೪. ಅಸದಿಸವಗ್ಗೋ

೧೮೧. ಅಸದಿಸಜಾತಕಂ (೨-೪-೧)

೬೧. ಧನುಗ್ಗಹೋ ಅಸದಿಸೋ, ರಾಜಪುತ್ತೋ ಮಹಬ್ಬಲೋ;

ದೂರೇಪಾತೀ ಅಕ್ಖಣವೇಧೀ, ಮಹಾಕಾಯಪ್ಪದಾಲನೋ.

೬೨. ಸಬ್ಬಾಮಿತ್ತೇ ರಣಂ ಕತ್ವಾ, ನ ಚ ಕಞ್ಚಿ ವಿಹೇಠಯಿ;

ಭಾತರಂ ಸೋತ್ಥಿಂ ಕತ್ವಾನ, ಸಂಯಮಂ ಅಜ್ಝುಪಾಗಮೀತಿ.

ಅಸದಿಸಜಾತಕಂ ಪಠಮಂ.

೧೮೨. ಸಙ್ಗಾಮಾವಚರಜಾತಕಂ (೨-೪-೨)

೬೩. ಸಙ್ಗಾಮಾವಚರೋ ಸೂರೋ, ಬಲವಾ ಇತಿ ವಿಸ್ಸುತೋ;

ಕಿಂ ನು ತೋರಣಮಾಸಜ್ಜ, ಪಟಿಕ್ಕಮಸಿ ಕುಞ್ಜರ.

೬೪. ಓಮದ್ದ ಖಿಪ್ಪಂ ಪಲಿಘಂ, ಏಸಿಕಾನಿ ಚ ಅಬ್ಬಹ [ಉಬ್ಬಹ (ಸ್ಯಾ.), ಅಬ್ಭುಹ (ಕ.)];

ತೋರಣಾನಿ ಚ ಮದ್ದಿತ್ವಾ, ಖಿಪ್ಪಂ ಪವಿಸ ಕುಞ್ಜರಾತಿ.

ಸಙ್ಗಾಮಾವಚರಜಾತಕಂ ದುತಿಯಂ.

೧೮೩. ವಾಲೋದಕಜಾತಕಂ (೨-೪-೩)

೬೫. ವಾಲೋದಕಂ ಅಪ್ಪರಸಂ ನಿಹೀನಂ, ಪಿತ್ವಾ [ಪೀತ್ವಾ (ಸೀ. ಪೀ.)] ಮದೋ ಜಾಯತಿ ಗದ್ರಭಾನಂ;

ಇಮಞ್ಚ ಪಿತ್ವಾನ ರಸಂ ಪಣೀತಂ, ಮದೋ ನ ಸಞ್ಜಾಯತಿ ಸಿನ್ಧವಾನಂ.

೬೬. ಅಪ್ಪಂ ಪಿವಿತ್ವಾನ ನಿಹೀನಜಚ್ಚೋ, ಸೋ ಮಜ್ಜತೀ ತೇನ ಜನಿನ್ದ ಪುಟ್ಠೋ [ಫುಟ್ಠೋ (ಸೀ. ಸ್ಯಾ.), ಮುಟ್ಠೋ (ಕ.)];

ಧೋರಯ್ಹಸೀಲೀ ಚ ಕುಲಮ್ಹಿ ಜಾತೋ, ನ ಮಜ್ಜತೀ ಅಗ್ಗರಸಂ ಪಿವಿತ್ವಾತಿ.

ವಾಲೋದಕಜಾತಕಂ ತತಿಯಂ.

೧೮೪. ಗಿರಿದತ್ತಜಾತಕಂ (೨-೪-೪)

೬೭. ದೂಸಿತೋ ಗಿರಿದತ್ತೇನ [ಗಿರಿದನ್ತೇನ (ಪೀ.)], ಹಯೋ ಸಾಮಸ್ಸ ಪಣ್ಡವೋ;

ಪೋರಾಣಂ ಪಕತಿಂ ಹಿತ್ವಾ, ತಸ್ಸೇವಾನುವಿಧಿಯ್ಯತಿ [ನುವಿಧೀಯತಿ (ಸೀ. ಪೀ.)].

೬೮. ಸಚೇ ಚ ತನುಜೋ ಪೋಸೋ, ಸಿಖರಾಕಾರ [ಸಿಙ್ಗಾರಾಕಾರ (ಸ್ಯಾ.)] ಕಪ್ಪಿತೋ;

ಆನನೇ ನಂ [ತಂ (ಸೀ. ಸ್ಯಾ. ಪೀ.)] ಗಹೇತ್ವಾನ, ಮಣ್ಡಲೇ ಪರಿವತ್ತಯೇ;

ಖಿಪ್ಪಮೇವ ಪಹನ್ತ್ವಾನ, ತಸ್ಸೇವಾನುವಿಧಿಯ್ಯತೀತಿ.

ಗಿರಿದತ್ತಜಾತಕಂ ಚತುತ್ಥಂ.

೧೮೫. ಅನಭಿರತಿಜಾತಕಂ (೨-೪-೫)

೬೯. ಯಥೋದಕೇ ಆವಿಲೇ ಅಪ್ಪಸನ್ನೇ, ನ ಪಸ್ಸತಿ ಸಿಪ್ಪಿಕಸಮ್ಬುಕಞ್ಚ;

ಸಕ್ಖರಂ ವಾಲುಕಂ ಮಚ್ಛಗುಮ್ಬಂ, ಏವಂ ಆವಿಲಮ್ಹಿ [ಆವಿಲೇ ಹಿ (ಸೀ.)] ಚಿತ್ತೇ;

ನ ಪಸ್ಸತಿ ಅತ್ತದತ್ಥಂ ಪರತ್ಥಂ.

೭೦. ಯಥೋದಕೇ ಅಚ್ಛೇ ವಿಪ್ಪಸನ್ನೇ, ಸೋ ಪಸ್ಸತಿ ಸಿಪ್ಪಿಕಸಮ್ಬುಕಞ್ಚ;

ಸಕ್ಖರಂ ವಾಲುಕಂ ಮಚ್ಛಗುಮ್ಬಂ, ಏವಂ ಅನಾವಿಲಮ್ಹಿ ಚಿತ್ತೇ;

ಸೋ ಪಸ್ಸತಿ ಅತ್ತದತ್ಥಂ ಪರತ್ಥನ್ತಿ.

ಅನಭಿರತಿಜಾತಕಂ ಪಞ್ಚಮಂ.

೧೮೬. ದಧಿವಾಹನಜಾತಕಂ (೨-೪-೬)

೭೧. ವಣ್ಣಗನ್ಧರಸೂಪೇತೋ, ಅಮ್ಬೋಯಂ ಅಹುವಾ ಪುರೇ;

ತಮೇವ ಪೂಜಂ ಲಭಮಾನೋ, ಕೇನಮ್ಬೋ ಕಟುಕಪ್ಫಲೋ.

೭೨. ಪುಚಿಮನ್ದಪರಿವಾರೋ, ಅಮ್ಬೋ ತೇ ದಧಿವಾಹನ;

ಮೂಲಂ ಮೂಲೇನ ಸಂಸಟ್ಠಂ, ಸಾಖಾ ಸಾಖಾ [ಸಾಖಂ (ಸ್ಯಾ. ಕ.)] ನಿಸೇವರೇ [ನಿವೀಸರೇ (ಕ.)];

ಅಸಾತಸನ್ನಿವಾಸೇನ, ತೇನಮ್ಬೋ ಕಟುಕಪ್ಫಲೋತಿ.

ದಧಿವಾಹನಜಾತಕಂ ಛಟ್ಠಂ.

೧೮೭. ಚತುಮಟ್ಠಜಾತಕಂ (೨-೪-೭)

೭೩. ಉಚ್ಚೇ ವಿಟಭಿಮಾರುಯ್ಹ, ಮನ್ತಯವ್ಹೋ ರಹೋಗತಾ;

ನೀಚೇ ಓರುಯ್ಹ ಮನ್ತವ್ಹೋ, ಮಿಗರಾಜಾಪಿ ಸೋಸ್ಸತಿ.

೭೪. ಯಂ ಸುವಣ್ಣೋ ಸುವಣ್ಣೇನ [ಯಂ ಸುಪಣ್ಣೋ ಸುಪಣ್ಣೇನ (ಸೀ. ಸ್ಯಾ. ಪೀ.)], ದೇವೋ ದೇವೇನ ಮನ್ತಯೇ;

ಕಿಂ ತೇತ್ಥ ಚತುಮಟ್ಠಸ್ಸ, ಬಿಲಂ ಪವಿಸ ಜಮ್ಬುಕಾತಿ.

ಚತುಮಟ್ಠಜಾತಕಂ ಸತ್ತಮಂ.

೧೮೮. ಸೀಹಕೋತ್ಥುಜಾತಕಂ (೨-೪-೮)

೭೫. ಸೀಹಙ್ಗುಲೀ ಸೀಹನಖೋ, ಸೀಹಪಾದಪತಿಟ್ಠಿತೋ;

ಸೋ ಸೀಹೋ ಸೀಹಸಙ್ಘಮ್ಹಿ, ಏಕೋ ನದತಿ ಅಞ್ಞಥಾ.

೭೬. ಮಾ ತ್ವಂ ನದಿ ರಾಜಪುತ್ತ, ಅಪ್ಪಸದ್ದೋ ವನೇ ವಸ;

ಸರೇನ ಖೋ [ಮಾ (ಕ.)] ತಂ ಜಾನೇಯ್ಯುಂ, ನ ಹಿ ತೇ ಪೇತ್ತಿಕೋ ಸರೋತಿ.

ಸೀಹಕೋತ್ಥುಜಾತಕಂ ಅಟ್ಠಮಂ.

೧೮೯. ಸೀಹಚಮ್ಮಜಾತಕಂ (೨-೪-೯)

೭೭. ನೇತಂ ಸೀಹಸ್ಸ ನದಿತಂ, ನ ಬ್ಯಗ್ಘಸ್ಸ ನ [ಬ್ಯಗ್ಘಸ್ಸ ನ ಚ (ಕ.)] ದೀಪಿನೋ;

ಪಾರುತೋ ಸೀಹಚಮ್ಮೇನ, ಜಮ್ಮೋ ನದತಿ ಗದ್ರಭೋ.

೭೮. ಚಿರಮ್ಪಿ ಖೋ ತಂ ಖಾದೇಯ್ಯ, ಗದ್ರಭೋ ಹರಿತಂ ಯವಂ;

ಪಾರುತೋ ಸೀಹಚಮ್ಮೇನ, ರವಮಾನೋವ ದೂಸಯೀತಿ.

ಸೀಹಚಮ್ಮಜಾತಕಂ ನವಮಂ.

೧೯೦. ಸೀಲಾನಿಸಂಸಜಾತಕಂ (೨-೪-೧೦)

೭೯. ಪಸ್ಸ ಸದ್ಧಾಯ ಸೀಲಸ್ಸ, ಚಾಗಸ್ಸ ಚ ಅಯಂ ಫಲಂ;

ನಾಗೋ ನಾವಾಯ ವಣ್ಣೇನ, ಸದ್ಧಂ ವಹತುಪಾಸಕಂ.

೮೦. ಸಬ್ಭಿರೇವ ಸಮಾಸೇಥ, ಸಬ್ಭಿ ಕುಬ್ಬೇಥ ಸನ್ಥವಂ;

ಸತಞ್ಹಿ ಸನ್ನಿವಾಸೇನ, ಸೋತ್ಥಿಂ ಗಚ್ಛತಿ ನ್ಹಾಪಿತೋತಿ.

ಸೀಲಾನಿಸಂಸಜಾತಕಂ ದಸಮಂ.

ಅಸದಿಸವಗ್ಗೋ ಚತುತ್ಥೋ.

ತಸ್ಸುದ್ದಾನಂ –

ಧನುಗ್ಗಹ ಕುಞ್ಜರ ಅಪ್ಪರಸೋ, ಗಿರಿದತ್ತಮನಾವಿಲಚಿತ್ತವರಂ;

ದಧಿವಾಹನ ಜಮ್ಬೂಕ ಸೀಹನಖೋ, ಹರಿತಯವ ನಾಗವರೇನ ದಸಾತಿ.