೧೫. ವೀಸತಿನಿಪಾತೋ

೪೯೭. ಮಾತಙ್ಗಜಾತಕಂ (೧)

೧. ಕುತೋ ನು ಆಗಚ್ಛಸಿ ದುಮ್ಮವಾಸೀ [ರುಮ್ಮವಾಸೀ (ಸೀ. ಪೀ.)], ಓತಲ್ಲಕೋ ಪಂಸುಪಿಸಾಚಕೋವ;

ಸಙ್ಕಾರಚೋಳಂ ಪಟಿಮುಞ್ಚ [ಪಟಿಮುಚ್ಚ (ಸೀ. ಪೀ.)] ಕಣ್ಠೇ, ಕೋ ರೇ ತುವಂ ಹೋಸಿ [ಹೋಹಿಸಿ (ಸೀ. ಪೀ.)] ಅದಕ್ಖಿಣೇಯ್ಯೋ.

೨. ಅನ್ನಂ ತವೇದಂ [ತವ ಇದಂ (ಕ. ಸೀ. ಪೀ.), ತವಯಿದಂ (ಸ್ಯಾ.)] ಪಕತಂ ಯಸಸ್ಸಿ, ತಂ ಖಜ್ಜರೇ ಭುಞ್ಜರೇ ಪಿಯ್ಯರೇ ಚ;

ಜಾನಾಸಿ ಮಂ ತ್ವಂ ಪರದತ್ತೂಪಜೀವಿಂ, ಉತ್ತಿಟ್ಠಪಿಣ್ಡಂ ಲಭತಂ ಸಪಾಕೋ.

೩. ಅನ್ನಂ ಮಮೇದಂ [ಮಮ ಇದಂ (ಕ. ಸೀ. ಪೀ.), ಮಮಯಿದಂ (ಸ್ಯಾ.)] ಪಕತಂ ಬ್ರಾಹ್ಮಣಾನಂ, ಅತ್ತತ್ಥಾಯ ಸದ್ದಹತೋ ಮಮೇದಂ [ಮಮ ಇದಂ (ಕ. ಸೀ. ಪೀ.), ಮಮಯಿದಂ (ಸ್ಯಾ.)];

ಅಪೇಹಿ ಏತ್ತೋ ಕಿಮಿಧಟ್ಠಿತೋಸಿ, ನ ಮಾದಿಸಾ ತುಯ್ಹಂ ದದನ್ತಿ ಜಮ್ಮ.

೪. ಥಲೇ ಚ ನಿನ್ನೇ ಚ ವಪನ್ತಿ ಬೀಜಂ, ಅನೂಪಖೇತ್ತೇ ಫಲಮಾಸಮಾನಾ [ಮಾಸಸಾನಾ (ಸೀ. ಪೀ.), ಮಾಸಿಂ ಸಮಾನಾ (ಸ್ಯಾ.)];

ಏತಾಯ ಸದ್ಧಾಯ ದದಾಹಿ ದಾನಂ, ಅಪ್ಪೇವ ಆರಾಧಯೇ ದಕ್ಖಿಣೇಯ್ಯೇ.

೫. ಖೇತ್ತಾನಿ ಮಯ್ಹಂ ವಿದಿತಾನಿ ಲೋಕೇ, ಯೇಸಾಹಂ ಬೀಜಾನಿ ಪತಿಟ್ಠಪೇಮಿ;

ಯೇ ಬ್ರಾಹ್ಮಣಾ ಜಾತಿಮನ್ತೂಪಪನ್ನಾ, ತಾನೀಧ ಖೇತ್ತಾನಿ ಸುಪೇಸಲಾನಿ.

೬. ಜಾತಿಮದೋ ಚ ಅತಿಮಾನಿತಾ ಚ, ಲೋಭೋ ಚ ದೋಸೋ ಚ ಮದೋ ಚ ಮೋಹೋ;

ಏತೇ ಅಗುಣಾ ಯೇಸು ಚ ಸನ್ತಿ [ಯೇಸು ವಸನ್ತಿ (ಸೀ. ಪೀ.)] ಸಬ್ಬೇ, ತಾನೀಧ ಖೇತ್ತಾನಿ ಅಪೇಸಲಾನಿ.

೭. ಜಾತಿಮದೋ ಚ ಅತಿಮಾನಿತಾ ಚ, ಲೋಭೋ ಚ ದೋಸೋ ಚ ಮದೋ ಚ ಮೋಹೋ;

ಏತೇ ಅಗುಣಾ ಯೇಸು ನ ಸನ್ತಿ ಸಬ್ಬೇ, ತಾನೀಧ ಖೇತ್ತಾನಿ ಸುಪೇಸಲಾನಿ.

೮. ಕ್ವೇತ್ಥ ಗತಾ [ಕ್ವತ್ಥ ಗತಾ (ಸ್ಯಾ.), ಕತ್ಥೇವ ಭಟ್ಠಾ (ಪೀ.)] ಉಪಜೋತಿಯೋ ಚ, ಉಪಜ್ಝಾಯೋ ಚ ಅಥವಾ ಗಣ್ಡಕುಚ್ಛಿ [ಅಣ್ಡಕುಚ್ಛಿ (ಸೀ. ಸ್ಯಾ. ಪೀ.)];

ಇಮಸ್ಸ ದಣ್ಡಞ್ಚ ವಧಞ್ಚ ದತ್ವಾ, ಗಲೇ ಗಹೇತ್ವಾ ಖಲಯಾಥ [ಗಲಯಾಥ (ಕ.)] ಜಮ್ಮಂ.

೯. ಗಿರಿಂ ನಖೇನ ಖಣಸಿ, ಅಯೋ ದನ್ತೇಹಿ [ದನ್ತೇನ (ಸೀ. ಪೀ.)] ಖಾದಸಿ;

ಜಾತವೇದಂ ಪದಹಸಿ, ಯೋ ಇಸಿಂ ಪರಿಭಾಸಸಿ.

೧೦. ಇದಂ ವತ್ವಾನ ಮಾತಙ್ಗೋ, ಇಸಿ ಸಚ್ಚಪರಕ್ಕಮೋ;

ಅನ್ತಲಿಕ್ಖಸ್ಮಿಂ ಪಕ್ಕಾಮಿ [ಪಕ್ಕಮಿ (ಕ.)], ಬ್ರಾಹ್ಮಣಾನಂ ಉದಿಕ್ಖತಂ.

೧೧. ಆವೇಲ್ಲಿತಂ [ಅವೇಠಿತಂ (ಸೀ. ಪೀ.)] ಪಿಟ್ಠಿತೋ ಉತ್ತಮಙ್ಗಂ, ಬಾಹುಂ [ಬಾಹಂ (ಸೀ. ಪೀ.)] ಪಸಾರೇತಿ ಅಕಮ್ಮನೇಯ್ಯಂ [ಅಕಮ್ಪನೇಯ್ಯಂ (ಕ.)];

ಸೇತಾನಿ ಅಕ್ಖೀನಿ ಯಥಾ ಮತಸ್ಸ, ಕೋ ಮೇ ಇಮಂ ಪುತ್ತಮಕಾಸಿ ಏವಂ.

೧೨. ಇಧಾಗಮಾ ಸಮಣೋ ದುಮ್ಮವಾಸೀ, ಓತಲ್ಲಕೋ ಪಂಸುಪಿಸಾಚಕೋವ;

ಸಙ್ಕಾರಚೋಳಂ ಪಟಿಮುಞ್ಚ ಕಣ್ಠೇ, ಸೋ ತೇ ಇಮಂ ಪುತ್ತಮಕಾಸಿ ಏವಂ.

೧೩. ಕತಮಂ ದಿಸಂ ಅಗಮಾ ಭೂರಿಪಞ್ಞೋ, ಅಕ್ಖಾಥ ಮೇ ಮಾಣವಾ ಏತಮತ್ಥಂ;

ಗನ್ತ್ವಾನ ತಂ ಪಟಿಕರೇಮು ಅಚ್ಚಯಂ, ಅಪ್ಪೇವ ನಂ ಪುತ್ತ ಲಭೇಮು ಜೀವಿತಂ.

೧೪. ವೇಹಾಯಸಂ ಅಗಮಾ ಭೂರಿಪಞ್ಞೋ, ಪಥದ್ಧುನೋ ಪನ್ನರಸೇವ ಚನ್ದೋ;

ಅಪಿ ಚಾಪಿ ಸೋ ಪುರಿಮದಿಸಂ ಅಗಚ್ಛಿ, ಸಚ್ಚಪ್ಪಟಿಞ್ಞೋ ಇಸಿ ಸಾಧುರೂಪೋ.

೧೫. ಆವೇಲ್ಲಿತಂ ಪಿಟ್ಠಿತೋ ಉತ್ತಮಙ್ಗಂ, ಬಾಹುಂ ಪಸಾರೇತಿ ಅಕಮ್ಮನೇಯ್ಯಂ;

ಸೇತಾನಿ ಅಕ್ಖೀನಿ ಯಥಾ ಮತಸ್ಸ, ಕೋ ಮೇ ಇಮಂ ಪುತ್ತಮಕಾಸಿ ಏವಂ.

೧೬. ಯಕ್ಖಾ ಹವೇ ಸನ್ತಿ ಮಹಾನುಭಾವಾ, ಅನ್ವಾಗತಾ ಇಸಯೋ ಸಾಧುರೂಪಾ;

ತೇ ದುಟ್ಠಚಿತ್ತಂ ಕುಪಿತಂ ವಿದಿತ್ವಾ, ಯಕ್ಖಾ ಹಿ ತೇ ಪುತ್ತಮಕಂಸು ಏವಂ.

೧೭. ಯಕ್ಖಾ ಚ ಮೇ ಪುತ್ತಮಕಂಸು ಏವಂ, ತ್ವಞ್ಞೇವ ಮೇ ಮಾ ಕುದ್ಧೋ [ಕುದ್ಧ (ಕ.)] ಬ್ರಹ್ಮಚಾರಿ;

ತುಮ್ಹೇವ [ತುಯ್ಹೇವ (ಕ.)] ಪಾದೇ ಸರಣಂ ಗತಾಸ್ಮಿ, ಅನ್ವಾಗತಾ ಪುತ್ತಸೋಕೇನ ಭಿಕ್ಖು.

೧೮. ತದೇವ ಹಿ ಏತರಹಿ ಚ ಮಯ್ಹಂ, ಮನೋಪದೋಸೋ ನ ಮಮತ್ಥಿ [ಮಮ ನತ್ಥಿ (ಪೀ.)] ಕೋಚಿ;

ಪುತ್ತೋ ಚ ತೇ ವೇದಮದೇನ ಮತ್ತೋ, ಅತ್ಥಂ ನ ಜಾನಾತಿ ಅಧಿಚ್ಚ ವೇದೇ.

೧೯. ಅದ್ಧಾ ಹವೇ ಭಿಕ್ಖು ಮುಹುತ್ತಕೇನ, ಸಮ್ಮುಯ್ಹತೇವ ಪುರಿಸಸ್ಸ ಸಞ್ಞಾ;

ಏಕಾಪರಾಧಂ [ಏತಾಪರಾಧಂ (ಕ.)] ಖಮ ಭೂರಿಪಞ್ಞ, ನ ಪಣ್ಡಿತಾ ಕೋಧಬಲಾ ಭವನ್ತಿ.

೨೦. ಇದಞ್ಚ ಮಯ್ಹಂ ಉತ್ತಿಟ್ಠಪಿಣ್ಡಂ, ತವ [ನತ್ಥಿ ಸೀ. ಪೀ. ಪೋತ್ಥಕೇಸು] ಮಣ್ಡಬ್ಯೋ ಭುಞ್ಜತು ಅಪ್ಪಪಞ್ಞೋ;

ಯಕ್ಖಾ ಚ ತೇ ನಂ [ತೇ ಪುತ್ತಂ (ಸ್ಯಾ.)] ನ ವಿಹೇಠಯೇಯ್ಯುಂ, ಪುತ್ತೋ ಚ ತೇ ಹೇಸ್ಸತಿ [ಹೋಹಿತಿ (ಸೀ. ಪೀ.)] ಸೋ ಅರೋಗೋ.

೨೧. ಮಣ್ಡಬ್ಯ ಬಾಲೋಸಿ ಪರಿತ್ತಪಞ್ಞೋ, ಯೋ ಪುಞ್ಞಖೇತ್ತಾನಮಕೋವಿದೋಸಿ;

ಮಹಕ್ಕಸಾವೇಸು ದದಾಸಿ ದಾನಂ, ಕಿಲಿಟ್ಠಕಮ್ಮೇಸು ಅಸಞ್ಞತೇಸು.

೨೨. ಜಟಾ ಚ ಕೇಸಾ ಅಜಿನಾ ನಿವತ್ಥಾ, ಜರೂದಪಾನಂವ ಮುಖಂ ಪರೂಳ್ಹಂ;

ಪಜಂ ಇಮಂ ಪಸ್ಸಥ ದುಮ್ಮರೂಪಂ [ರುಮ್ಮರೂಪಿಂ (ಸೀ. ಪೀ.)], ನ ಜಟಾಜಿನಂ ತಾಯತಿ ಅಪ್ಪಪಞ್ಞಂ.

೨೩. ಯೇಸಂ ರಾಗೋ ಚ ದೋಸೋ ಚ, ಅವಿಜ್ಜಾ ಚ ವಿರಾಜಿತಾ;

ಖೀಣಾಸವಾ ಅರಹನ್ತೋ, ತೇಸು ದಿನ್ನಂ ಮಹಪ್ಫಲನ್ತಿ.

ಮಾತಙ್ಗಜಾತಕಂ ಪಠಮಂ.

೪೯೮. ಚಿತ್ತಸಮ್ಭೂತಜಾತಕಂ (೨)

೨೪. ಸಬ್ಬಂ ನರಾನಂ ಸಫಲಂ ಸುಚಿಣ್ಣಂ, ನ ಕಮ್ಮುನಾ ಕಿಞ್ಚನ ಮೋಘಮತ್ಥಿ;

ಪಸ್ಸಾಮಿ ಸಮ್ಭೂತಂ ಮಹಾನುಭಾವಂ, ಸಕಮ್ಮುನಾ ಪುಞ್ಞಫಲೂಪಪನ್ನಂ.

೨೫. ಸಬ್ಬಂ ನರಾನಂ ಸಫಲಂ ಸುಚಿಣ್ಣಂ, ನ ಕಮ್ಮುನಾ ಕಿಞ್ಚನ ಮೋಘಮತ್ಥಿ;

ಕಚ್ಚಿನ್ನು ಚಿತ್ತಸ್ಸಪಿ ಏವಮೇವಂ, ಇದ್ಧೋ ಮನೋ ತಸ್ಸ ಯಥಾಪಿ ಮಯ್ಹಂ.

೨೬. ಸಬ್ಬಂ ನರಾನಂ ಸಫಲಂ ಸುಚಿಣ್ಣಂ, ನ ಕಮ್ಮುನಾ ಕಿಞ್ಚನ ಮೋಘಮತ್ಥಿ;

ಚಿತ್ತಮ್ಪಿ ಜಾನಾಹಿ [ಚಿತ್ತಂ ವಿಜಾನಾಹಿ (ಸೀ. ಪೀ.)] ತಥೇವ ದೇವ, ಇದ್ಧೋ ಮನೋ ತಸ್ಸ ಯಥಾಪಿ ತುಯ್ಹಂ.

೨೭. ಭವಂ ನು ಚಿತ್ತೋ ಸುತಮಞ್ಞತೋ ತೇ, ಉದಾಹು ತೇ ಕೋಚಿ ನಂ ಏತದಕ್ಖಾ;

ಗಾಥಾ ಸುಗೀತಾ ನ ಮಮತ್ಥಿ ಕಙ್ಖಾ, ದದಾಮಿ ತೇ ಗಾಮವರಂ ಸತಞ್ಚ.

೨೮. ನ ಚಾಹಂ ಚಿತ್ತೋ ಸುತಮಞ್ಞತೋ ಮೇ, ಇಸೀ ಚ ಮೇ ಏತಮತ್ಥಂ ಅಸಂಸಿ;

‘‘ಗನ್ತ್ವಾನ ರಞ್ಞೋ ಪಟಿಗಾಹಿ [ಪಟಿಗಾಯಿ (ಸ್ಯಾ. ಕ.), ಪಟಿಗಾಯ (?)] ಗಾಥಂ, ಅಪಿ ತೇ ವರಂ ಅತ್ತಮನೋ ದದೇಯ್ಯ’’ [ಅಪಿ ನು ತೇ ವರಂ ಅತ್ತಮನೋ ದದೇಯ್ಯ (ಸ್ಯಾ.), ಅಪಿ ನು ತೇ ಅತ್ತಮನೋ ವರಂ ದದೇ (ಕ.)].

೨೯. ಯೋಜೇನ್ತು ವೇ ರಾಜರಥೇ, ಸುಕತೇ ಚಿತ್ತಸಿಬ್ಬನೇ;

ಕಚ್ಛಂ ನಾಗಾನಂ ಬನ್ಧಥ, ಗೀವೇಯ್ಯಂ ಪಟಿಮುಞ್ಚಥ.

೩೦. ಆಹಞ್ಞನ್ತು [ಆಹಞ್ಞರೇ (ಸ್ಯಾ.)] ಭೇರಿಮುದಿಙ್ಗಸಙ್ಖೇ [ಸಙ್ಖಾ (ಸ್ಯಾ.)], ಸೀಘಾನಿ ಯಾನಾನಿ ಚ ಯೋಜಯನ್ತು;

ಅಜ್ಜೇವಹಂ ಅಸ್ಸಮಂ ತಂ ಗಮಿಸ್ಸಂ, ಯತ್ಥೇವ ದಕ್ಖಿಸ್ಸಮಿಸಿಂ ನಿಸಿನ್ನಂ.

೩೧. ಸುಲದ್ಧಲಾಭೋ ವತ ಮೇ ಅಹೋಸಿ, ಗಾಥಾ ಸುಗೀತಾ ಪರಿಸಾಯ ಮಜ್ಝೇ;

ಸ್ವಾಹಂ ಇಸಿಂ ಸೀಲವತೂಪಪನ್ನಂ, ದಿಸ್ವಾ ಪತೀತೋ ಸುಮನೋಹಮಸ್ಮಿ.

೩೨. ಆಸನಂ ಉದಕಂ ಪಜ್ಜಂ, ಪಟಿಗ್ಗಣ್ಹಾತು ನೋ ಭವಂ;

ಅಗ್ಘೇ ಭವನ್ತಂ ಪುಚ್ಛಾಮ, ಅಗ್ಘಂ ಕುರುತು ನೋ ಭವಂ.

೩೩. ರಮ್ಮಞ್ಚ ತೇ ಆವಸಥಂ ಕರೋನ್ತು, ನಾರೀಗಣೇಹಿ ಪರಿಚಾರಯಸ್ಸು;

ಕರೋಹಿ ಓಕಾಸಮನುಗ್ಗಹಾಯ, ಉಭೋಪಿ ಮಂ ಇಸ್ಸರಿಯಂ ಕರೋಮ.

೩೪. ದಿಸ್ವಾ ಫಲಂ ದುಚ್ಚರಿತಸ್ಸ ರಾಜ, ಅಥೋ ಸುಚಿಣ್ಣಸ್ಸ ಮಹಾವಿಪಾಕಂ;

ಅತ್ತಾನಮೇವ ಪಟಿಸಂಯಮಿಸ್ಸಂ, ನ ಪತ್ಥಯೇ ಪುತ್ತ [ಪುತ್ತಂ (ಸೀ. ಪೀ.)] ಪಸುಂ ಧನಂ ವಾ.

೩೫. ದಸೇವಿಮಾ ವಸ್ಸದಸಾ, ಮಚ್ಚಾನಂ ಇಧ ಜೀವಿತಂ;

ಅಪತ್ತಞ್ಞೇವ ತಂ ಓಧಿಂ, ನಳೋ ಛಿನ್ನೋವ ಸುಸ್ಸತಿ.

೩೬. ತತ್ಥ ಕಾ ನನ್ದಿ ಕಾ ಖಿಡ್ಡಾ, ಕಾ ರತೀ ಕಾ ಧನೇಸನಾ;

ಕಿಂ ಮೇ ಪುತ್ತೇಹಿ ದಾರೇಹಿ, ರಾಜ ಮುತ್ತೋಸ್ಮಿ ಬನ್ಧನಾ.

೩೭. ಸೋಹಂ ಏವಂ ಪಜಾನಾಮಿ [ಸೋ ಅಹಂ ಸುಪ್ಪಜಾನಾಮಿ (ಸೀ. ಪೀ.)], ಮಚ್ಚು ಮೇ ನಪ್ಪಮಜ್ಜತಿ;

ಅನ್ತಕೇನಾಧಿಪನ್ನಸ್ಸ, ಕಾ ರತೀ ಕಾ ಧನೇಸನಾ.

೩೮. ಜಾತಿ ನರಾನಂ ಅಧಮಾ ಜನಿನ್ದ, ಚಣ್ಡಾಲಯೋನಿ ದ್ವಿಪದಾಕನಿಟ್ಠಾ [ದಿಪದಾಕನಿಟ್ಠಾ (ಸೀ. ಪೀ.)];

ಸಕೇಹಿ ಕಮ್ಮೇಹಿ ಸುಪಾಪಕೇಹಿ, ಚಣ್ಡಾಲಗಬ್ಭೇ [ಚಣ್ಡಾಲಿಗಬ್ಭೇ (ಸ್ಯಾ.)] ಅವಸಿಮ್ಹ ಪುಬ್ಬೇ.

೩೯. ಚಣ್ಡಾಲಾಹುಮ್ಹ ಅವನ್ತೀಸು, ಮಿಗಾ ನೇರಞ್ಜರಂ ಪತಿ;

ಉಕ್ಕುಸಾ ನಮ್ಮದಾತೀರೇ [ರಮ್ಮದಾತೀರೇ (ಸ್ಯಾ. ಕ.)], ತ್ಯಜ್ಜ ಬ್ರಾಹ್ಮಣಖತ್ತಿಯಾ.

೪೦. ಉಪನೀಯತಿ ಜೀವಿತಮಪ್ಪಮಾಯು, ಜರೂಪನೀತಸ್ಸ ನ ಸನ್ತಿ ತಾಣಾ;

ಕರೋಹಿ ಪಞ್ಚಾಲ ಮಮೇತ [ಮಮೇವ (ಸ್ಯಾ. ಕ.)] ವಾಕ್ಯಂ, ಮಾಕಾಸಿ ಕಮ್ಮಾನಿ ದುಕ್ಖುದ್ರಯಾನಿ.

೪೧. ಉಪನೀಯತಿ ಜೀವಿತಮಪ್ಪಮಾಯು, ಜರೂಪನೀತಸ್ಸ ನ ಸನ್ತಿ ತಾಣಾ;

ಕರೋಹಿ ಪಞ್ಚಾಲ ಮಮೇತ ವಾಕ್ಯಂ, ಮಾಕಾಸಿ ಕಮ್ಮಾನಿ ದುಕ್ಖಪ್ಫಲಾನಿ.

೪೨. ಉಪನೀಯತಿ ಜೀವಿತಮಪ್ಪಮಾಯು, ಜರೂಪನೀತಸ್ಸ ನ ಸನ್ತಿ ತಾಣಾ;

ಕರೋಹಿ ಪಞ್ಚಾಲ ಮಮೇತ ವಾಕ್ಯಂ, ಮಾಕಾಸಿ ಕಮ್ಮಾನಿ ರಜಸ್ಸಿರಾನಿ.

೪೩. ಉಪನೀಯತಿ ಜೀವಿತಮಪ್ಪಮಾಯು, ವಣ್ಣಂ ಜರಾ ಹನ್ತಿ ನರಸ್ಸ ಜಿಯ್ಯತೋ;

ಕರೋಹಿ ಪಞ್ಚಾಲ ಮಮೇತ ವಾಕ್ಯಂ, ಮಾಕಾಸಿ ಕಮ್ಮಂ ನಿರಯೂಪಪತ್ತಿಯಾ.

೪೪. ಅದ್ಧಾ ಹಿ ಸಚ್ಚಂ ವಚನಂ ತವೇತಂ, ಯಥಾ ಇಸೀ ಭಾಸಸಿ ಏವಮೇತಂ;

ಕಾಮಾ ಚ ಮೇ ಸನ್ತಿ ಅನಪ್ಪರೂಪಾ, ತೇ ದುಚ್ಚಜಾ ಮಾದಿಸಕೇನ ಭಿಕ್ಖು.

೪೫. ನಾಗೋ ಯಥಾ ಪಙ್ಕಮಜ್ಝೇ ಬ್ಯಸನ್ನೋ, ಪಸ್ಸಂ ಥಲಂ ನಾಭಿಸಮ್ಭೋತಿ ಗನ್ತುಂ;

ಏವಮ್ಪಹಂ [ಏವಮಹಂ (ಸ್ಯಾ.)] ಕಾಮಪಙ್ಕೇ ಬ್ಯಸನ್ನೋ, ನ ಭಿಕ್ಖುನೋ ಮಗ್ಗಮನುಬ್ಬಜಾಮಿ.

೪೬. ಯಥಾಪಿ ಮಾತಾ ಚ ಪಿತಾ ಚ ಪುತ್ತಂ, ಅನುಸಾಸರೇ ಕಿನ್ತಿ ಸುಖೀ ಭವೇಯ್ಯ;

ಏವಮ್ಪಿ ಮಂ ತ್ವಂ ಅನುಸಾಸ ಭನ್ತೇ, ಯಥಾ ಚಿರಂ [ಯಮಾಚರಂ (ಸೀ. ಪೀ. ಕ. ಅಟ್ಠ.)] ಪೇಚ್ಚ ಸುಖೀ ಭವೇಯ್ಯಂ.

೪೭. ನೋ ಚೇ ತುವಂ ಉಸ್ಸಹಸೇ ಜನಿನ್ದ, ಕಾಮೇ ಇಮೇ ಮಾನುಸಕೇ ಪಹಾತುಂ;

ಧಮ್ಮಿಂ [ಧಮ್ಮಂ (ಸೀ. ಪೀ.)] ಬಲಿಂ ಪಟ್ಠಪಯಸ್ಸು ರಾಜ, ಅಧಮ್ಮಕಾರೋ ತವ [ಅಧಮ್ಮಕಾರೋ ಚ ತೇ (ಸೀ. ಸ್ಯಾ. ಪೀ.)] ಮಾಹು ರಟ್ಠೇ.

೪೮. ದೂತಾ ವಿಧಾವನ್ತು ದಿಸಾ ಚತಸ್ಸೋ, ನಿಮನ್ತಕಾ ಸಮಣಬ್ರಾಹ್ಮಣಾನಂ;

ತೇ ಅನ್ನಪಾನೇನ ಉಪಟ್ಠಹಸ್ಸು, ವತ್ಥೇನ ಸೇನಾಸನಪಚ್ಚಯೇನ ಚ.

೪೯. ಅನ್ನೇನ ಪಾನೇನ ಪಸನ್ನಚಿತ್ತೋ, ಸನ್ತಪ್ಪಯ ಸಮಣಬ್ರಾಹ್ಮಣೇ ಚ;

ದತ್ವಾ ಚ ಭುತ್ವಾ ಚ ಯಥಾನುಭಾವಂ, ಅನಿನ್ದಿತೋ ಸಗ್ಗಮುಪೇಹಿ [ಮುಪೇತಿ (ಪೀ. ಕ.)] ಠಾನಂ.

೫೦. ಸಚೇ ಚ ತಂ ರಾಜ ಮದೋ ಸಹೇಯ್ಯ, ನಾರೀಗಣೇಹಿ ಪರಿಚಾರಯನ್ತಂ;

ಇಮಮೇವ ಗಾಥಂ ಮನಸೀ ಕರೋಹಿ, ಭಾಸೇಸಿ [ಭಾಸೇಹಿ (ಸ್ಯಾ. ಪೀ. ಕ.)] ಚೇನಂ ಪರಿಸಾಯ ಮಜ್ಝೇ.

೫೧. ಅಬ್ಭೋಕಾಸಸಯೋ ಜನ್ತು, ವಜನ್ತ್ಯಾ ಖೀರಪಾಯಿತೋ;

ಪರಿಕಿಣ್ಣೋ ಸುವಾನೇಹಿ [ಸುಪಿನೇಹಿ (ಸೀ. ಪೀ.)], ಸ್ವಾಜ್ಜ ರಾಜಾತಿ ವುಚ್ಚತೀತಿ.

ಚಿತ್ತಸಮ್ಭೂತಜಾತಕಂ ದುತಿಯಂ.

೪೯೯. ಸಿವಿಜಾತಕಂ (೩)

೫೨. ದೂರೇ ಅಪಸ್ಸಂ ಥೇರೋವ, ಚಕ್ಖುಂ ಯಾಚಿತುಮಾಗತೋ;

ಏಕನೇತ್ತಾ ಭವಿಸ್ಸಾಮ, ಚಕ್ಖುಂ ಮೇ ದೇಹಿ ಯಾಚಿತೋ.

೫೩. ಕೇನಾನುಸಿಟ್ಠೋ ಇಧ ಮಾಗತೋಸಿ, ವನಿಬ್ಬಕ [ವಣಿಬ್ಬಕ (ಸೀ.)] ಚಕ್ಖುಪಥಾನಿ ಯಾಚಿತುಂ;

ಸುದುಚ್ಚಜಂ ಯಾಚಸಿ ಉತ್ತಮಙ್ಗಂ, ಯಮಾಹು ನೇತ್ತಂ ಪುರಿಸೇನ ದುಚ್ಚಜಂ.

೫೪. ಯಮಾಹು ದೇವೇಸು ಸುಜಮ್ಪತೀತಿ, ಮಘವಾತಿ ನಂ ಆಹು ಮನುಸ್ಸಲೋಕೇ;

ತೇನಾನುಸಿಟ್ಠೋ ಇಧ ಮಾಗತೋಸ್ಮಿ, ವನಿಬ್ಬಕೋ ಚಕ್ಖುಪಥಾನಿ ಯಾಚಿತುಂ.

೫೫. ವನಿಬ್ಬತೋ [ವನಿಬ್ಬಕೋ (ಸ್ಯಾ. ಪೀ.)] ಮಯ್ಹ ವನಿಂ [ವನಂ (ಕ.), ವಣಿಂ (ಸೀ. ಸ್ಯಾ. ಪೀ.)] ಅನುತ್ತರಂ, ದದಾಹಿ ತೇ ಚಕ್ಖುಪಥಾನಿ ಯಾಚಿತೋ;

ದದಾಹಿ ಮೇ ಚಕ್ಖುಪಥಂ ಅನುತ್ತರಂ, ಯಮಾಹು ನೇತ್ತಂ ಪುರಿಸೇನ ದುಚ್ಚಜಂ.

೫೬. ಯೇನ ಅತ್ಥೇನ ಆಗಚ್ಛಿ [ಆಗಞ್ಛಿ (ಸೀ. ಪೀ.)], ಯಮತ್ಥಮಭಿಪತ್ಥಯಂ;

ತೇ ತೇ ಇಜ್ಝನ್ತು ಸಙ್ಕಪ್ಪಾ, ಲಭ ಚಕ್ಖೂನಿ ಬ್ರಾಹ್ಮಣ.

೫೭. ಏಕಂ ತೇ ಯಾಚಮಾನಸ್ಸ, ಉಭಯಾನಿ ದದಾಮಹಂ;

ಸ ಚಕ್ಖುಮಾ ಗಚ್ಛ ಜನಸ್ಸ ಪೇಕ್ಖತೋ, ಯದಿಚ್ಛಸೇ ತ್ವಂ ತದತೇ ಸಮಿಜ್ಝತು.

೫೮. ಮಾ ನೋ ದೇವ ಅದಾ ಚಕ್ಖುಂ, ಮಾ ನೋ ಸಬ್ಬೇ ಪರಾಕರಿ [ಪರಕ್ಕರಿ (ಸ್ಯಾ. ಕ. ಅಟ್ಠ.), ಪರಿಕ್ಕರಿ (ಕ.) ಪರಿ + ಆ + ಕರಿ = ಪರಾಕರಿ];

ಧನಂ ದೇಹಿ ಮಹಾರಾಜ, ಮುತ್ತಾ ವೇಳುರಿಯಾ ಬಹೂ.

೫೯. ಯುತ್ತೇ ದೇವ ರಥೇ ದೇಹಿ, ಆಜಾನೀಯೇ ಚಲಙ್ಕತೇ;

ನಾಗೇ ದೇಹಿ ಮಹಾರಾಜ, ಹೇಮಕಪ್ಪನವಾಸಸೇ.

೬೦. ಯಥಾ ತಂ ಸಿವಯೋ [ಸೀವಿಯೋ (ಸ್ಯಾ.)] ಸಬ್ಬೇ, ಸಯೋಗ್ಗಾ ಸರಥಾ ಸದಾ;

ಸಮನ್ತಾ ಪರಿಕಿರೇಯ್ಯುಂ [ಪರಿಕರೇಯ್ಯುಂ (ಸ್ಯಾ. ಪೀ.)], ಏವಂ ದೇಹಿ ರಥೇಸಭ.

೬೧. ಯೋ ವೇ ದಸ್ಸನ್ತಿ ವತ್ವಾನ, ಅದಾನೇ ಕುರುತೇ ಮನೋ;

ಭೂಮ್ಯಂ [ಭೂಮ್ಯಾ (ಸೀ. ಪೀ.)] ಸೋ ಪತಿತಂ ಪಾಸಂ, ಗೀವಾಯಂ ಪಟಿಮುಞ್ಚತಿ.

೬೨. ಯೋ ವೇ ದಸ್ಸನ್ತಿ ವತ್ವಾನ, ಅದಾನೇ ಕುರುತೇ ಮನೋ;

ಪಾಪಾ ಪಾಪತರೋ ಹೋತಿ, ಸಮ್ಪತ್ತೋ ಯಮಸಾಧನಂ.

೬೩. ಯಞ್ಹಿ ಯಾಚೇ ತಞ್ಹಿ ದದೇ, ಯಂ ನ ಯಾಚೇ ನ ತಂ ದದೇ;

ಸ್ವಾಹಂ ತಮೇವ ದಸ್ಸಾಮಿ, ಯಂ ಮಂ ಯಾಚತಿ ಬ್ರಾಹ್ಮಣೋ.

೬೪. ಆಯುಂ ನು ವಣ್ಣಂ ನು ಸುಖಂ ಬಲಂ ನು, ಕಿಂ ಪತ್ಥಯಾನೋ ನು ಜನಿನ್ದ ದೇಸಿ;

ಕಥಞ್ಹಿ ರಾಜಾ ಸಿವಿನಂ ಅನುತ್ತರೋ, ಚಕ್ಖೂನಿ ದಜ್ಜಾ ಪರಲೋಕಹೇತು.

೬೫. ನ ವಾಹಮೇತಂ ಯಸಸಾ ದದಾಮಿ, ನ ಪುತ್ತಮಿಚ್ಛೇ ನ ಧನಂ ನ ರಟ್ಠಂ;

ಸತಞ್ಚ ಧಮ್ಮೋ ಚರಿತೋ ಪುರಾಣೋ, ಇಚ್ಚೇವ ದಾನೇ ರಮತೇ ಮನೋ ಮಮ [ಮಮಂ (ಸೀ. ಪೀ.)].

೬೬. ಸಖಾ ಚ ಮಿತ್ತೋ ಚ ಮಮಾಸಿ ಸೀವಿಕ [ಸೀವಕ (ಸೀ. ಪೀ.)], ಸುಸಿಕ್ಖಿತೋ ಸಾಧು ಕರೋಹಿ ಮೇ ವಚೋ;

ಉದ್ಧರಿತ್ವಾ [ಉದ್ಧತ್ವ (ಸೀ.), ಲದ್ಧ ತ್ವಂ (ಪೀ.)] ಚಕ್ಖೂನಿ ಮಮಂ ಜಿಗೀಸತೋ, ಹತ್ಥೇಸು ಠಪೇಹಿ [ಆವೇಸಿ (ಸೀ.)] ವನಿಬ್ಬಕಸ್ಸ.

೬೭. ಚೋದಿತೋ ಸಿವಿರಾಜೇನ, ಸಿವಿಕೋ ವಚನಙ್ಕರೋ;

ರಞ್ಞೋ ಚಕ್ಖೂನುದ್ಧರಿತ್ವಾ [ಚಕ್ಖೂನಿ ಉದ್ಧತ್ವಾ (ಸೀ. ಪೀ.)], ಬ್ರಾಹ್ಮಣಸ್ಸೂಪನಾಮಯಿ;

ಸಚಕ್ಖು ಬ್ರಾಹ್ಮಣೋ ಆಸಿ, ಅನ್ಧೋ ರಾಜಾ ಉಪಾವಿಸಿ.

೬೮. ತತೋ ಸೋ ಕತಿಪಾಹಸ್ಸ, ಉಪರೂಳ್ಹೇಸು ಚಕ್ಖುಸು;

ಸೂತಂ ಆಮನ್ತಯೀ ರಾಜಾ, ಸಿವೀನಂ ರಟ್ಠವಡ್ಢನೋ.

೬೯. ಯೋಜೇಹಿ ಸಾರಥಿ ಯಾನಂ, ಯುತ್ತಞ್ಚ ಪಟಿವೇದಯ;

ಉಯ್ಯಾನಭೂಮಿಂ ಗಚ್ಛಾಮ, ಪೋಕ್ಖರಞ್ಞೋ ವನಾನಿ ಚ.

೭೦. ಸೋ ಚ ಪೋಕ್ಖರಣೀತೀರೇ [ಪೋಕ್ಖರಣಿಯಾ ತೀರೇ (ಸೀ. ಪೀ.)], ಪಲ್ಲಙ್ಕೇನ ಉಪಾವಿಸಿ;

ತಸ್ಸ ಸಕ್ಕೋ ಪಾತುರಹು, ದೇವರಾಜಾ ಸುಜಮ್ಪತಿ.

೭೧. ಸಕ್ಕೋಹಮಸ್ಮಿ ದೇವಿನ್ದೋ, ಆಗತೋಸ್ಮಿ ತವನ್ತಿಕೇ;

ವರಂ ವರಸ್ಸು ರಾಜೀಸಿ, ಯಂ ಕಿಞ್ಚಿ ಮನಸಿಚ್ಛಸಿ.

೭೨. ಪಹೂತಂ ಮೇ ಧನಂ ಸಕ್ಕ, ಬಲಂ ಕೋಸೋ ಚನಪ್ಪಕೋ;