೪೦೧. ಪಣ್ಣಕಜಾತಕಂ (೭-೧-೬)

೩೯. ಪಣ್ಣಕಂ [ದಸಣ್ಣಕಂ (ಸೀ. ಸ್ಯಾ. ಪೀ.)] ತಿಖಿಣಧಾರಂ, ಅಸಿಂ ಸಮ್ಪನ್ನಪಾಯಿನಂ;

ಪರಿಸಾಯಂ ಪುರಿಸೋ ಗಿಲತಿ, ಕಿಂ ದುಕ್ಕರತರಂ ತತೋ;

ಯದಞ್ಞಂ ದುಕ್ಕರಂ ಠಾನಂ, ತಂ ಮೇ ಅಕ್ಖಾಹಿ ಪುಚ್ಛಿತೋ.

೪೦. ಗಿಲೇಯ್ಯ ಪುರಿಸೋ ಲೋಭಾ, ಅಸಿಂ ಸಮ್ಪನ್ನಪಾಯಿನಂ;

ಯೋ ಚ ವಜ್ಜಾ ದದಾಮೀತಿ, ತಂ ದುಕ್ಕರತರಂ ತತೋ;

ಸಬ್ಬಞ್ಞಂ ಸುಕರಂ ಠಾನಂ, ಏವಂ ಜಾನಾಹಿ ಮದ್ದವ [ಮಾಗಧ (ಸೀ. ಸ್ಯಾ. ಪೀ.)].

೪೧. ಬ್ಯಾಕಾಸಿ ಆಯುರೋ ಪಞ್ಹಂ, ಅತ್ಥಂ [ಅತ್ಥ (ಪೀ. ಸೀ. ನಿಯ್ಯ)] ಧಮ್ಮಸ್ಸ ಕೋವಿದೋ;

ಪುಕ್ಕುಸಂ ದಾನಿ ಪುಚ್ಛಾಮಿ, ಕಿಂ ದುಕ್ಕರತರಂ ತತೋ;

ಯದಞ್ಞಂ ದುಕ್ಕರಂ ಠಾನಂ, ತಂ ಮೇ ಅಕ್ಖಾಹಿ ಪುಚ್ಛಿತೋ.

೪೨. ನ ವಾಚಮುಪಜೀವನ್ತಿ, ಅಫಲಂ ಗಿರಮುದೀರಿತಂ;

ಯೋ ಚ ದತ್ವಾ ಅವಾಕಯಿರಾ, ತಂ ದುಕ್ಕರತರಂ ತತೋ;

ಸಬ್ಬಞ್ಞಂ ಸುಕರಂ ಠಾನಂ, ಏವಂ ಜಾನಾಹಿ ಮದ್ದವ.

೪೩. ಬ್ಯಾಕಾಸಿ ಪುಕ್ಕುಸೋ ಪಞ್ಹಂ, ಅತ್ಥಂ ಧಮ್ಮಸ್ಸ ಕೋವಿದೋ;

ಸೇನಕಂ ದಾನಿ ಪುಚ್ಛಾಮಿ, ಕಿಂ ದುಕ್ಕರತರಂ ತತೋ;

ಯದಞ್ಞಂ ದುಕ್ಕರಂ ಠಾನಂ, ತಂ ಮೇ ಅಕ್ಖಾಹಿ ಪುಚ್ಛಿತೋ.

೪೪. ದದೇಯ್ಯ ಪುರಿಸೋ ದಾನಂ, ಅಪ್ಪಂ ವಾ ಯದಿ ವಾ ಬಹುಂ;

ಯೋ ಚ ದತ್ವಾ ನಾನುತಪ್ಪೇ [ತಪೇ (ಸೀ. ಪೀ.)], ತಂ ದುಕ್ಕರತರಂ ತತೋ;

ಸಬ್ಬಞ್ಞಂ ಸುಕರಂ ಠಾನಂ, ಏವಂ ಜಾನಾಹಿ ಮದ್ದವ.

೪೫. ಬ್ಯಾಕಾಸಿ ಆಯುರೋ ಪಞ್ಹಂ, ಅಥೋ ಪುಕ್ಕುಸಪೋರಿಸೋ;

ಸಬ್ಬೇ ಪಞ್ಹೇ ಅತಿಭೋತಿ, ಯಥಾ ಭಾಸತಿ ಸೇನಕೋತಿ.

ಪಣ್ಣಕ [ದಸಣ್ಣಕ (ಸೀ. ಸ್ಯಾ. ಪೀ.)] ಜಾತಕಂ ಛಟ್ಠಂ.