೫೦೮. ಪಞ್ಚಪಣ್ಡಿತಜಾತಕಂ (೧೨)

೩೧೫. ಪಞ್ಚ ಪಣ್ಡಿತಾ ಸಮಾಗತಾತ್ಥ, ಪಞ್ಹಾ ಮೇ ಪಟಿಭಾತಿ ತಂ ಸುಣಾಥ;

ನಿನ್ದಿಯಮತ್ಥಂ ಪಸಂಸಿಯಂ ವಾ, ಕಸ್ಸೇವಾವಿಕರೇಯ್ಯ [ಕಸ್ಸ ವಾವೀಕರೇಯ್ಯ (ಕ.)] ಗುಯ್ಹಮತ್ಥಂ.

೩೧೬. ತ್ವಂ ಆವಿಕರೋಹಿ ಭೂಮಿಪಾಲ, ಭತ್ತಾ ಭಾರಸಹೋ ತುವಂ ವದೇ ತಂ;

ತವ ಛನ್ದರುಚೀನಿ [ಛನ್ದಞ್ಚ ರುಚಿಞ್ಚ (ಸೀ. ಪೀ.)] ಸಮ್ಮಸಿತ್ವಾ, ಅಥ ವಕ್ಖನ್ತಿ ಜನಿನ್ದ ಪಞ್ಚ ಧೀರಾ.

೩೧೭. ಯಾ ಸೀಲವತೀ ಅನಞ್ಞಥೇಯ್ಯಾ [ಅನಞ್ಞಧೇಯ್ಯಾ (ಸೀ. ಪೀ.)], ಭತ್ತುಚ್ಛನ್ದವಸಾನುಗಾ (ಪಿಯಾ) [( ) ನತ್ಥಿ ಸೀ. ಪೀ. ಪೋತ್ಥಕೇಸು] ಮನಾಪಾ;

ನಿನ್ದಿಯಮತ್ಥಂ ಪಸಂಸಿಯಂ ವಾ, ಭರಿಯಾಯಾವಿಕರೇಯ್ಯ [ಭರಿಯಾಯ ವಾವೀಕರೇಯ್ಯ (ಕ.)] ಗುಯ್ಹಮತ್ಥಂ.

೩೧೮. ಯೋ ಕಿಚ್ಛಗತಸ್ಸ ಆತುರಸ್ಸ, ಸರಣಂ ಹೋತಿ ಗತೀ ಪರಾಯನಞ್ಚ;

ನಿನ್ದಿಯಮತ್ಥಂ ಪಸಂಸಿಯಂ ವಾ, ಸಖಿನೋ ವಾವಿಕರೇಯ್ಯ ಗುಯ್ಹಮತ್ಥಂ.

೩೧೯. ಜೇಟ್ಠೋ [ಯೋ ಜೇಟ್ಠೋ (ಸ್ಯಾ.)] ಅಥ ಮಜ್ಝಿಮೋ ಕನಿಟ್ಠೋ, ಯೋ [ಸೋ (ಸೀ. ಸ್ಯಾ. ಪೀ.)] ಚೇ ಸೀಲಸಮಾಹಿತೋ ಠಿತತ್ತೋ;

ನಿನ್ದಿಯಮತ್ಥಂ ಪಸಂಸಿಯಂ ವಾ, ಭಾತು ವಾವೀಕರೇಯ್ಯ ಗುಯ್ಹಮತ್ಥಂ.

೩೨೦. ಯೋ ವೇ ಪಿತುಹದಯಸ್ಸ ಪದ್ಧಗೂ [ಪತ್ಥಗೂ (ಸ್ಯಾ.), ಪತ್ತಗೂ (ಕ.)], ಅನುಜಾತೋ ಪಿತರಂ ಅನೋಮಪಞ್ಞೋ;

ನಿನ್ದಿಯಮತ್ಥಂ ಪಸಂಸಿಯಂ ವಾ, ಪುತ್ತಸ್ಸಾವಿಕರೇಯ್ಯ [ಪುತ್ತಸ್ಸ ವಾವೀಕರೇಯ್ಯ (ಕ.)] ಗುಯ್ಹಮತ್ಥಂ.

೩೨೧. ಮಾತಾ ದ್ವಿಪದಾಜನಿನ್ದಸೇಟ್ಠ, ಯಾ ನಂ [ಯೋ ತಂ (ಸೀ. ಪೀ.)] ಪೋಸೇತಿ ಛನ್ದಸಾ ಪಿಯೇನ;

ನಿನ್ದಿಯಮತ್ಥಂ ಪಸಂಸಿಯಂ ವಾ, ಮಾತುಯಾವೀಕರೇಯ್ಯ [ಮಾತುಯಾ ವಾವೀಕರೇಯ್ಯ (ಕ.)] ಗುಯ್ಹಮತ್ಥಂ.

೩೨೨. ಗುಯ್ಹಸ್ಸ ಹಿ ಗುಯ್ಹಮೇವ ಸಾಧು, ನ ಹಿ ಗುಯ್ಹಸ್ಸ ಪಸತ್ಥಮಾವಿಕಮ್ಮಂ;

ಅನಿಪ್ಫನ್ನತಾ [ಅನಿಪ್ಫಾದಾಯ (ಸೀ. ಪೀ.), ಅನಿಪ್ಫನ್ನತಾಯ (ಸ್ಯಾ.), ಆ ನಿಪ್ಫಾದಾ (?)] ಸಹೇಯ್ಯ ಧೀರೋ, ನಿಪ್ಫನ್ನೋವ [ನಿಪ್ಫನ್ನತ್ಥೋ (ಸೀ. ಪೀ.), ನಿಪ್ಫನ್ನತ್ಥೋವ (ಸ್ಯಾ.)] ಯಥಾಸುಖಂ ಭಣೇಯ್ಯ.

೩೨೩. ಕಿಂ ತ್ವಂ ವಿಮನೋಸಿ ರಾಜಸೇಟ್ಠ, ದ್ವಿಪದಜನಿನ್ದ [ದಿಪದಿನ್ದ (ಸೀ. ಸ್ಯಾ. ಪೀ.)] ವಚನಂ ಸುಣೋಮ ಮೇತಂ [ನೇತಂ (ಸೀ. ಪೀ.), ತೇತಂ (ಸ್ಯಾ.)];

ಕಿಂ ಚಿನ್ತಯಮಾನೋ ದುಮ್ಮನೋಸಿ, ನೂನ ದೇವ ಅಪರಾಧೋ ಅತ್ಥಿ ಮಯ್ಹಂ.

೩೨೪. ‘‘ಪಣ್ಹೇ [ಪಞ್ಞೋ (ಸೀ. ಪೀ.), ಪಞ್ಹೇ (ಸ್ಯಾ.), ಪನ್ಹೇ (ಕ.)] ವಜ್ಝೋ ಮಹೋಸಧೋ’’ತಿ, ಆಣತ್ತೋ ಮೇ ವಧಾಯ ಭೂರಿಪಞ್ಞೋ;

ತಂ ಚಿನ್ತಯಮಾನೋ ದುಮ್ಮನೋಸ್ಮಿ, ನ ಹಿ ದೇವೀ ಅಪರಾಧೋ ಅತ್ಥಿ ತುಯ್ಹಂ.

೩೨೫. ಅಭಿದೋಸಗತೋ ದಾನಿ ಏಹಿಸಿ, ಕಿಂ ಸುತ್ವಾ ಕಿಂ ಸಙ್ಕತೇ ಮನೋ ತೇ;

ಕೋ ತೇ ಕಿಮವೋಚ ಭೂರಿಪಞ್ಞ, ಇಙ್ಘ ವಚನಂ ಸುಣೋಮ ಬ್ರೂಹಿ ಮೇತಂ.

೩೨೬. ‘‘ಪಣ್ಹೇ ವಜ್ಝೋ ಮಹೋಸಧೋ’’ತಿ, ಯದಿ ತೇ ಮನ್ತಯಿತಂ ಜನಿನ್ದ ದೋಸಂ;

ಭರಿಯಾಯ ರಹೋಗತೋ ಅಸಂಸಿ, ಗುಯ್ಹಂ ಪಾತುಕತಂ ಸುತಂ ಮಮೇತಂ.

೩೨೭. ಯಂ ಸಾಲವನಸ್ಮಿಂ ಸೇನಕೋ, ಪಾಪಕಮ್ಮಂ ಅಕಾಸಿ ಅಸಬ್ಭಿರೂಪಂ;

ಸಖಿನೋವ ರಹೋಗತೋ ಅಸಂಸಿ, ಗುಯ್ಹಂ ಪಾತುಕತಂ ಸುತಂ ಮಮೇತಂ.

೩೨೮. ಪುಕ್ಕುಸ [ಪಕ್ಕುಸ (ಕ.) ಜಾ. ೧.೭.೪೧ ಪಣ್ಣಜಾತಕೇ ಪಸ್ಸಿತಬ್ಬಂ] ಪುರಿಸಸ್ಸ ತೇ ಜನಿನ್ದ, ಉಪ್ಪನ್ನೋ ರೋಗೋ ಅರಾಜಯುತ್ತೋ;

ಭಾತುಞ್ಚ [ಭಾತುಚ್ಚ (ಸೀ. ಪೀ.), ಭಾತುವ (ಸ್ಯಾ.)] ರಹೋಗತೋ ಅಸಂಸಿ, ಗುಯ್ಹಂ ಪಾತುಕತಂ ಸುತಂ ಮಮೇತಂ.

೩೨೯. ಆಬಾಧೋಯಂ ಅಸಬ್ಭಿರೂಪೋ, ಕಾಮಿನ್ದೋ [ಕಾವಿನ್ದೋ (ಸೀ. ಪೀ.)] ನರದೇವೇನ ಫುಟ್ಠೋ;

ಪುತ್ತಸ್ಸ ರಹೋಗತೋ ಅಸಂಸಿ, ಗುಯ್ಹಂ ಪಾತುಕತಂ ಸುತಂ ಮಮೇತಂ.

೩೩೦. ಅಟ್ಠವಙ್ಕಂ ಮಣಿರತನಂ ಉಳಾರಂ, ಸಕ್ಕೋ ತೇ ಅದದಾ ಪಿತಾಮಹಸ್ಸ;

ದೇವಿನ್ದಸ್ಸ ಗತಂ ತದಜ್ಜ ಹತ್ಥಂ [ದೇವಿನ್ದಸ್ಸ ತದಜ್ಜ ಹತ್ಥಗತಂ (ಕ.)], ಮಾತುಞ್ಚ ರಹೋಗತೋ ಅಸಂಸಿ;

ಗುಯ್ಹಂ ಪಾತುಕತಂ ಸುತಂ ಮಮೇತಂ.

೩೩೧. ಗುಯ್ಹಸ್ಸ ಹಿ ಗುಯ್ಹಮೇವ ಸಾಧು, ನ ಹಿ ಗುಯ್ಹಸ್ಸ ಪಸತ್ಥಮಾವಿಕಮ್ಮಂ;

ಅನಿಪ್ಫನ್ನತಾ ಸಹೇಯ್ಯ ಧೀರೋ, ನಿಪ್ಫನ್ನೋವ ಯಥಾಸುಖಂ ಭಣೇಯ್ಯ.

೩೩೨. ನ ಗುಯ್ಹಮತ್ಥಂ ವಿವರೇಯ್ಯ, ರಕ್ಖೇಯ್ಯ ನಂ ಯಥಾ ನಿಧಿಂ;

ನ ಹಿ ಪಾತುಕತೋ ಸಾಧು, ಗುಯ್ಹೋ ಅತ್ಥೋ ಪಜಾನತಾ.

೩೩೩. ಥಿಯಾ ಗುಯ್ಹಂ ನ ಸಂಸೇಯ್ಯ, ಅಮಿತ್ತಸ್ಸ ಚ ಪಣ್ಡಿತೋ;

ಯೋ ಚಾಮಿಸೇನ ಸಂಹೀರೋ, ಹದಯತ್ಥೇನೋ ಚ ಯೋ ನರೋ.

೩೩೪. ಗುಯ್ಹಮತ್ಥಂ ಅಸಮ್ಬುದ್ಧಂ, ಸಮ್ಬೋಧಯತಿ ಯೋ ನರೋ;

ಮನ್ತಭೇದಭಯಾ ತಸ್ಸ, ದಾಸಭೂತೋ ತಿತಿಕ್ಖತಿ.

೩೩೫. ಯಾವನ್ತೋ ಪುರಿಸಸ್ಸತ್ಥಂ, ಗುಯ್ಹಂ ಜಾನನ್ತಿ ಮನ್ತಿನಂ;

ತಾವನ್ತೋ ತಸ್ಸ ಉಬ್ಬೇಗಾ, ತಸ್ಮಾ ಗುಯ್ಹಂ ನ ವಿಸ್ಸಜೇ.

೩೩೬. ವಿವಿಚ್ಚ ಭಾಸೇಯ್ಯ ದಿವಾ ರಹಸ್ಸಂ, ರತ್ತಿಂ ಗಿರಂ ನಾತಿವೇಲಂ ಪಮುಞ್ಚೇ;

ಉಪಸ್ಸುತಿಕಾ ಹಿ ಸುಣನ್ತಿ ಮನ್ತಂ, ತಸ್ಮಾ ಮನ್ತೋ ಖಿಪ್ಪಮುಪೇತಿ ಭೇದನ್ತಿ.

ಪಞ್ಚಪಣ್ಡಿತಜಾತಕಂ ದ್ವಾದಸಮಂ.