೩. ಉದಪಾನವಗ್ಗೋ

೨೭೧. ಉದಪಾನದೂಸಕಜಾತಕಂ (೩-೩-೧)

೬೧. ಆರಞ್ಞಿಕಸ್ಸ ಇಸಿನೋ, ಚಿರರತ್ತಂ ತಪಸ್ಸಿನೋ;

ಕಿಚ್ಛಾಕತಂ ಉದಪಾನಂ, ಕಥಂ ಸಮ್ಮ ಅವಾಹಸಿ [ಅವಾಹಯಿ (ಸೀ. ಪೀ.), ಅಪಾಹಸಿ (ಸ್ಯಾ.)].

೬೨. ಏಸ ಧಮ್ಮೋ ಸಿಙ್ಗಾಲಾನಂ, ಯಂ ಪಿತ್ವಾ ಓಹದಾಮಸೇ;

ಪಿತುಪಿತಾಮಹಂ ಧಮ್ಮೋ, ನ ತಂ [ನ ನಂ (ಸೀ. ಪೀ.)] ಉಜ್ಝಾತುಮರಹಸಿ.

೬೩. ಯೇಸಂ ವೋ ಏದಿಸೋ ಧಮ್ಮೋ, ಅಧಮ್ಮೋ ಪನ ಕೀದಿಸೋ;

ಮಾ ವೋ ಧಮ್ಮಂ ಅಧಮ್ಮಂ ವಾ, ಅದ್ದಸಾಮ ಕುದಾಚನನ್ತಿ.

ಉದಪಾನದೂಸಕಜಾತಕಂ ಪಠಮಂ.

೨೭೨. ಬ್ಯಗ್ಘಜಾತಕಂ (೩-೩-೨)

೬೪. ಯೇನ ಮಿತ್ತೇನ ಸಂಸಗ್ಗಾ, ಯೋಗಕ್ಖೇಮೋ ವಿಹಿಯ್ಯತಿ;

ಪುಬ್ಬೇವಜ್ಝಾಭವಂ ತಸ್ಸ, ರುಕ್ಖೇ ಅಕ್ಖೀವ ಪಣ್ಡಿತೋ.

೬೫. ಯೇನ ಮಿತ್ತೇನ ಸಂಸಗ್ಗಾ, ಯೋಗಕ್ಖೇಮೋ ಪವಡ್ಢತಿ;

ಕರೇಯ್ಯತ್ತಸಮಂ ವುತ್ತಿಂ, ಸಬ್ಬಕಿಚ್ಚೇಸು ಪಣ್ಡಿತೋ.

೬೬. ಏಥ ಬ್ಯಗ್ಘಾ ನಿವತ್ತವ್ಹೋ, ಪಚ್ಚುಪೇಥ [ಪಚ್ಚಮೇಥ (ಸೀ. ಪೀ.)] ಮಹಾವನಂ;

ಮಾ ವನಂ ಛಿನ್ದಿ ನಿಬ್ಯಗ್ಘಂ, ಬ್ಯಗ್ಘಾ ಮಾಹೇಸು ನಿಬ್ಬನಾತಿ.

ಬ್ಯಗ್ಘಜಾತಕಂ ದುತಿಯಂ.

೨೭೩. ಕಚ್ಛಪಜಾತಕಂ (೩-೩-೩)

೬೭. ಕೋ ನು ಉದ್ಧಿತಭತ್ತೋವ [ಉದ್ದಿತಭತ್ತೋವ (ಸೀ.), ವಡ್ಢಿತಭತ್ತೋವ (ಸ್ಯಾ.)], ಪೂರಹತ್ಥೋವ ಬ್ರಾಹ್ಮಣೋ;

ಕಹಂ ನು ಭಿಕ್ಖಂ ಅಚರಿ, ಕಂ ಸದ್ಧಂ ಉಪಸಙ್ಕಮಿ.

೬೮. ಅಹಂ ಕಪಿಸ್ಮಿ ದುಮ್ಮೇಧೋ, ಅನಾಮಾಸಾನಿ ಆಮಸಿಂ;

ತ್ವಂ ಮಂ ಮೋಚಯ ಭದ್ದನ್ತೇ, ಮುತ್ತೋ ಗಚ್ಛೇಯ್ಯ ಪಬ್ಬತಂ.

೬೯. ಕಚ್ಛಪಾ ಕಸ್ಸಪಾ ಹೋನ್ತಿ, ಕೋಣ್ಡಞ್ಞಾ ಹೋನ್ತಿ ಮಕ್ಕಟಾ;

ಮುಞ್ಚ ಕಸ್ಸಪ ಕೋಣ್ಡಞ್ಞಂ, ಕತಂ ಮೇಥುನಕಂ ತಯಾತಿ.

ಕಚ್ಛಪಜಾತಕಂ ತತಿಯಂ.

೨೭೪. ಲೋಲಜಾತಕಂ (೩-೩-೪)

೭೦. ಕಾಯಂ ಬಲಾಕಾ ಸಿಖಿನೀ, ಚೋರೀ ಲಙ್ಘಿಪಿತಾಮಹಾ;

ಓರಂ ಬಲಾಕೇ ಆಗಚ್ಛ, ಚಣ್ಡೋ ಮೇ ವಾಯಸೋ ಸಖಾ.

೭೧. ನಾಹಂ ಬಲಾಕಾ ಸಿಖಿನೀ, ಅಹಂ ಲೋಲೋಸ್ಮಿ ವಾಯಸೋ;

ಅಕತ್ವಾ ವಚನಂ ತುಯ್ಹಂ, ಪಸ್ಸ ಲೂನೋಸ್ಮಿ ಆಗತೋ.

೭೨. ಪುನಪಾಪಜ್ಜಸೀ ಸಮ್ಮ, ಸೀಲಞ್ಹಿ ತವ ತಾದಿಸಂ;

ನ ಹಿ ಮಾನುಸಕಾ ಭೋಗಾ, ಸುಭುಞ್ಜಾ ಹೋನ್ತಿ ಪಕ್ಖಿನಾತಿ.

ಲೋಲಜಾತಕಂ ಚತುತ್ಥಂ.

೨೭೫. ರುಚಿರಜಾತಕಂ (೩-೩-೫)

೭೩. ಕಾಯಂ ಬಲಾಕಾ ರುಚಿರಾ, ಕಾಕನೀಳಸ್ಮಿಮಚ್ಛತಿ;

ಚಣ್ಡೋ ಕಾಕೋ ಸಖಾ ಮಯ್ಹಂ, ಯಸ್ಸ [ತಸ್ಸ (ಸೀ. ಪೀ.)] ಚೇತಂ ಕುಲಾವಕಂ.

೭೪. ನನು ಮಂ ಸಮ್ಮ ಜಾನಾಸಿ, ದಿಜ ಸಾಮಾಕಭೋಜನ;

ಅಕತ್ವಾ ವಚನಂ ತುಯ್ಹಂ, ಪಸ್ಸ ಲೂನೋಸ್ಮಿ ಆಗತೋ.

೭೫. ಪುನಪಾಪಜ್ಜಸೀ ಸಮ್ಮ, ಸೀಲಞ್ಹಿ ತವ ತಾದಿಸಂ;

ನ ಹಿ ಮಾನುಸಕಾ ಭೋಗಾ, ಸುಭುಞ್ಜಾ ಹೋನ್ತಿ ಪಕ್ಖಿನಾತಿ.

ರುಚಿರಜಾತಕಂ ಪಞ್ಚಮಂ.

೨೭೬. ಕುರುಧಮ್ಮಜಾತಕಂ (೩-೩-೬)

೭೬. ತವ ಸದ್ಧಞ್ಚ ಸೀಲಞ್ಚ, ವಿದಿತ್ವಾನ ಜನಾಧಿಪ;

ವಣ್ಣಂ ಅಞ್ಜನವಣ್ಣೇನ, ಕಾಲಿಙ್ಗಸ್ಮಿಂ ನಿಮಿಮ್ಹಸೇ [ವಿನಿಮ್ಹಸೇ (ಸ್ಯಾ.), ವನಿಮ್ಹಸೇ (ಕ.)].

೭೭. ಅನ್ನಭಚ್ಚಾ ಚಭಚ್ಚಾ ಚ, ಯೋಧ ಉದ್ದಿಸ್ಸ ಗಚ್ಛತಿ;

ಸಬ್ಬೇ ತೇ ಅಪ್ಪಟಿಕ್ಖಿಪ್ಪಾ, ಪುಬ್ಬಾಚರಿಯವಚೋ ಇದಂ.

೭೮. ದದಾಮಿ ವೋ ಬ್ರಾಹ್ಮಣಾ ನಾಗಮೇತಂ, ರಾಜಾರಹಂ ರಾಜಭೋಗ್ಗಂ ಯಸಸ್ಸಿನಂ;

ಅಲಙ್ಕತಂ ಹೇಮಜಾಲಾಭಿಛನ್ನಂ, ಸಸಾರಥಿಂ ಗಚ್ಛಥ ಯೇನ ಕಾಮನ್ತಿ.

ಕುರುಧಮ್ಮಜಾತಕಂ [ಕುರುಧಮ್ಮಜಾತಕಂ (ಸೀ. ಸ್ಯಾ. ಪೀ.)] ಛಟ್ಠಂ.

೨೭೭. ರೋಮಕಜಾತಕಂ (೩-೩-೭)

೭೯. ವಸ್ಸಾನಿ ಪಞ್ಞಾಸ ಸಮಾಧಿಕಾನಿ, ವಸಿಮ್ಹ ಸೇಲಸ್ಸ ಗುಹಾಯ ರೋಮಕ;

ಅಸಙ್ಕಮಾನಾ ಅಭಿನಿಬ್ಬುತತ್ತಾ [ಅಭಿನಿಬ್ಬುತಚಿತ್ತಾ (ಸ್ಯಾ. ಕ.)], ಹತ್ಥತ್ತ [ಹತ್ಥತ್ಥ (ಸ್ಯಾ.)] ಮಾಯನ್ತಿ ಮಮಣ್ಡಜಾ ಪುರೇ.

೮೦. ತೇ ದಾನಿ ವಕ್ಕಙ್ಗ ಕಿಮತ್ಥಮುಸ್ಸುಕಾ, ಭಜನ್ತಿ ಅಞ್ಞಂ ಗಿರಿಕನ್ದರಂ ದಿಜಾ;

ನ ನೂನ ಮಞ್ಞನ್ತಿ ಮಮಂ ಯಥಾ ಪುರೇ, ಚಿರಪ್ಪವುತ್ಥಾ ಅಥ ವಾ ನ ತೇ ಇಮೇ.

೮೧. ಜಾನಾಮ ತಂ ನ ಮಯಂ ಸಮ್ಪಮೂಳ್ಹಾ [ನ ಮಯ’ಮಸ್ಮ ಮೂಳ್ಹಾ (ಸೀ. ಪೀ.)], ಸೋಯೇವ ತ್ವಂ ತೇ ಮಯಮಸ್ಮ ನಾಞ್ಞೇ;

ಚಿತ್ತಞ್ಚ ತೇ ಅಸ್ಮಿಂ ಜನೇ ಪದುಟ್ಠಂ, ಆಜೀವಿಕಾ [ಆಜೀವಕ (ಸೀ. ಸ್ಯಾ.), ಆಜೀವಿಕ (ಪೀ.)] ತೇನ ತಮುತ್ತಸಾಮಾತಿ.

ರೋಮಕಜಾತಕಂ ಸತ್ತಮಂ.

೨೭೮. ಮಹಿಂಸರಾಜಜಾತಕಂ (೩-೩-೮)

೮೨. ಕಿಮತ್ಥ [ಕಮತ್ಥ (ಸೀ. ಪೀ.)] ಮಭಿಸನ್ಧಾಯ, ಲಹುಚಿತ್ತಸ್ಸ ದುಬ್ಭಿನೋ [ದೂಭಿನೋ (ಸೀ. ಪೀ.)];

ಸಬ್ಬಕಾಮದದಸ್ಸೇವ [ದುಹಸ್ಸೇವ (ಸೀ. ಸ್ಯಾ. ಪೀ.), ರಹಸ್ಸೇವ (ಕ.)], ಇಮಂ ದುಕ್ಖಂ ತಿತಿಕ್ಖಸಿ.

೮೩. ಸಿಙ್ಗೇನ ನಿಹನಾಹೇತಂ, ಪದಸಾ ಚ ಅಧಿಟ್ಠಹ;

ಭಿಯ್ಯೋ [ಭೀಯೋ (ಸೀ.)] ಬಾಲಾ ಪಕುಜ್ಝೇಯ್ಯುಂ, ನೋ ಚಸ್ಸ ಪಟಿಸೇಧಕೋ.

೮೪. ಮಮೇವಾಯಂ ಮಞ್ಞಮಾನೋ, ಅಞ್ಞೇಪೇವಂ [ಅಞ್ಞಮ್ಪೇವಂ (ಸೀ. ಸ್ಯಾ. ಪೀ.)] ಕರಿಸ್ಸತಿ;

ತೇ ನಂ ತತ್ಥ ವಧಿಸ್ಸನ್ತಿ, ಸಾ ಮೇ ಮುತ್ತಿ ಭವಿಸ್ಸತೀತಿ.

ಮಹಿಂಸರಾಜಜಾತಕಂ [ಮಹಿಸಜಾತಕಂ (ಸೀ. ಸ್ಯಾ. ಪೀ.)] ಅಟ್ಠಮಂ.

೨೭೯. ಸತಪತ್ತಜಾತಕಂ (೩-೩-೯)

೮೫. ಯಥಾ ಮಾಣವಕೋ ಪನ್ಥೇ, ಸಿಙ್ಗಾಲಿಂ ವನಗೋಚರಿಂ;

ಅತ್ಥಕಾಮಂ ಪವೇದೇನ್ತಿಂ [ಪವದನ್ತಿಂ (ಪೀ.)], ಅನತ್ಥಕಾಮಾತಿ ಮಞ್ಞತಿ;

ಅನತ್ಥಕಾಮಂ ಸತಪತ್ತಂ, ಅತ್ಥಕಾಮೋತಿ ಮಞ್ಞತಿ.

೮೬. ಏವಮೇವ ಇಧೇಕಚ್ಚೋ, ಪುಗ್ಗಲೋ ಹೋತಿ ತಾದಿಸೋ;

ಹಿತೇಹಿ ವಚನಂ ವುತ್ತೋ, ಪಟಿಗಣ್ಹಾತಿ ವಾಮತೋ.

೮೭. ಯೇ ಚ ಖೋ ನಂ ಪಸಂಸನ್ತಿ, ಭಯಾ ಉಕ್ಕಂಸಯನ್ತಿ ವಾ [ಚ (ಸೀ. ಪೀ.)];

ತಞ್ಹಿ ಸೋ ಮಞ್ಞತೇ ಮಿತ್ತಂ, ಸತಪತ್ತಂವ ಮಾಣವೋತಿ.

ಸತಪತ್ತಜಾತಕಂ ನವಮಂ.

೨೮೦. ಪುಟದೂಸಕಜಾತಕಂ (೩-೩-೧೦)

೮೮. ಅದ್ಧಾ ಹಿ ನೂನ ಮಿಗರಾಜಾ, ಪುಟಕಮ್ಮಸ್ಸ ಕೋವಿದೋ;

ತಥಾ ಹಿ ಪುಟಂ ದೂಸೇತಿ, ಅಞ್ಞಂ ನೂನ ಕರಿಸ್ಸತಿ.

೮೯. ನ ಮೇ ಮಾತಾ ವಾ ಪಿತಾ ವಾ, ಪುಟಕಮ್ಮಸ್ಸ ಕೋವಿದೋ;

ಕತಂ ಕತಂ ಖೋ ದೂಸೇಮ, ಏವಂ ಧಮ್ಮಮಿದಂ ಕುಲಂ.

೯೦. ಯೇಸಂ ವೋ ಏದಿಸೋ ಧಮ್ಮೋ, ಅಧಮ್ಮೋ ಪನ ಕೀದಿಸೋ;

ಮಾ ವೋ ಧಮ್ಮಂ ಅಧಮ್ಮಂ ವಾ, ಅದ್ದಸಾಮ ಕುದಾಚನನ್ತಿ.

ಪುಟದೂಸಕಜಾತಕಂ ದಸಮಂ.

ಉದಪಾನವಗ್ಗೋ [ಅರಞ್ಞವಗ್ಗೋ (ಸೀ. ಪೀ. ಕ.)] ತತಿಯೋ.

ತಸ್ಸುದ್ದಾನಂ –

ಉದಪಾನವರಂ ವನಬ್ಯಗ್ಘ ಕಪಿ, ಸಿಖಿನೀ ಚ ಬಲಾಕ ರುಚಿರವರೋ;

ಸುಜನಾಧಿಪರೋಮಕದೂಸ ಪುನ, ಸತಪತ್ತವರೋ ಪುಟಕಮ್ಮ ದಸಾತಿ.