೪೩೪. ಚಕ್ಕವಾಕಜಾತಕಂ (೮)

೬೯. ಕಾಸಾಯವತ್ಥೇ ಸಕುಣೇ ವದಾಮಿ, ದುವೇ ದುವೇ ನನ್ದಮನೇ [ನನ್ದಿಮನೇ (ಸೀ. ಪೀ.)] ಚರನ್ತೇ;

ಕಂ ಅಣ್ಡಜಂ ಅಣ್ಡಜಾ ಮಾನುಸೇಸು, ಜಾತಿಂ ಪಸಂಸನ್ತಿ ತದಿಙ್ಘ ಬ್ರೂಥ.

೭೦. ಅಮ್ಹೇ ಮನುಸ್ಸೇಸು ಮನುಸ್ಸಹಿಂಸ, ಅನುಬ್ಬತೇ [ಅನುಪುಬ್ಬಕೇ (ಕ.)] ಚಕ್ಕವಾಕೇ ವದನ್ತಿ;

ಕಲ್ಯಾಣಭಾವಮ್ಹೇ [ಭಾವ’ಮ್ಹ (ಸೀ. ಪೀ.)] ದಿಜೇಸು ಸಮ್ಮತಾ, ಅಭಿರೂಪಾ [ಅಭೀತರೂಪಾ (ಸೀ. ಸ್ಯಾ. ಪೀ.)] ವಿಚರಾಮ ಅಣ್ಣವೇ. ( ) [(ನ ಘಾಸಹೇತೂಪಿ ಕರೋಮ ಪಾಪಂ) (ಕ.)]

೭೧. ಕಿಂ ಅಣ್ಣವೇ ಕಾನಿ ಫಲಾನಿ ಭುಞ್ಜೇ, ಮಂಸಂ ಕುತೋ ಖಾದಥ ಚಕ್ಕವಾಕಾ;

ಕಿಂ ಭೋಜನಂ ಭುಞ್ಜಥ ವೋ ಅನೋಮಾ [ಅಭಿಣ್ಹಂ (ಕ.)], ಬಲಞ್ಚ ವಣ್ಣೋ ಚ ಅನಪ್ಪರೂಪಾ [ಅನಪ್ಪರೂಪೋ (ಸೀ. ಸ್ಯಾ. ಪೀ.)].

೭೨. ನ ಅಣ್ಣವೇ ಸನ್ತಿ ಫಲಾನಿ ಧಙ್ಕ, ಮಂಸಂ ಕುತೋ ಖಾದಿತುಂ ಚಕ್ಕವಾಕೇ;

ಸೇವಾಲಭಕ್ಖಮ್ಹ [ಭಕ್ಖಿಮ್ಹ (ಕ.)] ಅಪಾಣಭೋಜನಾ [ಅವಾಕಭೋಜನಾ (ಸೀ. ಪೀ.)], ನ ಘಾಸಹೇತೂಪಿ ಕರೋಮ ಪಾಪಂ.

೭೩. ನ ಮೇ ಇದಂ ರುಚ್ಚತಿ ಚಕ್ಕವಾಕ, ಅಸ್ಮಿಂ ಭವೇ ಭೋಜನಸನ್ನಿಕಾಸೋ;

ಅಹೋಸಿ ಪುಬ್ಬೇ ತತೋ ಮೇ ಅಞ್ಞಥಾ, ಇಚ್ಚೇವ ಮೇ ವಿಮತಿ ಏತ್ಥ ಜಾತಾ.

೭೪. ಅಹಮ್ಪಿ ಮಂಸಾನಿ ಫಲಾನಿ ಭುಞ್ಜೇ, ಅನ್ನಾನಿ ಚ ಲೋಣಿಯತೇಲಿಯಾನಿ;

ರಸಂ ಮನುಸ್ಸೇಸು ಲಭಾಮಿ ಭೋತ್ತುಂ, ಸೂರೋವ ಸಙ್ಗಾಮಮುಖಂ ವಿಜೇತ್ವಾ;

ನ ಚ ಮೇ ತಾದಿಸೋ ವಣ್ಣೋ, ಚಕ್ಕವಾಕ ಯಥಾ ತವ.

೭೫. ಅಸುದ್ಧಭಕ್ಖೋಸಿ ಖಣಾನುಪಾತೀ, ಕಿಚ್ಛೇನ ತೇ ಲಬ್ಭತಿ ಅನ್ನಪಾನಂ;

ನ ತುಸ್ಸಸೀ ರುಕ್ಖಫಲೇಹಿ ಧಙ್ಕ, ಮಂಸಾನಿ ವಾ ಯಾನಿ ಸುಸಾನಮಜ್ಝೇ.

೭೬. ಯೋ ಸಾಹಸೇನ ಅಧಿಗಮ್ಮ ಭೋಗೇ, ಪರಿಭುಞ್ಜತಿ ಧಙ್ಕ ಖಣಾನುಪಾತೀ;

ತತೋ ಉಪಕ್ಕೋಸತಿ ನಂ ಸಭಾವೋ, ಉಪಕ್ಕುಟ್ಠೋ ವಣ್ಣಬಲಂ ಜಹಾತಿ.

೭೭. ಅಪ್ಪಮ್ಪಿ ಚೇ ನಿಬ್ಬುತಿಂ ಭುಞ್ಜತೀ ಯದಿ, ಅಸಾಹಸೇನ ಅಪರೂಪಘಾತೀ [ಅಸಾಹಸೇನಾನುಪಘಾತಿನೋ (ಕ.)];

ಬಲಞ್ಚ ವಣ್ಣೋ ಚ ತದಸ್ಸ ಹೋತಿ, ನ ಹಿ ಸಬ್ಬೋ ಆಹಾರಮಯೇನ ವಣ್ಣೋತಿ.

ಚಕ್ಕವಾಕಜಾತಕಂ ಅಟ್ಠಮಂ.