೫೧೦. ಅಯೋಘರಜಾತಕಂ (೧೪)

೩೬೩. ಯಮೇಕರತ್ತಿಂ ಪಠಮಂ, ಗಬ್ಭೇ ವಸತಿ ಮಾಣವೋ;

ಅಬ್ಭುಟ್ಠಿತೋವ ಸೋ ಯಾತಿ [ಸಯತಿ (ಸೀ. ಪೀ.), ಸ ಯಾತಿ (ಕತ್ಥಚಿ)], ಸಗಚ್ಛಂ ನ ನಿವತ್ತತಿ.

೩೬೪. ನ ಯುಜ್ಝಮಾನಾ ನ ಬಲೇನವಸ್ಸಿತಾ, ನರಾ ನ ಜೀರನ್ತಿ ನ ಚಾಪಿ ಮಿಯ್ಯರೇ;

ಸಬ್ಬಂ ಹಿದಂ [ಹಿ ತಂ (ಸೀ. ಪೀ.)] ಜಾತಿಜರಾಯುಪದ್ದುತಂ, ತಂ ಮೇ ಮತೀ ಹೋತಿ ಚರಾಮಿ ಧಮ್ಮಂ.

೩೬೫. ಚತುರಙ್ಗಿನಿಂ ಸೇನಂ ಸುಭಿಂಸರೂಪಂ, ಜಯನ್ತಿ ರಟ್ಠಾಧಿಪತೀ ಪಸಯ್ಹ;

ನ ಮಚ್ಚುನೋ ಜಯಿತುಮುಸ್ಸಹನ್ತಿ, ತಂ ಮೇ ಮತೀ ಹೋತಿ ಚರಾಮಿ ಧಮ್ಮಂ.

೩೬೬. ಹತ್ಥೀಹಿ ಅಸ್ಸೇಹಿ ರಥೇಹಿ ಪತ್ತಿಭಿ, ಪರಿವಾರಿತಾ ಮುಚ್ಚರೇ ಏಕಚ್ಚೇಯ್ಯಾ [ಏಕಚೇಯ್ಯಾ (ಸೀ. ಪೀ.)];

ನ ಮಚ್ಚುನೋ [ನ ಮಚ್ಚುತೋ (ಸೀ.)] ಮುಚ್ಚಿತುಮುಸ್ಸಹನ್ತಿ, ತಂ ಮೇ ಮತೀ ಹೋತಿ ಚರಾಮಿ ಧಮ್ಮಂ.

೩೬೭. ಹತ್ಥೀಹಿ ಅಸ್ಸೇಹಿ ರಥೇಹಿ ಪತ್ತಿಭಿ, ಸೂರಾ [ಪುರಾ (ಕ.)] ಪಭಞ್ಜನ್ತಿ ಪಧಂಸಯನ್ತಿ;

ನ ಮಚ್ಚುನೋ ಭಞ್ಜಿತುಮುಸ್ಸಹನ್ತಿ, ತಂ ಮೇ ಮತೀ ಹೋತಿ ಚರಾಮಿ ಧಮ್ಮಂ.

೩೬೮. ಮತ್ತಾ ಗಜಾ ಭಿನ್ನಗಳಾ [ಪಭಿನ್ನಗಲಾ (ಸೀ.)] ಪಭಿನ್ನಾ, ನಗರಾನಿ ಮದ್ದನ್ತಿ ಜನಂ ಹನನ್ತಿ;

ನ ಮಚ್ಚುನೋ ಮದ್ದಿತುಮುಸ್ಸಹನ್ತಿ, ತಂ ಮೇ ಮತೀ ಹೋತಿ ಚರಾಮಿ ಧಮ್ಮಂ.

೩೬೯. ಇಸ್ಸಾಸಿನೋ ಕತಹತ್ಥಾಪಿ ವೀರಾ [ವೀರಾ (ಸೀ. ಪೀ.)], ದೂರೇಪಾತೀ [ಪತೀ (ಕ.)] ಅಕ್ಖಣವೇಧಿನೋಪಿ;

ನ ಮಚ್ಚುನೋ ವಿಜ್ಝಿತುಮುಸ್ಸಹನ್ತಿ, ತಂ ಮೇ ಮತೀ ಹೋತಿ ಚರಾಮಿ ಧಮ್ಮಂ.

೩೭೦. ಸರಾನಿ ಖೀಯನ್ತಿ ಸಸೇಲಕಾನನಾ, ಸಬ್ಬಂ ಹಿದಂ [ಹಿ ತಂ (ಸೀ. ಪೀ.), ಪಿತಂ (ಸ್ಯಾ.)] ಖೀಯತಿ ದೀಘಮನ್ತರಂ;

ಸಬ್ಬಂ ಹಿದಂ [ಹಿ ತಂ (ಸೀ. ಪೀ.), ಪಿತಂ (ಸ್ಯಾ.)] ಭಞ್ಜರೇ ಕಾಲಪರಿಯಾಯಂ, ತಂ ಮೇ ಮತೀ ಹೋತಿ ಚರಾಮಿ ಧಮ್ಮಂ.

೩೭೧. ಸಬ್ಬೇ ಸಮೇವಂ ಹಿ ನರಾನನಾರಿನಂ [ನರಾನರೀನಂ (ಪೀ.), ನಾರೀ ನರಾನಂ (ಸ್ಯಾ.), ನರನಾರೀನಂ (ಕ.)], ಚಲಾಚಲಂ ಪಾಣಭುನೋಧ ಜೀವಿತಂ;

ಪಟೋವ ಧುತ್ತಸ್ಸ ದುಮೋವ ಕೂಲಜೋ, ತಂ ಮೇ ಮತೀ ಹೋತಿ ಚರಾಮಿ ಧಮ್ಮಂ.

೩೭೨. ದುಮಪ್ಫಲಾನೇವ ಪತನ್ತಿ ಮಾಣವಾ, ದಹರಾ ಚ ವುದ್ಧಾ ಚ ಸರೀರಭೇದಾ;

ನಾರಿಯೋ ನರಾ ಮಜ್ಝಿಮಪೋರಿಸಾ ಚ, ತಂ ಮೇ ಮತೀ ಹೋತಿ ಚರಾಮಿ ಧಮ್ಮಂ.

೩೭೩. ನಾಯಂ ವಯೋ ತಾರಕರಾಜಸನ್ನಿಭೋ, ಯದಬ್ಭತೀತಂ ಗತಮೇವ ದಾನಿ ತಂ;

ಜಿಣ್ಣಸ್ಸ ಹೀ ನತ್ಥಿ ರತೀ ಕುತೋ ಸುಖಂ, ತಂ ಮೇ ಮತೀ ಹೋತಿ ಚರಾಮಿ ಧಮ್ಮಂ.

೩೭೪. ಯಕ್ಖಾ ಪಿಸಾಚಾ ಅಥವಾಪಿ ಪೇತಾ, ಕುಪಿತಾತೇ [ಕುಪಿತಾಪಿ ತೇ (ಸೀ. ಪೀ.)] ಅಸ್ಸಸನ್ತಿ ಮನುಸ್ಸೇ;

ನ ಮಚ್ಚುನೋ ಅಸ್ಸಸಿತುಸ್ಸಹನ್ತಿ, ತಂ ಮೇ ಮತೀ ಹೋತಿ ಚರಾಮಿ ಧಮ್ಮಂ.

೩೭೫. ಯಕ್ಖೇ ಪಿಸಾಚೇ ಅಥವಾಪಿ ಪೇತೇ, ಕುಪಿತೇಪಿ ತೇ ನಿಜ್ಝಪನಂ ಕರೋನ್ತಿ;

ನ ಮಚ್ಚುನೋ ನಿಜ್ಝಪನಂ ಕರೋನ್ತಿ, ತಂ ಮೇ ಮತೀ ಹೋತಿ ಚರಾಮಿ ಧಮ್ಮಂ.

೩೭೬. ಅಪರಾಧಕೇ ದೂಸಕೇ ಹೇಠಕೇ ಚ, ರಾಜಾನೋ ದಣ್ಡೇನ್ತಿ ವಿದಿತ್ವಾನ ದೋಸಂ;

ನ ಮಚ್ಚುನೋ ದಣ್ಡಯಿತುಸ್ಸಹನ್ತಿ, ತಂ ಮೇ ಮತೀ ಹೋತಿ ಚರಾಮಿ ಧಮ್ಮಂ.

೩೭೭. ಅಪರಾಧಕಾ ದೂಸಕಾ ಹೇಟ್ಠಕಾ ಚ, ಲಭನ್ತಿ ತೇ ರಾಜಿನೋ ನಿಜ್ಝಪೇತುಂ;

ನ ಮಚ್ಚುನೋ ನಿಜ್ಝಪನಂ ಕರೋನ್ತಿ, ತಂ ಮೇ ಮತೀ ಹೋತಿ ಚರಾಮಿ ಧಮ್ಮಂ.

೩೭೮. ನ ಖತ್ತಿಯೋತಿ ನ ಚ ಬ್ರಾಹ್ಮಣೋತಿ, ನ ಅಡ್ಢಕಾ ಬಲವಾ ತೇಜವಾಪಿ;

ನ ಮಚ್ಚುರಾಜಸ್ಸ ಅಪೇಕ್ಖಮತ್ಥಿ, ತಂ ಮೇ ಮತೀ ಹೋತಿ ಚರಾಮಿ ಧಮ್ಮಂ.

೩೭೯. ಸೀಹಾ ಚ ಬ್ಯಗ್ಘಾ ಚ ಅಥೋಪಿ ದೀಪಿಯೋ, ಪಸಯ್ಹ ಖಾದನ್ತಿ ವಿಪ್ಫನ್ದಮಾನಂ;

ನ ಮಚ್ಚುನೋ ಖಾದಿತುಮುಸ್ಸಹನ್ತಿ, ತಂ ಮೇ ಮತೀ ಹೋತಿ ಚರಾಮಿ ಧಮ್ಮಂ.

೩೮೦. ಮಾಯಾಕಾರಾ ರಙ್ಗಮಜ್ಝೇ ಕರೋನ್ತಾ, ಮೋಹೇನ್ತಿ ಚಕ್ಖೂನಿ ಜನಸ್ಸ ತಾವದೇ;

ನ ಮಚ್ಚುನೋ ಮೋಹಯಿತುಸ್ಸಹನ್ತಿ, ತಂ ಮೇ ಮತೀ ಹೋತಿ ಚರಾಮಿ ಧಮ್ಮಂ.

೩೮೧. ಆಸೀವಿಸಾ ಕುಪಿತಾ ಉಗ್ಗತೇಜಾ, ಡಂಸನ್ತಿ ಮಾರೇನ್ತಿಪಿ ತೇ ಮನುಸ್ಸೇ;

ನ ಮಚ್ಚುನೋ ಡಂಸಿತುಮುಸ್ಸಹನ್ತಿ, ತಂ ಮೇ ಮತೀ ಹೋತಿ ಚರಾಮಿ ಧಮ್ಮಂ.

೩೮೨. ಆಸೀವಿಸಾ ಕುಪಿತಾ ಯಂ ಡಂಸನ್ತಿ, ತಿಕಿಚ್ಛಕಾ ತೇಸ ವಿಸಂ ಹನನ್ತಿ;

ನ ಮಚ್ಚುನೋ ದಟ್ಠವಿಸಂ [ದಟ್ಠಸ್ಸ ವಿಸಂ (ಕ.)] ಹನನ್ತಿ, ತಂ ಮೇ ಮತೀ ಹೋತಿ ಚರಾಮಿ ಧಮ್ಮಂ.

೩೮೩. ಧಮ್ಮನ್ತರೀ ವೇತ್ತರಣೀ [ವೇತರಣೀ (ಸೀ. ಪೀ.)] ಚ ಭೋಜೋ, ವಿಸಾನಿ ಹನ್ತ್ವಾನ ಭುಜಙ್ಗಮಾನಂ;

ಸುಯ್ಯನ್ತಿ ತೇ ಕಾಲಕತಾ ತಥೇವ, ತಂ ಮೇ ಮತೀ ಹೋತಿ ಚರಾಮಿ ಧಮ್ಮಂ.

೩೮೪. ವಿಜ್ಜಾಧರಾ ಘೋರಮಧೀಯಮಾನಾ, ಅದಸ್ಸನಂ ಓಸಧೇಹಿ ವಜನ್ತಿ;

ನ ಮಚ್ಚುರಾಜಸ್ಸ ವಜನ್ತದಸ್ಸನಂ [ವಜನ್ತಿ ಅದಸ್ಸನಂ (ಸ್ಯಾ. ಕ.)], ತಂ ಮೇ ಮತೀ ಹೋತಿ ಚರಾಮಿ ಧಮ್ಮಂ.

೩೮೫. ಧಮ್ಮೋ ಹವೇ ರಕ್ಖತಿ ಧಮ್ಮಚಾರಿಂ, ಧಮ್ಮೋ ಸುಚಿಣ್ಣೋ ಸುಖಮಾವಹಾತಿ;

ಏಸಾನಿಸಂಸೋ ಧಮ್ಮೇ ಸುಚಿಣ್ಣೇ, ನ ದುಗ್ಗತಿಂ ಗಚ್ಛತಿ ಧಮ್ಮಚಾರೀ.

೩೮೬. ನ ಹಿ ಧಮ್ಮೋ ಅಧಮ್ಮೋ ಚ, ಉಭೋ ಸಮವಿಪಾಕಿನೋ;

ಅಧಮ್ಮೋ ನಿರಯಂ ನೇತಿ, ಧಮ್ಮೋ ಪಾಪೇತಿ ಸುಗ್ಗತಿನ್ತಿ.

ಅಯೋಘರಜಾತಕಂ ಚುದ್ದಸಮಂ.

ತಸ್ಸುದ್ದಾನಂ –

ಮಾತಙ್ಗ ಸಮ್ಭೂತ ಸಿವಿ ಸಿರಿಮನ್ತೋ, ರೋಹಣ ಹಂಸ ಸತ್ತಿಗುಮ್ಬೋ ಭಲ್ಲಾತಿಯ;

ಸೋಮನಸ್ಸ ಚಮ್ಪೇಯ್ಯ ಬ್ರಹ್ಮ ಪಞ್ಚ-ಪಣ್ಡಿತ ಚಿರಸ್ಸಂವತ ಅಯೋಘರಾತಿ.

ವೀಸತಿನಿಪಾತಂ ನಿಟ್ಠಿತಂ.