೭. ಬೀರಣಥಮ್ಭವಗ್ಗೋ

೨೧೧. ಸೋಮದತ್ತಜಾತಕಂ (೨-೭-೧)

೧೨೧. ಅಕಾಸಿ ಯೋಗ್ಗಂ ಧುವಮಪ್ಪಮತ್ತೋ, ಸಂವಚ್ಛರಂ ಬೀರಣಥಮ್ಭಕಸ್ಮಿಂ;

ಬ್ಯಾಕಾಸಿ ಸಞ್ಞಂ ಪರಿಸಂ ವಿಗಯ್ಹ, ನ ನಿಯ್ಯಮೋ ತಾಯತಿ ಅಪ್ಪಪಞ್ಞಂ.

೧೨೨. ದ್ವಯಂ ಯಾಚನಕೋ ತಾತ, ಸೋಮದತ್ತ ನಿಗಚ್ಛತಿ;

ಅಲಾಭಂ ಧನಲಾಭಂ ವಾ, ಏವಂ ಧಮ್ಮಾ ಹಿ ಯಾಚನಾತಿ.

ಸೋಮದತ್ತಜಾತಕಂ ಪಠಮಂ.

೨೧೨. ಉಚ್ಛಿಟ್ಠಭತ್ತಜಾತಕಂ (೨-೭-೨)

೧೨೩. ಅಞ್ಞೋ ಉಪರಿಮೋ ವಣ್ಣೋ, ಅಞ್ಞೋ ವಣ್ಣೋ ಚ ಹೇಟ್ಠಿಮೋ;

ಬ್ರಾಹ್ಮಣೀ ತ್ವೇವ ಪುಚ್ಛಾಮಿ, ಕಿಂ ಹೇಟ್ಠಾ ಕಿಞ್ಚ ಉಪ್ಪರಿ.

೧೨೪. ಅಹಂ ನಟೋಸ್ಮಿ ಭದ್ದನ್ತೇ, ಭಿಕ್ಖಕೋಸ್ಮಿ ಇಧಾಗತೋ;

ಅಯಞ್ಹಿ ಕೋಟ್ಠಮೋತಿಣ್ಣೋ, ಅಯಂ ಸೋ ಯಂ [ತ್ವಂ (ಕ.)] ಗವೇಸಸೀತಿ.

ಉಚ್ಛಿಟ್ಠಭತ್ತಜಾತಕಂ ದುತಿಯಂ.

೨೧೩. ಭರುಜಾತಕಂ (೨-೭-೩)

೧೨೫. ಇಸೀನಮನ್ತರಂ ಕತ್ವಾ, ಭರುರಾಜಾತಿ [ಕುರುರಾಜಾತಿ (ಕ.)] ಮೇ ಸುತಂ;

ಉಚ್ಛಿನ್ನೋ ಸಹ ರಟ್ಠೇಹಿ [ರಟ್ಠೇನ (ಸೀ. ಪೀ.)], ಸರಾಜಾ ವಿಭವಙ್ಗತೋ.

೧೨೬. ತಸ್ಮಾ ಹಿ ಛನ್ದಾಗಮನಂ, ನಪ್ಪಸಂಸನ್ತಿ ಪಣ್ಡಿತಾ;

ಅದುಟ್ಠಚಿತ್ತೋ ಭಾಸೇಯ್ಯ, ಗಿರಂ ಸಚ್ಚುಪಸಂಹಿತನ್ತಿ.

ಭರುಜಾತಕಂ [ಕುರುರಾತಕಂ (ಕ.)] ತತಿಯಂ.

೨೧೪. ಪುಣ್ಣನದೀಜಾತಕಂ (೨-೭-೪)

೧೨೭. ಪುಣ್ಣಂ ನದಿಂ ಯೇನ ಚ ಪೇಯ್ಯಮಾಹು, ಜಾತಂ ಯವಂ ಯೇನ ಚ ಗುಯ್ಹಮಾಹು;

ದೂರಂ ಗತಂ ಯೇನ ಚ ಅವ್ಹಯನ್ತಿ, ಸೋ ತ್ಯಾಗತೋ [ತ್ಯಾಭತೋ (ಸ್ಯಾ. ಕ.) ಪಹೇಳಿಗಾಥಾಭಾವೋ ಮನಸಿ ಕಾತಬ್ಬೋ] ಹನ್ದ ಚ ಭುಞ್ಜ ಬ್ರಾಹ್ಮಣ.

೧೨೮. ಯತೋ ಮಂ ಸರತೀ ರಾಜಾ, ವಾಯಸಮ್ಪಿ ಪಹೇತವೇ;

ಹಂಸಾ ಕೋಞ್ಚಾ ಮಯೂರಾ ಚ [ಹಂಸಕೋಞ್ಚಮಯೂರಾನಂ (ಕ. ಅಟ್ಠ. ಪಾಠನ್ತರಂ)], ಅಸತೀಯೇವ ಪಾಪಿಯಾತಿ.

ಪುಣ್ಣನದೀಜಾತಕಂ ಚತುತ್ಥಂ.

೨೧೫. ಕಚ್ಛಪಜಾತಕಂ (೨-೭-೫)

೧೨೯. ಅವಧೀ ವತ ಅತ್ತಾನಂ, ಕಚ್ಛಪೋ ಬ್ಯಾಹರಂ ಗಿರಂ [ಕಚ್ಛಪೋವ ಪಬ್ಯಾಹರಂ (ಸ್ಯಾ.), ಕಚ್ಛಪೋ ಸೋ ಪಬ್ಯಾಹರಂ (ಕ.)];

ಸುಗ್ಗಹೀತಸ್ಮಿಂ ಕಟ್ಠಸ್ಮಿಂ, ವಾಚಾಯ ಸಕಿಯಾವಧಿ.

೧೩೦. ಏತಮ್ಪಿ ದಿಸ್ವಾ ನರವೀರಿಯಸೇಟ್ಠ, ವಾಚಂ ಪಮುಞ್ಚೇ ಕುಸಲಂ ನಾತಿವೇಲಂ;

ಪಸ್ಸಸಿ ಬಹುಭಾಣೇನ, ಕಚ್ಛಪಂ ಬ್ಯಸನಂ ಗತನ್ತಿ.

ಕಚ್ಛಪಜಾತಕಂ ಪಞ್ಚಮಂ.

೨೧೬. ಮಚ್ಛಜಾತಕಂ (೨-೭-೬)

೧೩೧. ನ ಮಾಯಮಗ್ಗಿ ತಪತಿ, ನ ಸೂಲೋ ಸಾಧುತಚ್ಛಿತೋ;

ಯಞ್ಚ ಮಂ ಮಞ್ಞತೇ ಮಚ್ಛೀ, ಅಞ್ಞಂ ಸೋ ರತಿಯಾ ಗತೋ.

೧೩೨. ಸೋ ಮಂ ದಹತಿ ರಾಗಗ್ಗಿ, ಚಿತ್ತಂ ಚೂಪತಪೇತಿ ಮಂ;

ಜಾಲಿನೋ ಮುಞ್ಚಥಾಯಿರಾ ಮಂ, ನ ಕಾಮೇ ಹಞ್ಞತೇ ಕ್ವಚೀತಿ.

ಮಚ್ಛಜಾತಕಂ ಛಟ್ಠಂ.

೨೧೭. ಸೇಗ್ಗುಜಾತಕಂ (೨-೭-೭)

೧೩೩. ಸಬ್ಬೋ ಲೋಕೋ ಅತ್ತಮನೋ ಅಹೋಸಿ, ಅಕೋವಿದಾ ಗಾಮಧಮ್ಮಸ್ಸ ಸೇಗ್ಗು;

ಕೋಮಾರಿ ಕೋ ನಾಮ [ಕೋಮಾರಿಕಾ ನಾಮ (ಕ.), ಕೋಮಾರಿಕೋ ನಾಮ (ಸ್ಯಾ. ಪೀ.)] ತವಜ್ಜ ಧಮ್ಮೋ, ಯಂ ತ್ವಂ ಗಹಿತಾ ಪವನೇ ಪರೋದಸಿ.

೧೩೪. ಯೋ ದುಕ್ಖಫುಟ್ಠಾಯ ಭವೇಯ್ಯ ತಾಣಂ, ಸೋ ಮೇ ಪಿತಾ ದುಬ್ಭಿ ವನೇ ಕರೋತಿ;

ಸಾ ಕಸ್ಸ ಕನ್ದಾಮಿ ವನಸ್ಸ ಮಜ್ಝೇ, ಯೋ ತಾಯಿತಾ ಸೋ ಸಹಸಂ ಕರೋತೀತಿ.

ಸೇಗ್ಗುಜಾತಕಂ ಸತ್ತಮಂ.

೨೧೮. ಕೂಟವಾಣಿಜಜಾತಕಂ (೨-೭-೮)

೧೩೫. ಸಠಸ್ಸ ಸಾಠೇಯ್ಯಮಿದಂ ಸುಚಿನ್ತಿತಂ, ಪಚ್ಚೋಡ್ಡಿತಂ ಪಟಿಕೂಟಸ್ಸ ಕೂಟಂ;

ಫಾಲಞ್ಚೇ ಖಾದೇಯ್ಯುಂ [ಅದೇಯ್ಯುಂ (ಸೀ. ಪೀ.)] ಮೂಸಿಕಾ, ಕಸ್ಮಾ ಕುಮಾರಂ ಕುಲಲಾ ನ [ನೋ (ಸೀ. ಸ್ಯಾ. ಪೀ.)] ಹರೇಯ್ಯುಂ.

೧೩೬. ಕೂಟಸ್ಸ ಹಿ ಸನ್ತಿ [ಸನ್ತೀಧ (ಕ.)] ಕೂಟಕೂಟಾ, ಭವತಿ [ಭವನ್ತಿ (ಕ.)] ಚಾಪಿ ನಿಕತಿನೋ ನಿಕತ್ಯಾ;

ದೇಹಿ ಪುತ್ತನಟ್ಠ ಫಾಲನಟ್ಠಸ್ಸ ಫಾಲಂ, ಮಾ ತೇ ಪುತ್ತಮಹಾಸಿ ಫಾಲನಟ್ಠೋತಿ.

ಕೂಟವಾಣಿಜಜಾತಕಂ ಅಟ್ಠಮಂ.

೨೧೯. ಗರಹಿತಜಾತಕಂ (೨-೭-೯)

೧೩೭. ಹಿರಞ್ಞಂ ಮೇ ಸುವಣ್ಣಂ ಮೇ, ಏಸಾ ರತ್ತಿಂ ದಿವಾ ಕಥಾ;

ದುಮ್ಮೇಧಾನಂ ಮನುಸ್ಸಾನಂ, ಅರಿಯಧಮ್ಮಂ ಅಪಸ್ಸತಂ.

೧೩೮. ದ್ವೇ ದ್ವೇ ಗಹಪತಯೋ ಗೇಹೇ, ಏಕೋ ತತ್ಥ ಅಮಸ್ಸುಕೋ;

ಲಮ್ಬತ್ಥನೋ ವೇಣಿಕತೋ, ಅಥೋ ಅಙ್ಕಿತಕಣ್ಣಕೋ;

ಕೀತೋ ಧನೇನ ಬಹುನಾ, ಸೋ ತಂ ವಿತುದತೇ ಜನನ್ತಿ.

ಗರಹಿತಜಾತಕಂ ನವಮಂ.

೨೨೦. ಧಮ್ಮಧಜಜಾತಕಂ (೨-೭-೧೦)

೧೩೯. ಸುಖಂ ಜೀವಿತರೂಪೋಸಿ, ರಟ್ಠಾ ವಿವನಮಾಗತೋ;

ಸೋ ಏಕಕೋ ರುಕ್ಖಮೂಲೇ [ಅರಞ್ಞಸ್ಮಿಂ (ಸೀ. ಸ್ಯಾ. ಪೀ.)], ಕಪಣೋ ವಿಯ ಝಾಯಸಿ.

೧೪೦. ಸುಖಂ ಜೀವಿತರೂಪೋಸ್ಮಿ, ರಟ್ಠಾ ವಿವನಮಾಗತೋ;

ಸೋ ಏಕಕೋ ರುಕ್ಖಮೂಲೇ, ಕಪಣೋ ವಿಯ ಝಾಯಾಮಿ;

ಸತಂ ಧಮ್ಮಂ ಅನುಸ್ಸರಂತಿ.

ಧಮ್ಮಧಜಜಾತಕಂ ದಸಮಂ.

ಬೀರಣಥಮ್ಭವಗ್ಗೋ ಸತ್ತಮೋ.

ತಸ್ಸುದ್ದಾನಂ –

ಅಥ ಬೀರಣಥಮ್ಭವರೋ ಚ ನಟೋ, ಭರುರಾಜವರುತ್ತಮಪುಣ್ಣನದೀ;

ಬಹುಭಾಣಿ ಅಗ್ಗಿಪವನೇ ಮೂಸಿಕಾ, ಸಹಲಮ್ಬತ್ಥನೋ ಕಪಣೇನ ದಸಾತಿ.