೫೦೭. ಮಹಾಪಲೋಭನಜಾತಕಂ (೧೧)

೨೮೪. ಬ್ರಹ್ಮಲೋಕಾ ಚವಿತ್ವಾನ, ದೇವಪುತ್ತೋ ಮಹಿದ್ಧಿಕೋ;

ರಞ್ಞೋ ಪುತ್ತೋ ಉದಪಾದಿ, ಸಬ್ಬಕಾಮಸಮಿದ್ಧಿಸು.

೨೮೫. ಕಾಮಾ ವಾ ಕಾಮಸಞ್ಞಾ ವಾ, ಬ್ರಹ್ಮಲೋಕೇ ನ ವಿಜ್ಜತಿ;

ಸ್ವಾಸ್ಸು [ಯ್ವಾಸ್ಸ (ಸೀ.)] ತಾಯೇವ ಸಞ್ಞಾಯ, ಕಾಮೇಹಿ ವಿಜಿಗುಚ್ಛಥ.

೨೮೬. ತಸ್ಸ ಚನ್ತೇಪುರೇ ಆಸಿ, ಝಾನಾಗಾರಂ ಸುಮಾಪಿತಂ;

ಸೋ ತತ್ಥ ಪಟಿಸಲ್ಲೀನೋ [ಪಟಿಸಲ್ಲಾನೋ (ಕ.)], ಏಕೋ ರಹಸಿ ಝಾಯಥ.

೨೮೭. ಸ ರಾಜಾ ಪರಿದೇವೇಸಿ, ಪುತ್ತಸೋಕೇನ ಅಟ್ಟಿತೋ;

ಏಕಪುತ್ತೋ ಚಯಂ ಮಯ್ಹಂ, ನ ಚ ಕಾಮಾನಿ ಭುಞ್ಜತಿ.

೨೮೮. ಕೋ ನು ಖ್ವೇತ್ಥ [ಖೇತ್ಥ (ಸೀ. ಪೀ.)] ಉಪಾಯೋ ಸೋ, ಕೋ ವಾ ಜಾನಾತಿ ಕಿಞ್ಚನಂ;

ಯೋ [ಕೋ (ಸೀ. ಪೀ.)] ಮೇ ಪುತ್ತಂ ಪಲೋಭೇಯ್ಯ, ಯಥಾ ಕಾಮಾನಿ ಪತ್ಥಯೇ.

೨೮೯. ಅಹು ಕುಮಾರೀ ತತ್ಥೇವ, ವಣ್ಣರೂಪಸಮಾಹಿತಾ;

ಕುಸಲಾ ನಚ್ಚಗೀತಸ್ಸ, ವಾದಿತೇ ಚ ಪದಕ್ಖಿಣಾ.

೨೯೦. ಸಾ ತತ್ಥ ಉಪಸಙ್ಕಮ್ಮ, ರಾಜಾನಂ ಏತದಬ್ರವಿ;

ಅಹಂ ಖೋ ನಂ ಪಲೋಭೇಯ್ಯಂ, ಸಚೇ ಭತ್ತಾ ಭವಿಸ್ಸತಿ.

೨೯೧. ತಂ ತಥಾವಾದಿನಿಂ ರಾಜಾ, ಕುಮಾರಿಂ ಏತದಬ್ರವಿ;

ತ್ವಞ್ಞೇವ ನಂ ಪಲೋಭೇಹಿ, ತವ ಭತ್ತಾ ಭವಿಸ್ಸತಿ.

೨೯೨. ಸಾ ಚ ಅನ್ತೇಪುರಂ ಗನ್ತ್ವಾ, ಬಹುಂ ಕಾಮುಪಸಂಹಿತಂ;

ಹದಯಙ್ಗಮಾ ಪೇಮನೀಯಾ, ಚಿತ್ರಾ ಗಾಥಾ ಅಭಾಸಥ.

೨೯೩. ತಸ್ಸಾ ಚ ಗಾಯಮಾನಾಯ, ಸದ್ದಂ ಸುತ್ವಾನ ನಾರಿಯಾ;

ಕಾಮಚ್ಛನ್ದಸ್ಸ ಉಪ್ಪಜ್ಜಿ, ಜನಂ ಸೋ ಪರಿಪುಚ್ಛಥ.

೨೯೪. ಕಸ್ಸೇಸೋ ಸದ್ದೋ ಕೋ ವಾ ಸೋ, ಭಣತಿ ಉಚ್ಚಾವಚಂ ಬಹುಂ;

ಹದಯಙ್ಗಮಂ ಪೇಮನೀಯಂ, ಅಹೋ [ಅಥೋ (ಸೀ. ಪೀ.)] ಕಣ್ಣಸುಖಂ ಮಮ.

೨೯೫. ಏಸಾ ಖೋ ಪಮದಾ ದೇವ, ಖಿಡ್ಡಾ ಏಸಾ ಅನಪ್ಪಿಕಾ [ಅನಪ್ಪಕಾ (ಕ.)];

ಸಚೇ ತ್ವಂ ಕಾಮೇ ಭುಞ್ಜೇಯ್ಯ, ಭಿಯ್ಯೋ ಭಿಯ್ಯೋ ಛಾದೇಯ್ಯು ತಂ.

೨೯೬. ಇಙ್ಘ ಆಗಚ್ಛತೋರೇನ [ಆಗಚ್ಛತೋರೇನಂ (ಕ.) ಆಗಚ್ಛತು + ಓರೇನ], ಅವಿದೂರಮ್ಹಿ ಗಾಯತು;

ಅಸ್ಸಮಸ್ಸ ಸಮೀಪಮ್ಹಿ, ಸನ್ತಿಕೇ ಮಯ್ಹಂ ಗಾಯತು.

೨೯೭. ತಿರೋಕುಟ್ಟಮ್ಹಿ ಗಾಯಿತ್ವಾ, ಝಾನಾಗಾರಮ್ಹಿ ಪಾವಿಸಿ;

ಬನ್ಧಿ ನಂ [ಭನ್ಧಿತುಂ (ಸ್ಯಾ. ಕ.)] ಅನುಪುಬ್ಬೇನ, ಆರಞ್ಞಮಿವ ಕುಞ್ಜರಂ.

೨೯೮. ತಸ್ಸ [ತಸ್ಸಾ (ಸ್ಯಾ.)] ಕಾಮರಸಂ ಞತ್ವಾ, ಇಸ್ಸಾಧಮ್ಮೋ ಅಜಾಯಥ;

‘‘ಅಹಮೇವ ಕಾಮೇ ಭುಞ್ಜೇಯ್ಯಂ, ಮಾ ಅಞ್ಞೋ ಪುರಿಸೋ ಅಹು’’.

೨೯೯. ತತೋ ಅಸಿಂ ಗಹೇತ್ವಾನ, ಪುರಿಸೇ ಹನ್ತುಂ ಉಪಕ್ಕಮಿ;

ಅಹಮೇವೇಕೋ ಭುಞ್ಜಿಸ್ಸಂ, ಮಾ ಅಞ್ಞೋ ಪುರಿಸೋ ಸಿಯಾ.

೩೦೦. ತತೋ ಜಾನಪದಾ ಸಬ್ಬೇ, ವಿಕ್ಕನ್ದಿಂಸು ಸಮಾಗತಾ;

ಪುತ್ತೋ ತ್ಯಾಯಂ ಮಹಾರಾಜ, ಜನಂ ಹೇಠೇತ್ಯದೂಸಕಂ.

೩೦೧. ತಞ್ಚ ರಾಜಾ ವಿವಾಹೇಸಿ [ನಿವಾಹೇಸಿ (ಸ್ಯಾ.), ವಿಹಾಹೇಸಿ (ಪೀ.)], ಸಮ್ಹಾ ರಟ್ಠಾ ಚ [ರಟ್ಠಾತೋ (ಸೀ. ಪೀ.), ರಟ್ಠತೋ (ಕ.)] ಖತ್ತಿಯೋ;

ಯಾವತಾ ವಿಜಿತಂ ಮಯ್ಹಂ, ನ ತೇ ವತ್ಥಬ್ಬ [ವತ್ತಬ್ಬ (ಸೀ. ಪೀ.)] ತಾವದೇ.

೩೦೨. ತತೋ ಸೋ ಭರಿಯಮಾದಾಯ, ಸಮುದ್ದಂ ಉಪಸಙ್ಕಮಿ;

ಪಣ್ಣಸಾಲಂ ಕರಿತ್ವಾನ, ವನಮುಞ್ಛಾಯ ಪಾವಿಸಿ.

೩೦೩. ಅಥೇತ್ಥ ಇಸಿ ಮಾಗಚ್ಛಿ, ಸಮುದ್ದಂ ಉಪರೂಪರಿ;

ಸೋ ತಸ್ಸ ಗೇಹಂ ಪಾವೇಕ್ಖಿ, ಭತ್ತಕಾಲೇ ಉಪಟ್ಠಿತೇ.

೩೦೪. ತಞ್ಚ ಭರಿಯಾ ಪಲೋಭೇಸಿ, ಪಸ್ಸ ಯಾವ ಸುದಾರುಣಂ;

ಚುತೋ ಸೋ ಬ್ರಹ್ಮಚರಿಯಮ್ಹಾ, ಇದ್ಧಿಯಾ ಪರಿಹಾಯಥ.

೩೦೫. ರಾಜಪುತ್ತೋ ಚ ಉಞ್ಛಾತೋ, ವನಮೂಲಫಲಂ ಬಹುಂ;

ಸಾಯಂ ಕಾಜೇನ [ಕಾಚೇನ (ಪೀ.)] ಆದಾಯ, ಅಸ್ಸಮಂ ಉಪಸಙ್ಕಮಿ.

೩೦೬. ಇಸೀ ಚ ಖತ್ತಿಯಂ ದಿಸ್ವಾ, ಸಮುದ್ದಂ ಉಪಸಙ್ಕಮಿ;

‘‘ವೇಹಾಯಸಂ ಗಮಿಸ್ಸ’’ನ್ತಿ, ಸೀದತೇ ಸೋ ಮಹಣ್ಣವೇ.

೩೦೭. ಖತ್ತಿಯೋ ಚ ಇಸಿಂ ದಿಸ್ವಾ, ಸೀದಮಾನಂ ಮಹಣ್ಣವೇ;

ತಸ್ಸೇವ ಅನುಕಮ್ಪಾಯ, ಇಮಾ ಗಾಥಾ ಅಭಾಸಥ.

೩೦೮. ಅಭಿಜ್ಜಮಾನೇ ವಾರಿಸ್ಮಿಂ, ಸಯಂ ಆಗಮ್ಮ ಇದ್ಧಿಯಾ;

ಮಿಸ್ಸೀಭಾವಿತ್ಥಿಯಾ ಗನ್ತ್ವಾ, ಸಂಸೀದಸಿ ಮಹಣ್ಣವೇ.

೩೦೯. ಆವಟ್ಟನೀ ಮಹಾಮಾಯಾ, ಬ್ರಹ್ಮಚರಿಯವಿಕೋಪನಾ;

ಸೀದನ್ತಿ ನಂ ವಿದಿತ್ವಾನ, ಆರಕಾ ಪರಿವಜ್ಜಯೇ.

೩೧೦. ಅನಲಾ ಮುದುಸಮ್ಭಾಸಾ, ದುಪ್ಪೂರಾ ತಾ ನದೀಸಮಾ;

ಸೀದನ್ತಿ ನಂ ವಿದಿತ್ವಾನ, ಆರಕಾ ಪರಿವಜ್ಜಯೇ.

೩೧೧. ಯಂ ಏತಾ ಉಪಸೇವನ್ತಿ, ಛನ್ದಸಾ ವಾ ಧನೇನ ವಾ;

ಜಾತವೇದೋವ ಸಂ ಠಾನಂ, ಖಿಪ್ಪಂ ಅನುದಹನ್ತಿ ನಂ.

೩೧೨. ಖತ್ತಿಯಸ್ಸ ವಚೋ ಸುತ್ವಾ, ಇಸಿಸ್ಸ ನಿಬ್ಬಿದಾ ಅಹು;

ಲದ್ಧಾ ಪೋರಾಣಕಂ ಮಗ್ಗಂ, ಗಚ್ಛತೇ ಸೋ ವಿಹಾಯಸಂ.

೩೧೩. ಖತ್ತಿಯೋ ಚ ಇಸಿಂ ದಿಸ್ವಾ, ಗಚ್ಛಮಾನಂ ವಿಹಾಯಸಂ;

ಸಂವೇಗಂ ಅಲಭೀ ಧೀರೋ, ಪಬ್ಬಜ್ಜಂ ಸಮರೋಚಯಿ.

೩೧೪. ತತೋ ಸೋ ಪಬ್ಬಜಿತ್ವಾನ, ಕಾಮರಾಗಂ ವಿರಾಜಯಿ;

ಕಾಮರಾಗಂ ವಿರಾಜೇತ್ವಾ, ಬ್ರಹ್ಮಲೋಕೂಪಗೋ ಅಹೂತಿ.

ಮಹಾಪಲೋಭನಜಾತಕಂ ಏಕಾದಸಮಂ.