೪೧೮. ಅಟ್ಠಸದ್ದಜಾತಕಂ (೨)

೧೦. ಇದಂ ಪುರೇ ನಿನ್ನಮಾಹು, ಬಹುಮಚ್ಛಂ ಮಹೋದಕಂ;

ಆವಾಸೋ ಬಕರಾಜಸ್ಸ, ಪೇತ್ತಿಕಂ ಭವನಂ ಮಮ;

ತ್ಯಜ್ಜ ಭೇಕೇನ [ಭಿಙ್ಗೇನ (ಕ.)] ಯಾಪೇಮ, ಓಕಂ ನ ವಜಹಾಮಸೇ [ಓಕನ್ತಂ ನ ಜಹಾಮಸೇ (ಕ.)].

೧೧. ಕೋ ದುತಿಯಂ ಅಸೀಲಿಸ್ಸ, ಬನ್ಧರಸ್ಸಕ್ಖಿ ಭೇಚ್ಛತಿ [ಭೇಜ್ಜತಿ (ಸೀ. ಸ್ಯಾ. ಪೀ.), ಭಿನ್ದತಿ (ಕ.)];

ಕೋ ಮೇ ಪುತ್ತೇ ಕುಲಾವಕಂ, ಮಞ್ಚ ಸೋತ್ಥಿಂ ಕರಿಸ್ಸತಿ.

೧೨. ಸಬ್ಬಾ ಪರಿಕ್ಖಯಾ ಫೇಗ್ಗು, ಯಾವ ತಸ್ಸಾ ಗತೀ ಅಹು;

ಖೀಣಭಕ್ಖೋ ಮಹಾರಾಜ, ಸಾರೇ ನ ರಮತೀ ಘುಣೋ.

೧೩. ಸಾ ನೂನಾಹಂ ಇತೋ ಗನ್ತ್ವಾ, ರಞ್ಞೋ ಮುತ್ತಾ ನಿವೇಸನಾ;

ಅತ್ತಾನಂ ರಮಯಿಸ್ಸಾಮಿ, ದುಮಸಾಖನಿಕೇತಿನೀ.

೧೪. ಸೋ ನೂನಾಹಂ ಇತೋ ಗನ್ತ್ವಾ, ರಞ್ಞೋ ಮುತ್ತೋ ನಿವೇಸನಾ;

ಅಗ್ಗೋದಕಾನಿ ಪಿಸ್ಸಾಮಿ, ಯೂಥಸ್ಸ ಪುರತೋ ವಜಂ.

೧೫. ತಂ ಮಂ ಕಾಮೇಹಿ ಸಮ್ಮತ್ತಂ, ರತ್ತಂ ಕಾಮೇಸು ಮುಚ್ಛಿತಂ;

ಆನಯೀ ಭರತೋ [ವನತೋ (ಕ.)] ಲುದ್ದೋ, ಬಾಹಿಕೋ ಭದ್ದಮತ್ಥು ತೇ.

೧೬. ಅನ್ಧಕಾರತಿಮಿಸಾಯಂ, ತುಙ್ಗೇ ಉಪರಿಪಬ್ಬತೇ;

ಸಾ ಮಂ ಸಣ್ಹೇನ ಮುದುನಾ, ಮಾ ಪಾದಂ ಖಲಿ [ಖಣಿ (ಸೀ. ಸ್ಯಾ. ಪೀ.)] ಯಸ್ಮನಿ.

೧೭. ಅಸಂಸಯಂ ಜಾತಿಖಯನ್ತದಸ್ಸೀ, ನ ಗಬ್ಭಸೇಯ್ಯಂ ಪುನರಾವಜಿಸ್ಸಂ;

ಅಯಮನ್ತಿಮಾ ಪಚ್ಛಿಮಾ ಗಬ್ಭಸೇಯ್ಯಾ [ಅಯಂ ಹಿ ಮೇ ಅನ್ತಿಮಾ ಗಬ್ಭಸೇಯ್ಯಾ (ಸೀ. ಪೀ.)], ಖೀಣೋ ಮೇ ಸಂಸಾರೋ ಪುನಬ್ಭವಾಯಾತಿ.

ಅಟ್ಠಸದ್ದಜಾತಕಂ ದುತಿಯಂ.