೪೨೩. ಇನ್ದ್ರಿಯಜಾತಕಂ (೭)

೬೦. ಯೋ ಇನ್ದ್ರಿಯಾನಂ ಕಾಮೇನ, ವಸಂ ನಾರದ ಗಚ್ಛತಿ;

ಸೋ ಪರಿಚ್ಚಜ್ಜುಭೋ ಲೋಕೇ, ಜೀವನ್ತೋವ ವಿಸುಸ್ಸತಿ [ಜೀವನ್ತೋಪಿವಿಸುಸ್ಸತಿ (ಸ್ಯಾ.), ಜೀವನ್ತೋ ವಾಪಿ ಸುಸ್ಸತಿ (ಕ.)].

೬೧. ಸುಖಸ್ಸಾನನ್ತರಂ ದುಕ್ಖಂ, ದುಕ್ಖಸ್ಸಾನನ್ತರಂ ಸುಖಂ;

ಸೋಸಿ [ಸೋಪಿ (ಸ್ಯಾ. ಪೀ. ಕ.)] ಪತ್ತೋ ಸುಖಾ [ಸುಖ (ಸ್ಯಾ.), ಸುಖಂ (ಕ.)] ದುಕ್ಖಂ, ಪಾಟಿಕಙ್ಖ ವರಂ ಸುಖಂ.

೬೨. ಕಿಚ್ಛಕಾಲೇ ಕಿಚ್ಛಸಹೋ, ಯೋ ಕಿಚ್ಛಂ ನಾತಿವತ್ತತಿ;

ಸ ಕಿಚ್ಛನ್ತಂ ಸುಖಂ ಧೀರೋ, ಯೋಗಂ ಸಮಧಿಗಚ್ಛತಿ.

೬೩. ನ ಹೇವ ಕಾಮಾನ ಕಾಮಾ, ನಾನತ್ಥಾ ನಾತ್ಥಕಾರಣಾ;

ನ ಕತಞ್ಚ ನಿರಙ್ಕತ್ವಾ, ಧಮ್ಮಾ ಚವಿತುಮರಹಸಿ.

೬೪. ದಕ್ಖಂ ಗಹಪತೀ [ಗಹಪತಂ (ಸೀ. ಸ್ಯಾ. ಪೀ.), ಗಹವತಂ (?)] ಸಾಧು, ಸಂವಿಭಜ್ಜಞ್ಚ ಭೋಜನಂ;

ಅಹಾಸೋ ಅತ್ಥಲಾಭೇಸು, ಅತ್ಥಬ್ಯಾಪತ್ತಿ ಅಬ್ಯಥೋ.

೬೫. ಏತ್ತಾವತೇತಂ ಪಣ್ಡಿಚ್ಚಂ, ಅಪಿ ಸೋ [ಅಸಿತೋ (ಸೀ. ಸ್ಯಾ. ಪೀ.)] ದವಿಲೋ [ದೇವಲೋ (ಸೀ. ಪೀ.)] ಬ್ರವಿ;

ನ ಯಿತೋ ಕಿಞ್ಚಿ ಪಾಪಿಯೋ, ಯೋ ಇನ್ದ್ರಿಯಾನಂ ವಸಂ ವಜೇ.

೬೬. ಅಮಿತ್ತಾನಂವ ಹತ್ಥತ್ಥಂ, ಸಿವಿ ಪಪ್ಪೋತಿ ಮಾಮಿವ;

ಕಮ್ಮಂ ವಿಜ್ಜಞ್ಚ ದಕ್ಖೇಯ್ಯಂ, ವಿವಾಹಂ ಸೀಲಮದ್ದವಂ;

ಏತೇ ಚ ಯಸೇ ಹಾಪೇತ್ವಾ, ನಿಬ್ಬತ್ತೋ ಸೇಹಿ ಕಮ್ಮೇಹಿ.

೬೭. ಸೋಹಂ ಸಹಸ್ಸಜೀನೋವ ಅಬನ್ಧು ಅಪರಾಯಣೋ;

ಅರಿಯಧಮ್ಮಾ ಅಪಕ್ಕನ್ತೋ, ಯಥಾ ಪೇತೋ ತಥೇವಹಂ.

೬೮. ಸುಖಕಾಮೇ ದುಕ್ಖಾಪೇತ್ವಾ, ಆಪನ್ನೋಸ್ಮಿ ಪದಂ ಇಮಂ;

ಸೋ ಸುಖಂ ನಾಧಿಗಚ್ಛಾಮಿ, ಠಿತೋ [ಚಿತೋ (ಪೀ. ಸೀ. ಅಟ್ಠ.)] ಭಾಣುಮತಾಮಿವಾತಿ.

ಇನ್ದ್ರಿಯಜಾತಕಂ ಸತ್ತಮಂ.