೪೦೦. ದಬ್ಭಪುಪ್ಫಜಾತಕಂ (೭-೧-೫)

೨೯. ಅನುತೀರಚಾರೀ ಭದ್ದನ್ತೇ, ಸಹಾಯಮನುಧಾವ ಮಂ;

ಮಹಾ ಮೇ ಗಹಿತೋ [ರೋಹಿತೋ (ಕ.)] ಮಚ್ಛೋ, ಸೋ ಮಂ ಹರತಿ ವೇಗಸಾ.

೩೦. ಗಮ್ಭೀರಚಾರೀ ಭದ್ದನ್ತೇ, ದಳ್ಹಂ ಗಣ್ಹಾಹಿ ಥಾಮಸಾ;

ಅಹಂ ತಂ ಉದ್ಧರಿಸ್ಸಾಮಿ, ಸುಪಣ್ಣೋ ಉರಗಾಮಿವ [ಉರಗಮ್ಮಿವ (ಸೀ. ಸ್ಯಾ. ಪೀ.)].

೩೧. ವಿವಾದೋ ನೋ ಸಮುಪ್ಪನ್ನೋ, ದಬ್ಭಪುಪ್ಫ ಸುಣೋಹಿ ಮೇ;

ಸಮೇಹಿ ಮೇಧಗಂ [ಮೇಧಕಂ (ಪೀ.)] ಸಮ್ಮ, ವಿವಾದೋ ವೂಪಸಮ್ಮತಂ.

೩೨. ಧಮ್ಮಟ್ಠೋಹಂ ಪುರೇ ಆಸಿಂ, ಬಹೂ ಅಡ್ಡಾ ಮೇ ತೀರಿತಾ [ಬಹುಅಟ್ಟಂ ಮೇ ತೀರಿತಂ (ಸೀ.), ಬಹುಅಟ್ಟಂವ ತೀರಿತಂ (ಸ್ಯಾ.), ಬಹು ಅತ್ಥಂ ಮೇ ತೀರಿತಂ (ಪೀ.)];

ಸಮೇಮಿ ಮೇಧಗಂ ಸಮ್ಮ, ವಿವಾದೋ ವೂಪಸಮ್ಮತಂ.

೩೩. ಅನುತೀರಚಾರಿ ನಙ್ಗುಟ್ಠಂ, ಸೀಸಂ ಗಮ್ಭೀರಚಾರಿನೋ;

ಅಚ್ಚಾಯಂ [ಅಥಾಯಂ (ಸೀ. ಪೀ.)] ಮಜ್ಝಿಮೋ ಖಣ್ಡೋ, ಧಮ್ಮಟ್ಠಸ್ಸ ಭವಿಸ್ಸತಿ.

೩೪. ಚಿರಮ್ಪಿ ಭಕ್ಖೋ ಅಭವಿಸ್ಸ, ಸಚೇ ನ ವಿವದೇಮಸೇ;

ಅಸೀಸಕಂ ಅನಙ್ಗುಟ್ಠಂ, ಸಿಙ್ಗಾಲೋ ಹರತಿ ರೋಹಿತಂ.

೩೫. ಯಥಾಪಿ ರಾಜಾ ನನ್ದೇಯ್ಯ, ರಜ್ಜಂ ಲದ್ಧಾನ ಖತ್ತಿಯೋ;

ಏವಾಹಮಜ್ಜ ನನ್ದಾಮಿ, ದಿಸ್ವಾ ಪುಣ್ಣಮುಖಂ ಪತಿಂ.

೩೬. ಕಥಂ ನು ಥಲಜೋ ಸನ್ತೋ, ಉದಕೇ ಮಚ್ಛಂ ಪರಾಮಸಿ;

ಪುಟ್ಠೋ ಮೇ ಸಮ್ಮ ಅಕ್ಖಾಹಿ, ಕಥಂ ಅಧಿಗತಂ ತಯಾ.

೩೭. ವಿವಾದೇನ ಕಿಸಾ ಹೋನ್ತಿ, ವಿವಾದೇನ ಧನಕ್ಖಯಾ;

ಜೀನಾ ಉದ್ದಾ ವಿವಾದೇನ, ಭುಞ್ಜ ಮಾಯಾವಿ ರೋಹಿತಂ.

೩೮. ಏವಮೇವ ಮನುಸ್ಸೇಸು, ವಿವಾದೋ ಯತ್ಥ ಜಾಯತಿ;

ಧಮ್ಮಟ್ಠಂ ಪಟಿಧಾವನ್ತಿ, ಸೋ ಹಿ ನೇಸಂ ವಿನಾಯಕೋ;

ಧನಾಪಿ ತತ್ಥ ಜೀಯನ್ತಿ, ರಾಜಕೋಸೋ ಪವಡ್ಢತೀತಿ [ಚ ವಡ್ಢತಿ (ಪೀ.)].

ದಬ್ಭಪುಪ್ಫಜಾತಕಂ ಪಞ್ಚಮಂ.