್ಗಪಕ್ಖಿತ್ತನಿಕಿಣ್ಣಮನ್ತರೇ;

ಸಾ ರಕ್ಖಿತಾ ಕುಚ್ಛಿಗತಾವ [ಕುಚ್ಛಿಗತಾ ಚ (ಕ.)] ತೇ ಸದಾ, ವಾಯುಸ್ಸ [ಹರಿಸ್ಸ (ಕ.)] ಪುತ್ತೇನ ಸಹಾ ತಹಿಂ ರತಾ.

೯೦. ಸಂವಿಗ್ಗರೂಪೋ ಇಸಿನಾ ವಿಯಾಕತೋ [ಪಬ್ಯಾಕತೋ (ಕ.), ಬ್ಯಾಕತೋ (ಸ್ಯಾ. ಪೀ.)], ಸೋ ದಾನವೋ ತತ್ಥ ಸಮುಗ್ಗಮುಗ್ಗಿಲಿ;

ಅದ್ದಕ್ಖಿ ಭರಿಯಂ ಸುಚಿ ಮಾಲಧಾರಿನಿಂ, ವಾಯುಸ್ಸ ಪುತ್ತೇನ ಸಹಾ ತಹಿಂ ರತಂ.

೯೧. ಸುದಿಟ್ಠರೂಪಮುಗ್ಗತಪಾನುವತ್ತಿನಾ [ಸುದಿಟ್ಠರೂಪುಗ್ಗತಪಾನುವತ್ತಿನಾ (ಸೀ. ಸ್ಯಾ. ಪೀ.)], ಹೀನಾ ನರಾ ಯೇ ಪಮದಾವಸಂ ಗತಾ;

ಯಥಾ ಹವೇ ಪಾಣರಿವೇತ್ಥ ರಕ್ಖಿತಾ, ದುಟ್ಠಾ ಮಯೀ ಅಞ್ಞಮಭಿಪ್ಪಮೋದಯಿ.

೯೨. ದಿವಾ ಚ ರತ್ತೋ ಚ ಮಯಾ ಉಪಟ್ಠಿತಾ, ತಪಸ್ಸಿನಾ ಜೋತಿರಿವಾ ವನೇ ವಸಂ;

ಸಾ ಧಮ್ಮಮುಕ್ಕಮ್ಮ ಅಧಮ್ಮಮಾಚರಿ, ಅಕಿರಿಯರೂಪೋ ಪಮದಾಹಿ ಸನ್ಥವೋ.

೯೩. ಸರೀರಮಜ್ಝಮ್ಹಿ ಠಿತಾತಿಮಞ್ಞಹಂ, ಮಯ್ಹಂ ಅಯನ್ತಿ ಅಸತಿಂ ಅಸಞ್ಞತಂ;

ಸಾ ಧಮ್ಮಮುಕ್ಕಮ್ಮ ಅಧಮ್ಮಮಾಚರಿ, ಅಕಿರಿಯರೂಪೋ ಪಮದಾಹಿ ಸನ್ಥವೋ.

೯೪. ಸುರಕ್ಖಿತಂ ಮೇತಿ ಕಥಂ ನು ವಿಸ್ಸಸೇ, ಅನೇಕಚಿತ್ತಾಸು ನ ಹತ್ಥಿ [ಅನೇಕಚಿತ್ತಾ ಪುನ ಹೇತ್ಥ (ಕ.)] ರಕ್ಖಣಾ;

ಏತಾ ಹಿ ಪಾತಾಲಪಪಾತಸನ್ನಿಭಾ, ಏತ್ಥಪ್ಪಮತ್ತೋ ಬ್ಯಸನಂ ನಿಗಚ್ಛತಿ.

೯೫. ತಸ್ಮಾ ಹಿ ತೇ ಸುಖಿನೋ ವೀತಸೋಕಾ, ಯೇ ಮಾತುಗಾಮೇಹಿ ಚರನ್ತಿ ನಿಸ್ಸಟಾ;

ಏತಂ ಸಿವಂ ಉತ್ತಮಮಾಭಿಪತ್ಥಯಂ, ನ ಮಾತುಗಾಮೇಹಿ ಕರೇಯ್ಯ ಸನ್ಥವನ್ತಿ.

ಸಮುಗ್ಗಜಾತಕಂ ದಸಮಂ.