೫. ಕುಮ್ಭವಗ್ಗೋ

೨೯೧. ಸುರಾಘಟಜಾತಕಂ (೨-೫-೧)

೧೨೧. ಸಬ್ಬಕಾಮದದಂ ಕುಮ್ಭಂ, ಕುಟಂ ಲದ್ಧಾನ ಧುತ್ತಕೋ;

ಯಾವ ನಂ ಅನುಪಾಲೇತಿ, ತಾವ ಸೋ ಸುಖಮೇಧತಿ.

೧೨೨. ಯದಾ ಮತ್ತೋ ಚ ದಿತ್ತೋ ಚ, ಪಮಾದಾ ಕುಮ್ಭಮಬ್ಭಿದಾ;

ತದಾ ನಗ್ಗೋ ಚ ಪೋತ್ಥೋ ಚ, ಪಚ್ಛಾ ಬಾಲೋ ವಿಹಞ್ಞತಿ.

೧೨೩. ಏವಮೇವ ಯೋ ಧನಂ ಲದ್ಧಾ, ಪಮತ್ತೋ [ಅಮತ್ತಾ (ಸೀ.), ಅಮತ್ತೋ (ಪೀ.)] ಪರಿಭುಞ್ಜತಿ;

ಪಚ್ಛಾ ತಪ್ಪತಿ ದುಮ್ಮೇಧೋ, ಕುಟಂ ಭಿತ್ವಾವ [ಕುಟಂ ಭಿನ್ನೋವ (ಸೀ. ಪೀ.), ಕುಟಭಿನ್ನೋವ (?)] ಧುತ್ತಕೋತಿ.

ಸುರಾಘಟ [ಭದ್ರಘಟ (ಸೀ. ಪೀ.), ಭದ್ರಘಟಭೇದಕ (ಸ್ಯಾ.)] ಜಾತಕಂ ಪಠಮಂ.

೨೯೨. ಸುಪತ್ತಜಾತಕಂ (೩-೫-೨)

೧೨೪. ಬಾರಾಣಸ್ಯಂ [ಬಾರಾಣಸ್ಸಂ (ಸೀ. ಪೀ.)] ಮಹಾರಾಜ, ಕಾಕರಾಜಾ ನಿವಾಸಕೋ [ನಿವಾಸಿಕೋ (ಸೀ. ಪೀ.)];

ಅಸೀತಿಯಾ ಸಹಸ್ಸೇಹಿ, ಸುಪತ್ತೋ ಪರಿವಾರಿತೋ.

೧೨೫. ತಸ್ಸ ದೋಹಳಿನೀ ಭರಿಯಾ, ಸುಫಸ್ಸಾ ಭಕ್ಖಿತುಮಿಚ್ಛತಿ [ಮಚ್ಛಮಿಚ್ಛತಿ (ಸೀ. ಪೀ.)];

ರಞ್ಞೋ ಮಹಾನಸೇ ಪಕ್ಕಂ, ಪಚ್ಚಗ್ಘಂ ರಾಜಭೋಜನಂ.

೧೨೬. ತೇಸಾಹಂ ಪಹಿತೋ ದೂತೋ, ರಞ್ಞೋ ಚಮ್ಹಿ ಇಧಾಗತೋ;

ಭತ್ತು ಅಪಚಿತಿಂ ಕುಮ್ಮಿ, ನಾಸಾಯಮಕರಂ [ಮಕರಿಂ (ಸೀ. ನಿಸ್ಸಯ)] ವಣನ್ತಿ.

ಸುಪತ್ತಜಾತಕಂ ದುತಿಯಂ.

೨೯೩. ಕಾಯನಿಬ್ಬಿನ್ದಜಾತಕಂ (೩-೫-೩)

೧೨೭. ಫುಟ್ಠಸ್ಸ ಮೇ ಅಞ್ಞತರೇನ ಬ್ಯಾಧಿನಾ, ರೋಗೇನ ಬಾಳ್ಹಂ ದುಖಿತಸ್ಸ ರುಪ್ಪತೋ;

ಪರಿಸುಸ್ಸತಿ ಖಿಪ್ಪಮಿದಂ ಕಳೇವರಂ, ಪುಪ್ಫಂ ಯಥಾ ಪಂಸುನಿ ಆತಪೇ ಕತಂ.

೧೨೮. ಅಜಞ್ಞಂ ಜಞ್ಞಸಙ್ಖಾತಂ, ಅಸುಚಿಂ ಸುಚಿಸಮ್ಮತಂ;

ನಾನಾಕುಣಪಪರಿಪೂರಂ, ಜಞ್ಞರೂಪಂ ಅಪಸ್ಸತೋ.

೧೨೯. ಧಿರತ್ಥುಮಂ ಆತುರಂ ಪೂತಿಕಾಯಂ, ಜೇಗುಚ್ಛಿಯಂ ಅಸ್ಸುಚಿಂ ಬ್ಯಾಧಿಧಮ್ಮಂ;

ಯತ್ಥಪ್ಪಮತ್ತಾ ಅಧಿಮುಚ್ಛಿತಾ ಪಜಾ, ಹಾಪೇನ್ತಿ ಮಗ್ಗಂ ಸುಗತೂಪಪತ್ತಿಯಾತಿ.

ಕಾಯನಿಬ್ಬಿನ್ದ [ಕಾಯವಿಚ್ಛನ್ದ (ಸೀ.), ಕಾಯವಿಚ್ಛಿನ್ದ (ಪೀ.)] ಜಾತಕಂ ತತಿಯಂ.

೨೯೪. ಜಮ್ಬುಖಾದಕಜಾತಕಂ (೩-೫-೪)

೧೩೦. ಕೋಯಂ ಬಿನ್ದುಸ್ಸರೋ ವಗ್ಗು, ಸರವನ್ತಾನ [ಪವದನ್ತಾನ (ಸೀ. ಪೀ.)] ಮುತ್ತಮೋ;

ಅಚ್ಚುತೋ ಜಮ್ಬುಸಾಖಾಯ, ಮೋರಚ್ಛಾಪೋವ ಕೂಜತಿ.

೧೩೧. ಕುಲಪುತ್ತೋವ ಜಾನಾತಿ [ಕುಲಪುತ್ತೋ ಪಜಾನಾತಿ (ಸ್ಯಾ. ಕ.)], ಕುಲಪುತ್ತಂ [ಕುಲಪುತ್ತೇ (ಸೀ. ಪೀ.)] ಪಸಂಸಿತುಂ;

ಬ್ಯಗ್ಘಚ್ಛಾಪಸರೀವಣ್ಣ, ಭುಞ್ಜ ಸಮ್ಮ ದದಾಮಿ ತೇ.

೧೩೨. ಚಿರಸ್ಸಂ ವತ ಪಸ್ಸಾಮಿ, ಮುಸಾವಾದೀ ಸಮಾಗತೇ;

ವನ್ತಾದಂ ಕುಣಪಾದಞ್ಚ, ಅಞ್ಞಮಞ್ಞಂ ಪಸಂಸಕೇತಿ.

ಜಮ್ಬುಖಾದಕಜಾತಕಂ ಚತುತ್ಥಂ.

೨೯೫. ಅನ್ತಜಾತಕಂ (೩-೫-೫)

೧೩೩. ಉಸಭಸ್ಸೇವ ತೇ ಖನ್ಧೋ, ಸೀಹಸ್ಸೇವ ವಿಜಮ್ಭಿತಂ;

ಮಿಗರಾಜ ನಮೋ ತ್ಯತ್ಥು, ಅಪಿ ಕಿಞ್ಚಿ ಲಭಾಮಸೇ.

೧೩೪. ಕುಲಪುತ್ತೋವ ಜಾನಾತಿ, ಕುಲಪುತ್ತಂ ಪಸಂಸಿತುಂ;

ಮಯೂರಗೀವಸಙ್ಕಾಸ, ಇತೋ ಪರಿಯಾಹಿ ವಾಯಸ.

೧೩೫. ಮಿಗಾನಂ ಸಿಙ್ಗಾಲೋ [ಕೋತ್ಥುಕೋ (ಸೀ. ಪೀ.), ಕೋಟ್ಠುಕೋ (ಸ್ಯಾ.)] ಅನ್ತೋ, ಪಕ್ಖೀನಂ ಪನ ವಾಯಸೋ;

ಏರಣ್ಡೋ ಅನ್ತೋ ರುಕ್ಖಾನಂ, ತಯೋ ಅನ್ತಾ ಸಮಾಗತಾತಿ.

ಅನ್ತಜಾತಕಂ ಪಞ್ಚಮಂ.

೨೯೬. ಸಮುದ್ದಜಾತಕಂ (೩-೫-೬)

೧೩೬. ಕೋ ನಾಯಂ [ಕೋ ನ್ವಾಯಂ (ಸ್ಯಾ.)] ಲೋಣತೋಯಸ್ಮಿಂ, ಸಮನ್ತಾ ಪರಿಧಾವತಿ;

ಮಚ್ಛೇ ಮಕರೇ ಚ ವಾರೇತಿ, ಊಮೀಸು ಚ ವಿಹಞ್ಞತಿ.

೧೩೭. ಅನನ್ತಪಾಯೀ ಸಕುಣೋ, ಅತಿತ್ತೋತಿ ದಿಸಾಸುತೋ;

ಸಮುದ್ದಂ ಪಾತುಮಿಚ್ಛಾಮಿ, ಸಾಗರಂ ಸರಿತಂ ಪತಿಂ.

೧೩೮. ಸೋ ಅಯಂ ಹಾಯತಿ ಚೇವ, ಪೂರತೇ ಚ ಮಹೋದಧಿ;

ನಾಸ್ಸ ನಾಯತಿ ಪೀತನ್ತೋ, ಅಪೇಯ್ಯೋ ಕಿರ ಸಾಗರೋತಿ.

ಸಮುದ್ದಜಾತಕಂ ಛಟ್ಠಂ.

೨೯೭. ಕಾಮವಿಲಾಪಜಾತಕಂ (೩-೫-೭)

೧೩೯. ಉಚ್ಚೇ ಸಕುಣ ಡೇಮಾನ, ಪತ್ತಯಾನ ವಿಹಙ್ಗಮ;

ವಜ್ಜಾಸಿ ಖೋ ತ್ವಂ ವಾಮೂರುಂ, ಚಿರಂ ಖೋ ಸಾ ಕರಿಸ್ಸತಿ [ಸರಿಸ್ಸತಿ (ಕ.)].

೧೪೦. ಇದಂ ಖೋ ಸಾ ನ ಜಾನಾತಿ, ಅಸಿಂ ಸತ್ತಿಞ್ಚ ಓಡ್ಡಿತಂ;

ಸಾ ಚಣ್ಡೀ ಕಾಹತಿ ಕೋಧಂ, ತಂ ಮೇ ತಪತಿ ನೋ ಇದಂ [ನೋ ಇಧ (ಸೀ. ಸ್ಯಾ. ಪೀ.)].

೧೪೧. ಏಸ ಉಪ್ಪಲಸನ್ನಾಹೋ, ನಿಕ್ಖಞ್ಚುಸ್ಸೀಸಕೋಹಿತಂ [ನಿಕ್ಖಮುಸ್ಸೀಸಕೇ ಕತಂ (ಸೀ. ಪೀ.), ನಿಕ್ಖಞ್ಚುಸ್ಸೀಸಕೇ ಕತಂ (ಸ್ಯಾ.)];

ಕಾಸಿಕಞ್ಚ ಮುದುಂ ವತ್ಥಂ, ತಪ್ಪೇತು ಧನಿಕಾ ಪಿಯಾತಿ [ಧನಕಾಮಿಯಾತಿ (ಸ್ಯಾ. ಪೀ.), ಧನಕಾಮಿಕಾತಿ (ಸೀ.)].

ಕಾಮವಿಲಾಪಜಾತಕಂ ಸತ್ತಮಂ.

೨೯೮. ಉದುಮ್ಬರಜಾತಕಂ (೩-೫-೮)

೧೪೨. ಉದುಮ್ಬರಾ ಚಿಮೇ ಪಕ್ಕಾ, ನಿಗ್ರೋಧಾ ಚ ಕಪಿತ್ಥನಾ;

ಏಹಿ ನಿಕ್ಖಮ ಭುಞ್ಜಸ್ಸು, ಕಿಂ ಜಿಘಚ್ಛಾಯ ಮಿಯ್ಯಸಿ.

೧೪೩. ಏವಂ ಸೋ ಸುಹಿತೋ ಹೋತಿ, ಯೋ ವುಡ್ಢಮಪಚಾಯತಿ;

ಯಥಾಹಮಜ್ಜ ಸುಹಿತೋ, ದುಮಪಕ್ಕಾನಿ ಮಾಸಿತೋ.

೧೪೪. ಯಂ ವನೇಜೋ ವನೇಜಸ್ಸ, ವಞ್ಚೇಯ್ಯ ಕಪಿನೋ ಕಪಿ;

ದಹರೋ ಕಪಿ [ದಹರೋಪಿ ತಂ ನ (ಸೀ. ಪೀ.), ದಹರೋಪಿ ನ (ಸ್ಯಾ.)] ಸದ್ಧೇಯ್ಯ, ನ ಹಿ ಜಿಣ್ಣೋ ಜರಾಕಪೀತಿ.

ಉದುಮ್ಬರಜಾತಕಂ ಅಟ್ಠಮಂ.

೨೯೯. ಕೋಮಾರಪುತ್ತಜಾತಕಂ (೩-೫-೯)

೧೪೫. ಪುರೇ ತುವಂ ಸೀಲವತಂ ಸಕಾಸೇ, ಓಕ್ಕನ್ತಿಕಂ [ಓಕ್ಕನ್ದಿಕಂ (ಸೀ. ಸ್ಯಾ. ಪೀ.)] ಕೀಳಸಿ ಅಸ್ಸಮಮ್ಹಿ;

ಕರೋಹರೇ [ಕರೋಹಿ ರೇ (ಕ.)] ಮಕ್ಕಟಿಯಾನಿ ಮಕ್ಕಟ, ನ ತಂ ಮಯಂ ಸೀಲವತಂ ರಮಾಮ.

೧೪೬. ಸುತಾ ಹಿ ಮಯ್ಹಂ ಪರಮಾ ವಿಸುದ್ಧಿ, ಕೋಮಾರಪುತ್ತಸ್ಸ ಬಹುಸ್ಸುತಸ್ಸ;

ಮಾ ದಾನಿ ಮಂ ಮಞ್ಞಿ ತುವಂ ಯಥಾ ಪುರೇ, ಝಾನಾನುಯುತ್ತೋ ವಿಹರಾಮಿ [ಝಾನಾನುಯುತ್ತಾ ವಿಹರಾಮ (ಸೀ. ಪೀ.)] ಆವುಸೋ.

೧೪೭. ಸಚೇಪಿ ಸೇಲಸ್ಮಿ ವಪೇಯ್ಯ ಬೀಜಂ, ದೇವೋ ಚ ವಸ್ಸೇ ನ ಹಿ ತಂ ವಿರೂಳ್ಹೇ [ನೇವ ಹಿ ತಂ ರುಹೇಯ್ಯ (ಸೀ. ಪೀ.), ನ ಹಿ ತಂ ವಿರೂಹೇ (?)];

ಸುತಾ ಹಿ ತೇ ಸಾ ಪರಮಾ ವಿಸುದ್ಧಿ, ಆರಾ ತುವಂ ಮಕ್ಕಟ ಝಾನಭೂಮಿಯಾತಿ.

ಕೋಮಾರಪುತ್ತಜಾತಕಂ ನವಮಂ.

೩೦೦. ವಕಜಾತಕಂ (೩-೫-೧೦)

೧೪೮. ಪರಪಾಣರೋಧಾ [ಪರಪಾಣಘಾತೇ (ಸ್ಯಾ.), ಪರಪಾಣರೋಚಂ (ಕ.)] ಜೀವನ್ತೋ, ಮಂಸಲೋಹಿತಭೋಜನೋ;

ವಕೋ ವತಂ ಸಮಾದಾಯ, ಉಪಪಜ್ಜಿ ಉಪೋಸಥಂ.

೧೪೯. ತಸ್ಸ ಸಕ್ಕೋ ವತಞ್ಞಾಯ, ಅಜರೂಪೇನುಪಾಗಮಿ;

ವೀತತಪೋ ಅಜ್ಝಪ್ಪತ್ತೋ, ಭಞ್ಜಿ ಲೋಹಿತಪೋ ತಪಂ.

೧೫೦. ಏವಮೇವ ಇಧೇಕಚ್ಚೇ, ಸಮಾದಾನಮ್ಹಿ ದುಬ್ಬಲಾ;

ಲಹುಂ ಕರೋನ್ತಿ ಅತ್ತಾನಂ, ವಕೋವ ಅಜಕಾರಣಾತಿ.

ವಕಜಾತಕಂ ದಸಮಂ.

ಕುಮ್ಭವಗ್ಗೋ ಪಞ್ಚಮೋ.

ತಸ್ಸುದ್ದಾನಂ –

ವರಕುಮ್ಭ ಸುಪತ್ತಸಿರಿವ್ಹಯನೋ, ಸುಚಿಸಮ್ಮತ ಬಿನ್ದುಸರೋ ಚುಸಭೋ;

ಸರಿತಂಪತಿ ಚಣ್ಡಿ ಜರಾಕಪಿನಾ, ಅಥ ಮಕ್ಕಟಿಯಾ ವಕಕೇನ ದಸಾತಿ.

ಅಥ ವಗ್ಗುದ್ದಾನಂ –

ಸಙ್ಕಪ್ಪೋ ಪದುಮೋ ಚೇವ, ಉದಪಾನೇನ ತತಿಯಂ;

ಅಬ್ಭನ್ತರಂ ಘಟಭೇದಂ, ತಿಕನಿಪಾತಮ್ಹಿಲಙ್ಕತನ್ತಿ.

ತಿಕನಿಪಾತಂ ನಿಟ್ಠಿತಂ.