೪೩೩. ಲೋಮಸಕಸ್ಸಪಜಾತಕಂ (೭)

೬೦. ಅಸ್ಸ ಇನ್ದಸಮೋ ರಾಜ, ಅಚ್ಚನ್ತಂ ಅಜರಾಮರೋ;

ಸಚೇ ತ್ವಂ ಯಞ್ಞಂ ಯಾಜೇಯ್ಯ, ಇಸಿಂ ಲೋಮಸಕಸ್ಸಪಂ.

೬೧. ಸಸಮುದ್ದಪರಿಯಾಯಂ, ಮಹಿಂ ಸಾಗರಕುಣ್ಡಲಂ;

ನ ಇಚ್ಛೇ ಸಹ ನಿನ್ದಾಯ, ಏವಂ ಸೇಯ್ಯ [ಸಯ್ಹ (ಸೀ. ಸ್ಯಾ. ಪೀ.)] ವಿಜಾನಹಿ.

೬೨. ಧಿರತ್ಥು ತಂ ಯಸಲಾಭಂ, ಧನಲಾಭಞ್ಚ ಬ್ರಾಹ್ಮಣ;

ಯಾ ವುತ್ತಿ ವಿನಿಪಾತೇನ, ಅಧಮ್ಮಚರಣೇನ ವಾ.

೬೩. ಅಪಿ ಚೇ ಪತ್ತಮಾದಾಯ, ಅನಗಾರೋ ಪರಿಬ್ಬಜೇ;

ಸಾಯೇವ ಜೀವಿಕಾ ಸೇಯ್ಯೋ, ಯಾ ಚಾಧಮ್ಮೇನ ಏಸನಾ.

೬೪. ಅಪಿ ಚೇ ಪತ್ತಮಾದಾಯ, ಅನಗಾರೋ ಪರಿಬ್ಬಜೇ;

ಅಞ್ಞಂ ಅಹಿಂಸಯಂ ಲೋಕೇ, ಅಪಿ ರಜ್ಜೇನ ತಂ ವರಂ.

೬೫. ಬಲಂ ಚನ್ದೋ ಬಲಂ ಸುರಿಯೋ, ಬಲಂ ಸಮಣಬ್ರಾಹ್ಮಣಾ;

ಬಲಂ ವೇಲಾ ಸಮುದ್ದಸ್ಸ, ಬಲಾತಿಬಲಮಿತ್ಥಿಯೋ.

೬೬. ಯಥಾ ಉಗ್ಗತಪಂ ಸನ್ತಂ, ಇಸಿಂ ಲೋಮಸಕಸ್ಸಪಂ;

ಪಿತು ಅತ್ಥಾ ಚನ್ದವತೀ, ವಾಜಪೇಯ್ಯಂ [ವಾಚಪೇಯ್ಯಂ (ಪೀ. ಕ.)] ಅಯಾಜಯಿ.

೬೭. ತಂ ಲೋಭಪಕತಂ ಕಮ್ಮಂ, ಕಟುಕಂ ಕಾಮಹೇತುಕಂ;

ತಸ್ಸ ಮೂಲಂ ಗವೇಸಿಸ್ಸಂ, ಛೇಚ್ಛಂ ರಾಗಂ ಸಬನ್ಧನಂ.

೬೮. ಧಿರತ್ಥು ಕಾಮೇ ಸುಬಹೂಪಿ ಲೋಕೇ, ತಪೋವ ಸೇಯ್ಯೋ ಕಾಮಗುಣೇಹಿ ರಾಜ;

ತಪೋ ಕರಿಸ್ಸಾಮಿ ಪಹಾಯ ಕಾಮೇ, ತವೇವ ರಟ್ಠಂ ಚನ್ದವತೀ ಚ ಹೋತೂತಿ.

ಲೋಮಸಕಸ್ಸಪಜಾತಕಂ ಸತ್ತಮಂ.