೪. ಅಬ್ಭನ್ತರವಗ್ಗೋ

೨೮೧. ಅಬ್ಭನ್ತರಜಾತಕಂ (೩-೪-೧)

೯೧. ಅಬ್ಭನ್ತರೋ ನಾಮ ದುಮೋ, ಯಸ್ಸ ದಿಬ್ಯಮಿದಂ ಫಲಂ;

ಭುತ್ವಾ ದೋಹಳಿನೀ ನಾರೀ, ಚಕ್ಕವತ್ತಿಂ ವಿಜಾಯತಿ.

೯೨. ತ್ವಮ್ಪಿ [ತ್ವಞ್ಚ (ಸೀ. ಪೀ.), ತ್ವಂ ಹಿ (ಕ.)] ಭದ್ದೇ ಮಹೇಸೀಸಿ, ಸಾ ಚಾಪಿ [ಚಾಸಿ (ಸೀ. ಪೀ.)] ಪತಿನೋ ಪಿಯಾ;

ಆಹರಿಸ್ಸತಿ ತೇ ರಾಜಾ, ಇದಂ ಅಬ್ಭನ್ತರಂ ಫಲಂ.

೯೩. ಭತ್ತುರತ್ಥೇ ಪರಕ್ಕನ್ತೋ, ಯಂ ಠಾನಮಧಿಗಚ್ಛತಿ;

ಸೂರೋ ಅತ್ತಪರಿಚ್ಚಾಗೀ, ಲಭಮಾನೋ ಭವಾಮಹನ್ತಿ.

ಅಬ್ಭನ್ತರಜಾತಕಂ ಪಠಮಂ.

೨೮೨. ಸೇಯ್ಯಜಾತಕಂ (೩-೪-೨)

೯೪. ಸೇಯ್ಯಂಸೋ ಸೇಯ್ಯಸೋ ಹೋತಿ, ಯೋ ಸೇಯ್ಯಮುಪಸೇವತಿ;

ಏಕೇನ ಸನ್ಧಿಂ ಕತ್ವಾನ, ಸತಂ ವಜ್ಝೇ [ಮಚ್ಚೇ (ಕ.), ಬಜ್ಝೇ (ಕ. ಅಟ್ಠ.)] ಅಮೋಚಯಿಂ.

೯೫. [ಕಸ್ಮಾ…ಪೇ… ಸಗ್ಗಂ ನ ಗಚ್ಛೇಯ್ಯ (ಕತ್ಥಚಿ)] ತಸ್ಮಾ ಸಬ್ಬೇನ ಲೋಕೇನ, ಸನ್ಧಿಂ ಕತ್ವಾನ ಏಕತೋ [ಏಕಕೋ (ಸೀ. ಸ್ಯಾ. ಪೀ.)];

ಪೇಚ್ಚ ಸಗ್ಗಂ ನಿಗಚ್ಛೇಯ್ಯ [ಕಸ್ಮಾ…ಪೇ… ಸಗ್ಗಂ ನ ಗಚ್ಛೇಯ್ಯ (ಕತ್ಥಚಿ)], ಇದಂ ಸುಣಾಥ ಕಾಸಿಯಾ [ಕಾಸಯೋ (ಸೀ. ಪೀ.)].

೯೬. ಇದಂ ವತ್ವಾ ಮಹಾರಾಜಾ, ಕಂಸೋ ಬಾರಾಣಸಿಗ್ಗಹೋ;

ಧನುಂ ಕಣ್ಡಞ್ಚ [ತೂಣಿಞ್ಚ (ಸೀ. ಪೀ.)] ನಿಕ್ಖಿಪ್ಪ, ಸಂಯಮಂ ಅಜ್ಝುಪಾಗಮೀತಿ.

ಸೇಯ್ಯಜಾತಕಂ ದುತಿಯಂ.

೨೮೩. ವಡ್ಢಕೀಸೂಕರಜಾತಕಂ (೩-೪-೩)

೯೭. ವರಂ ವರಂ ತ್ವಂ ನಿಹನಂ ಪುರೇ ಚರಿ, ಅಸ್ಮಿಂ ಪದೇಸೇ ಅಭಿಭುಯ್ಯ ಸೂಕರೇ;

ಸೋ ದಾನಿ ಏಕೋ ಬ್ಯಪಗಮ್ಮ ಝಾಯಸಿ, ಬಲಂ ನು ತೇ ಬ್ಯಗ್ಘ ನ ಚಜ್ಜ ವಿಜ್ಜತಿ.

೯೮. ಇಮೇ ಸುದಂ [ಇಮಸ್ಸು ತಾ (ಸ್ಯಾ. ಕ.)] ಯನ್ತಿ ದಿಸೋದಿಸಂ ಪುರೇ, ಭಯಟ್ಟಿತಾ ಲೇಣಗವೇಸಿನೋ ಪುಥು;

ತೇ ದಾನಿ ಸಙ್ಗಮ್ಮ ವಸನ್ತಿ ಏಕತೋ, ಯತ್ಥಟ್ಠಿತಾ ದುಪ್ಪಸಹಜ್ಜಮೇ [ದುಪ್ಪಸಹಜ್ಜಿಮೇ (ಸ್ಯಾ.)] ಮಯಾ.

೯೯. ನಮತ್ಥು ಸಙ್ಘಾನ ಸಮಾಗತಾನಂ, ದಿಸ್ವಾ ಸಯಂ ಸಖ್ಯ ವದಾಮಿ ಅಬ್ಭುತಂ;

ಬ್ಯಗ್ಘಂ ಮಿಗಾ ಯತ್ಥ ಜಿನಿಂಸು ದಾಠಿನೋ, ಸಾಮಗ್ಗಿಯಾ ದಾಠಬಲೇಸು ಮುಚ್ಚರೇತಿ.

ವಡ್ಢಕೀಸೂಕರಜಾತಕಂ ತತಿಯಂ.

೨೮೪. ಸಿರಿಜಾತಕಂ (೩-೪-೪)

೧೦೦. ಯಂ ಉಸ್ಸುಕಾ ಸಙ್ಘರನ್ತಿ, ಅಲಕ್ಖಿಕಾ ಬಹುಂ ಧನಂ;

ಸಿಪ್ಪವನ್ತೋ ಅಸಿಪ್ಪಾ ಚ, ಲಕ್ಖಿವಾ ತಾನಿ ಭುಞ್ಜತಿ.

೧೦೧. ಸಬ್ಬತ್ಥ ಕತಪುಞ್ಞಸ್ಸ, ಅತಿಚ್ಚಞ್ಞೇವ ಪಾಣಿನೋ;

ಉಪ್ಪಜ್ಜನ್ತಿ ಬಹೂ ಭೋಗಾ, ಅಪ್ಪನಾಯತನೇಸುಪಿ.

೧೦೨. ಕುಕ್ಕುಟೋ [ಕುಕ್ಕುಟ (ಸೀ. ಪೀ.), ಕುಕ್ಕುಟಾ (ಸೀ. ನಿಸ್ಸಯ, ಸದ್ದನೀತಿ)] ಮಣಯೋ ದಣ್ಡೋ, ಥಿಯೋ ಚ ಪುಞ್ಞಲಕ್ಖಣಾ;

ಉಪ್ಪಜ್ಜನ್ತಿ ಅಪಾಪಸ್ಸ, ಕತಪುಞ್ಞಸ್ಸ ಜನ್ತುನೋತಿ.

ಸಿರಿಜಾತಕಂ ಚತುತ್ಥಂ.

೨೮೫. ಮಣಿಸೂಕರಜಾತಕಂ (೩-೪-೫)

೧೦೩. ದರಿಯಾ ಸತ್ತ ವಸ್ಸಾನಿ, ತಿಂಸಮತ್ತಾ ವಸಾಮಸೇ;

ಹಞ್ಞಾಮ [ಹಞ್ಛೇಮ (ಸೀ. ಪೀ.), ಹಞ್ಛಾಮ (?)] ಮಣಿನೋ ಆಭಂ, ಇತಿ ನೋ ಮನ್ತನಂ ಅಹು.

೧೦೪. ಯಾವತಾ ಮಣಿಂ ಘಂಸಾಮ [ಯಾವ ಯಾವ ನಿಘಂಸಾಮ (ಸೀ. ಪೀ.)], ಭಿಯ್ಯೋ ವೋದಾಯತೇ ಮಣಿ;

ಇದಞ್ಚ ದಾನಿ ಪುಚ್ಛಾಮ, ಕಿಂ ಕಿಚ್ಚಂ ಇಧ ಮಞ್ಞಸಿ.

೧೦೫. ಅಯಂ ಮಣಿ ವೇಳೂರಿಯೋ, ಅಕಾಚೋ ವಿಮಲೋ [ವಿಪುಲೋ (ಕ.)] ಸುಭೋ;

ನಾಸ್ಸ ಸಕ್ಕಾ ಸಿರಿಂ ಹನ್ತುಂ, ಅಪಕ್ಕಮಥ ಸೂಕರಾತಿ.

ಮಣಿಸೂಕರ [ಮಣಿಘಂಸ (ಕ.)] ಜಾತಕಂ ಪಞ್ಚಮಂ.

೨೮೬. ಸಾಲೂಕಜಾತಕಂ (೩-೪-೬)

೧೦೬. ಮಾ ಸಾಲೂಕಸ್ಸ ಪಿಹಯಿ, ಆತುರನ್ನಾನಿ ಭುಞ್ಜತಿ;

ಅಪ್ಪೋಸ್ಸುಕ್ಕೋ ಭುಸಂ ಖಾದ, ಏತಂ ದೀಘಾಯುಲಕ್ಖಣಂ.

೧೦೭. ಇದಾನಿ ಸೋ ಇಧಾಗನ್ತ್ವಾ, ಅತಿಥೀ ಯುತ್ತಸೇವಕೋ;

ಅಥ ದಕ್ಖಸಿ ಸಾಲೂಕಂ, ಸಯನ್ತಂ ಮುಸಲುತ್ತರಂ.

೧೦೮. ವಿಕನ್ತಂ [ವಿಕತ್ತಂ (ಸೀ.), ವಿಕನ್ತಿಯಮಾನಂ ಛಿನ್ದಿಯಮಾನಂತಿ ಅತ್ಥೋ] ಸೂಕರಂ ದಿಸ್ವಾ, ಸಯನ್ತಂ ಮುಸಲುತ್ತರಂ;

ಜರಗ್ಗವಾ ವಿಚಿನ್ತೇಸುಂ, ವರಮ್ಹಾಕಂ ಭುಸಾಮಿವಾತಿ.

ಸಾಲೂಕಜಾತಕಂ ಛಟ್ಠಂ.

೨೮೭. ಲಾಭಗರಹಜಾತಕಂ (೩-೪-೭)

೧೦೯. ನಾನುಮ್ಮತ್ತೋ ನಾಪಿಸುಣೋ, ನಾನಟೋ ನಾಕುತೂಹಲೋ;

ಮೂಳ್ಹೇಸು ಲಭತೇ ಲಾಭಂ, ಏಸಾ ತೇ ಅನುಸಾಸನೀ.

೧೧೦. ಧಿರತ್ಥು ತಂ ಯಸಲಾಭಂ, ಧನಲಾಭಞ್ಚ ಬ್ರಾಹ್ಮಣ;

ಯಾ ವುತ್ತಿ ವಿನಿಪಾತೇನ, ಅಧಮ್ಮಚರಣೇನ [ಅಧಮ್ಮಚರಿಯಾಯ (ಸೀ. ಸ್ಯಾ.)] ವಾ.

೧೧೧. ಅಪಿ ಚೇ ಪತ್ತಮಾದಾಯ, ಅನಗಾರೋ ಪರಿಬ್ಬಜೇ;

ಏಸಾವ ಜೀವಿಕಾ ಸೇಯ್ಯೋ [ಸೇಯ್ಯಾ (ಸೀ. ಸ್ಯಾ. ಪೀ.)], ಯಾ ಚಾಧಮ್ಮೇನ ಏಸನಾತಿ.

ಲಾಭಗರಹಜಾತಕಂ ಸತ್ತಮಂ.

೨೮೮. ಮಚ್ಛುದ್ದಾನಜಾತಕಂ (೩-೪-೮)

೧೧೨. ಅಗ್ಘನ್ತಿ ಮಚ್ಛಾ ಅಧಿಕಂ ಸಹಸ್ಸಂ, ನ ಸೋ ಅತ್ಥಿ ಯೋ ಇಮಂ ಸದ್ದಹೇಯ್ಯ;

ಮಯ್ಹಞ್ಚ ಅಸ್ಸು ಇಧ ಸತ್ತ ಮಾಸಾ, ಅಹಮ್ಪಿ ತಂ ಮಚ್ಛುದ್ದಾನಂ ಕಿಣೇಯ್ಯಂ.

೧೧೩. ಮಚ್ಛಾನಂ ಭೋಜನಂ ದತ್ವಾ, ಮಮ ದಕ್ಖಿಣಮಾದಿಸಿ;

ತಂ ದಕ್ಖಿಣಂ ಸರನ್ತಿಯಾ, ಕತಂ ಅಪಚಿತಿಂ ತಯಾ.

೧೧೪. ಪದುಟ್ಠಚಿತ್ತಸ್ಸ ನ ಫಾತಿ ಹೋತಿ, ನ ಚಾಪಿ ತಂ [ನಂ (ಸೀ. ಸ್ಯಾ.)] ದೇವತಾ ಪೂಜಯನ್ತಿ;

ಯೋ ಭಾತರಂ ಪೇತ್ತಿಕಂ ಸಾಪತೇಯ್ಯಂ, ಅವಞ್ಚಯೀ ದುಕ್ಕಟಕಮ್ಮಕಾರೀತಿ.

ಮಚ್ಛುದ್ದಾನಜಾತಕಂ ಅಟ್ಠಮಂ.

೨೮೯. ನಾನಾಛನ್ದಜಾತಕಂ (೩-೪-೯)

೧೧೫. ನಾನಾಛನ್ದಾ ಮಹಾರಾಜ, ಏಕಾಗಾರೇ ವಸಾಮಸೇ;

ಅಹಂ ಗಾಮವರಂ ಇಚ್ಛೇ, ಬ್ರಾಹ್ಮಣೀ ಚ ಗವಂ ಸತಂ.

೧೧೬. ಪುತ್ತೋ ಚ ಆಜಞ್ಞರಥಂ, ಕಞ್ಞಾ ಚ ಮಣಿಕುಣ್ಡಲಂ;

ಯಾ ಚೇಸಾ ಪುಣ್ಣಿಕಾ ಜಮ್ಮೀ, ಉದುಕ್ಖಲಂಭಿಕಙ್ಖತಿ.

೧೧೭. ಬ್ರಾಹ್ಮಣಸ್ಸ ಗಾಮವರಂ, ಬ್ರಾಹ್ಮಣಿಯಾ ಗವಂ ಸತಂ;

ಪುತ್ತಸ್ಸ ಆಜಞ್ಞರಥಂ, ಕಞ್ಞಾಯ ಮಣಿಕುಣ್ಡಲಂ;

ಯಞ್ಚೇತಂ ಪುಣ್ಣಿಕಂ ಜಮ್ಮಿಂ, ಪಟಿಪಾದೇಥುದುಕ್ಖಲನ್ತಿ.

ನಾನಾಛನ್ದಜಾತಕಂ ನವಮಂ.

೨೯೦. ಸೀಲವೀಮಂಸಕಜಾತಕಂ (೩-೪-೧೦)

೧೧೮. ಸೀಲಂ ಕಿರೇವ ಕಲ್ಯಾಣಂ, ಸೀಲಂ ಲೋಕೇ ಅನುತ್ತರಂ;

ಪಸ್ಸ ಘೋರವಿಸೋ ನಾಗೋ, ಸೀಲವಾತಿ ನ ಹಞ್ಞತಿ.

೧೧೯. ಸೋಹಂ ಸೀಲಂ ಸಮಾದಿಸ್ಸಂ, ಲೋಕೇ ಅನುಮತಂ ಸಿವಂ;

ಅರಿಯವುತ್ತಿಸಮಾಚಾರೋ, ಯೇನ ವುಚ್ಚತಿ ಸೀಲವಾ.

೧೨೦. ಞಾತೀನಞ್ಚ ಪಿಯೋ ಹೋತಿ, ಮಿತ್ತೇಸು ಚ ವಿರೋಚತಿ;

ಕಾಯಸ್ಸ ಭೇದಾ ಸುಗತಿಂ, ಉಪಪಜ್ಜತಿ ಸೀಲವಾತಿ.

ಸೀಲವೀಮಂಸಕಜಾತಕಂ ದಸಮಂ.

ಅಬ್ಭನ್ತರವಗ್ಗೋ ಚತುತ್ಥೋ.

ತಸ್ಸುದ್ದಾನಂ –

ದುಮ ಕಂಸವರುತ್ತಮಬ್ಯಗ್ಘಮಿಗಾ, ಮಣಯೋ ಮಣಿ ಸಾಲುಕಮವ್ಹಯನೋ;

ಅನುಸಾಸನಿಯೋಪಿ ಚ ಮಚ್ಛವರೋ, ಮಣಿಕುಣ್ಡಲಕೇನ ಕಿರೇನ ದಸಾತಿ.