೪೨೨. ಚೇತಿಯಜಾತಕಂ (೬)

೪೫. ಧಮ್ಮೋ ಹವೇ ಹತೋ ಹನ್ತಿ, ನಾಹತೋ ಹನ್ತಿ ಕಿಞ್ಚನಂ [ಕಞ್ಚಿನಂ (ಪೀ.)];

ತಸ್ಮಾ ಹಿ ಧಮ್ಮಂ ನ ಹನೇ, ಮಾ ತ್ವಂ [ತಂ (ಸ್ಯಾ. ಪೀ.)] ಧಮ್ಮೋ ಹತೋ ಹನಿ.

೪೬. ಅಲಿಕಂ ಭಾಸಮಾನಸ್ಸ, ಅಪಕ್ಕಮನ್ತಿ ದೇವತಾ;

ಪೂತಿಕಞ್ಚ ಮುಖಂ ವಾತಿ, ಸಕಟ್ಠಾನಾ ಚ ಧಂಸತಿ;

ಯೋ ಜಾನಂ ಪುಚ್ಛಿತೋ ಪಞ್ಹಂ, ಅಞ್ಞಥಾ ನಂ ವಿಯಾಕರೇ.

೪೭. ಸಚೇ ಹಿ ಸಚ್ಚಂ ಭಣಸಿ, ಹೋಹಿ ರಾಜ ಯಥಾ ಪುರೇ;

ಮುಸಾ ಚೇ ಭಾಸಸೇ ರಾಜ, ಭೂಮಿಯಂ ತಿಟ್ಠ ಚೇತಿಯ.

೪೮. ಅಕಾಲೇ ವಸ್ಸತೀ ತಸ್ಸ, ಕಾಲೇ ತಸ್ಸ ನ ವಸ್ಸತಿ;

ಯೋ ಜಾನಂ ಪುಚ್ಛಿತೋ ಪಞ್ಹಂ, ಅಞ್ಞಥಾ ನಂ ವಿಯಾಕರೇ.

೪೯. ಸಚೇ ಹಿ ಸಚ್ಚಂ ಭಣಸಿ, ಹೋಹಿ ರಾಜ ಯಥಾ ಪುರೇ;

ಮುಸಾ ಚೇ ಭಾಸಸೇ ರಾಜ, ಭೂಮಿಂ ಪವಿಸ ಚೇತಿಯ.

೫೦. ಜಿವ್ಹಾ ತಸ್ಸ ದ್ವಿಧಾ ಹೋತಿ, ಉರಗಸ್ಸೇವ ದಿಸಮ್ಪತಿ;

ಯೋ ಜಾನಂ ಪುಚ್ಛಿತೋ ಪಞ್ಹಂ, ಅಞ್ಞಥಾ ನಂ ವಿಯಾಕರೇ.

೫೧. ಸಚೇ ಹಿ ಸಚ್ಚಂ ಭಣಸಿ, ಹೋಹಿ ರಾಜ ಯಥಾ ಪುರೇ;

ಮುಸಾ ಚೇ ಭಾಸಸೇ ರಾಜ, ಭಿಯ್ಯೋ ಪವಿಸ ಚೇತಿಯ.

೫೨. ಜಿವ್ಹಾ ತಸ್ಸ ನ ಭವತಿ, ಮಚ್ಛಸ್ಸೇವ ದಿಸಮ್ಪತಿ;

ಯೋ ಜಾನಂ ಪುಚ್ಛಿತೋ ಪಞ್ಹಂ, ಅಞ್ಞಥಾ ನಂ ವಿಯಾಕರೇ.

೫೩. ಸಚೇ ಹಿ ಸಚ್ಚಂ ಭಣಸಿ, ಹೋಹಿ ರಾಜ ಯಥಾ ಪುರೇ;

ಮುಸಾ ಚೇ ಭಾಸಸೇ ರಾಜ, ಭಿಯ್ಯೋ ಪವಿಸ ಚೇತಿಯ.

೫೪. ಥಿಯೋವ ತಸ್ಸ ಜಾಯನ್ತಿ [ಥಿಯೋ ತಸ್ಸ ಪಜಾಯನ್ತಿ (ಕ.)], ನ ಪುಮಾ ಜಾಯರೇ ಕುಲೇ;

ಯೋ ಜಾನಂ ಪುಚ್ಛಿತೋ ಪಞ್ಹಂ, ಅಞ್ಞಥಾ ನಂ ವಿಯಾಕರೇ.

೫೫. ಸಚೇ ಹಿ ಸಚ್ಚಂ ಭಣಸಿ, ಹೋಹಿ ರಾಜ ಯಥಾ ಪುರೇ;

ಮುಸಾ ಚೇ ಭಾಸಸೇ ರಾಜ, ಭಿಯ್ಯೋ ಪವಿಸ ಚೇತಿಯ.

೫೬. ಪುತ್ತಾ ತಸ್ಸ ನ ಭವನ್ತಿ, ಪಕ್ಕಮನ್ತಿ ದಿಸೋದಿಸಂ;

ಯೋ ಜಾನಂ ಪುಚ್ಛಿತೋ ಪಞ್ಹಂ, ಅಞ್ಞಥಾ ನಂ ವಿಯಾಕರೇ.

೫೭. ಸಚೇ ಹಿ ಸಚ್ಚಂ ಭಣಸಿ, ಹೋಹಿ ರಾಜ ಯಥಾ ಪುರೇ;

ಮುಸಾ ಚೇ ಭಾಸಸೇ ರಾಜ, ಭಿಯ್ಯೋ ಪವಿಸ ಚೇತಿಯ.

೫೮. ಸ ರಾಜಾ ಇಸಿನಾ ಸತ್ತೋ, ಅನ್ತಲಿಕ್ಖಚರೋ ಪುರೇ;

ಪಾವೇಕ್ಖಿ ಪಥವಿಂ ಚೇಚ್ಚೋ, ಹೀನತ್ತೋ ಪತ್ವ ಪರಿಯಾಯಂ [ಅತ್ತಪರಿಯಾಯಂ (ಸೀ. ಸ್ಯಾ.), ಪತ್ತಪರಿಯಾಯಂ (ಕ. ಸೀ. ನಿಯ್ಯ)].

೫೯. ತಸ್ಮಾ ಹಿ ಛನ್ದಾಗಮನಂ, ನಪ್ಪಸಂಸನ್ತಿ ಪಣ್ಡಿತಾ;

ಅದುಟ್ಠಚಿತ್ತೋ ಭಾಸೇಯ್ಯ, ಗಿರಂ ಸಚ್ಚೂಪಸಂಹಿತನ್ತಿ.

ಚೇತಿಯಜಾತಕಂ ಛಟ್ಠಂ.