೫. ರುಹಕವಗ್ಗೋ

೧೯೧. ರುಹಕಜಾತಕಂ (೨-೫-೧)

೮೧. ಅಪಿ [ಅಮ್ಭೋ (ಸ್ಯಾ. ಕ. ಸೀ.)] ರುಹಕ ಛಿನ್ನಾಪಿ, ಜಿಯಾ ಸನ್ಧೀಯತೇ ಪುನ;

ಸನ್ಧೀಯಸ್ಸು ಪುರಾಣಿಯಾ, ಮಾ ಕೋಧಸ್ಸ ವಸಂ ಗಮಿ.

೮೨. ವಿಜ್ಜಮಾನೇಸು ವಾಕೇಸು [ವಿಜ್ಜಮಾನಾಸು ಮರುವಾಸು (ಸೀ.), ವಿಜ್ಜಮಾನಾಸು ಮರೂದ್ವಾಸು (ಪೀ.)], ವಿಜ್ಜಮಾನೇಸು ಕಾರಿಸು;

ಅಞ್ಞಂ ಜಿಯಂ ಕರಿಸ್ಸಾಮಿ, ಅಲಞ್ಞೇವ ಪುರಾಣಿಯಾತಿ.

ರುಹಕಜಾತಕಂ ಪಠಮಂ.

೧೯೨. ಸಿರಿಕಾಳಕಣ್ಣಿಜಾತಕಂ (೨-೫-೨)

೮೩. ಇತ್ಥೀ ಸಿಯಾ ರೂಪವತೀ, ಸಾ ಚ ಸೀಲವತೀ ಸಿಯಾ;

ಪುರಿಸೋ ತಂ ನ ಇಚ್ಛೇಯ್ಯ, ಸದ್ದಹಾಸಿ ಮಹೋಸಧ.

೮೪. ಸದ್ದಹಾಮಿ ಮಹಾರಾಜ, ಪುರಿಸೋ ದುಬ್ಭಗೋ ಸಿಯಾ;

ಸಿರೀ ಚ ಕಾಳಕಣ್ಣೀ ಚ, ನ ಸಮೇನ್ತಿ ಕುದಾಚನನ್ತಿ.

ಸಿರಿಕಾಳಕಣ್ಣಿಜಾತಕಂ ದುತಿಯಂ.

೧೯೩. ಚೂಳಪದುಮಜಾತಕಂ (೨-೫-೩)

೮೫. ಅಯಮೇವ ಸಾ ಅಹಮಪಿ [ಅಹಮ್ಪಿ (ಸೀ. ಸ್ಯಾ. ಪೀ.), ಅಹಸ್ಮಿ (ಕ.)] ಸೋ ಅನಞ್ಞೋ, ಅಯಮೇವ ಸೋ ಹತ್ಥಚ್ಛಿನ್ನೋ ಅನಞ್ಞೋ;

ಯಮಾಹ ‘‘ಕೋಮಾರಪತೀ ಮಮ’’ನ್ತಿ, ವಜ್ಝಿತ್ಥಿಯೋ ನತ್ಥಿ ಇತ್ಥೀಸು ಸಚ್ಚಂ.

೮೬. ಇಮಞ್ಚ ಜಮ್ಮಂ ಮುಸಲೇನ ಹನ್ತ್ವಾ, ಲುದ್ದಂ ಛವಂ ಪರದಾರೂಪಸೇವಿಂ;

ಇಮಿಸ್ಸಾ ಚ ನಂ ಪಾಪಪತಿಬ್ಬತಾಯ, ಜೀವನ್ತಿಯಾ ಛಿನ್ದಥ ಕಣ್ಣನಾಸನ್ತಿ.

ಚೂಳಪದುಮಜಾತಕಂ ತತಿಯಂ.

೧೯೪. ಮಣಿಚೋರಜಾತಕಂ (೨-೫-೪)

೮೭. ನ ಸನ್ತಿ ದೇವಾ ಪವಸನ್ತಿ ನೂನ, ನ ಹಿ ನೂನ ಸನ್ತಿ ಇಧ ಲೋಕಪಾಲಾ;

ಸಹಸಾ ಕರೋನ್ತಾನಮಸಞ್ಞತಾನಂ, ನ ಹಿ ನೂನ ಸನ್ತೀ ಪಟಿಸೇಧಿತಾರೋ.

೮೮. ಅಕಾಲೇ ವಸ್ಸತೀ ತಸ್ಸ, ಕಾಲೇ ತಸ್ಸ ನ ವಸ್ಸತಿ;

ಸಗ್ಗಾ ಚ ಚವತಿ ಠಾನಾ, ನನು ಸೋ ತಾವತಾ ಹತೋತಿ.

ಮಣಿಚೋರಜಾತಕಂ ಚತುತ್ಥಂ.

೧೯೫. ಪಬ್ಬತೂಪತ್ಥರಜಾತಕಂ (೨-೫-೫)

೮೯. ಪಬ್ಬತೂಪತ್ಥರೇ [ಪಬ್ಬತಪತ್ಥರೇ (ಸೀ. ಸ್ಯಾ. ಪೀ.)] ರಮ್ಮೇ, ಜಾತಾ ಪೋಕ್ಖರಣೀ ಸಿವಾ;

ತಂ ಸಿಙ್ಗಾಲೋ ಅಪಾಪಾಯಿ [ಅಪಾಪಾಸಿ (ಸೀ. ಸ್ಯಾ. ಪೀ.)], ಜಾನಂ ಸೀಹೇನ ರಕ್ಖಿತಂ.

೯೦. ಪಿವನ್ತಿ ಚೇ [ಪಿವನ್ತಿ ವೇ (ಸೀ.), ಪಿವನ್ತಿವ (ಪೀ.), ಪಿವನ್ತೇವ (?)] ಮಹಾರಾಜ, ಸಾಪದಾನಿ ಮಹಾನದಿಂ;

ನ ತೇನ ಅನದೀ ಹೋತಿ, ಖಮಸ್ಸು ಯದಿ ತೇ ಪಿಯಾತಿ.

ಪಬ್ಬತೂಪತ್ಥರ [ಪಬ್ಬತಪತ್ಥರ (ಸೀ. ಸ್ಯಾ. ಪೀ.)] ಜಾತಕಂ ಪಞ್ಚಮಂ.

೧೯೬. ವಲಾಹಕಸ್ಸಜಾತಕಂ (೨-೫-೬)

೯೧. ಯೇ ನ ಕಾಹನ್ತಿ ಓವಾದಂ, ನರಾ ಬುದ್ಧೇನ ದೇಸಿತಂ;

ಬ್ಯಸನಂ ತೇ ಗಮಿಸ್ಸನ್ತಿ, ರಕ್ಖಸೀಹಿವ ವಾಣಿಜಾ.

೯೨. ಯೇ ಚ ಕಾಹನ್ತಿ ಓವಾದಂ, ನರಾ ಬುದ್ಧೇನ ದೇಸಿತಂ;

ಸೋತ್ಥಿಂ ಪಾರಂ ಗಮಿಸ್ಸನ್ತಿ, ವಲಾಹೇನೇವ [ವಾಲಾಹೇನೇವ (ಸೀ. ಪೀ.)] ವಾಣಿಜಾತಿ.

ವಲಾಹಕಸ್ಸ [ವಾಲಾಹಸ್ಸ (ಸೀ. ಪೀ.)] ಜಾತಕಂ ಛಟ್ಠಂ.

೧೯೭. ಮಿತ್ತಾಮಿತ್ತಜಾತಕಂ (೨-೫-೭)

೯೩. ನ ನಂ ಉಮ್ಹಯತೇ ದಿಸ್ವಾ, ನ ಚ ನಂ ಪಟಿನನ್ದತಿ;

ಚಕ್ಖೂನಿ ಚಸ್ಸ ನ ದದಾತಿ, ಪಟಿಲೋಮಞ್ಚ ವತ್ತತಿ.

೯೪. ಏತೇ ಭವನ್ತಿ ಆಕಾರಾ, ಅಮಿತ್ತಸ್ಮಿಂ ಪತಿಟ್ಠಿತಾ;

ಯೇಹಿ ಅಮಿತ್ತಂ ಜಾನೇಯ್ಯ, ದಿಸ್ವಾ ಸುತ್ವಾ ಚ ಪಣ್ಡಿತೋತಿ.

ಮಿತ್ತಾಮಿತ್ತಜಾತಕಂ ಸತ್ತಮಂ.

೧೯೮. ರಾಧಜಾತಕಂ (೨-೫-೮)

೯೫. ಪವಾಸಾ ಆಗತೋ ತಾತ, ಇದಾನಿ ನಚಿರಾಗತೋ;

ಕಚ್ಚಿನ್ನು ತಾತ ತೇ ಮಾತಾ, ನ ಅಞ್ಞಮುಪಸೇವತಿ.

೯೬. ನ ಖೋ ಪನೇತಂ ಸುಭಣಂ, ಗಿರಂ ಸಚ್ಚುಪಸಂಹಿತಂ;

ಸಯೇಥ ಪೋಟ್ಠಪಾದೋವ, ಮುಮ್ಮುರೇ [ಮುಮ್ಮುರೇ (ಸ್ಯಾ.), ಮಂ ಪುರೇ (ಕ.) ಮುಮ್ಮುರಸದ್ದೋ ಥುಸಗ್ಗಿಮ್ಹಿ ಕುಕ್ಕುಳೇ ಚ ವತ್ತತೀತಿ ಸಕ್ಕತಾಭಿಧಾನೇಸು] ಉಪಕೂಥಿತೋತಿ [ಉಪಕೂಸಿತೋತಿ (ಸೀ. ಸ್ಯಾ. ಪೀ.), ಉಪಕೂಲಿತೋ (ಕ.)].

ರಾಧಜಾತಕಂ ಅಟ್ಠಮಂ.

೧೯೯. ಗಹಪತಿಜಾತಕಂ (೨-೫-೯)

೯೭. ಉಭಯಂ ಮೇ ನ ಖಮತಿ, ಉಭಯಂ ಮೇ ನ ರುಚ್ಚತಿ;

ಯಾಚಾಯಂ ಕೋಟ್ಠಮೋತಿಣ್ಣಾ, ನಾದ್ದಸಂ ಇತಿ ಭಾಸತಿ.

೯೮. ತಂ ತಂ ಗಾಮಪತಿ ಬ್ರೂಮಿ, ಕದರೇ ಅಪ್ಪಸ್ಮಿ ಜೀವಿತೇ;

ದ್ವೇ ಮಾಸೇ ಸಙ್ಗರಂ ಕತ್ವಾ [ಕಾರಂ ಕತ್ವಾನ (ಸೀ. ಪೀ.), ಸಂಕರಂ ಕತ್ವಾ (ಕ.)], ಮಂಸಂ ಜರಗ್ಗವಂ ಕಿಸಂ;

ಅಪ್ಪತ್ತಕಾಲೇ ಚೋದೇಸಿ, ತಮ್ಪಿ ಮಯ್ಹಂ ನ ರುಚ್ಚತೀತಿ.

ಗಹಪತಿಜಾತಕಂ ನವಮಂ.

೨೦೦. ಸಾಧುಸೀಲಜಾತಕಂ (೨-೫-೧೦)

೯೯. ಸರೀರದಬ್ಯಂ ವುಡ್ಢಬ್ಯಂ [ವದ್ಧಬ್ಯಂ (ಸೀ. ಪೀ.)], ಸೋಜಚ್ಚಂ ಸಾಧುಸೀಲಿಯಂ;

ಬ್ರಾಹ್ಮಣಂ ತೇವ ಪುಚ್ಛಾಮ, ಕನ್ನು ತೇಸಂ ವನಿಮ್ಹಸೇ [ವಣಿಮ್ಹಸೇ (ಸೀ. ಪೀ.)].

೧೦೦. ಅತ್ಥೋ ಅತ್ಥಿ ಸರೀರಸ್ಮಿಂ, ವುಡ್ಢಬ್ಯಸ್ಸ ನಮೋ ಕರೇ;

ಅತ್ಥೋ ಅತ್ಥಿ ಸುಜಾತಸ್ಮಿಂ, ಸೀಲಂ ಅಸ್ಮಾಕ ರುಚ್ಚತೀತಿ.

ಸಾಧುಸೀಲಜಾತಕಂ ದಸಮಂ.

ರುಹಕವಗ್ಗೋ ಪಞ್ಚಮೋ.

ತಸ್ಸುದ್ದಾನಂ –

ಅಪಿರುಹಕ ರೂಪವತೀ ಮುಸಲೋ, ಪವಸನ್ತಿ ಸಪಞ್ಚಮಪೋಕ್ಖರಣೀ;

ಅಥ ಮುತ್ತಿಮವಾಣಿಜ ಉಮ್ಹಯತೇ, ಚಿರಆಗತ ಕೋಟ್ಠ ಸರೀರ ದಸಾತಿ.