೪೨೦. ಸುಮಙ್ಗಲಜಾತಕಂ (೪)

೨೭. ಭುಸಮ್ಹಿ [ಭುಸಮ್ಪಿ (ಕ.), ಭುಸಂ ಹಿ (ಸೀ. ನಿಯ್ಯ)] ಕುದ್ಧೋತಿ ಅವೇಕ್ಖಿಯಾನ, ನ ತಾವ ದಣ್ಡಂ ಪಣಯೇಯ್ಯ ಇಸ್ಸರೋ;

ಅಟ್ಠಾನಸೋ ಅಪ್ಪತಿರೂಪಮತ್ತನೋ, ಪರಸ್ಸ ದುಕ್ಖಾನಿ ಭುಸಂ ಉದೀರಯೇ.

೨೮. ಯತೋ ಚ ಜಾನೇಯ್ಯ ಪಸಾದಮತ್ತನೋ, ಅತ್ಥಂ ನಿಯುಞ್ಜೇಯ್ಯ ಪರಸ್ಸ ದುಕ್ಕಟಂ;

ತದಾಯಮತ್ಥೋತಿ ಸಯಂ ಅವೇಕ್ಖಿಯ, ಅಥಸ್ಸ ದಣ್ಡಂ ಸದಿಸಂ ನಿವೇಸಯೇ.

೨೯. ನ ಚಾಪಿ ಝಾಪೇತಿ ಪರಂ ನ ಅತ್ತನಂ, ಅಮುಚ್ಛಿತೋ ಯೋ ನಯತೇ ನಯಾನಯಂ;

ಯೋ ದಣ್ಡಧಾರೋ ಭವತೀಧ ಇಸ್ಸರೋ, ಸ ವಣ್ಣಗುತ್ತೋ ಸಿರಿಯಾ ನ ಧಂಸತಿ.

೩೦. ಯೇ ಖತ್ತಿಯಾ ಸೇ ಅನಿಸಮ್ಮಕಾರಿನೋ, ಪಣೇನ್ತಿ ದಣ್ಡಂ ಸಹಸಾ ಪಮುಚ್ಛಿತಾ;

ಅವಣ್ಣಸಂಯುತಾ [ಯುತ್ತಾವ (ಕ.)] ಜಹನ್ತಿ ಜೀವಿತಂ, ಇತೋ ವಿಮುತ್ತಾಪಿ ಚ ಯನ್ತಿ ದುಗ್ಗತಿಂ.

೩೧. ಧಮ್ಮೇ ಚ ಯೇ ಅರಿಯಪ್ಪವೇದಿತೇ ರತಾ, ಅನುತ್ತರಾ ತೇ ವಚಸಾ ಮನಸಾ ಕಮ್ಮುನಾ ಚ;

ತೇ ಸನ್ತಿಸೋರಚ್ಚಸಮಾಧಿಸಣ್ಠಿತಾ, ವಜನ್ತಿ ಲೋಕಂ ದುಭಯಂ ತಥಾವಿಧಾ.

೩೨. ರಾಜಾಹಮಸ್ಮಿ ನರಪಮದಾನಮಿಸ್ಸರೋ, ಸಚೇಪಿ ಕುಜ್ಝಾಮಿ ಠಪೇಮಿ ಅತ್ತನಂ;

ನಿಸೇಧಯನ್ತೋ ಜನತಂ ತಥಾವಿಧಂ, ಪಣೇಮಿ ದಣ್ಡಂ ಅನುಕಮ್ಪ ಯೋನಿಸೋ.

೩೩. ಸಿರೀ ಚ ಲಕ್ಖೀ ಚ ತವೇವ ಖತ್ತಿಯ, ಜನಾಧಿಪ ಮಾ ವಿಜಹಿ ಕುದಾಚನಂ;

ಅಕ್ಕೋಧನೋ ನಿಚ್ಚಪಸನ್ನಚಿತ್ತೋ, ಅನೀಘೋ ತುವಂ ವಸ್ಸಸತಾನಿ ಪಾಲಯ.

೩೪. ಗುಣೇಹಿ ಏತೇಹಿ ಉಪೇತ ಖತ್ತಿಯ, ಠಿತಮರಿಯವತ್ತೀ [ವತ್ತಿ (ಸೀ.), ವುತ್ತಿ (ಕ.)] ಸುವಚೋ ಅಕೋಧನೋ;

ಸುಖೀ ಅನುಪ್ಪೀಳ ಪಸಾಸಮೇದಿನಿಂ [ಅನುಪ್ಪೀಳಂ ಸಹಸಮೇದನಿಂ (ಕ.)], ಇತೋ ವಿಮುತ್ತೋಪಿ ಚ ಯಾಹಿ ಸುಗ್ಗತಿಂ.

೩೫. ಏವಂ ಸುನೀತೇನ [ಸುವಿನೀತೇನ (ಪೀ.)] ಸುಭಾಸಿತೇನ, ಧಮ್ಮೇನ ಞಾಯೇನ ಉಪಾಯಸೋ ನಯಂ;

ನಿಬ್ಬಾಪಯೇ ಸಙ್ಖುಭಿತಂ ಮಹಾಜನಂ, ಮಹಾವ ಮೇಘೋ ಸಲಿಲೇನ ಮೇದಿನಿನ್ತಿ [ಮೇದನಿನ್ತಿ (ಸ್ಯಾ. ಕ.)].

ಸುಮಙ್ಗಲಜಾತಕಂ ಚತುತ್ಥಂ.