೩೧೫. ಸಬ್ಬಮಂಸಲಾಭಜಾತಕಂ (೪-೨-೫)

೫೭. ಫರುಸಾ ವತ ತೇ ವಾಚಾ, ಮಂಸಂ [ಸಮ್ಮ (ಪೀ. ಕ.)] ಯಾಚನಕೋ ಅಸಿ [ಚಸಿ (ಪೀ.)];

ಕಿಲೋಮಸದಿಸೀ [ಕಿಲೋಮಸ್ಸ ಸದಿಸಾ (ಪೀ.)] ವಾಚಾ, ಕಿಲೋಮಂ ಸಮ್ಮ ದಮ್ಮಿ ತೇ.

೫೮. ಅಙ್ಗಮೇತಂ ಮನುಸ್ಸಾನಂ, ಭಾತಾ ಲೋಕೇ ಪವುಚ್ಚತಿ;

ಅಙ್ಗಸ್ಸ ಸದಿಸೀ ವಾಚಾ [ಅಙ್ಗಸ್ಸದಿಸೀ ತೇ ವಾಚಾ (ಕ.)], ಅಙ್ಗಂ ಸಮ್ಮ ದದಾಮಿ ತೇ.

೫೯. ತಾತಾತಿ ಪುತ್ತೋ ವದಮಾನೋ, ಕಮ್ಪೇತಿ [ಸಮ್ಮೇತಿ (ಕ.)] ಹದಯಂ ಪಿತು;

ಹದಯಸ್ಸ ಸದಿಸೀ [ಹದಯಸ್ಸದಿಸೀ (ಕ.)] ವಾಚಾ, ಹದಯಂ ಸಮ್ಮ ದಮ್ಮಿ ತೇ.

೬೦. ಯಸ್ಸ ಗಾಮೇ ಸಖಾ ನತ್ಥಿ, ಯಥಾರಞ್ಞಂ ತಥೇವ ತಂ;

ಸಬ್ಬಸ್ಸ ಸದಿಸೀ ವಾಚಾ, ಸಬ್ಬಂ ಸಮ್ಮ ದದಾಮಿ ತೇತಿ.

ಸಬ್ಬಮಂಸಲಾಭಜಾತಕಂ [ಮಂಸಜಾತಕಂ (ಸೀ. ಸ್ಯಾ. ಪೀ.)] ಪಞ್ಚಮಂ.