೫೦೯. ಹತ್ಥಿಪಾಲಜಾತಕಂ (೧೩)

೩೩೭. ಚಿರಸ್ಸಂ ವತ ಪಸ್ಸಾಮ, ಬ್ರಾಹ್ಮಣಂ ದೇವವಣ್ಣಿನಂ;

ಮಹಾಜಟಂ ಖಾರಿಧರಂ [ಭಾರಧರಂ (ಪೀ.)], ಪಙ್ಕದನ್ತಂ ರಜಸ್ಸಿರಂ.

೩೩೮. ಚಿರಸ್ಸಂ ವತ ಪಸ್ಸಾಮ, ಇಸಿಂ ಧಮ್ಮಗುಣೇ ರತಂ;

ಕಾಸಾಯವತ್ಥವಸನಂ, ವಾಕಚೀರಂ ಪಟಿಚ್ಛದಂ.

೩೩೯. ಆಸನಂ ಉದಕಂ ಪಜ್ಜಂ, ಪಟಿಗಣ್ಹಾತು ನೋ ಭವಂ;

ಅಗ್ಘೇ ಭವನ್ತಂ ಪುಚ್ಛಾಮ, ಅಗ್ಘಂ ಕುರುತು ನೋ ಭವಂ.

೩೪೦. ಅಧಿಚ್ಚ ವೇದೇ ಪರಿಯೇಸ ವಿತ್ತಂ, ಪುತ್ತೇ ಗಹೇ [ಗೇಹೇ (ಸೀ. ಸ್ಯಾ. ಪೀ.)] ತಾತ ಪತಿಟ್ಠಪೇತ್ವಾ;

ಗನ್ಧೇ ರಸೇ ಪಚ್ಚನುಭುಯ್ಯ [ಪಚ್ಚನುಭೋತ್ವ (ಸ್ಯಾ.), ಪಚ್ಚನುಭುತ್ವ (ಪೀ.)] ಸಬ್ಬಂ, ಅರಞ್ಞಂ ಸಾಧು ಮುನಿ ಸೋ ಪಸತ್ಥೋ.

೩೪೧. ವೇದಾ ನ ಸಚ್ಚಾ ನ ಚ ವಿತ್ತಲಾಭೋ, ನ ಪುತ್ತಲಾಭೇನ ಜರಂ ವಿಹನ್ತಿ;

ಗನ್ಧೇ ರಸೇ ಮುಚ್ಚನ [ಮುಞ್ಚನ (ಸೀ. ಕ.)] ಮಾಹು ಸನ್ತೋ, ಸಕಮ್ಮುನಾ [ಸಕಮ್ಮನಾ (ಸೀ. ಪೀ.)] ಹೋತಿ ಫಲೂಪಪತ್ತಿ.

೩೪೨. ಅದ್ಧಾ ಹಿ ಸಚ್ಚಂ ವಚನಂ ತವೇತಂ, ಸಕಮ್ಮುನಾ ಹೋತಿ ಫಲೂಪಪತ್ತಿ;

ಜಿಣ್ಣಾ ಚ ಮಾತಾಪಿತರೋ ತವೀಮೇ [ತವೇಮೇ (ಸೀ.), ತವ ಯಿಮೇ (ಸ್ಯಾ. ಪೀ.)], ಪಸ್ಸೇಯ್ಯುಂ ತಂ ವಸ್ಸಸತಂ ಅರೋಗಂ [ಅರೋಗ್ಯಂ (ಸ್ಯಾ. ಕ.)].

೩೪೩. ಯಸ್ಸಸ್ಸ ಸಕ್ಖೀ ಮರಣೇನ ರಾಜ, ಜರಾಯ ಮೇತ್ತೀ ನರವೀರಸೇಟ್ಠ;

ಯೋ ಚಾಪಿ ಜಞ್ಞಾ ನ ಮರಿಸ್ಸಂ ಕದಾಚಿ, ಪಸ್ಸೇಯ್ಯುಂ ತಂ ವಸ್ಸಸತಂ ಅರೋಗಂ.

೩೪೪. ಯಥಾಪಿ ನಾವಂ ಪುರಿಸೋ ದಕಮ್ಹಿ, ಏರೇತಿ ಚೇ ನಂ ಉಪನೇತಿ ತೀರಂ;

ಏವಮ್ಪಿ ಬ್ಯಾಧೀ ಸತತಂ ಜರಾ ಚ, ಉಪನೇತಿ ಮಚ್ಚಂ [ಮಚ್ಚು (ಸ್ಯಾ. ಪೀ.)] ವಸಮನ್ತಕಸ್ಸ.

೩೪೫. ಪಙ್ಕೋ ಚ ಕಾಮಾ ಪಲಿಪೋ ಚ ಕಾಮಾ, ಮನೋಹರಾ ದುತ್ತರಾ ಮಚ್ಚುಧೇಯ್ಯಾ;

ಏತಸ್ಮಿಂ ಪಙ್ಕೇ ಪಲಿಪೇ ಬ್ಯಸನ್ನಾ [ವಿಸನ್ನಾ (ಸ್ಯಾ. ಕ.)], ಹೀನತ್ತರೂಪಾ ನ ತರನ್ತಿ ಪಾರಂ.

೩೪೬. ಅಯಂ ಪುರೇ ಲುದ್ದಮಕಾಸಿ ಕಮ್ಮಂ, ಸ್ವಾಯಂ ಗಹೀತೋ ನ ಹಿ ಮೋಕ್ಖಿತೋ ಮೇ;

ಓರುನ್ಧಿಯಾ ನಂ ಪರಿರಕ್ಖಿಸ್ಸಾಮಿ, ಮಾಯಂ ಪುನ ಲುದ್ದಮಕಾಸಿ ಕಮ್ಮಂ.

೩೪೭. ಗವಂವ [ಗಾವಂವ (ಸೀ.)] ನಟ್ಠಂ ಪುರಿಸೋ ಯಥಾ ವನೇ, ಅನ್ವೇಸತೀ [ಪರಿಯೇಸತೀ (ಸೀ. ಪೀ.)] ರಾಜ ಅಪಸ್ಸಮಾನೋ;

ಏವಂ ನಟ್ಠೋ ಏಸುಕಾರೀ ಮಮತ್ಥೋ, ಸೋಹಂ ಕಥಂ ನ ಗವೇಸೇಯ್ಯಂ ರಾಜ.

೩೪೮. ಹಿಯ್ಯೋತಿ ಹಿಯ್ಯತಿ [ಹೀಯೋತಿ ಹೀಯತಿ (ಸೀ.)] ಪೋಸೋ, ಪರೇತಿ ಪರಿಹಾಯತಿ;

ಅನಾಗತಂ ನೇತಮತ್ಥೀತಿ ಞತ್ವಾ, ಉಪ್ಪನ್ನಛನ್ದಂ ಕೋ ಪನುದೇಯ್ಯ ಧೀರೋ.

೩೪೯. ಪಸ್ಸಾಮಿ ವೋಹಂ ದಹರಂ [ದಹರೀ (ಸ್ಯಾ. ಪೀ. ಕ.)] ಕುಮಾರಿಂ, ಮತ್ತೂಪಮಂ ಕೇತಕಪುಪ್ಫನೇತ್ತಂ;

ಅಭುತ್ತಭೋಗೇ [ಅಭುತ್ವ ಭೋಗೇ (ಸ್ಯಾ. ಕ. ಅಟ್ಠ.), ಅಭುತ್ವ ಭೋಗೇ (ಪೀ.), ಭೋಗೇ ಅತುತ್ವಾ (ಕ.)] ಪಠಮೇ ವಯಸ್ಮಿಂ, ಆದಾಯ ಮಚ್ಚು ವಜತೇ ಕುಮಾರಿಂ.

೩೫೦. ಯುವಾ ಸುಜಾತೋ ಸುಮುಖೋ ಸುದಸ್ಸನೋ, ಸಾಮೋ ಕುಸುಮ್ಭಪರಿಕಿಣ್ಣಮಸ್ಸು;

ಹಿತ್ವಾನ ಕಾಮೇ ಪಟಿಕಚ್ಚ [ಪಟಿಗಚ್ಚ (ಸೀ.), ಪಟಿಗಚ್ಛ (ಸ್ಯಾ. ಪೀ.)] ಗೇಹಂ, ಅನುಜಾನ ಮಂ ಪಬ್ಬಜಿಸ್ಸಾಮಿ ದೇವ.

೩೫೧. ಸಾಖಾಹಿ ರುಕ್ಖೋ ಲಭತೇ ಸಮಞ್ಞಂ, ಪಹೀನಸಾಖಂ ಪನ ಖಾಣುಮಾಹು;

ಪಹೀನಪುತ್ತಸ್ಸ ಮಮಜ್ಜ ಭೋತಿ, ವಾಸೇಟ್ಠಿ ಭಿಕ್ಖಾಚರಿಯಾಯ ಕಾಲೋ.

೩೫೨. ಅಘಸ್ಮಿ ಕೋಞ್ಚಾವ ಯಥಾ ಹಿಮಚ್ಚಯೇ, ಕತಾನಿ [ತನ್ತಾನಿ (ಸೀ. ಪೀ.)] ಜಾಲಾನಿ ಪದಾಲಿಯ [ಪದಾಲೇಯ್ಯ (ಸೀ.)] ಹಂಸಾ;

ಗಚ್ಛನ್ತಿ ಪುತ್ತಾ ಚ ಪತೀ ಚ ಮಯ್ಹಂ, ಸಾಹಂ ಕಥಂ ನಾನುವಜೇ ಪಜಾನಂ.

೩೫೩. ಏತೇ ಭುತ್ವಾ ವಮಿತ್ವಾ ಚ, ಪಕ್ಕಮನ್ತಿ ವಿಹಙ್ಗಮಾ;

ಯೇ ಚ ಭುತ್ವಾನ ವಮಿಂಸು, ತೇ ಮೇ ಹತ್ಥತ್ತ [ಹತ್ಥತ್ಥ (ಸೀ. ಸ್ಯಾ. ಪೀ.)] ಮಾಗತಾ.

೩೫೪. ಅವಮೀ ಬ್ರಾಹ್ಮಣೋ ಕಾಮೇ, ಸೋ [ತೇ (ಸೀ. ಪೀ.)] ತ್ವಂ ಪಚ್ಚಾವಮಿಸ್ಸಸಿ;

ವನ್ತಾದೋ ಪುರಿಸೋ ರಾಜ, ನ ಸೋ ಹೋತಿ ಪಸಂಸಿಯೋ.

೩೫೫. ಪಙ್ಕೇ ಚ [ಪಙ್ಕೇವ (ಸೀ. ಪೀ.)] ಪೋಸಂ ಪಲಿಪೇ ಬ್ಯಸನ್ನಂ, ಬಲೀ ಯಥಾ ದುಬ್ಬಲಮುದ್ಧರೇಯ್ಯ;

ಏವಮ್ಪಿ ಮಂ ತ್ವಂ ಉದತಾರಿ ಭೋತಿ, ಪಞ್ಚಾಲಿ ಗಾಥಾಹಿ ಸುಭಾಸಿತಾಹಿ.

೩೫೬. ಇದಂ ವತ್ವಾ ಮಹಾರಾಜಾ, ಏಸುಕಾರೀ ದಿಸಮ್ಪತಿ;

ರಟ್ಠಂ ಹಿತ್ವಾನ ಪಬ್ಬಜಿ, ನಾಗೋ ಛೇತ್ವಾವ ಬನ್ಧನಂ.

೩೫೭. ರಾಜಾ ಚ ಪಬ್ಬಜ್ಜಮರೋಚಯಿತ್ಥ, ರಟ್ಠಂ ಪಹಾಯ ನರವೀರಸೇಟ್ಠೋ;

ತುವಮ್ಪಿ ನೋ ಹೋತಿ ಯಥೇವ ರಾಜಾ, ಅಮ್ಹೇಹಿ ಗುತ್ತಾ ಅನುಸಾಸ ರಜ್ಜಂ.

೩೫೮. ರಾಜಾ ಚ ಪಬ್ಬಜ್ಜಮರೋಚಯಿತ್ಥ, ರಟ್ಠಂ ಪಹಾಯ ನರವೀರಸೇಟ್ಠೋ;

ಅಹಮ್ಪಿ ಏಕಾ [ಏಕಾವ (ಸೀ.)] ಚರಿಸ್ಸಾಮಿ ಲೋಕೇ, ಹಿತ್ವಾನ ಕಾಮಾನಿ ಮನೋರಮಾನಿ.

೩೫೯. ರಾಜಾ ಚ ಪಬ್ಬಜ್ಜಮರೋಚಯಿತ್ಥ, ರಟ್ಠಂ ಪಹಾಯ ನರವೀರಸೇಟ್ಠೋ;

ಅಹಮ್ಪಿ ಏಕಾ ಚರಿಸ್ಸಾಮಿ ಲೋಕೇ, ಹಿತ್ವಾನ ಕಾಮಾನಿ ಯಥೋಧಿಕಾನಿ.

೩೬೦. ಅಚ್ಚೇನ್ತಿ ಕಾಲಾ ತರಯನ್ತಿ ರತ್ತಿಯೋ, ವಯೋಗುಣಾ ಅನುಪುಬ್ಬಂ ಜಹನ್ತಿ;

ಅಹಮ್ಪಿ ಏಕಾ ಚರಿಸ್ಸಾಮಿ ಲೋಕೇ, ಹಿತ್ವಾನ ಕಾಮಾನಿ ಮನೋರಮಾನಿ.

೩೬೧. ಅಚ್ಚೇನ್ತಿ ಕಾಲಾ ತರಯನ್ತಿ ರತ್ತಿಯೋ, ವಯೋಗುಣಾ ಅನುಪುಬ್ಬಂ ಜಹನ್ತಿ;

ಅಹಮ್ಪಿ ಏಕಾ ಚರಿಸ್ಸಾಮಿ ಲೋಕೇ, ಹಿತ್ವಾನ ಕಾಮಾನಿ ಯಥೋಧಿಕಾನಿ.

೩೬೨. ಅಚ್ಚೇನ್ತಿ ಕಾಲಾ ತರಯನ್ತಿ ರತ್ತಿಯೋ, ವಯೋಗುಣಾ ಅನುಪುಬ್ಬಂ ಜಹನ್ತಿ;

ಅಹಮ್ಪಿ ಏಕಾ ಚರಿಸ್ಸಾಮಿ ಲೋಕೇ, ಸೀತಿಭೂತಾ [ಸೀತೀಭೂತಾ (ಸೀ.)] ಸಬ್ಬಮತಿಚ್ಚ ಸಙ್ಗನ್ತಿ.

ಹತ್ಥಿಪಾಲಜಾತಕಂ ತೇರಸಮಂ.