೩೭೪. ಚೂಳಧನುಗ್ಗಹಜಾತಕಂ (೫-೩-೪)

೧೨೮. ಸಬ್ಬಂ ಭಣ್ಡಂ ಸಮಾದಾಯ, ಪಾರಂ ತಿಣ್ಣೋಸಿ ಬ್ರಾಹ್ಮಣ;

ಪಚ್ಚಾಗಚ್ಛ ಲಹುಂ ಖಿಪ್ಪಂ, ಮಮ್ಪಿ ತಾರೇಹಿ ದಾನಿತೋ [ದಾನಿಭೋ (ಸ್ಯಾ.)].

೧೨೯. ಅಸನ್ಥುತಂ ಮಂ ಚಿರಸನ್ಥುತೇನ, ನಿಮೀನಿ ಭೋತೀ ಅದ್ಧುವಂ ಧುವೇನ;

ಮಯಾಪಿ ಭೋತೀ ನಿಮಿನೇಯ್ಯ ಅಞ್ಞಂ, ಇತೋ ಅಹಂ ದೂರತರಂ ಗಮಿಸ್ಸಂ.

೧೩೦. ಕಾಯಂ ಏಳಗಲಾಗುಮ್ಬೇ [ಏಳಗಣಗುಮ್ಬೇ (ಕ.)], ಕರೋತಿ ಅಹುಹಾಸಿಯಂ;

ನಯೀಧ ನಚ್ಚಗೀತಂ ವಾ [ನಯಿಧ ನಚ್ಚಂ ವಾ ಗೀತಂ ವಾ (ಸೀ. ಸ್ಯಾ. ಪೀ.)], ತಾಳಂ ವಾ ಸುಸಮಾಹಿತಂ;

ಅನಮ್ಹಿಕಾಲೇ [ಅನಮ್ಹಕಾಲೇ (ಪೀ.)] ಸುಸೋಣಿ [ಸುಸ್ಸೋಣಿ (ಸೀ. ಸ್ಯಾ. ಪೀ.)], ಕಿಂ ನು ಜಗ್ಘಸಿ ಸೋಭನೇ [ಸೋಭಣೇ (ಪೀ. ಕ.)].

೧೩೧. ಸಿಙ್ಗಾಲ ಬಾಲ ದುಮ್ಮೇಧ, ಅಪ್ಪಪಞ್ಞೋಸಿ ಜಮ್ಬುಕ;

ಜೀನೋ ಮಚ್ಛಞ್ಚ ಪೇಸಿಞ್ಚ, ಕಪಣೋ ವಿಯ ಝಾಯಸಿ.

೧೩೨. ಸುದಸ್ಸಂ ವಜ್ಜಮಞ್ಞೇಸಂ, ಅತ್ತನೋ ಪನ ದುದ್ದಸಂ;

ಜೀನಾ ಪತಿಞ್ಚ ಜಾರಞ್ಚ, ಮಞ್ಞೇ ತ್ವಞ್ಞೇವ [ಮಮ್ಪಿ ತ್ವಞ್ಞೇವ (ಸೀ. ಸ್ಯಾ.), ತ್ವಮ್ಪಿ ಮಞ್ಞೇವ (ಪೀ.)] ಝಾಯಸಿ.

೧೩೩. ಏವಮೇತಂ ಮಿಗರಾಜ, ಯಥಾ ಭಾಸಸಿ ಜಮ್ಬುಕ;

ಸಾ ನೂನಾಹಂ ಇತೋ ಗನ್ತ್ವಾ, ಭತ್ತು ಹೇಸ್ಸಂ ವಸಾನುಗಾ.

೧೩೪. ಯೋ ಹರೇ ಮತ್ತಿಕಂ ಥಾಲಂ, ಕಂಸಥಾಲಮ್ಪಿ ಸೋ ಹರೇ;

ಕತಞ್ಚೇವ [ಕತಂಯೇವ (ಸೀ. ಸ್ಯಾ. ಪೀ.)] ತಯಾ ಪಾಪಂ, ಪುನಪೇವಂ ಕರಿಸ್ಸಸೀತಿ.

ಚೂಳಧನುಗ್ಗಹಜಾತಕಂ ಚತುತ್ಥಂ.