೪೦೨. ಸತ್ತುಭಸ್ತಜಾತಕಂ (೭-೧-೭)

೪೬. ವಿಬ್ಭನ್ತಚಿತ್ತೋ ಕುಪಿತಿನ್ದ್ರಿಯೋಸಿ, ನೇತ್ತೇಹಿ ತೇ ವಾರಿಗಣಾ ಸವನ್ತಿ;

ಕಿಂ ತೇ ನಟ್ಠಂ ಕಿಂ ಪನ ಪತ್ಥಯಾನೋ, ಇಧಾಗಮಾ ಬ್ರಹ್ಮೇ ತದಿಙ್ಘ [ಬ್ರಾಹ್ಮಣ ಇಙ್ಘ (ಸೀ. ಸ್ಯಾ.)] ಬ್ರೂಹಿ.

೪೭. ಮಿಯ್ಯೇಥ ಭರಿಯಾ ವಜತೋ ಮಮಜ್ಜ, ಅಗಚ್ಛತೋ ಮರಣಮಾಹ ಯಕ್ಖೋ;

ಏತೇನ ದುಕ್ಖೇನ ಪವೇಧಿತೋಸ್ಮಿ, ಅಕ್ಖಾಹಿ ಮೇ ಸೇನಕ ಏತಮತ್ಥಂ.

೪೮. ಬಹೂನಿ ಠಾನಾನಿ ವಿಚಿನ್ತಯಿತ್ವಾ, ಯಮೇತ್ಥ ವಕ್ಖಾಮಿ ತದೇವ ಸಚ್ಚಂ;

ಮಞ್ಞಾಮಿ ತೇ ಬ್ರಾಹ್ಮಣ ಸತ್ತುಭಸ್ತಂ, ಅಜಾನತೋ ಕಣ್ಹಸಪ್ಪೋ ಪವಿಟ್ಠೋ.

೪೯. ಆದಾಯ ದಣ್ಡಂ ಪರಿಸುಮ್ಭ ಭಸ್ತಂ, ಪಸ್ಸೇಳಮೂಗಂ ಉರಗಂ ದುಜಿವ್ಹಂ [ದಿಜಿವ್ಹಂ (ಸೀ. ಪೀ.)];

ಛಿನ್ದಜ್ಜ ಕಙ್ಖಂ ವಿಚಿಕಿಚ್ಛಿತಾನಿ, ಭುಜಙ್ಗಮಂ ಪಸ್ಸ ಪಮುಞ್ಚ ಭಸ್ತಂ.

೫೦. ಸಂವಿಗ್ಗರೂಪೋ ಪರಿಸಾಯ ಮಜ್ಝೇ, ಸೋ ಬ್ರಾಹ್ಮಣೋ ಸತ್ತುಭಸ್ತಂ ಪಮುಞ್ಚಿ;

ಅಥ ನಿಕ್ಖಮಿ ಉರಗೋ ಉಗ್ಗತೇಜೋ, ಆಸೀವಿಸೋ ಸಪ್ಪೋ ಫಣಂ ಕರಿತ್ವಾ.

೫೧. ಸುಲದ್ಧಲಾಭಾ ಜನಕಸ್ಸ ರಞ್ಞೋ, ಯೋ ಪಸ್ಸತೀ ಸೇನಕಂ ಸಾಧುಪಞ್ಞಂ;

ವಿವಟ್ಟಛದ್ದೋ [ವಿವತ್ತಚ್ಛದ್ದೋ (ಸೀ.), ವಿವಟ್ಟಚ್ಛದೋ (ಸ್ಯಾ.), ವಿವಟ್ಟಚ್ಛದ್ದಾ (ಪೀ.)] ನುಸಿ ಸಬ್ಬದಸ್ಸೀ, ಞಾಣಂ ನು ತೇ ಬ್ರಾಹ್ಮಣ ಭಿಂಸರೂಪಂ.

೫೨. ಇಮಾನಿ ಮೇ ಸತ್ತಸತಾನಿ ಅತ್ಥಿ, ಗಣ್ಹಾಹಿ ಸಬ್ಬಾನಿ ದದಾಮಿ ತುಯ್ಹಂ;

ತಯಾ ಹಿ ಮೇ ಜೀವಿತಮಜ್ಜ ಲದ್ಧಂ, ಅಥೋಪಿ ಭರಿಯಾಯ ಮಕಾಸಿ ಸೋತ್ಥಿಂ.

೫೩. ನ ಪಣ್ಡಿತಾ ವೇತನಮಾದಿಯನ್ತಿ, ಚಿತ್ರಾಹಿ ಗಾಥಾಹಿ ಸುಭಾಸಿತಾಹಿ;

ಇತೋಪಿ ತೇ ಬ್ರಹ್ಮೇ ದದನ್ತು ವಿತ್ತಂ, ಆದಾಯ ತ್ವಂ ಗಚ್ಛ ಸಕಂ ನಿಕೇತನ್ತಿ.

ಸತ್ತುಭಸ್ತಜಾತಕಂ [ಸೇನಕಜಾತಕಂ (ಸ್ಯಾ.)] ಸತ್ತಮಂ.