೪೧೭. ಕಚ್ಚಾನಿಜಾತಕಂ (೧)

೧. ಓದಾತವತ್ಥಾ ಸುಚಿ ಅಲ್ಲಕೇಸಾ, ಕಚ್ಚಾನಿ ಕಿಂ ಕುಮ್ಭಿಮಧಿಸ್ಸಯಿತ್ವಾ [ಕುಮ್ಭಿಮಪಸ್ಸಯಿತ್ವಾ (ಪೀ.)];

ಪಿಟ್ಠಾ ತಿಲಾ ಧೋವಸಿ ತಣ್ಡುಲಾನಿ, ತಿಲೋದನೋ ಹೇಹಿತಿ ಕಿಸ್ಸ ಹೇತು.

೨. ನ ಖೋ ಅಯಂ ಬ್ರಾಹ್ಮಣ ಭೋಜನತ್ಥಾ [ಭೋಜನತ್ಥಂ (ಸ್ಯಾ.)], ತಿಲೋದನೋ ಹೇಹಿತಿ ಸಾಧುಪಕ್ಕೋ;

ಧಮ್ಮೋ ಮತೋ ತಸ್ಸ ಪಹುತ್ತಮಜ್ಜ [ಪಹೂನಮಜ್ಜ (ಸ್ಯಾ.), ಪಹೂತಮಜ್ಜ (ಸೀ.), ಬಹೂತಮಜ್ಜಾ (ಪೀ.)], ಅಹಂ ಕರಿಸ್ಸಾಮಿ ಸುಸಾನಮಜ್ಝೇ.

೩. ಅನುವಿಚ್ಚ ಕಚ್ಚಾನಿ ಕರೋಹಿ ಕಿಚ್ಚಂ, ಧಮ್ಮೋ ಮತೋ ಕೋ ನು ತವೇವ [ತವೇತ (ಸೀ. ಸ್ಯಾ. ಪೀ.)] ಸಂಸಿ;

ಸಹಸ್ಸನೇತ್ತೋ ಅತುಲಾನುಭಾವೋ, ನ ಮಿಯ್ಯತೀ ಧಮ್ಮವರೋ ಕದಾಚಿ.

೪. ದಳ್ಹಪ್ಪಮಾಣಂ ಮಮ ಏತ್ಥ ಬ್ರಹ್ಮೇ, ಧಮ್ಮೋ ಮತೋ ನತ್ಥಿ ಮಮೇತ್ಥ ಕಙ್ಖಾ;

ಯೇ ಯೇವ ದಾನಿ ಪಾಪಾ ಭವನ್ತಿ, ತೇ ತೇವ ದಾನಿ ಸುಖಿತಾ ಭವನ್ತಿ.

೫. ಸುಣಿಸಾ ಹಿ ಮಯ್ಹಂ ವಞ್ಝಾ ಅಹೋಸಿ, ಸಾ ಮಂ ವಧಿತ್ವಾನ ವಿಜಾಯಿ ಪುತ್ತಂ;

ಸಾ ದಾನಿ ಸಬ್ಬಸ್ಸ ಕುಲಸ್ಸ ಇಸ್ಸರಾ, ಅಹಂ ಪನಮ್ಹಿ [ವಸಾಮಿ (ಸ್ಯಾ.)] ಅಪವಿದ್ಧಾ ಏಕಿಕಾ.

೬. ಜೀವಾಮಿ ವೋಹಂ ನ ಮತೋಹಮಸ್ಮಿ [ನಾಹಂ ಮತೋಸ್ಮಿ (ಸೀ. ಪೀ.)], ತವೇವ ಅತ್ಥಾಯ ಇಧಾಗತೋಸ್ಮಿ;

ಯಾ ತಂ ವಧಿತ್ವಾನ ವಿಜಾಯಿ ಪುತ್ತಂ, ಸಹಾವ ಪುತ್ತೇನ ಕರೋಮಿ ಭಸ್ಮಂ.

೭. ಏವಞ್ಚ [ಏತಞ್ಚ (ಸೀ. ಪೀ.)] ತೇ ರುಚ್ಚತಿ ದೇವರಾಜ, ಮಮೇವ ಅತ್ಥಾಯ ಇಧಾಗತೋಸಿ;

ಅಹಞ್ಚ ಪುತ್ತೋ ಸುಣಿಸಾ ಚ ನತ್ತಾ, ಸಮ್ಮೋದಮಾನಾ ಘರಮಾವಸೇಮ.

೮. ಏವಞ್ಚ ತೇ ರುಚ್ಚತಿ ಕಾತಿಯಾನಿ, ಹತಾಪಿ ಸನ್ತಾ ನ ಜಹಾಸಿ ಧಮ್ಮಂ;

ತುವಞ್ಚ [ತ್ವಞ್ಚ (ಪೀ. ಕ.)] ಪುತ್ತೋ ಸುಣಿಸಾ ಚ ನತ್ತಾ, ಸಮ್ಮೋದಮಾನಾ ಘರಮಾವಸೇಥ.

೯. ಸಾ ಕಾತಿಯಾನೀ ಸುಣಿಸಾಯ ಸದ್ಧಿಂ, ಸಮ್ಮೋದಮಾನಾ ಘರಮಾವಸಿತ್ಥ;

ಪುತ್ತೋ ಚ ನತ್ತಾ ಚ ಉಪಟ್ಠಹಿಂಸು, ದೇವಾನಮಿನ್ದೇನ ಅಧಿಗ್ಗಹೀತಾತಿ.

ಕಚ್ಚಾನಿಜಾತಕಂ ಪಠಮಂ.