೪೨೬. ದೀಪಿಜಾತಕಂ (೧೦)

೮೮. ಖಮನೀಯಂ ಯಾಪನೀಯಂ, ಕಚ್ಚಿ ಮಾತುಲ ತೇ ಸುಖಂ;

ಸುಖಂ ತೇ ಅಮ್ಮಾ ಅವಚ, ಸುಖಕಾಮಾವ [ಸುಖಕಾಮಾ ಹಿ (ಸೀ. ಸ್ಯಾ. ಪೀ.)] ತೇ ಮಯಂ.

೮೯. ನಙ್ಗುಟ್ಠಂ ಮೇ ಅವಕ್ಕಮ್ಮ [ಅಪಕ್ಕಮ್ಮ (ಕ.)], ಹೇಠಯಿತ್ವಾನ [ಪೋಥಯಿತ್ವಾನ (ಕ.)] ಏಳಿಕೇ [ಏಳಕಿ (ಸ್ಯಾ.), ಏಳಿಕಿ (ಪೀ.)];

ಸಾಜ್ಜ ಮಾತುಲವಾದೇನ, ಮುಞ್ಚಿತಬ್ಬಾ ನು ಮಞ್ಞಸಿ.

೯೦. ಪುರತ್ಥಾಮುಖೋ ನಿಸಿನ್ನೋಸಿ, ಅಹಂ ತೇ ಮುಖಮಾಗತಾ;

ಪಚ್ಛತೋ ತುಯ್ಹಂ ನಙ್ಗುಟ್ಠಂ, ಕಥಂ ಖ್ವಾಹಂ ಅವಕ್ಕಮಿಂ [ಅಪಕ್ಕಮಿಂ (ಕ.)].

೯೧. ಯಾವತಾ ಚತುರೋ ದೀಪಾ, ಸಸಮುದ್ದಾ ಸಪಬ್ಬತಾ;

ತಾವತಾ ಮಯ್ಹಂ ನಙ್ಗುಟ್ಠಂ, ಕಥಂ ಖೋ ತ್ವಂ ವಿವಜ್ಜಯಿ.

೯೨. ಪುಬ್ಬೇವ ಮೇತಮಕ್ಖಿಂಸು [ಮೇತಂ ಅಕ್ಖಂಸು (ಸೀ. ಪೀ.)], ಮಾತಾ ಪಿತಾ ಚ ಭಾತರೋ;

ದೀಘಂ ದುಟ್ಠಸ್ಸ ನಙ್ಗುಟ್ಠಂ, ಸಾಮ್ಹಿ ವೇಹಾಯಸಾಗತಾ.

೯೩. ತಞ್ಚ ದಿಸ್ವಾನ ಆಯನ್ತಿಂ, ಅನ್ತಲಿಕ್ಖಸ್ಮಿ ಏಳಿಕೇ;

ಮಿಗಸಙ್ಘೋ ಪಲಾಯಿತ್ಥ, ಭಕ್ಖೋ ಮೇ ನಾಸಿತೋ ತಯಾ.

೯೪. ಇಚ್ಚೇವಂ ವಿಲಪನ್ತಿಯಾ, ಏಳಕಿಯಾ ರುಹಗ್ಘಸೋ;

ಗಲಕಂ ಅನ್ವಾವಮದ್ದಿ, ನತ್ಥಿ ದುಟ್ಠೇ ಸುಭಾಸಿತಂ.

೯೫. ನೇವ ದುಟ್ಠೇ ನಯೋ ಅತ್ಥಿ, ನ ಧಮ್ಮೋ ನ ಸುಭಾಸಿತಂ;

ನಿಕ್ಕಮಂ ದುಟ್ಠೇ ಯುಞ್ಜೇಥ, ಸೋ ಚ ಸಬ್ಭಿಂ ನ ರಞ್ಜತೀತಿ.

ದೀಪಿಜಾತಕಂ ದಸಮಂ.

ಅಟ್ಠಕನಿಪಾತಂ ನಿಟ್ಠಿತಂ.