೬. ನತಂದಳ್ಹವಗ್ಗೋ

೨೦೧. ಬನ್ಧನಾಗಾರಜಾತಕಂ (೨-೬-೧)

೧೦೧. ನ ತಂ ದಳ್ಹಂ ಬನ್ಧನಮಾಹು ಧೀರಾ, ಯದಾಯಸಂ ದಾರುಜಪಬ್ಬಜಞ್ಚ [ಬಬ್ಬಜಞ್ಚ (ಸೀ.)];

ಸಾರತ್ತರತ್ತಾ ಮಣಿಕುಣ್ಡಲೇಸು, ಪುತ್ತೇಸು ದಾರೇಸು ಚ ಯಾ ಅಪೇಕ್ಖಾ.

೧೦೨. ಏತಂ ದಳ್ಹಂ ಬನ್ಧನಮಾಹು ಧೀರಾ, ಓಹಾರಿನಂ ಸಿಥಿಲಂ ದುಪ್ಪಮುಞ್ಚಂ;

ಏತಮ್ಪಿ ಛೇತ್ವಾನ ವಜನ್ತಿ ಧೀರಾ, ಅನಪೇಕ್ಖಿನೋ ಕಾಮಸುಖಂ ಪಹಾಯಾತಿ.

ಬನ್ಧನಾಗಾರಜಾತಕಂ ಪಠಮಂ.

೨೦೨. ಕೇಳಿಸೀಲಜಾತಕಂ (೨-೬-೨)

೧೦೩. ಹಂಸಾ ಕೋಞ್ಚಾ ಮಯೂರಾ ಚ, ಹತ್ಥಯೋ [ಹತ್ಥಿನೋ (ಸೀ.), ಹತ್ಥಿಯೋ (ಸ್ಯಾ. ಪೀ.)] ಪಸದಾ ಮಿಗಾ;

ಸಬ್ಬೇ ಸೀಹಸ್ಸ ಭಾಯನ್ತಿ, ನತ್ಥಿ ಕಾಯಸ್ಮಿ ತುಲ್ಯತಾ.

೧೦೪. ಏವಮೇವ ಮನುಸ್ಸೇಸು, ದಹರೋ ಚೇಪಿ ಪಞ್ಞವಾ;

ಸೋ ಹಿ ತತ್ಥ ಮಹಾ ಹೋತಿ, ನೇವ ಬಾಲೋ ಸರೀರವಾತಿ.

ಕೇಳಿಸೀಲಜಾತಕಂ ದುತಿಯಂ.

೨೦೩. ಖಣ್ಡಜಾತಕಂ (೨-೬-೩)

೧೦೫. ವಿರೂಪಕ್ಖೇಹಿ ಮೇ ಮೇತ್ತಂ, ಮೇತ್ತಂ ಏರಾಪಥೇಹಿ ಮೇ;

ಛಬ್ಯಾಪುತ್ತೇಹಿ ಮೇ ಮೇತ್ತಂ, ಮೇತ್ತಂ ಕಣ್ಹಾಗೋತಮಕೇಹಿ ಚ.

ಅಪಾದಕೇಹಿ ಮೇ ಮೇತ್ತಂ, ಮೇತ್ತಂ ದ್ವಿಪಾದಕೇಹಿ ಮೇ;

ಚತುಪ್ಪದೇಹಿ ಮೇ ಮೇತ್ತಂ, ಮೇತ್ತಂ ಬಹುಪ್ಪದೇಹಿ ಮೇ.

ಮಾ ಮಂ ಅಪಾದಕೋ ಹಿಂಸಿ, ಮಾ ಮಂ ಹಿಂಸಿ ದ್ವಿಪಾದಕೋ;

ಮಾ ಮಂ ಚತುಪ್ಪದೋ ಹಿಂಸಿ, ಮಾ ಮಂ ಹಿಂಸಿ ಬಹುಪ್ಪದೋ.

ಸಬ್ಬೇ ಸತ್ತಾ ಸಬ್ಬೇ ಪಾಣಾ, ಸಬ್ಬೇ ಭೂತಾ ಚ ಕೇವಲಾ;

ಸಬ್ಬೇ ಭದ್ರಾನಿ ಪಸ್ಸನ್ತು, ಮಾ ಕಞ್ಚಿ [ಕಿಞ್ಚಿ (ಸ್ಯಾ. ಕ.)] ಪಾಪಮಾಗಮಾ.

೧೦೬. ಅಪ್ಪಮಾಣೋ ಬುದ್ಧೋ, ಅಪ್ಪಮಾಣೋ ಧಮ್ಮೋ;

ಅಪ್ಪಮಾಣೋ ಸಙ್ಘೋ, ಪಮಾಣವನ್ತಾನಿ ಸರೀಸಪಾನಿ [ಸಿರಿಸಪಾನಿ (ಸೀ. ಸ್ಯಾ. ಪೀ.)];

ಅಹಿವಿಚ್ಛಿಕಸತಪದೀ, ಉಣ್ಣನಾಭಿ [ಉಣ್ಣಾನಾಭಿ (ಸೀ. ಸ್ಯಾ. ಪೀ.)] ಸರಬೂಮೂಸಿಕಾ.

ಕತಾ ಮೇ ರಕ್ಖಾ ಕತಾ ಮೇ ಪರಿತ್ತಾ, ಪಟಿಕ್ಕಮನ್ತು ಭೂತಾನಿ;

ಸೋಹಂ ನಮೋ ಭಗವತೋ, ನಮೋ ಸತ್ತನ್ನಂ ಸಮ್ಮಾಸಮ್ಬುದ್ಧಾನನ್ತಿ.

ಖಣ್ಡಜಾತಕಂ ತತಿಯಂ.

೨೦೪. ವೀರಕಜಾತಕಂ (೨-೬-೪)

೧೦೭. ಅಪಿ ವೀರಕ ಪಸ್ಸೇಸಿ, ಸಕುಣಂ ಮಞ್ಜುಭಾಣಕಂ;

ಮಯೂರಗೀವಸಙ್ಕಾಸಂ, ಪತಿಂ ಮಯ್ಹಂ ಸವಿಟ್ಠಕಂ.

೧೦೮. ಉದಕಥಲಚರಸ್ಸ ಪಕ್ಖಿನೋ, ನಿಚ್ಚಂ ಆಮಕಮಚ್ಛಭೋಜಿನೋ;

ತಸ್ಸಾನುಕರಂ ಸವಿಟ್ಠಕೋ, ಸೇವಾಲೇ ಪಲಿಗುಣ್ಠಿತೋ ಮತೋತಿ.

ವೀರಕಜಾತಕಂ ಚತುತ್ಥಂ.

೨೦೫. ಗಙ್ಗೇಯ್ಯಜಾತಕಂ (೨-೬-೫)

೧೦೯. ಸೋಭತಿ ಮಚ್ಛೋ ಗಙ್ಗೇಯ್ಯೋ, ಅಥೋ ಸೋಭತಿ ಯಾಮುನೋ [ಸೋಭನ್ತಿ ಮಚ್ಛಾ ಗಙ್ಗೇಯ್ಯಾ, ಅಥೋ ಸೋಭನ್ತಿ ಯಾಮುನಾ (ಸ್ಯಾ. ಪೀ.)];

ಚತುಪ್ಪದೋಯಂ ಪುರಿಸೋ, ನಿಗ್ರೋಧಪರಿಮಣ್ಡಲೋ;

ಈಸಕಾಯತ [ಈಸಮಾಯತ (ಕ.)] ಗೀವೋ ಚ, ಸಬ್ಬೇವ ಅತಿರೋಚತಿ.

೧೧೦. ಯಂ ಪುಚ್ಛಿತೋ ನ ತಂ ಅಕ್ಖಾಸಿ [ಅಕ್ಖಾ (ಸೀ. ಸ್ಯಾ. ಪೀ.)], ಅಞ್ಞಂ ಅಕ್ಖಾಸಿ [ಅಕ್ಖಾತಿ (ಸ್ಯಾ. ಪೀ.)] ಪುಚ್ಛಿತೋ;

ಅತ್ತಪ್ಪಸಂಸಕೋ ಪೋಸೋ, ನಾಯಂ ಅಸ್ಮಾಕ ರುಚ್ಚತೀತಿ.

ಗಙ್ಗೇಯ್ಯಜಾತಕಂ ಪಞ್ಚಮಂ.

೨೦೬. ಕುರುಙ್ಗಮಿಗಜಾತಕಂ (೨-೬-೬)

೧೧೧. ಇಙ್ಘ ವದ್ಧಮಯಂ [ವದ್ಧಮಯಂ (ಸೀ. ಸ್ಯಾ. ಪೀ.)] ಪಾಸಂ, ಛಿನ್ದ ದನ್ತೇಹಿ ಕಚ್ಛಪ;

ಅಹಂ ತಥಾ ಕರಿಸ್ಸಾಮಿ, ಯಥಾ ನೇಹಿತಿ ಲುದ್ದಕೋ.

೧೧೨. ಕಚ್ಛಪೋ ಪಾವಿಸೀ ವಾರಿಂ, ಕುರುಙ್ಗೋ ಪಾವಿಸೀ ವನಂ;

ಸತಪತ್ತೋ ದುಮಗ್ಗಮ್ಹಾ, ದೂರೇ ಪುತ್ತೇ ಅಪಾನಯೀತಿ.

ಕುರುಙ್ಗಮಿಗಜಾತಕಂ ಛಟ್ಠಂ.

೨೦೭. ಅಸ್ಸಕಜಾತಕಂ (೨-೬-೭)

೧೧೩. ಅಯಮಸ್ಸಕರಾಜೇನ, ದೇಸೋ ವಿಚರಿತೋ ಮಯಾ;

ಅನುಕಾಮಯ ಕಾಮೇನ [ಅನುಕಾಮಯವನುಕಾಮೇನ (ಸೀ. ಪೀ.)], ಪಿಯೇನ ಪತಿನಾ ಸಹ.

೧೧೪. ನವೇನ ಸುಖದುಕ್ಖೇನ, ಪೋರಾಣಂ ಅಪಿಧೀಯತಿ [ಅಪಿಥೀಯತಿ (ಸೀ. ಪೀ.), ಅಪಿಥಿಯ್ಯತಿ (ಸ್ಯಾ.)];

ತಸ್ಮಾ ಅಸ್ಸಕರಞ್ಞಾವ, ಕೀಟೋ ಪಿಯತರೋ ಮಮಾತಿ.

ಅಸ್ಸಕಜಾತಕಂ ಸತ್ತಮಂ.

೨೦೮. ಸುಸುಮಾರಜಾತಕಂ (೨-೬-೮)

೧೧೫. ಅಲಂ ಮೇತೇಹಿ ಅಮ್ಬೇಹಿ, ಜಮ್ಬೂಹಿ ಪನಸೇಹಿ ಚ;

ಯಾನಿ ಪಾರಂ ಸಮುದ್ದಸ್ಸ, ವರಂ ಮಯ್ಹಂ ಉದುಮ್ಬರೋ.

೧೧೬. ಮಹತೀ ವತ ತೇ ಬೋನ್ದಿ, ನ ಚ ಪಞ್ಞಾ ತದೂಪಿಕಾ;

ಸುಸುಮಾರ [ಸುಂಸುಮಾರ (ಸೀ. ಸ್ಯಾ. ಪೀ.)] ವಞ್ಚಿತೋ ಮೇಸಿ, ಗಚ್ಛ ದಾನಿ ಯಥಾಸುಖನ್ತಿ.

ಸುಸುಮಾರಜಾತಕಂ ಅಟ್ಠಮಂ.

೨೦೯. ಕುಕ್ಕುಟಜಾತಕಂ (೨-೬-೯)

೧೧೭. ದಿಟ್ಠಾ ಮಯಾ ವನೇ ರುಕ್ಖಾ, ಅಸ್ಸಕಣ್ಣಾ ವಿಭೀಟಕಾ [ವಿಭೇದಕಾ (ಸ್ಯಾ. ಕ.)];

ನ ತಾನಿ ಏವಂ ಸಕ್ಕನ್ತಿ, ಯಥಾ ತ್ವಂ ರುಕ್ಖ ಸಕ್ಕಸಿ.

೧೧೮. ಪುರಾಣಕುಕ್ಕುಟೋ [ಕಕ್ಕರೋ (ಸೀ. ಸ್ಯಾ. ಪೀ.)] ಅಯಂ, ಭೇತ್ವಾ ಪಞ್ಜರಮಾಗತೋ;

ಕುಸಲೋ ವಾಳಪಾಸಾನಂ, ಅಪಕ್ಕಮತಿ ಭಾಸತೀತಿ.

ಕುಕ್ಕುಟ [ಕಕ್ಕರ (ಸೀ. ಸ್ಯಾ. ಪೀ.)] ಜಾತಕಂ ನವಮಂ.

೨೧೦. ಕನ್ದಗಲಕಜಾತಕಂ (೨-೬-೧೦)

೧೧೯. ಅಮ್ಭೋ ಕೋ ನಾಮ ಯಂ ರುಕ್ಖೋ, ಸಿನ್ನಪತ್ತೋ [ಸೀನಪತ್ತೋ (ಸೀ. ಪೀ.)] ಸಕಣ್ಟಕೋ;

ಯತ್ಥ ಏಕಪ್ಪಹಾರೇನ, ಉತ್ತಮಙ್ಗಂ ವಿಭಿಜ್ಜಿತಂ [ವಿಸಾಟಿಕಂ (ಸೀ. ಸ್ಯಾ. ಪೀ.), ವಿಘಾಟಿತಂ (ಸೀ. ನಿಯ್ಯ)].

೧೨೦. ಅಚಾರಿ ವತಾಯಂ ವಿತುದಂ ವನಾನಿ, ಕಟ್ಠಙ್ಗರುಕ್ಖೇಸು ಅಸಾರಕೇಸು;

ಅಥಾಸದಾ ಖದಿರಂ ಜಾತಸಾರಂ [ಜಾತಿಸಾರಂ (ಕ.)], ಯತ್ಥಬ್ಭಿದಾ ಗರುಳೋ ಉತ್ತಮಙ್ಗನ್ತಿ.

ಕನ್ದಗಲಕ [ಕನ್ದಲಕ (ಕ.)] ಜಾತಕಂ ದಸಮಂ.

ನತಂದಳ್ಹವಗ್ಗೋ ಛಟ್ಠೋ.

ತಸ್ಸುದ್ದಾನಂ –

ದಳ್ಹಬನ್ಧನ ಹಂಸವರೋ ಚ ಪುನ, ವಿರೂಪಕ್ಖ ಸವಿಟ್ಠಕ ಮಚ್ಛವರೋ;

ಸಕುರುಙ್ಗ ಸಅಸ್ಸಕ ಅಮ್ಬವರೋ, ಪುನ ಕುಕ್ಕುಟಕೋ ಗರುಳೇನ ದಸಾತಿ.