೯. ಉಪಾಹನವಗ್ಗೋ

೨೩೧. ಉಪಾಹನಜಾತಕಂ (೨-೯-೧)

೧೬೧. ಯಥಾಪಿ ಕೀತಾ ಪುರಿಸಸ್ಸುಪಾಹನಾ, ಸುಖಸ್ಸ ಅತ್ಥಾಯ ದುಖಂ ಉದಬ್ಬಹೇ;

ಘಮ್ಮಾಭಿತತ್ತಾ ಥಲಸಾ ಪಪೀಳಿತಾ, ತಸ್ಸೇವ ಪಾದೇ ಪುರಿಸಸ್ಸ ಖಾದರೇ.

೧೬೨. ಏವಮೇವ ಯೋ ದುಕ್ಕುಲೀನೋ ಅನರಿಯೋ, ತಮ್ಮಾಕ [ತಮ್ಹಾಕ (ಸೀ.), ತುಮ್ಹಾಕ (ಸ್ಯಾ. ಪೀ.)] ವಿಜ್ಜಞ್ಚ ಸುತಞ್ಚ ಆದಿಯ;

ತಮೇವ ಸೋ ತತ್ಥ ಸುತೇನ ಖಾದತಿ, ಅನರಿಯೋ ವುಚ್ಚತಿ ದುಪಾಹನೂಪಮೋತಿ [ಪಾನದೂಪಮೋತಿ (ಸೀ. ಪೀ.)].

ಉಪಾಹನಜಾತಕಂ ಪಠಮಂ.

೨೩೨. ವೀಣಾಗುಣಜಾತಕಂ (೨-೯-೨)

೧೬೩. ಏಕಚಿನ್ತಿತೋ ಯಮತ್ಥೋ, ಬಾಲೋ ಅಪರಿಣಾಯಕೋ;

ನ ಹಿ ಖುಜ್ಜೇನ ವಾಮೇನ, ಭೋತಿ ಸಙ್ಗನ್ತುಮರಹಸಿ.

೧೬೪. ಪುರಿಸೂಸಭಂ ಮಞ್ಞಮಾನಾ, ಅಹಂ ಖುಜ್ಜಮಕಾಮಯಿಂ;

ಸೋಯಂ ಸಂಕುಟಿತೋ ಸೇತಿ, ಛಿನ್ನತನ್ತಿ ಯಥಾ ವಿಣಾತಿ [ಥುಣಾತಿ (ಸೀ.)].

ವೀಣಾಗುಣಜಾತಕಂ ದುತಿಯಂ.

೨೩೩. ವಿಕಣ್ಣಜಾತಕಂ (೨-೯-೩)

೧೬೫. ಕಾಮಂ ಯಹಿಂ ಇಚ್ಛಸಿ ತೇನ ಗಚ್ಛ, ವಿದ್ಧೋಸಿ ಮಮ್ಮಮ್ಹಿ [ಮಮಸ್ಮಿ (ಕ.)] ವಿಕಣ್ಣಕೇನ;

ಹತೋಸಿ ಭತ್ತೇನ ಸುವಾದಿತೇನ [ಸವಾದಿತೇನ (ಸೀ. ಸ್ಯಾ. ಪೀ.)], ಲೋಲೋ ಚ ಮಚ್ಛೇ ಅನುಬನ್ಧಮಾನೋ.

೧೬೬. ಏವಮ್ಪಿ ಲೋಕಾಮಿಸಂ ಓಪತನ್ತೋ, ವಿಹಞ್ಞತೀ ಚಿತ್ತವಸಾನುವತ್ತೀ;

ಸೋ ಹಞ್ಞತಿ ಞಾತಿಸಖಾನ ಮಜ್ಝೇ, ಮಚ್ಛಾನುಗೋ ಸೋರಿವ ಸುಂಸುಮಾರೋತಿ [ಸುಸುಮಾರೋ (ಕ.)].

ವಿಕಣ್ಣಜಾತಕಂ ತತಿಯಂ.

೨೩೪. ಅಸಿತಾಭೂಜಾತಕಂ (೨-೯-೪)

೧೬೭. ತ್ವಮೇವ ದಾನಿಮಕರ [ಮಕರಿ (ಸ್ಯಾ.), ಮಕರಾ (ಕ. ಸೀ.)], ಯಂ ಕಾಮೋ ಬ್ಯಗಮಾ ತಯಿ;

ಸೋಯಂ ಅಪ್ಪಟಿಸನ್ಧಿಕೋ, ಖರಛಿನ್ನಂವ ರೇನುಕಂ [ರೇರುಕಂ (ಸೀ. ಪೀ.)].

೧೬೮. ಅತ್ರಿಚ್ಛಂ [ಅತ್ರಿಚ್ಛಾ (ಸೀ. ಸ್ಯಾ. ಪೀ.)] ಅತಿಲೋಭೇನ, ಅತಿಲೋಭಮದೇನ ಚ;

ಏವಂ ಹಾಯತಿ ಅತ್ಥಮ್ಹಾ, ಅಹಂವ ಅಸಿತಾಭುಯಾತಿ.

ಅಸಿತಾಭೂಜಾತಕಂ ಚತುತ್ಥಂ.

೨೩೫. ವಚ್ಛನಖಜಾತಕಂ (೨-೯-೫)

೧೬೯. ಸುಖಾ ಘರಾ ವಚ್ಛನಖ, ಸಹಿರಞ್ಞಾ ಸಭೋಜನಾ;

ಯತ್ಥ ಭುತ್ವಾ ಪಿವಿತ್ವಾ ಚ, ಸಯೇಯ್ಯಾಥ ಅನುಸ್ಸುಕೋ.

೧೭೦. ಘರಾ ನಾನೀಹಮಾನಸ್ಸ, ಘರಾ ನಾಭಣತೋ ಮುಸಾ;

ಘರಾ ನಾದಿನ್ನದಣ್ಡಸ್ಸ, ಪರೇಸಂ ಅನಿಕುಬ್ಬತೋ [ಅನಿಕ್ರುಬ್ಬತೋ (ಕ.)];

ಏವಂ ಛಿದ್ದಂ ದುರಭಿಸಮ್ಭವಂ [ದುರಭಿಭವಂ (ಸೀ. ಪೀ.)], ಕೋ ಘರಂ ಪಟಿಪಜ್ಜತೀತಿ.

ವಚ್ಛನಖಜಾತಕಂ ಪಞ್ಚಮಂ.

೨೩೬. ಬಕಜಾತಕಂ (೨-೯-೬)

೧೭೧. ಭದ್ದಕೋ ವತಯಂ ಪಕ್ಖೀ, ದಿಜೋ ಕುಮುದಸನ್ನಿಭೋ;

ವೂಪಸನ್ತೇಹಿ ಪಕ್ಖೇಹಿ, ಮನ್ದಮನ್ದೋವ ಝಾಯತಿ.

೧೭೨. ನಾಸ್ಸ ಸೀಲಂ ವಿಜಾನಾಥ, ಅನಞ್ಞಾಯ ಪಸಂಸಥ;

ಅಮ್ಹೇ ದಿಜೋ ನ ಪಾಲೇತಿ, ತೇನ ಪಕ್ಖೀ ನ ಫನ್ದತೀತಿ.

ಬಕಜಾತಕಂ ಛಟ್ಠಂ.

೨೩೭. ಸಾಕೇತಜಾತಕಂ (೨-೯-೭)

೧೭೩. ಕೋ ನು ಖೋ ಭಗವಾ ಹೇತು, ಏಕಚ್ಚೇ ಇಧ ಪುಗ್ಗಲೇ;

ಅತೀವ ಹದಯಂ ನಿಬ್ಬಾತಿ, ಚಿತ್ತಞ್ಚಾಪಿ ಪಸೀದತಿ.

೧೭೪. ಪುಬ್ಬೇವ ಸನ್ನಿವಾಸೇನ, ಪಚ್ಚುಪ್ಪನ್ನಹಿತೇನ ವಾ;

ಏವಂ ತಂ ಜಾಯತೇ ಪೇಮಂ, ಉಪ್ಪಲಂವ ಯಥೋದಕೇತಿ.

ಸಾಕೇತಜಾತಕಂ ಸತ್ತಮಂ.

೨೩೮. ಏಕಪದಜಾತಕಂ (೨-೯-೮)

೧೭೫. ಇಙ್ಘ ಏಕಪದಂ ತಾತ, ಅನೇಕತ್ಥಪದಸ್ಸಿತಂ [ಪದನಿಸ್ಸಿತಂ (ಸೀ. ಪೀ.)];

ಕಿಞ್ಚಿ ಸಙ್ಗಾಹಿಕಂ ಬ್ರೂಸಿ, ಯೇನತ್ಥೇ ಸಾಧಯೇಮಸೇ.

೧೭೬. ದಕ್ಖೇಯ್ಯೇಕಪದಂ ತಾತ, ಅನೇಕತ್ಥಪದಸ್ಸಿತಂ;

ತಞ್ಚ ಸೀಲೇನ ಸಞ್ಞುತ್ತಂ, ಖನ್ತಿಯಾ ಉಪಪಾದಿತಂ;

ಅಲಂ ಮಿತ್ತೇ ಸುಖಾಪೇತುಂ, ಅಮಿತ್ತಾನಂ ದುಖಾಯ ಚಾತಿ.

ಏಕಪದಜಾತಕಂ ಅಟ್ಠಮಂ.

೨೩೯. ಹರಿತಮಣ್ಡೂಕಜಾತಕಂ (೨-೯-೯)

೧೭೭. ಆಸೀವಿಸಮ್ಪಿ ಮಂ [ಆಸೀವಿಸಂ ಮಮಂ (ಸೀ. ಪೀ.)] ಸನ್ತಂ, ಪವಿಟ್ಠಂ ಕುಮಿನಾಮುಖಂ;

ರುಚ್ಚತೇ ಹರಿತಾಮಾತಾ, ಯಂ ಮಂ ಖಾದನ್ತಿ ಮಚ್ಛಕಾ.

೧೭೮. ವಿಲುಮ್ಪತೇವ ಪುರಿಸೋ, ಯಾವಸ್ಸ ಉಪಕಪ್ಪತಿ;

ಯದಾ ಚಞ್ಞೇ ವಿಲುಮ್ಪನ್ತಿ, ಸೋ ವಿಲುತ್ತೋ ವಿಲುಮ್ಪತೀತಿ [ವಿಲುಪ್ಪತೀತಿ (?)].

ಹರಿತಮಣ್ಡೂಕಜಾತಕಂ ನವಮಂ.

೨೪೦. ಮಹಾಪಿಙ್ಗಲಜಾತಕಂ (೨-೯-೧೦)

೧೭೯. ಸಬ್ಬೋ ಜನೋ ಹಿಂಸಿತೋ ಪಿಙ್ಗಲೇನ, ತಸ್ಮಿಂ ಮತೇ ಪಚ್ಚಯಾ [ಪಚ್ಚಯಂ (ಸೀ. ಸ್ಯಾ. ಪೀ.)] ವೇದಯನ್ತಿ;

ಪಿಯೋ ನು ತೇ ಆಸಿ ಅಕಣ್ಹನೇತ್ತೋ, ಕಸ್ಮಾ ನು ತ್ವಂ ರೋದಸಿ ದ್ವಾರಪಾಲ.

೧೮೦. ನ ಮೇ ಪಿಯೋ ಆಸಿ ಅಕಣ್ಹನೇತ್ತೋ, ಭಾಯಾಮಿ ಪಚ್ಚಾಗಮನಾಯ ತಸ್ಸ;

ಇತೋ ಗತೋ ಹಿಂಸೇಯ್ಯ ಮಚ್ಚುರಾಜಂ, ಸೋ ಹಿಂಸಿತೋ ಆನೇಯ್ಯ ಪುನ ಇಧ.

೧೮೧. ದಡ್ಢೋ ವಾಹಸಹಸ್ಸೇಹಿ, ಸಿತ್ತೋ ಘಟಸತೇಹಿ ಸೋ;

ಪರಿಕ್ಖತಾ ಚ ಸಾ ಭೂಮಿ, ಮಾ ಭಾಯಿ ನಾಗಮಿಸ್ಸತೀತಿ.

ಮಹಾಪಿಙ್ಗಲಜಾತಕಂ ದಸಮಂ.

ಉಪಾಹನವಗ್ಗೋ ನವಮೋ.

ತಸ್ಸುದ್ದಾನಂ –

ವರುಪಾಹನ ಖುಜ್ಜ ವಿಕಣ್ಣಕಕೋ, ಅಸಿತಾಭುಯ ಪಞ್ಚಮವಚ್ಛನಖೋ;

ದಿಜ ಪೇಮವರುತ್ತಮಏಕಪದಂ, ಕುಮಿನಾಮುಖ ಪಿಙ್ಗಲಕೇನ ದಸಾತಿ.