೪೧೯. ಸುಲಸಾಜಾತಕಂ (೩)

೧೮. ಇದಂ ಸುವಣ್ಣಕಾಯೂರಂ, ಮುತ್ತಾ ವೇಳುರಿಯಾ ಬಹೂ;

ಸಬ್ಬಂ ಹರಸ್ಸು ಭದ್ದನ್ತೇ, ಮಞ್ಚ ದಾಸೀತಿ ಸಾವಯ.

೧೯. ಓರೋಪಯಸ್ಸು ಕಲ್ಯಾಣಿ, ಮಾ ಬಾಳ್ಹಂ [ಬಹುಂ (ಸೀ. ಸ್ಯಾ. ಪೀ.)] ಪರಿದೇವಸಿ;

ನ ಚಾಹಂ ಅಭಿಜಾನಾಮಿ, ಅಹನ್ತ್ವಾ ಧನಮಾಭತಂ.

೨೦. ಯತೋ ಸರಾಮಿ ಅತ್ತಾನಂ, ಯತೋ ಪತ್ತಾಸ್ಮಿ ವಿಞ್ಞುತಂ;

ನ ಚಾಹಂ ಅಭಿಜಾನಾಮಿ, ಅಞ್ಞಂ ಪಿಯತರಂ ತಯಾ.

೨೧. ಏಹಿ ತಂ ಉಪಗೂಹಿಸ್ಸಂ [ಉಪಗುಯ್ಹಿಸ್ಸಂ (ಕ.)], ಕರಿಸ್ಸಞ್ಚ ಪದಕ್ಖಿಣಂ;

ನ ಹಿ ದಾನಿ ಪುನ ಅತ್ಥಿ, ಮಮ ತುಯ್ಹಞ್ಚ ಸಙ್ಗಮೋ.

೨೨. ನ ಹಿ ಸಬ್ಬೇಸು ಠಾನೇಸು, ಪುರಿಸೋ ಹೋತಿ ಪಣ್ಡಿತೋ;

ಇತ್ಥೀಪಿ ಪಣ್ಡಿತಾ ಹೋತಿ, ತತ್ಥ ತತ್ಥ ವಿಚಕ್ಖಣಾ.

೨೩. ನ ಹಿ ಸಬ್ಬೇಸು ಠಾನೇಸು, ಪುರಿಸೋ ಹೋತಿ ಪಣ್ಡಿತೋ;

ಇತ್ಥೀಪಿ ಪಣ್ಡಿತಾ ಹೋತಿ, ಲಹುಂ ಅತ್ಥಂ ವಿಚಿನ್ತಿಕಾ [ಲಹುಮತ್ಥವಿಚಿನ್ತಿಕಾ (ಸೀ. ಪೀ.)].

೨೪. ಲಹುಞ್ಚ ವತ ಖಿಪ್ಪಞ್ಚ, ನಿಕಟ್ಠೇ ಸಮಚೇತಯಿ;

ಮಿಗಂ ಪುಣ್ಣಾಯತೇನೇವ [ಪುಣ್ಣಾಯತನೇವ (ಸ್ಯಾ.)], ಸುಲಸಾ ಸತ್ತುಕಂ ವಧಿ.

೨೫. ಯೋಧ ಉಪ್ಪತಿತಂ ಅತ್ಥಂ, ನ ಖಿಪ್ಪಮನುಬುಜ್ಝತಿ;

ಸೋ ಹಞ್ಞತಿ ಮನ್ದಮತಿ, ಚೋರೋವ ಗಿರಿಗಬ್ಭರೇ.

೨೬. ಯೋ ಚ ಉಪ್ಪತಿತಂ ಅತ್ಥಂ, ಖಿಪ್ಪಮೇವ ನಿಬೋಧತಿ;

ಮುಚ್ಚತೇ ಸತ್ತುಸಮ್ಬಾಧಾ, ಸುಲಸಾ ಸತ್ತುಕಾಮಿವಾತಿ.

ಸುಲಸಾಜಾತಕಂ ತತಿಯಂ.