೩೩೮. ಥುಸಜಾತಕಂ (೪-೪-೮)

೧೪೯. ವಿದಿತಂ ಥುಸಂ ಉನ್ದುರಾನಂ [ಉನ್ದೂರಾನಂ (ಕ.)], ವಿದಿತಂ ಪನ ತಣ್ಡುಲಂ;

ಥುಸಂ ಥುಸಂ [ಥುಸಂ ಥೂಲಂ (ಸೀ.)] ವಿವಜ್ಜೇತ್ವಾ, ತಣ್ಡುಲಂ ಪನ ಖಾದರೇ.

೧೫೦. ಯಾ ಮನ್ತನಾ ಅರಞ್ಞಸ್ಮಿಂ, ಯಾ ಚ ಗಾಮೇ ನಿಕಣ್ಣಿಕಾ;

ಯಞ್ಚೇತಂ ಇತಿ ಚೀತಿ ಚ, ಏತಮ್ಪಿ ವಿದಿತಂ ಮಯಾ.

೧೫೧. ಧಮ್ಮೇನ ಕಿರ ಜಾತಸ್ಸ, ಪಿತಾ ಪುತ್ತಸ್ಸ ಮಕ್ಕಟೋ;

ದಹರಸ್ಸೇವ ಸನ್ತಸ್ಸ, ದನ್ತೇಹಿ ಫಲಮಚ್ಛಿದಾ.

೧೫೨. ಯಮೇತಂ ಪರಿಸಪ್ಪಸಿ [ಪರಿಸಬ್ಬೇಸಿ (ಕ.)], ಅಜಕಾಣೋವ ಸಾಸಪೇ;

ಯೋಪಾಯಂ ಹೇಟ್ಠತೋ ಸೇತಿ [ಸೇಸಿ (ಸೀ.)], ಏತಮ್ಪಿ ವಿದಿತಂ ಮಯಾತಿ.

ಥುಸಜಾತಕಂ ಅಟ್ಠಮಂ.