೪೨೫. ಅಟ್ಠಾನಜಾತಕಂ (೯)

೭೭. ಗಙ್ಗಾ ಕುಮುದಿನೀ ಸನ್ತಾ, ಸಙ್ಖವಣ್ಣಾ ಚ ಕೋಕಿಲಾ;

ಜಮ್ಬು ತಾಲಫಲಂ ದಜ್ಜಾ, ಅಥ ನೂನ ತದಾ ಸಿಯಾ.

೭೮. ಯದಾ ಕಚ್ಛಪಲೋಮಾನಂ, ಪಾವಾರೋ ತಿವಿಧೋ ಸಿಯಾ;

ಹೇಮನ್ತಿಕಂ ಪಾವುರಣಂ [ಪಾಪುರಣಂ (ಸೀ. ಸ್ಯಾ. ಪೀ.)], ಅಥ ನೂನ ತದಾ ಸಿಯಾ.

೭೯. ಯದಾ ಮಕಸಪಾದಾನಂ [ದಾಠಾನಂ (ಸೀ. ಪೀ.)], ಅಟ್ಟಾಲೋ ಸುಕತೋ ಸಿಯಾ;

ದಳ್ಹೋ ಚ ಅವಿಕಮ್ಪೀ ಚ [ಅಪ್ಪಕಮ್ಪೀ ಚ (ಸೀ. ಪೀ.)], ಅಥ ನೂನ ತದಾ ಸಿಯಾ.

೮೦. ಯದಾ ಸಸವಿಸಾಣಾನಂ, ನಿಸ್ಸೇಣೀ ಸುಕತಾ ಸಿಯಾ;

ಸಗ್ಗಸ್ಸಾರೋಹಣತ್ಥಾಯ, ಅಥ ನೂನ ತದಾ ಸಿಯಾ.

೮೧. ಯದಾ ನಿಸ್ಸೇಣಿಮಾರುಯ್ಹ, ಚನ್ದಂ ಖಾದೇಯ್ಯು ಮೂಸಿಕಾ;

ರಾಹುಞ್ಚ ಪರಿಪಾತೇಯ್ಯುಂ [ಪರಿಬಾಹೇಯ್ಯುಂ (ಸ್ಯಾ.)], ಅಥ ನೂನ ತದಾ ಸಿಯಾ.

೮೨. ಯದಾ ಸುರಾಘಟಂ ಪಿತ್ವಾ, ಮಕ್ಖಿಕಾ ಗಣಚಾರಿಣೀ;

ಅಙ್ಗಾರೇ ವಾಸಂ ಕಪ್ಪೇಯ್ಯುಂ, ಅಥ ನೂನ ತದಾ ಸಿಯಾ.

೮೩. ಯದಾ ಬಿಮ್ಬೋಟ್ಠಸಮ್ಪನ್ನೋ, ಗದ್ರಭೋ ಸುಮುಖೋ ಸಿಯಾ;

ಕುಸಲೋ ನಚ್ಚಗೀತಸ್ಸ, ಅಥ ನೂನ ತದಾ ಸಿಯಾ.

೮೪. ಯದಾ ಕಾಕಾ ಉಲೂಕಾ ಚ, ಮನ್ತಯೇಯ್ಯುಂ ರಹೋಗತಾ;

ಅಞ್ಞಮಞ್ಞಂ ಪಿಹಯೇಯ್ಯುಂ, ಅಥ ನೂನ ತದಾ ಸಿಯಾ.

೮೫. ಯದಾ ಮುಳಾಲ [ಪುಲಸ (ಸೀ. ಪೀ.), ಪುಲಾಸ (ಸ್ಯಾ.)] ಪತ್ತಾನಂ, ಛತ್ತಂ ಥಿರತರಂ ಸಿಯಾ;

ವಸ್ಸಸ್ಸ ಪಟಿಘಾತಾಯ, ಅಥ ನೂನ ತದಾ ಸಿಯಾ.

೮೬. ಯದಾ ಕುಲಕೋ [ಕುಲುಙ್ಕೋ (ಸೀ. ಪೀ.), ಕುಲುಕೋ (ಸ್ಯಾ.)] ಸಕುಣೋ, ಪಬ್ಬತಂ ಗನ್ಧಮಾದನಂ;

ತುಣ್ಡೇನಾದಾಯ ಗಚ್ಛೇಯ್ಯ, ಅಥ ನೂನ ತದಾ ಸಿಯಾ.

೮೭. ಯದಾ ಸಾಮುದ್ದಿಕಂ ನಾವಂ, ಸ-ಯನ್ತಂ ಸ-ವಟಾಕರಂ [ಸಪಟಾಕಾರಂ (ಕ.)];

ಚೇಟೋ ಆದಾಯ ಗಚ್ಛೇಯ್ಯ, ಅಥ ನೂನ ತದಾ ಸಿಯಾತಿ.

ಅಟ್ಠಾನಜಾತಕಂ ನವಮಂ.