೩. ಕಲ್ಯಾಣವಗ್ಗೋ

೧೭೧. ಕಲ್ಯಾಣಧಮ್ಮಜಾತಕಂ (೨-೩-೧)

೪೧. ಕಲ್ಯಾಣಧಮ್ಮೋತಿ ಯದಾ ಜನಿನ್ದ, ಲೋಕೇ ಸಮಞ್ಞಂ ಅನುಪಾಪುಣಾತಿ;

ತಸ್ಮಾ ನ ಹಿಯ್ಯೇಥ [ಹೀಯೇಥ (ಸೀ.)] ನರೋ ಸಪಞ್ಞೋ, ಹಿರಿಯಾಪಿ ಸನ್ತೋ ಧುರಮಾದಿಯನ್ತಿ.

೪೨. ಸಾಯಂ ಸಮಞ್ಞಾ ಇಧ ಮಜ್ಜ ಪತ್ತಾ, ಕಲ್ಯಾಣಧಮ್ಮೋತಿ ಜನಿನ್ದ ಲೋಕೇ;

ತಾಹಂ ಸಮೇಕ್ಖಂ ಇಧ ಪಬ್ಬಜಿಸ್ಸಂ, ನ ಹಿ ಮತ್ಥಿ ಛನ್ದೋ ಇಧ ಕಾಮಭೋಗೇತಿ.

ಕಲ್ಯಾಣಧಮ್ಮಜಾತಕಂ ಪಠಮಂ.

೧೭೨. ದದ್ದರಜಾತಕಂ (೨-೩-೨)

೪೩. ಕೋ ನು ಸದ್ದೇನ ಮಹತಾ, ಅಭಿನಾದೇತಿ ದದ್ದರಂ;

ತಂ ಸೀಹಾ ನಪ್ಪಟಿನದನ್ತಿ [ಕಿಂ ಸೀಹಾ ನಪ್ಪಟಿನದನ್ತಿ (ಸೀ. ಪೀ.), ನ ಸೀಹಾ ಪಟಿನದನ್ತಿ (ಕ.)], ಕೋ ನಾಮೇಸೋ ಮಿಗಾಧಿಭೂ.

೪೪. ಅಧಮೋ ಮಿಗಜಾತಾನಂ, ಸಿಙ್ಗಾಲೋ ತಾತ ವಸ್ಸತಿ;

ಜಾತಿಮಸ್ಸ ಜಿಗುಚ್ಛನ್ತಾ, ತುಣ್ಹೀ ಸೀಹಾ ಸಮಚ್ಛರೇತಿ.

ದದ್ದರಜಾತಕಂ ದುತಿಯಂ.

೧೭೩. ಮಕ್ಕಟಜಾತಕಂ (೨-೩-೩)

೪೫. ತಾತ ಮಾಣವಕೋ ಏಸೋ, ತಾಲಮೂಲಂ ಅಪಸ್ಸಿತೋ;

ಅಗಾರಕಞ್ಚಿದಂ ಅತ್ಥಿ, ಹನ್ದ ದೇಮಸ್ಸಗಾರಕಂ.

೪೬. ಮಾ ಖೋ ತ್ವಂ ತಾತ ಪಕ್ಕೋಸಿ, ದೂಸೇಯ್ಯ ನೋ ಅಗಾರಕಂ;

ನೇತಾದಿಸಂ ಮುಖಂ ಹೋತಿ, ಬ್ರಾಹ್ಮಣಸ್ಸ ಸುಸೀಲಿನೋತಿ.

ಮಕ್ಕಟಜಾತಕಂ ತತಿಯಂ.

೧೭೪. ದುಬ್ಭಿಯಮಕ್ಕಟಜಾತಕಂ (೨-೩-೪)

೪೭. ಅದಮ್ಹ ತೇ ವಾರಿ ಪಹೂತರೂಪಂ, ಘಮ್ಮಾಭಿತತ್ತಸ್ಸ ಪಿಪಾಸಿತಸ್ಸ;

ಸೋ ದಾನಿ ಪಿತ್ವಾನ [ಪೀತ್ವಾನ (ಸೀ. ಪೀ.)] ಕಿರಿಙ್ಕರೋಸಿ [ಕಿಕಿಂಕರೋಸಿ (ಸೀ. ಸ್ಯಾ. ಪೀ.)], ಅಸಙ್ಗಮೋ ಪಾಪಜನೇನ ಸೇಯ್ಯೋ.

೪೮. ಕೋ ತೇ ಸುತೋ ವಾ ದಿಟ್ಠೋ ವಾ, ಸೀಲವಾ ನಾಮ ಮಕ್ಕಟೋ;

ಇದಾನಿ ಖೋ ತಂ ಓಹಚ್ಛಂ [ಊಹಚ್ಚ (ಸೀ. ಪೀ.), ಓಹಚ್ಚಂ (ಸ್ಯಾ.), ಉಹಜ್ಜಂ (ಕ.)], ಏಸಾ ಅಸ್ಮಾಕ ಧಮ್ಮತಾತಿ.

ದುಬ್ಭಿಯಮಕ್ಕಟಜಾತಕಂ ಚತುತ್ಥಂ.

೧೭೫. ಆದಿಚ್ಚುಪಟ್ಠಾನಜಾತಕಂ (೨-೩-೫)

೪೯. ಸಬ್ಬೇಸು ಕಿರ ಭೂತೇಸು, ಸನ್ತಿ ಸೀಲಸಮಾಹಿತಾ;

ಪಸ್ಸ ಸಾಖಾಮಿಗಂ ಜಮ್ಮಂ, ಆದಿಚ್ಚಮುಪತಿಟ್ಠತಿ.

೫೦. ನಾಸ್ಸ ಸೀಲಂ ವಿಜಾನಾಥ, ಅನಞ್ಞಾಯ ಪಸಂಸಥ;

ಅಗ್ಗಿಹುತ್ತಞ್ಚ ಉಹನ್ನಂ [ಊಹನ್ತಂ (ಸೀ.), ಊಹನಂ (ಸ್ಯಾ.), ಊಹನ್ತಿ (ಪೀ.), ಉಹದಂ (ಕ.)], ದ್ವೇ ಚ ಭಿನ್ನಾ ಕಮಣ್ಡಲೂತಿ.

ಆದಿಚ್ಚುಪಟ್ಠಾನಜಾತಕಂ ಪಞ್ಚಮಂ.

೧೭೬. ಕಳಾಯಮುಟ್ಠಿಜಾತಕಂ (೨-೩-೬)

೫೧. ಬಾಲೋ ವತಾಯಂ ದುಮಸಾಖಗೋಚರೋ, ಪಞ್ಞಾ ಜನಿನ್ದ ನಯಿಮಸ್ಸ ವಿಜ್ಜತಿ;

ಕಳಾಯಮುಟ್ಠಿಂ [ಕಲಾಯಮುಟ್ಠಿಂ (ಸೀ. ಪೀ.)] ಅವಕಿರಿಯ ಕೇವಲಂ, ಏಕಂ ಕಳಾಯಂ ಪತಿತಂ ಗವೇಸತಿ.

೫೨. ಏವಮೇವ ಮಯಂ ರಾಜ, ಯೇ ಚಞ್ಞೇ ಅತಿಲೋಭಿನೋ;

ಅಪ್ಪೇನ ಬಹುಂ ಜಿಯ್ಯಾಮ, ಕಳಾಯೇನೇವ ವಾನರೋತಿ.

ಕಳಾಯಮುಟ್ಠಿಜಾತಕಂ ಛಟ್ಠಂ.

೧೭೭. ತಿನ್ದುಕಜಾತಕಂ (೨-೩-೭)

೫೩. ಧನುಹತ್ಥಕಲಾಪೇಹಿ, ನೇತ್ತಿಂ ಸವರಧಾರಿಭಿ;

ಸಮನ್ತಾ ಪರಿಕಿಣ್ಣಮ್ಹ, ಕಥಂ ಮೋಕ್ಖೋ ಭವಿಸ್ಸತಿ.

೫೪. ಅಪ್ಪೇವ ಬಹುಕಿಚ್ಚಾನಂ, ಅತ್ಥೋ ಜಾಯೇಥ ಕೋಚಿ ನಂ;

ಅತ್ಥಿ ರುಕ್ಖಸ್ಸ ಅಚ್ಛಿನ್ನಂ, ಖಜ್ಜಥಞ್ಞೇವ ತಿನ್ದುಕನ್ತಿ.

ತಿನ್ದುಕಜಾತಕಂ ಸತ್ತಮಂ.

೧೭೮. ಕಚ್ಛಪಜಾತಕಂ (೨-೩-೮)

೫೫. ಜನಿತ್ತಂ ಮೇ ಭವಿತ್ತಂ ಮೇ, ಇತಿ ಪಙ್ಕೇ ಅವಸ್ಸಯಿಂ;

ತಂ ಮಂ ಪಙ್ಕೋ ಅಜ್ಝಭವಿ, ಯಥಾ ದುಬ್ಬಲಕಂ ತಥಾ;

ತಂ ತಂ ವದಾಮಿ ಭಗ್ಗವ, ಸುಣೋಹಿ ವಚನಂ ಮಮ.

೫೬. ಗಾಮೇ ವಾ ಯದಿ ವಾ ರಞ್ಞೇ, ಸುಖಂ ಯತ್ರಾಧಿಗಚ್ಛತಿ;

ತಂ ಜನಿತ್ತಂ ಭವಿತ್ತಞ್ಚ, ಪುರಿಸಸ್ಸ ಪಜಾನತೋ;

ಯಮ್ಹಿ ಜೀವೇ ತಮ್ಹಿ ಗಚ್ಛೇ, ನ ನಿಕೇತಹತೋ ಸಿಯಾತಿ.

ಕಚ್ಛಪಜಾತಕಂ ಅಟ್ಠಮಂ.

೧೭೯. ಸತಧಮ್ಮಜಾತಕಂ (೨-೩-೯)

೫೭. ತಞ್ಚ ಅಪ್ಪಞ್ಚ ಉಚ್ಛಿಟ್ಠಂ, ತಞ್ಚ ಕಿಚ್ಛೇನ ನೋ ಅದಾ;

ಸೋಹಂ ಬ್ರಾಹ್ಮಣಜಾತಿಕೋ, ಯಂ ಭುತ್ತಂ ತಮ್ಪಿ ಉಗ್ಗತಂ.

೫೮. ಏವಂ ಧಮ್ಮಂ ನಿರಂಕತ್ವಾ [ನಿರಾಕತ್ವಾ (?) ನಿ + ಆ + ಕರ + ತ್ವಾ], ಯೋ ಅಧಮ್ಮೇನ ಜೀವತಿ;

ಸತಧಮ್ಮೋವ ಲಾಭೇನ, ಲದ್ಧೇನಪಿ ನ ನನ್ದತೀತಿ.

ಸತಧಮ್ಮಜಾತಕಂ ನವಮಂ.

೧೮೦. ದುದ್ದದಜಾತಕಂ (೨-೩-೧೦)

೫೯. ದುದ್ದದಂ ದದಮಾನಾನಂ, ದುಕ್ಕರಂ ಕಮ್ಮ ಕುಬ್ಬತಂ;

ಅಸನ್ತೋ ನಾನುಕುಬ್ಬನ್ತಿ, ಸತಂ ಧಮ್ಮೋ ದುರನ್ನಯೋ.

೬೦. ತಸ್ಮಾ ಸತಞ್ಚ ಅಸತಂ, ನಾನಾ ಹೋತಿ ಇತೋ ಗತಿ;

ಅಸನ್ತೋ ನಿರಯಂ ಯನ್ತಿ, ಸನ್ತೋ ಸಗ್ಗಪರಾಯಣಾತಿ [ಪರಾಯನಾ (ಸ್ಯಾ. ಕ.)].

ದುದ್ದದಜಾತಕಂ ದಸಮಂ.

ಕಲ್ಯಾಣವಗ್ಗೋ ತತಿಯೋ.

ತಸ್ಸುದ್ದಾನಂ –

ಸುಸಮಞ್ಞಮಿಗಾಧಿಭೂ ಮಾಣವಕೋ, ವಾರಿಪಹೂತರೂಪಾದಿಚ್ಚುಪಟ್ಠಾನಾ;

ಸಕಳಾಯಸತಿನ್ದುಕಪಙ್ಕ ಪುನ, ಸತಧಮ್ಮ ಸುದುದ್ದದಕೇನ ದಸಾತಿ.