೫೦೬. ಚಮ್ಪೇಯ್ಯಜಾತಕಂ (೧೦)

೨೪೦. ಕಾ ನು ವಿಜ್ಜುರಿವಾಭಾಸಿ, ಓಸಧೀ ವಿಯ ತಾರಕಾ;

ದೇವತಾ ನುಸಿ ಗನ್ಧಬ್ಬೀ, ನ ತಂ ಮಞ್ಞಾಮಿ ಮಾನುಸಿಂ [ಮಾನುಸೀ (ಸ್ಯಾ. ಕ.)].

೨೪೧. ನಮ್ಹಿ ದೇವೀ ನ ಗನ್ಧಬ್ಬೀ, ನ ಮಹಾರಾಜ ಮಾನುಸೀ;

ನಾಗಕಞ್ಞಾಸ್ಮಿ ಭದ್ದನ್ತೇ, ಅತ್ಥೇನಮ್ಹಿ ಇಧಾಗತಾ.

೨೪೨. ವಿಬ್ಭನ್ತಚಿತ್ತಾ ಕುಪಿತಿನ್ದ್ರಿಯಾಸಿ, ನೇತ್ತೇಹಿ ತೇ ವಾರಿಗಣಾ ಸವನ್ತಿ;

ಕಿಂ ತೇ ನಟ್ಠಂ ಕಿಂ ಪನ ಪತ್ಥಯಾನಾ, ಇಧಾಗತಾ ನಾರಿ ತದಿಙ್ಘ ಬ್ರೂಹಿ.

೨೪೩. ಯಮುಗ್ಗತೇಜೋ ಉರಗೋತಿ ಚಾಹು, ನಾಗೋತಿ ನಂ ಆಹು ಜನಾ ಜನಿನ್ದ;

ತಮಗ್ಗಹೀ ಪುರಿಸೋ ಜೀವಿಕತ್ಥೋ, ತಂ ಬನ್ಧನಾ ಮುಞ್ಚ ಪತೀ ಮಮೇಸೋ.

೨೪೪. ಕಥಂ ನ್ವಯಂ ಬಲವಿರಿಯೂಪಪನ್ನೋ, ಹತ್ಥತ್ತ [ಹತ್ಥತ್ಥ (ಸೀ. ಸ್ಯಾ. ಪೀ.)] ಮಾಗಚ್ಛಿ ವನಿಬ್ಬಕಸ್ಸ;

ಅಕ್ಖಾಹಿ ಮೇ ನಾಗಕಞ್ಞೇ ತಮತ್ಥಂ, ಕಥಂ ವಿಜಾನೇಮು ಗಹೀತನಾಗಂ.

೨೪೫. ನಗರಮ್ಪಿ ನಾಗೋ ಭಸ್ಮಂ ಕರೇಯ್ಯ, ತಥಾ ಹಿ ಸೋ ಬಲವಿರಿಯೂಪಪನ್ನೋ;

ಧಮ್ಮಞ್ಚ ನಾಗೋ ಅಪಚಾಯಮಾನೋ, ತಸ್ಮಾ ಪರಕ್ಕಮ್ಮ ತಪೋ ಕರೋತಿ.

೨೪೬. ಚಾತುದ್ದಸಿಂ ಪಞ್ಚದಸಿಂ [ಪನ್ನರಸಿಂ (ಸೀ. ಸ್ಯಾ. ಪೀ.)] ಚ ರಾಜ, ಚತುಪ್ಪಥೇ ಸಮ್ಮತಿ ನಾಗರಾಜಾ;

ತಮಗ್ಗಹೀ ಪುರಿಸೋ ಜೀವಿಕತ್ಥೋ, ತಂ ಬನ್ಧನಾ ಮುಞ್ಚ ಪತೀ ಮಮೇಸೋ.

೨೪೭. ಸೋಳಸಿತ್ಥಿಸಹಸ್ಸಾನಿ, ಆಮುತ್ತಮಣಿಕುಣ್ಡಲಾ;

ವಾರಿಗೇಹಸಯಾ ನಾರೀ [ನಾರಿಯೋ (ಪೀ.)], ತಾಪಿ ತಂ ಸರಣಂ ಗತಾ.

೨೪೮. ಧಮ್ಮೇನ ಮೋಚೇಹಿ ಅಸಾಹಸೇನ, ಗಾಮೇನ ನಿಕ್ಖೇನ ಗವಂ ಸತೇನ;

ಓಸ್ಸಟ್ಠಕಾಯೋ ಉರಗೋ ಚರಾತು, ಪುಞ್ಞತ್ಥಿಕೋ ಮುಞ್ಚತು ಬನ್ಧನಸ್ಮಾ.

೨೪೯. ಧಮ್ಮೇನ ಮೋಚೇಮಿ ಅಸಾಹಸೇನ, ಗಾಮೇನ ನಿಕ್ಖೇನ ಗವಂ ಸತೇನ;

ಓಸ್ಸಟ್ಠಕಾಯೋ ಉರಗೋ ಚರಾತು, ಪುಞ್ಞತ್ಥಿಕೋ ಮುಞ್ಚತು ಬನ್ಧನಸ್ಮಾ.

೨೫೦. ದಮ್ಮಿ ನಿಕ್ಖಸತಂ ಲುದ್ದ, ಥೂಲಞ್ಚ ಮಣಿಕುಣ್ಡಲಂ;

ಚತುಸ್ಸದಞ್ಚ ಪಲ್ಲಙ್ಕಂ, ಉಮಾಪುಪ್ಫಸರಿನ್ನಿಭಂ.

೨೫೧. ದ್ವೇ ಚ ಸಾದಿಸಿಯೋ ಭರಿಯಾ, ಉಸಭಞ್ಚ ಗವಂ ಸತಂ;

ಓಸ್ಸಟ್ಠಕಾಯೋ ಉರಗೋ ಚರಾತು, ಪುಞ್ಞತ್ಥಿಕೋ ಮುಞ್ಚತು ಬನ್ಧನಸ್ಮಾ.

೨೫೨. ವಿನಾಪಿ ದಾನಾ ತವ ವಚನಂ ಜನಿನ್ದ, ಮುಞ್ಚೇಮು ನಂ ಉರಗಂ ಬನ್ಧನಸ್ಮಾ;

ಓಸ್ಸಟ್ಠಕಾಯೋ ಉರಗೋ ಚರಾತು, ಪುಞ್ಞತ್ಥಿಕೋ ಮುಞ್ಚತು ಬನ್ಧನಸ್ಮಾ.

೨೫೩. ಮುತ್ತೋ ಚಮ್ಪೇಯ್ಯಕೋ ನಾಗೋ, ರಾಜಾನಂ ಏತದಬ್ರವಿ;

ನಮೋ ತೇ ಕಾಸಿರಾಜತ್ಥು, ನಮೋ ತೇ ಕಾಸಿವಡ್ಢನ;

ಅಞ್ಜಲಿಂ ತೇ ಪಗ್ಗಣ್ಹಾಮಿ, ಪಸ್ಸೇಯ್ಯಂ ಮೇ ನಿವೇಸನಂ.

೨೫೪. ಅದ್ಧಾ ಹಿ ದುಬ್ಬಿಸ್ಸಸಮೇತಮಾಹು, ಯಂ ಮಾನುಸೋ ವಿಸ್ಸಸೇ ಅಮಾನುಸಮ್ಹಿ;

ಸಚೇ ಚ ಮಂ ಯಾಚಸಿ ಏತಮತ್ಥಂ, ದಕ್ಖೇಮು ತೇ ನಾಗ ನಿವೇಸನಾನಿ.

೨೫೫. ಸಚೇಪಿ [ಸಚೇ ಹಿ (ಸೀ. ಪೀ. ಅಟ್ಠ.)] ವಾತೋ ಗಿರಿಮಾವಹೇಯ್ಯ, ಚನ್ದೋ ಚ ಸುರಿಯೋ ಚ ಛಮಾ ಪತೇಯ್ಯುಂ;

ಸಬ್ಬಾ ಚ ನಜ್ಜೋ ಪಟಿಸೋತಂ ವಜೇಯ್ಯುಂ, ನ ತ್ವೇವಹಂ ರಾಜ ಮುಸಾ ಭಣೇಯ್ಯಂ.

೨೫೬. ನಭಂ ಫಲೇಯ್ಯ ಉದಧೀಪಿ ಸುಸ್ಸೇ, ಸಂವಟ್ಟಯೇ [ಸಂವಟ್ಟೇಯಂ (ಸೀ. ಪೀ.), ಸಂವಟ್ಟೇಯ್ಯ (ಸ್ಯಾ. ಕ.)] ಭೂತಧರಾ ವಸುನ್ಧರಾ;

ಸಿಲುಚ್ಚಯೋ ಮೇರು ಸಮೂಲಮುಪ್ಪತೇ [ಮುಬ್ಬಹೇ (ಸೀ. ಸ್ಯಾ. ಪೀ. ಕ. ಅಟ್ಠ.), ಮುಟ್ಠಹೇ (ಕ.)], ನ ತ್ವೇವಹಂ ರಾಜ ಮುಸಾ ಭಣೇಯ್ಯಂ.

೨೫೭. ಅದ್ಧಾ ಹಿ ದುಬ್ಬಿಸ್ಸಸಮೇತಮಾಹು, ಯಂ ಮಾನುಸೋ ವಿಸ್ಸಸೇ ಅಮಾನುಸಮ್ಹಿ;

ಸಚೇ ಚ ಮಂ ಯಾಚಸಿ ಏತಮತ್ಥಂ, ದಕ್ಖೇಮು ತೇ ನಾಗ ನಿವೇಸನಾನಿ.

೨೫೮. ತುಮ್ಹೇ ಖೋತ್ಥ ಘೋರವಿಸಾ ಉಳಾರಾ, ಮಹಾತೇಜಾ ಖಿಪ್ಪಕೋಪೀ ಚ ಹೋಥ;

ಮಂಕಾರಣಾ [ಮಮ ಕಾರಣಾ (ಸೀ. ಸ್ಯಾ. ಪೀ.)] ಬನ್ಧನಸ್ಮಾ ಪಮುತ್ತೋ, ಅರಹಸಿ ನೋ ಜಾನಿತುಯೇ [ಜಾನಿತಾಯೇ (ಸೀ.), ಜಾನಿತವೇ (ಸ್ಯಾ.), ಜಾನಿತಯೇ (ಪೀ.)] ಕತಾನಿ.

೨೫೯. ಸೋ ಪಚ್ಚತಂ ನಿರಯೇ ಘೋರರೂಪೇ, ಮಾ ಕಾಯಿಕಂ ಸಾತಮಲತ್ಥ ಕಿಞ್ಚಿ;

ಪೇಳಾಯ ಬದ್ಧೋ ಮರಣಂ ಉಪೇತು, ಯೋ ತಾದಿಸಂ ಕಮ್ಮಕತಂ ನ ಜಾನೇ.

೨೬೦. ಸಚ್ಚಪ್ಪಟಿಞ್ಞಾ ತವಮೇಸ ಹೋತು, ಅಕ್ಕೋಧನೋ ಹೋಹಿ ಅನುಪನಾಹೀ;

ಸಬ್ಬಞ್ಚ ತೇ ನಾಗಕುಲಂ ಸುಪಣ್ಣಾ, ಅಗ್ಗಿಂವ ಗಿಮ್ಹೇಸು [ಗಿಮ್ಹಾಸು (ಸೀ. ಸ್ಯಾ. ಪೀ.)] ವಿವಜ್ಜಯನ್ತು.

೨೬೧. ಅನುಕಮ್ಪಸೀ ನಾಗಕುಲಂ ಜನಿನ್ದ, ಮಾತಾ ಯಥಾ ಸುಪ್ಪಿಯಂ ಏಕಪುತ್ತಂ;

ಅಹಞ್ಚ ತೇ ನಾಗಕುಲೇನ ಸದ್ಧಿಂ, ಕಾಹಾಮಿ ವೇಯ್ಯಾವಟಿಕಂ ಉಳಾರಂ.

೨೬೨. ಯೋಜೇನ್ತು ವೇ ರಾಜರಥೇ ಸುಚಿತ್ತೇ, ಕಮ್ಬೋಜಕೇ ಅಸ್ಸತರೇ ಸುದನ್ತೇ;

ನಾಗೇ ಚ ಯೋಜೇನ್ತು ಸುವಣ್ಣಕಪ್ಪನೇ, ದಕ್ಖೇಮು ನಾಗಸ್ಸ ನಿವೇಸನಾನಿ.

೨೬೩. ಭೇರೀ ಮುದಿಙ್ಗಾ [ಮುತಿಙ್ಗಾ (ಸೀ. ಪೀ.)] ಪಣವಾ ಚ ಸಙ್ಖಾ, ಅವಜ್ಜಯಿಂಸು ಉಗ್ಗಸೇನಸ್ಸ ರಞ್ಞೋ;

ಪಾಯಾಸಿ ರಾಜಾ ಬಹುಸೋಭಮಾನೋ, ಪುರಕ್ಖತೋ ನಾರಿಗಣಸ್ಸ ಮಜ್ಝೇ.

೨೬೪. ಸುವಣ್ಣಚಿತಕಂ ಭೂಮಿಂ, ಅದ್ದಕ್ಖಿ ಕಾಸಿವಡ್ಢನೋ;

ಸೋವಣ್ಣಮಯಪಾಸಾದೇ, ವೇಳುರಿಯಫಲಕತ್ಥತೇ.

೨೬೫. ಸ ರಾಜಾ ಪಾವಿಸಿ ಬ್ಯಮ್ಹಂ, ಚಮ್ಪೇಯ್ಯಸ್ಸ ನಿವೇಸನಂ;

ಆದಿಚ್ಚವಣ್ಣಸನ್ನಿಭಂ, ಕಂಸವಿಜ್ಜು ಪಭಸ್ಸರಂ.

೨೬೬. ನಾನಾರುಕ್ಖೇಹಿ ಸಞ್ಛನ್ನಂ, ನಾನಾಗನ್ಧಸಮೀರಿತಂ;

ಸೋ ಪಾವೇಕ್ಖಿ ಕಾಸಿರಾಜಾ, ಚಮ್ಪೇಯ್ಯಸ್ಸ ನಿವೇಸನಂ.

೨೬೭. ಪವಿಟ್ಠಸ್ಮಿಂ ಕಾಸಿರಞ್ಞೇ, ಚಮ್ಪೇಯ್ಯಸ್ಸ ನಿವೇಸನಂ;

ದಿಬ್ಬಾ ತೂರಿಯಾ ಪವಜ್ಜಿಂಸು, ನಾಗಕಞ್ಞಾ ಚ ನಚ್ಚಿಸುಂ [ನಚ್ಚಯುಂ (ಸೀ. ಪೀ. ಕ.)].

೨೬೮. ತಂ ನಾಗಕಞ್ಞಾ ಚರಿತಂ ಗಣೇನ, ಅನ್ವಾರುಹೀ ಕಾಸಿರಾಜಾ ಪಸನ್ನೋ;

ನಿಸೀದಿ ಸೋವಣ್ಣಮಯಮ್ಹಿ ಪೀಠೇ, ಸಾಪಸ್ಸಯೇ [ಸೋಪಸ್ಸಯೇ (ಕ.)] ಚನ್ದನಸಾರಲಿತ್ತೇ.

೨೬೯. ಸೋ ತತ್ಥ ಭುತ್ವಾ ಚ ಅಥೋ ರಮಿತ್ವಾ, ಚಮ್ಪೇಯ್ಯಕಂ ಕಾಸಿರಾಜಾ ಅವೋಚ;

ವಿಮಾನಸೇಟ್ಠಾನಿ ಇಮಾನಿ ತುಯ್ಹಂ, ಆದಿಚ್ಚವಣ್ಣಾನಿ ಪಭಸ್ಸರಾನಿ;

ನೇತಾದಿಸಂ ಅತ್ಥಿ ಮನುಸ್ಸಲೋಕೇ, ಕಿಂ ಪತ್ಥಯಂ [ಕಿಮತ್ಥಿಯಂ (ಸೀ. ಸ್ಯಾ. ಪೀ.)] ನಾಗ ತಪೋ ಕರೋಸಿ.

೨೭೦. ತಾ ಕಮ್ಬುಕಾಯೂರಧರಾ ಸುವತ್ಥಾ, ವಟ್ಟಙ್ಗುಲೀ ತಮ್ಬತಲೂಪಪನ್ನಾ;

ಪಗ್ಗಯ್ಹ ಪಾಯೇನ್ತಿ ಅನೋಮವಣ್ಣಾ, ನೇತಾದಿಸಂ ಅತ್ಥಿ ಮನುಸ್ಸಲೋಕೇ;

ಕಿಂ ಪತ್ಥಯಂ ನಾಗ ತಪೋ ಕರೋಸಿ.

೨೭೧. ನಜ್ಜೋ ಚ ತೇಮಾ ಪುಥುಲೋಮಮಚ್ಛಾ, ಆಟಾ [ಆದಾ (ಸ್ಯಾ.), ಅದಾ (ಪೀ.)] ಸಕುನ್ತಾಭಿರುದಾ ಸುತಿತ್ಥಾ;

ನೇತಾದಿಸಂ ಅತ್ಥಿ ಮನುಸ್ಸಲೋಕೇ, ಕಿಂ ಪತ್ಥಯಂ ನಾಗ ತಪೋ ಕರೋಸಿ.

೨೭೨. ಕೋಞ್ಚಾ ಮಯೂರಾ ದಿವಿಯಾ ಚ ಹಂಸಾ, ವಗ್ಗುಸ್ಸರಾ ಕೋಕಿಲಾ ಸಮ್ಪತನ್ತಿ;

ನೇತಾದಿಸಂ ಅತ್ಥಿ ಮನುಸ್ಸಲೋಕೇ, ಕಿಂ ಪತ್ಥಯಂ ನಾಗ ತಪೋ ಕರೋಸಿ.

೨೭೩. ಅಮ್ಬಾ ಚ ಸಾಲಾ ತಿಲಕಾ ಚ ಜಮ್ಬುಯೋ, ಉದ್ದಾಲಕಾ ಪಾಟಲಿಯೋ ಚ ಫುಲ್ಲಾ;

ನೇತಾದಿಸಂ ಅತ್ಥಿ ಮನುಸ್ಸಲೋಕೇ, ಕಿಂ ಪತ್ಥಯಂ ನಾಗ ತಪೋ ಕರೋಸಿ.

೨೭೪. ಇಮಾ ಚ ತೇ ಪೋಕ್ಖರಞ್ಞೋ ಸಮನ್ತತೋ, ದಿಬ್ಬಾ [ದಿಬ್ಯಾ (ಸ್ಯಾ.), ದಿವಿಯಾ (ಪೀ.)] ಚ ಗನ್ಧಾ ಸತತಂ ಪವಾಯನ್ತಿ;

ನೇತಾದಿಸಂ ಅತ್ಥಿ ಮನುಸ್ಸಲೋಕೇ, ಕಿಂ ಪತ್ಥಯಂ ನಾಗ ತಪೋ ಕರೋಸಿ.

೨೭೫. ನ ಪುತ್ತಹೇತು ನ ಧನಸ್ಸ ಹೇತು, ನ ಆಯುನೋ ಚಾಪಿ [ವಾಪಿ (ಸೀ. ಪೀ.)] ಜನಿನ್ದ ಹೇತು;

ಮನುಸ್ಸಯೋನಿಂ ಅಭಿಪತ್ಥಯಾನೋ, ತಸ್ಮಾ ಪರಕ್ಕಮ್ಮ ತಪೋ ಕರೋಮಿ.

೨೭೬. ತ್ವಂ ಲೋಹಿತಕ್ಖೋ ವಿಹತನ್ತರಂಸೋ, ಅಲಙ್ಕತೋ ಕಪ್ಪಿತಕೇಸಮಸ್ಸು;

ಸುರೋಸಿತೋ ಲೋಹಿತಚನ್ದನೇನ, ಗನ್ಧಬ್ಬರಾಜಾವ ದಿಸಾ ಪಭಾಸಸಿ.

೨೭೭. ದೇವಿದ್ಧಿಪತ್ತೋಸಿ ಮಹಾನುಭಾವೋ, ಸಬ್ಬೇಹಿ ಕಾಮೇಹಿ ಸಮಙ್ಗಿಭೂತೋ;

ಪುಚ್ಛಾಮಿ ತಂ ನಾಗರಾಜೇತಮತ್ಥಂ, ಸೇಯ್ಯೋ ಇತೋ ಕೇನ ಮನುಸ್ಸಲೋಕೋ.

೨೭೮. ಜನಿನ್ದ ನಾಞ್ಞತ್ರ ಮನುಸ್ಸಲೋಕಾ, ಸುದ್ಧೀ ವ ಸಂವಿಜ್ಜತಿ ಸಂಯಮೋ ವಾ;

ಅಹಞ್ಚ ಲದ್ಧಾನ ಮನುಸ್ಸಯೋನಿಂ, ಕಾಹಾಮಿ ಜಾತಿಮರಣಸ್ಸ ಅನ್ತಂ.

೨೭೯. ಅದ್ಧಾ ಹವೇ ಸೇವಿತಬ್ಬಾ ಸಪಞ್ಞಾ, ಬಹುಸ್ಸುತಾ ಯೇ ಬಹುಠಾನಚಿನ್ತಿನೋ;

ನಾರಿಯೋ ಚ ದಿಸ್ವಾನ ತುವಞ್ಚ ನಾಗ, ಕಾಹಾಮಿ ಪುಞ್ಞಾನಿ ಅನಪ್ಪಕಾನಿ.

೨೮೦. ಅದ್ಧಾ ಹವೇ ಸೇವಿತಬ್ಬಾ ಸಪಞ್ಞಾ, ಬಹುಸ್ಸುತಾ ಯೇ ಬಹುಠಾನಚಿನ್ತಿನೋ;

ನಾರಿಯೋ ಚ ದಿಸ್ವಾನ ಮಮಞ್ಚ ರಾಜ, ಕರೋಹಿ ಪುಞ್ಞಾನಿ ಅನಪ್ಪಕಾನಿ.

೨೮೧. ಇದಞ್ಚ ಮೇ ಜಾತರೂಪಂ ಪಹೂತಂ, ರಾಸೀ ಸುವಣ್ಣಸ್ಸ ಚ ತಾಲಮತ್ತಾ;

[ಇತೋ ಹರಿತ್ವಾ ಸೋವಣ್ಣಘರಾನಿ ಕಾರಯ, ರೂಪಿಯಸ್ಸ ಚ ಪಾಕಾರಂ ಕರೋನ್ತು (ಸೀ. ಸ್ಯಾ.) ಇತೋ ಹರಿತ್ವಾ ಸೋವಣ್ಣಘರಾನಿ, [ಕಾರಯ] ರೂಪಿಯಸ್ಸ ಚ ಪಾಕಾರಂ ಕರೋನ್ತು (ಪೀ.)] ಇತೋ ಹರಿತ್ವಾನ ಸುವಣ್ಣಘರಾನಿ, ಕರಸ್ಸು ರೂಪಿಯಪಾಕಾರಂ ಕರೋನ್ತು [ಇತೋ ಹರಿತ್ವಾ ಸೋವಣ್ಣಘರಾನಿ ಕಾರಯ, ರೂಪಿಯಸ್ಸ ಚ ಪಾಕಾರಂ ಕರೋನ್ತು (ಸೀ. ಸ್ಯಾ.) ಇತೋ ಹರಿತ್ವಾ ಸೋವಣ್ಣಘರಾನಿ, [ಕಾರಯ] ರೂಪಿಯಸ್ಸ ಚ ಪಾಕಾರಂ ಕರೋನ್ತು (ಪೀ.)].

೨೮೨. ಮುತ್ತಾ ಚ [ಮುತ್ತಾನಞ್ಚ (ಸೀ. ಸ್ಯಾ.)] ವಾಹಸಹಸ್ಸಾನಿ ಪಞ್ಚ, ವೇಳುರಿಯಮಿಸ್ಸಾನಿ ಇತೋ ಹರಿತ್ವಾ;

ಅನ್ತೇಪುರೇ ಭೂಮಿಯಂ ಸನ್ಥರನ್ತು, ನಿಕ್ಕದ್ದಮಾ ಹೇಹಿತಿ ನೀರಜಾ ಚ.

೨೮೩. ಏತಾದಿಸಂ ಆವಸ ರಾಜಸೇಟ್ಠ, ವಿಮಾನಸೇಟ್ಠಂ ಬಹು ಸೋಭಮಾನಂ;

ಬಾರಾಣಸಿಂ ನಗರಂ ಇದ್ಧಂ ಫೀತಂ, ರಜ್ಜಞ್ಚ ಕಾರೇಹಿ ಅನೋಮಪಞ್ಞಾತಿ.

ಚಮ್ಪೇಯ್ಯಜಾತಕಂ ದಸಮಂ.