೨. ಪದುಮವಗ್ಗೋ

೨೬೧. ಪದುಮಜಾತಕಂ (೩-೨-೧)

೩೧. ಯಥಾ ಕೇಸಾ ಚ ಮಸ್ಸೂ ಚ, ಛಿನ್ನಂ ಛಿನ್ನಂ ವಿರೂಹತಿ;

ಏವಂ ರೂಹತು ತೇ ನಾಸಾ, ಪದುಮಂ ದೇಹಿ ಯಾಚಿತೋ.

೩೨. ಯಥಾ ಸಾರದಿಕಂ ಬೀಜಂ, ಖೇತ್ತೇ ವುತ್ತಂ ವಿರೂಹತಿ;

ಏವಂ ರೂಹತು ತೇ ನಾಸಾ, ಪದುಮಂ ದೇಹಿ ಯಾಚಿತೋ.

೩೩. ಉಭೋಪಿ ಪಲಪನ್ತೇತೇ [ವಿಲಪನ್ತೇತೇ (ಸ್ಯಾ. ಕ.)], ಅಪಿ ಪದ್ಮಾನಿ ದಸ್ಸತಿ;

ವಜ್ಜುಂ ವಾ ತೇ ನ ವಾ ವಜ್ಜುಂ, ನತ್ಥಿ ನಾಸಾಯ ರೂಹನಾ;

ದೇಹಿ ಸಮ್ಮ ಪದುಮಾನಿ, ಅಹಂ ಯಾಚಾಮಿ ಯಾಚಿತೋತಿ.

ಪದುಮಜಾತಕಂ ಪಠಮಂ.

೨೬೨. ಮುದುಪಾಣಿಜಾತಕಂ (೩-೨-೨)

೩೪. ಪಾಣಿ ಚೇ ಮುದುಕೋ ಚಸ್ಸ, ನಾಗೋ ಚಸ್ಸ ಸುಕಾರಿತೋ;

ಅನ್ಧಕಾರೋ ಚ ವಸ್ಸೇಯ್ಯ, ಅಥ ನೂನ ತದಾ ಸಿಯಾ.

೩೫. ಅನಲಾ ಮುದುಸಮ್ಭಾಸಾ, ದುಪ್ಪೂರಾ ತಾ [ದುಪ್ಪೂರತ್ತಾ (ಕ.)] ನದೀಸಮಾ;

ಸೀದನ್ತಿ ನಂ ವಿದಿತ್ವಾನ, ಆರಕಾ ಪರಿವಜ್ಜಯೇ.

೩೬. ಯಂ ಏತಾ ಉಪಸೇವನ್ತಿ, ಛನ್ದಸಾ ವಾ ಧನೇನ ವಾ;

ಜಾತವೇದೋವ ಸಂ ಠಾನಂ, ಖಿಪ್ಪಂ ಅನುದಹನ್ತಿ ನನ್ತಿ.

ಮುದುಪಾಣಿಜಾತಕಂ ದುತಿಯಂ.

೨೬೩. ಚೂಳಪಲೋಭನಜಾತಕಂ (೩-೨-೩)

೩೭. ಅಭಿಜ್ಜಮಾನೇ ವಾರಿಸ್ಮಿಂ, ಸಯಂ [ಅಯಂ (ಕ.)] ಆಗಮ್ಮ ಇದ್ಧಿಯಾ;

ಮಿಸ್ಸೀಭಾವಿತ್ಥಿಯಾ ಗನ್ತ್ವಾ, ಸಂಸೀದಸಿ [ಸಂಸೀದತಿ (ಕ.)] ಮಹಣ್ಣವೇ.

೩೮. ಆವಟ್ಟನೀ ಮಹಾಮಾಯಾ, ಬ್ರಹ್ಮಚರಿಯವಿಕೋಪನಾ;

ಸೀದನ್ತಿ ನಂ ವಿದಿತ್ವಾನ, ಆರಕಾ ಪರಿವಜ್ಜಯೇ.

೩೯. ಯಂ ಏತಾ ಉಪಸೇವನ್ತಿ, ಛನ್ದಸಾ ವಾ ಧನೇನ ವಾ;

ಜಾತವೇದೋವ ಸಂ ಠಾನಂ, ಖಿಪ್ಪಂ ಅನುದಹನ್ತಿ ನನ್ತಿ.

ಚೂಳಪಲೋಭನ [ಚುಲ್ಲಪಲೋಭನ (ಸೀ. ಸ್ಯಾ. ಪೀ.)] ಜಾತಕಂ ತತಿಯಂ.

೨೬೪. ಮಹಾಪನಾದಜಾತಕಂ (೩-೨-೪)

೪೦. ಪನಾದೋ ನಾಮ ಸೋ ರಾಜಾ, ಯಸ್ಸ ಯೂಪೋ ಸುವಣ್ಣಯೋ;

ತಿರಿಯಂ ಸೋಳಸುಬ್ಬೇಧೋ [ಸೋಳಸಪಬ್ಬೇಧೋ (ಸೀ. ಪೀ.)], ಉದ್ಧಮಾಹು [ಉಚ್ಚಮಾಹು (ಸೀ. ಸ್ಯಾ. ಪೀ.)] ಸಹಸ್ಸಧಾ.

೪೧. ಸಹಸ್ಸಕಣ್ಡೋ ಸತಗೇಣ್ಡು [ಸತಭೇದೋ (ಸೀ. ಪೀ.), ಸತಭೇಣ್ಡು (ಸೀ. ನಿಸ್ಸಯ)], ಧಜಾಸು ಹರಿತಾಮಯೋ;

ಅನಚ್ಚುಂ ತತ್ಥ ಗನ್ಧಬ್ಬಾ, ಛ ಸಹಸ್ಸಾನಿ ಸತ್ತಧಾ.

೪೨. ಏವಮೇತಂ [ಏವಮೇವ (ಕ.)] ತದಾ ಆಸಿ, ಯಥಾ ಭಾಸಸಿ ಭದ್ದಜಿ;

ಸಕ್ಕೋ ಅಹಂ ತದಾ ಆಸಿಂ, ವೇಯ್ಯಾವಚ್ಚಕರೋ ತವಾತಿ.

ಮಹಾಪನಾದಜಾತಕಂ ಚತುತ್ಥಂ.

೨೬೫. ಖುರಪ್ಪಜಾತಕಂ (೩-೨-೫)

೪೩. ದಿಸ್ವಾ ಖುರಪ್ಪೇ ಧನುವೇಗನುನ್ನೇ, ಖಗ್ಗೇ ಗಹೀತೇ ತಿಖಿಣೇ ತೇಲಧೋತೇ;

ತಸ್ಮಿಂ ಭಯಸ್ಮಿಂ ಮರಣೇ ವಿಯೂಳ್ಹೇ, ಕಸ್ಮಾ ನು ತೇ ನಾಹು ಛಮ್ಭಿತತ್ತಂ.

೪೪. ದಿಸ್ವಾ ಖುರಪ್ಪೇ ಧನುವೇಗನುನ್ನೇ, ಖಗ್ಗೇ ಗಹೀತೇ ತಿಖಿಣೇ ತೇಲಧೋತೇ;

ತಸ್ಮಿಂ ಭಯಸ್ಮಿಂ ಮರಣೇ ವಿಯೂಳ್ಹೇ, ವೇದಂ ಅಲತ್ಥಂ ವಿಪುಲಂ ಉಳಾರಂ.

೪೫. ಸೋ ವೇದಜಾತೋ ಅಜ್ಝಭವಿಂ ಅಮಿತ್ತೇ, ಪುಬ್ಬೇವ ಮೇ ಜೀವಿತಮಾಸಿ ಚತ್ತಂ;

ನ ಹಿ ಜೀವಿತೇ ಆಲಯಂ ಕುಬ್ಬಮಾನೋ, ಸೂರೋ ಕಯಿರಾ ಸೂರಕಿಚ್ಚಂ ಕದಾಚೀತಿ.

ಖುರಪ್ಪಜಾತಕಂ ಪಞ್ಚಮಂ.

೨೬೬. ವಾತಗ್ಗಸಿನ್ಧವಜಾತಕಂ (೩-೨-೬)

೪೬. ಯೇನಾಸಿ ಕಿಸಿಯಾ ಪಣ್ಡು, ಯೇನ ಭತ್ತಂ ನ ರುಚ್ಚತಿ;

ಅಯಂ ಸೋ ಆಗತೋ ಭತ್ತಾ [ತಾತೋ (ಸೀ. ಸ್ಯಾ. ಪೀ.)], ಕಸ್ಮಾ ದಾನಿ ಪಲಾಯಸಿ.

೪೭. ಸಚೇ [ನ ಖೋ (ಸ್ಯಾ. ಕ.)] ಪನಾದಿಕೇನೇವ, ಸನ್ಥವೋ ನಾಮ ಜಾಯತಿ;

ಯಸೋ ಹಾಯತಿ ಇತ್ಥೀನಂ, ತಸ್ಮಾ ತಾತ ಪಲಾಯಹಂ [ಪಲಾಯಿಹಂ (ಸ್ಯಾ.), ಪಲಾಯಿತಂ (ಕ.)].

೪೮. ಯಸ್ಸಸ್ಸಿನಂ ಕುಲೇ ಜಾತಂ, ಆಗತಂ ಯಾ ನ ಇಚ್ಛತಿ;

ಸೋಚತಿ ಚಿರರತ್ತಾಯ, ವಾತಗ್ಗಮಿವ ಭದ್ದಲೀತಿ [ಕುನ್ದಲೀತಿ (ಸೀ. ಪೀ.), ಗದ್ರಭೀತಿ (ಸ್ಯಾ.)].

ವಾತಗ್ಗಸಿನ್ಧವಜಾತಕಂ ಛಟ್ಠಂ.

೨೬೭. ಕಕ್ಕಟಕಜಾತಕಂ (೩-೨-೭)

೪೯. ಸಿಙ್ಗೀಮಿಗೋ ಆಯತಚಕ್ಖುನೇತ್ತೋ, ಅಟ್ಠಿತ್ತಚೋ ವಾರಿಸಯೋ ಅಲೋಮೋ;

ತೇನಾಭಿಭೂತೋ ಕಪಣಂ ರುದಾಮಿ, ಮಾ ಹೇವ ಮಂ ಪಾಣಸಮಂ ಜಹೇಯ್ಯ [ಜಹೇಯ್ಯಾ (ಪೀ.) ಜಹಾ’ಯ್ಯೇ (?)].

೫೦. ಅಯ್ಯ ನ ತಂ ಜಹಿಸ್ಸಾಮಿ, ಕುಞ್ಜರಂ ಸಟ್ಠಿಹಾಯನಂ [ಕುಞ್ಜರ ಸಟ್ಠಿಹಾಯನ (ಸೀ. ಪೀ.)];

ಪಥಬ್ಯಾ ಚಾತುರನ್ತಾಯ, ಸುಪ್ಪಿಯೋ ಹೋಸಿ ಮೇ ತುವಂ.

೫೧. ಯೇ ಕುಳೀರಾ ಸಮುದ್ದಸ್ಮಿಂ, ಗಙ್ಗಾಯ ಯಮುನಾಯ [ನಮ್ಮದಾಯ (ಸೀ. ಪೀ.)] ಚ;

ತೇಸಂ ತ್ವಂ ವಾರಿಜೋ ಸೇಟ್ಠೋ, ಮುಞ್ಚ ರೋದನ್ತಿಯಾ ಪತಿನ್ತಿ.

ಕಕ್ಕಟಕ [ಕುಳೀರ (ಕ.)] ಜಾತಕಂ ಸತ್ತಮಂ.

೨೬೮. ಆರಾಮದೂಸಕಜಾತಕಂ (೩-೨-೮)

೫೨. ಯೋ ವೇ ಸಬ್ಬಸಮೇತಾನಂ, ಅಹುವಾ ಸೇಟ್ಠಸಮ್ಮತೋ;

ತಸ್ಸಾಯಂ ಏದಿಸೀ ಪಞ್ಞಾ, ಕಿಮೇವ ಇತರಾ ಪಜಾ.

೫೩. ಏವಮೇವ ತುವಂ ಬ್ರಹ್ಮೇ, ಅನಞ್ಞಾಯ ವಿನಿನ್ದಸಿ;

ಕಥಂ ಮೂಲಂ ಅದಿಸ್ವಾನ [ಕಥಂಹಿ ಮೂಲಂ ಅದಿತ್ವಾ (ಸ್ಯಾ. ಪೀ.)], ರುಕ್ಖಂ ಜಞ್ಞಾ ಪತಿಟ್ಠಿತಂ.

೫೪. ನಾಹಂ ತುಮ್ಹೇ ವಿನಿನ್ದಾಮಿ, ಯೇ ಚಞ್ಞೇ ವಾನರಾ ವನೇ;

ವಿಸ್ಸಸೇನೋವ ಗಾರಯ್ಹೋ, ಯಸ್ಸತ್ಥಾ ರುಕ್ಖರೋಪಕಾತಿ.

ಆರಾಮದೂಸಕಜಾತಕಂ ಅಟ್ಠಮಂ.

೨೬೯. ಸುಜಾತಜಾತಕಂ (೩-೨-೯)

೫೫. ನ ಹಿ ವಣ್ಣೇನ ಸಮ್ಪನ್ನಾ, ಮಞ್ಜುಕಾ ಪಿಯದಸ್ಸನಾ;

ಖರವಾಚಾ ಪಿಯಾ ಹೋತಿ, ಅಸ್ಮಿಂ ಲೋಕೇ ಪರಮ್ಹಿ ಚ.

೫೬. ನನು ಪಸ್ಸಸಿಮಂ ಕಾಳಿಂ, ದುಬ್ಬಣ್ಣಂ ತಿಲಕಾಹತಂ;

ಕೋಕಿಲಂ ಸಣ್ಹವಾಚೇನ, ಬಹೂನಂ ಪಾಣಿನಂ ಪಿಯಂ.

೫೭. ತಸ್ಮಾ ಸಖಿಲವಾಚಸ್ಸ, ಮನ್ತಭಾಣೀ ಅನುದ್ಧತೋ;

ಅತ್ಥಂ ಧಮ್ಮಞ್ಚ ದೀಪೇತಿ, ಮಧುರಂ ತಸ್ಸ ಭಾಸಿತನ್ತಿ.

ಸುಜಾತಜಾತಕಂ ನವಮಂ.

೨೭೦. ಉಲೂಕಜಾತಕಂ (೩-೨-೧೦)

೫೮. ಸಬ್ಬೇಹಿ ಕಿರ ಞಾತೀಹಿ, ಕೋಸಿಯೋ ಇಸ್ಸರೋ ಕತೋ;

ಸಚೇ ಞಾತೀಹಿ ಅನುಞ್ಞಾತೋ [ಞಾತೀಹನುಞ್ಞಾತೋ (ಸೀ. ಪೀ.)], ಭಣೇಯ್ಯಾಹಂ ಏಕವಾಚಿಕಂ.

೫೯. ಭಣ ಸಮ್ಮ ಅನುಞ್ಞಾತೋ, ಅತ್ಥಂ ಧಮ್ಮಞ್ಚ ಕೇವಲಂ;

ಸನ್ತಿ ಹಿ ದಹರಾ ಪಕ್ಖೀ, ಪಞ್ಞವನ್ತೋ ಜುತಿನ್ಧರಾ.

೬೦. ನ ಮೇ ರುಚ್ಚತಿ ಭದ್ದಂ ವೋ [ಭದನ್ತೇ (ಕ.)], ಉಲೂಕಸ್ಸಾಭಿಸೇಚನಂ;

ಅಕ್ಕುದ್ಧಸ್ಸ ಮುಖಂ ಪಸ್ಸ, ಕಥಂ ಕುದ್ಧೋ ಕರಿಸ್ಸತೀತಿ.

ಉಲೂಕಜಾತಕಂ ದಸಮಂ.

ಪದುಮವಗ್ಗೋ ದುತಿಯೋ.

ತಸ್ಸುದ್ದಾನಂ –

ಪದುಮುತ್ತಮ ನಾಗಸಿರಿವ್ಹಯನೋ, ಸ-ಮಹಣ್ಣವ ಯೂಪ ಖುರಪ್ಪವರೋ;

ಅಥ ಭದ್ದಲೀ ಕುಞ್ಜರ ರುಕ್ಖ ಪುನ, ಖರವಾಚ ಉಲೂಕವರೇನ ದಸಾತಿ.