೨. ಸನ್ಥವವಗ್ಗೋ

೧೬೧. ಇನ್ದಸಮಾನಗೋತ್ತಜಾತಕಂ (೨-೨-೧)

೨೧. ನ ಸನ್ಥವಂ [ಸನ್ಧವಂ (ಕ.)] ಕಾಪುರಿಸೇನ ಕಯಿರಾ, ಅರಿಯೋ ಅನರಿಯೇನ ಪಜಾನಮತ್ಥಂ;

ಚಿರಾನುವುತ್ಥೋಪಿ ಕರೋತಿ ಪಾಪಂ, ಗಜೋ ಯಥಾ ಇನ್ದಸಮಾನಗೋತ್ತಂ.

೨೨. ಯಂ ತ್ವೇವ ಜಞ್ಞಾ ಸದಿಸೋ ಮಮನ್ತಿ, ಸೀಲೇನ ಪಞ್ಞಾಯ ಸುತೇನ ಚಾಪಿ;

ತೇನೇವ ಮೇತ್ತಿಂ ಕಯಿರಾಥ ಸದ್ಧಿಂ, ಸುಖೋ ಹವೇ ಸಪ್ಪುರಿಸೇನ ಸಙ್ಗಮೋತಿ.

ಇನ್ದಸಮಾನಗೋತ್ತಜಾತಕಂ ಪಠಮಂ.

೧೬೨. ಸನ್ಥವಜಾತಕಂ (೨-೨-೨)

೨೩. ನ ಸನ್ಥವಸ್ಮಾ ಪರಮತ್ಥಿ ಪಾಪಿಯೋ, ಯೋ ಸನ್ಥವೋ [ಸನ್ಧವೋ (ಕ.)] ಕಾಪುರಿಸೇನ ಹೋತಿ;

ಸನ್ತಪ್ಪಿತೋ ಸಪ್ಪಿನಾ ಪಾಯಸೇನ [ಪಾಯಾಸೇನ (ಕ.)], ಕಿಚ್ಛಾಕತಂ ಪಣ್ಣಕುಟಿಂ ಅದಯ್ಹಿ [ಅದಡ್ಢಹಿ (ಸೀ. ಸ್ಯಾ.), ಅದಟ್ಠಹಿ (ಪೀ.), ಅದದ್ದಹಿ (?)].

೨೪. ನ ಸನ್ಥವಸ್ಮಾ ಪರಮತ್ಥಿ ಸೇಯ್ಯೋ, ಯೋ ಸನ್ಥವೋ ಸಪ್ಪುರಿಸೇನ ಹೋತಿ;

ಸೀಹಸ್ಸ ಬ್ಯಗ್ಘಸ್ಸ ಚ ದೀಪಿನೋ ಚ, ಸಾಮಾ ಮುಖಂ ಲೇಹತಿ ಸನ್ಥವೇನಾತಿ.

ಸನ್ಥವಜಾತಕಂ ದುತಿಯಂ.

೧೬೩. ಸುಸೀಮಜಾತಕಂ (೨-೨-೩)

೨೫. ಕಾಳಾ ಮಿಗಾ ಸೇತದನ್ತಾ ತವೀಮೇ [ತವ ಇಮೇ (ಸೀ. ಸ್ಯಾ. ಪೀ.)], ಪರೋಸತಂ ಹೇಮಜಾಲಾಭಿಛನ್ನಾ [ಹೇಮಜಾಲಾಭಿಸಞ್ಛನ್ನಾ (ಸೀ.)];

ತೇ ತೇ ದದಾಮೀತಿ ಸುಸೀಮ ಬ್ರೂಸಿ, ಅನುಸ್ಸರಂ ಪೇತ್ತಿಪಿತಾಮಹಾನಂ.

೨೬. ಕಾಳಾ ಮಿಗಾ ಸೇತದನ್ತಾ ಮಮೀಮೇ [ಮಮ ಇಮೇ (ಸೀ. ಪೀ.)], ಪರೋಸತಂ ಹೇಮಜಾಲಾಭಿಚ್ಛನ್ನಾ;

ತೇ ತೇ ದದಾಮೀತಿ ವದಾಮಿ ಮಾಣವ, ಅನುಸ್ಸರಂ ಪೇತ್ತಿಪಿತಾಮಹಾನನ್ತಿ.

ಸುಸೀಮಜಾತಕಂ ತತಿಯಂ.

೧೬೪. ಗಿಜ್ಝಜಾತಕಂ (೨-೨-೪)

೨೭. ಯಂ ನು ಗಿಜ್ಝೋ ಯೋಜನಸತಂ, ಕುಣಪಾನಿ ಅವೇಕ್ಖತಿ;

ಕಸ್ಮಾ ಜಾಲಞ್ಚ ಪಾಸಞ್ಚ, ಆಸಜ್ಜಾಪಿ ನ ಬುಜ್ಝಸಿ.

೨೮. ಯದಾ ಪರಾಭವೋ ಹೋತಿ, ಪೋಸೋ ಜೀವಿತಸಙ್ಖಯೇ;

ಅಥ ಜಾಲಞ್ಚ ಪಾಸಞ್ಚ, ಆಸಜ್ಜಾಪಿ ನ ಬುಜ್ಝತೀತಿ.

ಗಿಜ್ಝಜಾತಕಂ ಚತುತ್ಥಂ.

೧೬೫. ನಕುಲಜಾತಕಂ (೨-೨-೫)

೨೯. ಸನ್ಧಿಂ ಕತ್ವಾ ಅಮಿತ್ತೇನ, ಅಣ್ಡಜೇನ ಜಲಾಬುಜ;

ವಿವರಿಯ ದಾಠಂ ಸೇಸಿ [ಸಯಸಿ (ಸೀ. ಸ್ಯಾ. ಪೀ.)], ಕುತೋ ತೇ ಭಯಮಾಗತಂ.

೩೦. ಸಙ್ಕೇಥೇವ [ಸಙ್ಕತೇವ (ಕ.)] ಅಮಿತ್ತಸ್ಮಿಂ, ಮಿತ್ತಸ್ಮಿಮ್ಪಿ ನ ವಿಸ್ಸಸೇ;

ಅಭಯಾ ಭಯಮುಪ್ಪನ್ನಂ, ಅಪಿ ಮೂಲಾನಿ ಕನ್ತತೀತಿ [ಮೂಲಂ ನಿಕನ್ತತೀತಿ (ಸೀ.)].

ನಕುಲಜಾತಕಂ ಪಞ್ಚಮಂ.

೧೬೬. ಉಪಸಾಳಕಜಾತಕಂ (೨-೨-೬)

೩೧. ಉಪಸಾಳಕನಾಮಾನಿ [ಉಪಸಾಳ್ಹಕನಾಮಾನಂ (ಸೀ. ಸ್ಯಾ. ಪೀ.)], ಸಹಸ್ಸಾನಿ ಚತುದ್ದಸ;

ಅಸ್ಮಿಂ ಪದೇಸೇ ದಡ್ಢಾನಿ, ನತ್ಥಿ ಲೋಕೇ ಅನಾಮತಂ.

೩೨. ಯಮ್ಹಿ ಸಚ್ಚಞ್ಚ ಧಮ್ಮೋ ಚ, ಅಹಿಂಸಾ ಸಂಯಮೋ ದಮೋ;

ಏತಂ ಅರಿಯಾ ಸೇವನ್ತಿ, ಏತಂ ಲೋಕೇ ಅನಾಮತನ್ತಿ.

ಉಪಸಾಳಕಜಾತಕಂ ಛಟ್ಠಂ.

೧೬೭. ಸಮಿದ್ಧಿಜಾತಕಂ (೨-೨-೭)

೩೩. ಅಭುತ್ವಾ ಭಿಕ್ಖಸಿ ಭಿಕ್ಖು, ನ ಹಿ ಭುತ್ವಾನ ಭಿಕ್ಖಸಿ;

ಭುತ್ವಾನ ಭಿಕ್ಖು ಭಿಕ್ಖಸ್ಸು, ಮಾ ತಂ ಕಾಲೋ ಉಪಚ್ಚಗಾ.

೩೪. ಕಾಲಂ ವೋಹಂ ನ ಜಾನಾಮಿ, ಛನ್ನೋ ಕಾಲೋ ನ ದಿಸ್ಸತಿ;

ತಸ್ಮಾ ಅಭುತ್ವಾ ಭಿಕ್ಖಾಮಿ, ಮಾ ಮಂ ಕಾಲೋ ಉಪಚ್ಚಗಾತಿ.

ಸಮಿದ್ಧಿಜಾತಕಂ ಸತ್ತಮಂ.

೧೬೮. ಸಕುಣಗ್ಘಿಜಾತಕಂ (೨-೨-೮)

೩೫. ಸೇನೋ ಬಲಸಾ ಪತಮಾನೋ, ಲಾಪಂ ಗೋಚರಠಾಯಿನಂ;

ಸಹಸಾ ಅಜ್ಝಪ್ಪತ್ತೋವ, ಮರಣಂ ತೇನುಪಾಗಮಿ.

೩೬. ಸೋಹಂ ನಯೇನ ಸಮ್ಪನ್ನೋ, ಪೇತ್ತಿಕೇ ಗೋಚರೇ ರತೋ;

ಅಪೇತಸತ್ತು ಮೋದಾಮಿ, ಸಮ್ಪಸ್ಸಂ ಅತ್ಥಮತ್ತನೋತಿ.

ಸಕುಣಗ್ಘಿಜಾತಕಂ ಅಟ್ಠಮಂ.

೧೬೯. ಅರಕಜಾತಕಂ (೨-೨-೯)

೩೭. ಯೋ ವೇ ಮೇತ್ತೇನ ಚಿತ್ತೇನ, ಸಬ್ಬಲೋಕಾನುಕಮ್ಪತಿ;

ಉದ್ಧಂ ಅಧೋ ಚ ತಿರಿಯಂ, ಅಪ್ಪಮಾಣೇನ ಸಬ್ಬಸೋ.

೩೮. ಅಪ್ಪಮಾಣಂ ಹಿತಂ ಚಿತ್ತಂ, ಪರಿಪುಣ್ಣಂ ಸುಭಾವಿತಂ;

ಯಂ ಪಮಾಣಕತಂ ಕಮ್ಮಂ, ನ ತಂ ತತ್ರಾವಸಿಸ್ಸತೀತಿ.

ಅರಕಜಾತಕಂ ನವಮಂ.

೧೭೦. ಕಕಣ್ಟಕಜಾತಕಂ (೨-೨-೧೦)

೩೯. ನಾಯಂ ಪುರೇ ಉಣ್ಣಮತಿ [ಉನ್ನಮತಿ (ಸ್ಯಾ.)], ತೋರಣಗ್ಗೇ ಕಕಣ್ಟಕೋ;

ಮಹೋಸಧ ವಿಜಾನಾಹಿ, ಕೇನ ಥದ್ಧೋ ಕಕಣ್ಟಕೋ.

೪೦. ಅಲದ್ಧಪುಬ್ಬಂ ಲದ್ಧಾನ, ಅಡ್ಢಮಾಸಂ ಕಕಣ್ಟಕೋ;

ಅತಿಮಞ್ಞತಿ ರಾಜಾನಂ, ವೇದೇಹಂ ಮಿಥಿಲಗ್ಗಹನ್ತಿ.

ಕಕಣ್ಟಕಜಾತಕಂ ದಸಮಂ.

ಸನ್ಥವವಗ್ಗೋ ದುತಿಯೋ.

ತಸ್ಸುದ್ದಾನಂ –

ಅಥ ಇನ್ದಸಮಾನ ಸಪಣ್ಣಕುಟಿ, ಸುಸಿಮುತ್ತಮ ಗಿಜ್ಝ ಜಲಾಬುಜಕೋ;

ಉಪಸಾಳಕ ಭಿಕ್ಖು ಸಲಾಪವರೋ, ಅಥ ಮೇತ್ತವರೋ ದಸಪುಣ್ಣಮತೀತಿ.