೮. ಕಾಸಾವವಗ್ಗೋ

೨೨೧. ಕಾಸಾವಜಾತಕಂ (೨-೮-೧)

೧೪೧. ಅನಿಕ್ಕಸಾವೋ ಕಾಸಾವಂ, ಯೋ ವತ್ಥಂ ಪರಿದಹಿಸ್ಸತಿ [ಪರಿದಹೇಸ್ಸತಿ (ಸೀ. ಪೀ.)];

ಅಪೇತೋ ದಮಸಚ್ಚೇನ, ನ ಸೋ ಕಾಸಾವಮರಹತಿ.

೧೪೨. ಯೋ ಚ ವನ್ತಕಸಾವಸ್ಸ, ಸೀಲೇಸು ಸುಸಮಾಹಿತೋ;

ಉಪೇತೋ ದಮಸಚ್ಚೇನ, ಸ ವೇ ಕಾಸಾವಮರಹತೀತಿ.

ಕಾಸಾವಜಾತಕಂ ಪಠಮಂ.

೨೨೨. ಚೂಳನನ್ದಿಯಜಾತಕಂ (೨-೮-೨)

೧೪೩. ಇದಂ ತದಾಚರಿಯವಚೋ, ಪಾರಾಸರಿಯೋ ಯದಬ್ರವಿ [ಪೋರಾಣಾಚರಿಯೋಬ್ರವಿ (ಕ.)];

ಮಾಸು ತ್ವಂ ಅಕರಿ [ಅಕರಾ (ಸೀ. ಪೀ.)] ಪಾಪಂ, ಯಂ ತ್ವಂ ಪಚ್ಛಾ ಕತಂ ತಪೇ.

೧೪೪. ಯಾನಿ ಕರೋತಿ ಪುರಿಸೋ, ತಾನಿ ಅತ್ತನಿ ಪಸ್ಸತಿ;

ಕಲ್ಯಾಣಕಾರೀ ಕಲ್ಯಾಣಂ, ಪಾಪಕಾರೀ ಚ ಪಾಪಕಂ;

ಯಾದಿಸಂ ವಪತೇ ಬೀಜಂ, ತಾದಿಸಂ ಹರತೇ ಫಲನ್ತಿ.

ಚೂಳನನ್ದಿಯಜಾತಕಂ ದುತಿಯಂ.

೨೨೩. ಪುಟಭತ್ತಜಾತಕಂ (೨-೮-೩)

೧೪೫. ನಮೇ ನಮನ್ತಸ್ಸ ಭಜೇ ಭಜನ್ತಂ, ಕಿಚ್ಚಾನುಕುಬ್ಬಸ್ಸ ಕರೇಯ್ಯ ಕಿಚ್ಚಂ;

ನಾನತ್ಥಕಾಮಸ್ಸ ಕರೇಯ್ಯ ಅತ್ಥಂ, ಅಸಮ್ಭಜನ್ತಮ್ಪಿ ನ ಸಮ್ಭಜೇಯ್ಯ.

೧೪೬. ಚಜೇ ಚಜನ್ತಂ ವನಥಂ ನ ಕಯಿರಾ, ಅಪೇತಚಿತ್ತೇನ ನ ಸಮ್ಭಜೇಯ್ಯ;

ದಿಜೋ ದುಮಂ ಖೀಣಫಲನ್ತಿ ಞತ್ವಾ, ಅಞ್ಞಂ ಸಮೇಕ್ಖೇಯ್ಯ ಮಹಾ ಹಿ ಲೋಕೋತಿ.

ಪುಟಭತ್ತಜಾತಕಂ ತತಿಯಂ.

೨೨೪. ಕುಮ್ಭಿಲಜಾತಕಂ (೨-೮-೪)

೧೪೭. ಯಸ್ಸೇತೇ ಚತುರೋ ಧಮ್ಮಾ, ವಾನರಿನ್ದ ಯಥಾ ತವ;

ಸಚ್ಚಂ ಧಮ್ಮೋ ಧಿತಿ ಚಾಗೋ, ದಿಟ್ಠಂ ಸೋ ಅತಿವತ್ತತಿ.

೧೪೮. ಯಸ್ಸ ಚೇತೇ ನ ವಿಜ್ಜನ್ತಿ, ಗುಣಾ ಪರಮಭದ್ದಕಾ;

ಸಚ್ಚಂ ಧಮ್ಮೋ ಧಿತಿ ಚಾಗೋ, ದಿಟ್ಠಂ ಸೋ ನಾತಿವತ್ತತೀತಿ.

ಕುಮ್ಭಿಲಜಾತಕಂ ಚತುತ್ಥಂ.

೨೨೫. ಖನ್ತಿವಣ್ಣಜಾತಕಂ (೨-೮-೫)

೧೪೯. ಅತ್ಥಿ ಮೇ ಪುರಿಸೋ ದೇವ, ಸಬ್ಬಕಿಚ್ಚೇಸು ಬ್ಯಾವಟೋ [ವಾವಟೋ (ಕ.)];

ತಸ್ಸ ಚೇಕೋಪರಾಧತ್ಥಿ, ತತ್ಥ ತ್ವಂ ಕಿನ್ತಿ ಮಞ್ಞಸಿ.

೧೫೦. ಅಮ್ಹಾಕಮ್ಪತ್ಥಿ ಪುರಿಸೋ, ಏದಿಸೋ ಇಧ ವಿಜ್ಜತಿ;

ದುಲ್ಲಭೋ ಅಙ್ಗಸಮ್ಪನ್ನೋ, ಖನ್ತಿರಸ್ಮಾಕ ರುಚ್ಚತೀತಿ.

ಖನ್ತಿವಣ್ಣಜಾತಕಂ ಪಞ್ಚಮಂ.

೨೨೬. ಕೋಸಿಯಜಾತಕಂ (೨-೮-೬)

೧೫೧. ಕಾಲೇ ನಿಕ್ಖಮನಾ ಸಾಧು, ನಾಕಾಲೇ ಸಾಧು ನಿಕ್ಖಮೋ;

ಅಕಾಲೇನ ಹಿ ನಿಕ್ಖಮ್ಮ, ಏಕಕಮ್ಪಿ ಬಹುಜ್ಜನೋ;

ನ ಕಿಞ್ಚಿ ಅತ್ಥಂ ಜೋತೇತಿ, ಧಙ್ಕಸೇನಾವ ಕೋಸಿಯಂ.

೧೫೨. ಧೀರೋ ಚ ವಿಧಿವಿಧಾನಞ್ಞೂ, ಪರೇಸಂ ವಿವರಾನುಗೂ;

ಸಬ್ಬಾಮಿತ್ತೇ ವಸೀಕತ್ವಾ, ಕೋಸಿಯೋವ ಸುಖೀ ಸಿಯಾತಿ.

ಕೋಸಿಯಜಾತಕಂ ಛಟ್ಠಂ.

೨೨೭. ಗೂಥಪಾಣಜಾತಕಂ (೨-೮-೭)

೧೫೩. ಸೂರೋ ಸೂರೇನ ಸಙ್ಗಮ್ಮ, ವಿಕ್ಕನ್ತೇನ ಪಹಾರಿನಾ;

ಏಹಿ ನಾಗ ನಿವತ್ತಸ್ಸು, ಕಿಂ ನು ಭೀತೋ ಪಲಾಯಸಿ;

ಪಸ್ಸನ್ತು ಅಙ್ಗಮಗಧಾ, ಮಮ ತುಯ್ಹಞ್ಚ ವಿಕ್ಕಮಂ.

೧೫೪. ನ ತಂ ಪಾದಾ ವಧಿಸ್ಸಾಮಿ, ನ ದನ್ತೇಹಿ ನ ಸೋಣ್ಡಿಯಾ;

ಮೀಳ್ಹೇನ ತಂ ವಧಿಸ್ಸಾಮಿ, ಪೂತಿ ಹಞ್ಞತು ಪೂತಿನಾತಿ.

ಗೂಥಪಾಣಜಾತಕಂ ಸತ್ತಮಂ.

೨೨೮. ಕಾಮನೀತಜಾತಕಂ (೨-೮-೮)

೧೫೫. ತಯೋ ಗಿರಿಂ ಅನ್ತರಂ ಕಾಮಯಾಮಿ, ಪಞ್ಚಾಲಾ ಕುರುಯೋ ಕೇಕಕೇ ಚ [ಕುರಯೋ ಕೇಕಯೇ ಚ (ಸೀ.)];

ತತುತ್ತರಿಂ [ತದುತ್ತರಿಂ (ಕ.)] ಬ್ರಾಹ್ಮಣ ಕಾಮಯಾಮಿ, ತಿಕಿಚ್ಛ ಮಂ ಬ್ರಾಹ್ಮಣ ಕಾಮನೀತಂ.

೧೫೬. ಕಣ್ಹಾಹಿದಟ್ಠಸ್ಸ ಕರೋನ್ತಿ ಹೇಕೇ, ಅಮನುಸ್ಸಪವಿಟ್ಠಸ್ಸ [ಅಮನುಸ್ಸವದ್ಧಸ್ಸ (ಸೀ. ಪೀ.), ಅಮನುಸ್ಸವಿಟ್ಠಸ್ಸ (ಸ್ಯಾ.)] ಕರೋನ್ತಿ ಪಣ್ಡಿತಾ;

ನ ಕಾಮನೀತಸ್ಸ ಕರೋತಿ ಕೋಚಿ, ಓಕ್ಕನ್ತಸುಕ್ಕಸ್ಸ ಹಿ ಕಾ ತಿಕಿಚ್ಛಾತಿ.

ಕಾಮನೀತಜಾತಕಂ ಅಟ್ಠಮಂ.

೨೨೯. ಪಲಾಯಿತಜಾತಕಂ (೨-೮-೯)

೧೫೭. ಗಜಗ್ಗಮೇಘೇಹಿ ಹಯಗ್ಗಮಾಲಿಭಿ, ರಥೂಮಿಜಾತೇಹಿ ಸರಾಭಿವಸ್ಸೇಭಿ [ಸರಾಭಿವಸ್ಸಭಿ (ಸ್ಯಾ. ಸೀ. ಅಟ್ಠ.), ಸರಾಭಿವಸ್ಸಿಭಿ (?)];

ಥರುಗ್ಗಹಾವಟ್ಟ [ಧನುಗ್ಗಹಾವಟ್ಟ (ಕ.)] ದಳ್ಹಪ್ಪಹಾರಿಭಿ, ಪರಿವಾರಿತಾ ತಕ್ಕಸಿಲಾ ಸಮನ್ತತೋ.

೧೫೮. [ಅಭಿಧಾವಥಾ ಚ ಪತಥಾ ಚ, ವಿವಿಧವಿನದಿತಾ ಚ ದನ್ತಿಭಿ; ವತ್ತತಜ್ಜ ತುಮುಲೋ ಘೋಸೋ, ಯಥಾ ವಿಜ್ಜುತಾ ಜಲಧರಸ್ಸ ಗಜ್ಜತೋತಿ; (ಸೀ. ಪೀ. ಕ.)] ಅಭಿಧಾವಥ ಚೂಪಧಾವಥ ಚ [ಅಭಿಧಾವಥಾ ಚುಪ್ಪತಥಾ ಚ (ಸ್ಯಾ.)], ವಿವಿಧಾ ವಿನಾದಿತಾ [ವಿನಾದಿತತ್ಥ (ಕ.)] ವದನ್ತಿಭಿ;

ವತ್ತತಜ್ಜ ತುಮುಲೋ ಘೋಸೋ ಯಥಾ, ವಿಜ್ಜುಲತಾ ಜಲಧರಸ್ಸ ಗಜ್ಜತೋತಿ [ಅಭಿಧಾವಥಾ ಚ ಪತಥಾ ಚ, ವಿವಿಧವಿನದಿತಾ ಚ ದನ್ತಿಭಿ; ವತ್ತತಜ್ಜ ತುಮುಲೋ ಘೋಸೋ, ಯಥಾ ವಿಜ್ಜುತಾ ಜಲಧರಸ್ಸ ಗಜ್ಜತೋತಿ; (ಸೀ. ಪೀ. ಕ.)].

ಪಲಾಯಿತಜಾತಕಂ ನವಮಂ.

೨೩೦. ದುತಿಯಪಲಾಯಿತಜಾತಕಂ (೨-೮-೧೦)

೧೫೯. ಧಜಮಪರಿಮಿತಂ ಅನನ್ತಪಾರಂ, ದುಪ್ಪಸಹಂಧಙ್ಕೇಹಿ ಸಾಗರಂವ [ಸಾಗರಮಿವ (ಸೀ. ಸ್ಯಾ. ಪೀ.)];

ಗಿರಿಮಿವಅನಿಲೇನ ದುಪ್ಪಸಯ್ಹೋ [ದುಪ್ಪಸಹೋ (ಸೀ. ಪೀ. ಕ.)], ದುಪ್ಪಸಹೋ ಅಹಮಜ್ಜತಾದಿಸೇನ.

೧೬೦. ಮಾ ಬಾಲಿಯಂ ವಿಲಪಿ [ವಿಪ್ಪಲಪಿ (ಬಹೂಸು)] ನ ಹಿಸ್ಸ ತಾದಿಸಂ, ವಿಡಯ್ಹಸೇ [ವಿಳಯ್ಹಸೇ (ಸೀ. ಪೀ.)] ನ ಹಿ ಲಭಸೇ ನಿಸೇಧಕಂ;

ಆಸಜ್ಜಸಿ ಗಜಮಿವ ಏಕಚಾರಿನಂ, ಯೋ ತಂ ಪದಾ ನಳಮಿವ ಪೋಥಯಿಸ್ಸತೀತಿ.

ದುತಿಯಪಲಾಯಿತಜಾತಕಂ ದಸಮಂ.

ಕಾಸಾವವಗ್ಗೋ ಅಟ್ಠಮೋ.

ತಸ್ಸುದ್ದಾನಂ –

ವರವತ್ಥವಚೋ ದುಮಖೀಣಫಲಂ, ಚತುರೋಧಮ್ಮವರಂ ಪುರಿಸುತ್ತಮ;

ಧಙ್ಕಮಗಧಾ ಚ ತಯೋಗಿರಿನಾಮ, ಗಜಗ್ಗವರೋ ಧಜವರೇನ ದಸಾತಿ.