೪೧೧. ಸುಸೀಮಜಾತಕಂ (೭-೨-೬)

೧೧೪. ಕಾಳಾನಿ ಕೇಸಾನಿ ಪುರೇ ಅಹೇಸುಂ, ಜಾತಾನಿ ಸೀಸಮ್ಹಿ ಯಥಾಪದೇಸೇ;

ತಾನಜ್ಜ ಸೇತಾನಿ ಸುಸೀಮ [ಸುಸಿಮ (ಕ.)] ದಿಸ್ವಾ, ಧಮ್ಮಂ ಚರ ಬ್ರಹ್ಮಚರಿಯಸ್ಸ ಕಾಲೋ.

೧೧೫. ಮಮೇವ ದೇವ ಪಲಿತಂ ನ ತುಯ್ಹಂ, ಮಮೇವ ಸೀಸಂ ಮಮ ಉತ್ತಮಙ್ಗಂ;

‘‘ಅತ್ಥಂ ಕರಿಸ್ಸ’’ನ್ತಿ ಮುಸಾ ಅಭಾಣಿಂ [ಅಭಾಸಿಂ (ಕ.)], ಏಕಾಪರಾಧಂ ಖಮ ರಾಜಸೇಟ್ಠ.

೧೧೬. ದಹರೋ ತುವಂ ದಸ್ಸನಿಯೋಸಿ ರಾಜ, ಪಠಮುಗ್ಗತೋ ಹೋಸಿ [ಹೋಹಿ (ಸೀ.), ಹೋತಿ (ಕ.)] ಯಥಾ ಕಳೀರೋ;

ರಜ್ಜಞ್ಚ ಕಾರೇಹಿ ಮಮಞ್ಚ ಪಸ್ಸ, ಮಾ ಕಾಲಿಕಂ ಅನುಧಾವೀ ಜನಿನ್ದ.

೧೧೭. ಪಸ್ಸಾಮಿ ವೋಹಂ ದಹರಿಂ ಕುಮಾರಿಂ, ಸಾಮಟ್ಠಪಸ್ಸಂ ಸುತನುಂ ಸುಮಜ್ಝಂ;

ಕಾಳಪ್ಪವಾಳಾವ ಪವೇಲ್ಲಮಾನಾ, ಪಲೋಭಯನ್ತೀವ [ಸಾ ಲೋಭಯನ್ತೀವ (ಪೀ.)] ನರೇಸು ಗಚ್ಛತಿ.

೧೧೮. ತಮೇನ ಪಸ್ಸಾಮಿಪರೇನ ನಾರಿಂ, ಆಸೀತಿಕಂ ನಾವುತಿಕಂ ವ ಜಚ್ಚಾ;

ದಣ್ಡಂ ಗಹೇತ್ವಾನ ಪವೇಧಮಾನಂ, ಗೋಪಾನಸೀಭೋಗ್ಗಸಮಂ ಚರನ್ತಿಂ.

೧೧೯. ಸೋಹಂ ತಮೇವಾನುವಿಚಿನ್ತಯನ್ತೋ, ಏಕೋ ಸಯಾಮಿ [ಪಸ್ಸಾಮಿ (ಕ.)] ಸಯನಸ್ಸ ಮಜ್ಝೇ;

‘‘ಅಹಮ್ಪಿ ಏವಂ’’ ಇತಿ ಪೇಕ್ಖಮಾನೋ, ನ ಗಹೇ ರಮೇ [ನ ಗೇಹೇ ರಮೇ (ಸೀ.), ಗೇಹೇ ನ ರಮೇ (ಸ್ಯಾ. ಕ.)] ಬ್ರಹ್ಮಚರಿಯಸ್ಸ ಕಾಲೋ.

೧೨೦. ರಜ್ಜುವಾಲಮ್ಬನೀ ಚೇಸಾ, ಯಾ ಗೇಹೇ ವಸತೋ ರತಿ;

ಏವಮ್ಪಿ ಛೇತ್ವಾನ ವಜನ್ತಿ ಧೀರಾ, ಅನಪೇಕ್ಖಿನೋ ಕಾಮಸುಖಂ ಪಹಾಯಾತಿ.

ಸುಸೀಮಜಾತಕಂ ಛಟ್ಠಂ.