೪೨೪. ಆದಿತ್ತಜಾತಕಂ (೮)

೬೯. ಆದಿತ್ತಸ್ಮಿಂ ಅಗಾರಸ್ಮಿಂ, ಯಂ ನೀಹರತಿ ಭಾಜನಂ;

ತಂ ತಸ್ಸ ಹೋತಿ ಅತ್ಥಾಯ, ನೋ ಚ ಯಂ ತತ್ಥ ಡಯ್ಹತಿ.

೭೦. ಏವಾಮಾದೀಪಿತೋ ಲೋಕೋ, ಜರಾಯ ಮರಣೇನ ಚ;

ನೀಹರೇಥೇವ ದಾನೇನ, ದಿನ್ನಂ ಹೋತಿ ಸುನೀಹತಂ [ಸುನೀಭತಂ (ಸೀ. ಸ್ಯಾ. ಪೀ.), ಸುನಿಬ್ಭತಂ (ಕ.)].

೭೧. ಯೋ ಧಮ್ಮಲದ್ಧಸ್ಸ ದದಾತಿ ದಾನಂ, ಉಟ್ಠಾನವೀರಿಯಾಧಿಗತಸ್ಸ ಜನ್ತು;

ಅತಿಕ್ಕಮ್ಮ ಸೋ ವೇತರಣಿಂ [ವೇತ್ತರಣಿಂ (ಕ.)] ಯಮಸ್ಸ, ದಿಬ್ಬಾನಿ ಠಾನಾನಿ ಉಪೇತಿ ಮಚ್ಚೋ.

೭೨. ದಾನಞ್ಚ ಯುದ್ಧಞ್ಚ ಸಮಾನಮಾಹು, ಅಪ್ಪಾಪಿ ಸನ್ತಾ ಬಹುಕೇ ಜಿನನ್ತಿ;

ಅಪ್ಪಮ್ಪಿ ಚೇ ಸದ್ದಹಾನೋ ದದಾತಿ, ತೇನೇವ ಸೋ ಹೋತಿ ಸುಖೀ ಪರತ್ಥ.

೭೩. ವಿಚೇಯ್ಯ ದಾನಂ ಸುಗತಪ್ಪಸತ್ಥಂ, ಯೇ ದಕ್ಖಿಣೇಯ್ಯಾ ಇಧ ಜೀವಲೋಕೇ;

ಏತೇಸು ದಿನ್ನಾನಿ ಮಹಪ್ಫಲಾನಿ, ಬೀಜಾನಿ ವುತ್ತಾನಿ ಯಥಾ ಸುಖೇತ್ತೇ.

೭೪. ಯೋ ಪಾಣಭೂತಾನಿ ಅಹೇಠಯಂ ಚರಂ, ಪರೂಪವಾದಾ ನ ಕರೋತಿ ಪಾಪಂ;

ಭೀರುಂ ಪಸಂಸನ್ತಿ ನ ತತ್ಥ ಸೂರಂ, ಭಯಾ ಹಿ ಸನ್ತೋ ನ ಕರೋನ್ತಿ ಪಾಪಂ.

೭೫. ಹೀನೇನ ಬ್ರಹ್ಮಚರಿಯೇನ, ಖತ್ತಿಯೇ ಉಪಪಜ್ಜತಿ;

ಮಜ್ಝಿಮೇನ ಚ ದೇವತ್ತಂ, ಉತ್ತಮೇನ ವಿಸುಜ್ಝತಿ.

೭೬. ಅದ್ಧಾ ಹಿ ದಾನಂ ಬಹುಧಾ ಪಸತ್ಥಂ, ದಾನಾ ಚ ಖೋ ಧಮ್ಮಪದಂವ ಸೇಯ್ಯೋ;

ಪುಬ್ಬೇವ ಹಿ ಪುಬ್ಬತರೇವ ಸನ್ತೋ [ಪುಬ್ಬೇ ಚ ಹಿ ಪುಬ್ಬತರೇ ಚ ಸನ್ತೋ (ಸಂ. ನಿ. ೧.೩೩)], ನಿಬ್ಬಾನಮೇವಜ್ಝಗಮುಂ ಸಪಞ್ಞಾತಿ.

ಆದಿತ್ತಜಾತಕಂ ಅಟ್ಠಮಂ.