೫೦೫. ಸೋಮನಸ್ಸಜಾತಕಂ (೯)

೨೧೧. ಕೋ ತಂ ಹಿಂಸತಿ ಹೇಠೇತಿ, ಕಿಂ [ಕಿನ್ನು (ಪೀ. ಕ.)] ದುಮ್ಮನೋ ಸೋಚಸಿ ಅಪ್ಪತೀತೋ;

ಕಸ್ಸಜ್ಜ ಮಾತಾಪಿತರೋ ರುದನ್ತು, ಕ್ವಜ್ಜ ಸೇತು [ಕೋ ನ್ವೇಜ್ಜ ಸೇತಿ (ಕ.), ಕೋ ಅಜ್ಜ ಸೇತು (?)] ನಿಹತೋ ಪಥಬ್ಯಾ.

೨೧೨. ತುಟ್ಠೋಸ್ಮಿ ದೇವ ತವ ದಸ್ಸನೇನ, ಚಿರಸ್ಸಂ ಪಸ್ಸಾಮಿ ತಂ ಭೂಮಿಪಾಲ;

ಅಹಿಂಸಕೋ ರೇಣುಮನುಪ್ಪವಿಸ್ಸ, ಪುತ್ತೇನ ತೇ ಹೇಠಯಿತೋಸ್ಮಿ [ಪೋಥಯಿತೋಸ್ಮಿ (ಕ.)] ದೇವ.

೨೧೩. ಆಯನ್ತು ದೋವಾರಿಕಾ ಖಗ್ಗಬನ್ಧಾ [ಖಗ್ಗಬದ್ಧಾ (ಸೀ. ಪೀ.)], ಕಾಸಾವಿಯಾ ಯನ್ತು [ಹನ್ತು (ಕ.)] ಅನ್ತೇಪುರನ್ತಂ;

ಹನ್ತ್ವಾನ ತಂ ಸೋಮನಸ್ಸಂ ಕುಮಾರಂ, ಛೇತ್ವಾನ ಸೀಸಂ ವರಮಾಹರನ್ತು.

೨೧೪. ಪೇಸಿತಾ ರಾಜಿನೋ ದೂತಾ, ಕುಮಾರಂ ಏತದಬ್ರವುಂ;

ಇಸ್ಸರೇನ ವಿತಿಣ್ಣೋಸಿ, ವಧಂ ಪತ್ತೋಸಿ ಖತ್ತಿಯ.

೨೧೫. ಸ ರಾಜಪುತ್ತೋ ಪರಿದೇವಯನ್ತೋ, ದಸಙ್ಗುಲಿಂ ಅಞ್ಜಲಿಂ ಪಗ್ಗಹೇತ್ವಾ;

ಅಹಮ್ಪಿ ಇಚ್ಛಾಮಿ ಜನಿನ್ದ ದಟ್ಠುಂ, ಜೀವಂ ಮಂ ನೇತ್ವಾ [ಜೀವಂ ಪನೇತ್ವಾ (ಸೀ. ಪೀ.)] ಪಟಿದಸ್ಸಯೇಥ.

೨೧೬. ತಸ್ಸ ತಂ ವಚನಂ ಸುತ್ವಾ, ರಞ್ಞೋ ಪುತ್ತಂ ಅದಸ್ಸಯುಂ;

ಪುತ್ತೋ ಚ ಪಿತರಂ ದಿಸ್ವಾ, ದೂರತೋವಜ್ಝಭಾಸಥ.

೨೧೭. ಆಗಚ್ಛುಂ [ಆಗಞ್ಛುಂ (ಸೀ.), ಆಗಞ್ಛು (ಪೀ.)] ದೋವಾರಿಕಾ ಖಗ್ಗಬನ್ಧಾ, ಕಾಸಾವಿಯಾ ಹನ್ತು ಮಮಂ ಜನಿನ್ದ;

ಅಕ್ಖಾಹಿ ಮೇ ಪುಚ್ಛಿತೋ ಏತಮತ್ಥಂ, ಅಪರಾಧೋ ಕೋ ನಿಧ ಮಮಜ್ಜ ಅತ್ಥಿ.

೨೧೮. ಸಾಯಞ್ಚ ಪಾತೋ ಉದಕಂ ಸಜಾತಿ, ಅಗ್ಗಿಂ ಸದಾ ಪಾರಿಚರತಪ್ಪಮತ್ತೋ;

ತಂ ತಾದಿಸಂ ಸಂಯತಂ ಬ್ರಹ್ಮಚಾರಿಂ, ಕಸ್ಮಾ ತುವಂ ಬ್ರೂಸಿ ಗಹಪ್ಪತೀತಿ.

೨೧೯. ತಾಲಾ ಚ ಮೂಲಾ ಚ ಫಲಾ ಚ ದೇವ, ಪರಿಗ್ಗಹಾ ವಿವಿಧಾ ಸನ್ತಿಮಸ್ಸ;

ತೇ ರಕ್ಖತಿ ಗೋಪಯತಪ್ಪಮತ್ತೋ, [ಬ್ರಾಹ್ಮಣೋ ಗಹಪತಿ ತೇನ ಹೋತಿ (ಸೀ. ಸ್ಯಾ. ಪೀ.)] ತಸ್ಮಾ ಅಹಂ ಬ್ರೂಮಿ ಗಹಪ್ಪತೀತಿ [ಬ್ರಾಹ್ಮಣೋ ಗಹಪತಿ ತೇನ ಹೋತಿ (ಸೀ. ಸ್ಯಾ. ಪೀ.)].

೨೨೦. ಸಚ್ಚಂ ಖೋ ಏತಂ ವದಸಿ ಕುಮಾರ, ಪರಿಗ್ಗಹಾ ವಿವಿಧಾ ಸನ್ತಿಮಸ್ಸ;

ತೇ ರಕ್ಖತಿ ಗೋಪಯತಪ್ಪಮತ್ತೋ, ಸ [ನತ್ಥಿ ಇದಂ ಸೀ. ಸ್ಯಾ. ಪೀ. ಪೋತ್ಥಕೇಸು] ಬ್ರಾಹ್ಮಣೋ ಗಹಪತಿ ತೇನ ಹೋತಿ.

೨೨೧. ಸುಣನ್ತು ಮಯ್ಹಂ ಪರಿಸಾ ಸಮಾಗತಾ, ಸನೇಗಮಾ ಜಾನಪದಾ ಚ ಸಬ್ಬೇ;

ಬಾಲಾಯಂ ಬಾಲಸ್ಸ ವಚೋ ನಿಸಮ್ಮ, ಅಹೇತುನಾ ಘಾತಯತೇ ಮಂ [ಘಾತಯತೇ (ಸೀ. ಪೀ.)] ಜನಿನ್ದೋ.

೨೨೨. ದಳ್ಹಸ್ಮಿ ಮೂಲೇ ವಿಸಟೇ ವಿರೂಳ್ಹೇ, ದುನ್ನಿಕ್ಕಯೋ ವೇಳು ಪಸಾಖಜಾತೋ;

ವನ್ದಾಮಿ ಪಾದಾನಿ ತವ [ತವಂ (ಸೀ. ಪೀ.)] ಜನಿನ್ದ, ಅನುಜಾನ ಮಂ ಪಬ್ಬಜಿಸ್ಸಾಮಿ ದೇವ.

೨೨೩. ಭುಞ್ಜಸ್ಸು ಭೋಗೇ ವಿಪುಲೇ ಕುಮಾರ, ಸಬ್ಬಞ್ಚ ತೇ ಇಸ್ಸರಿಯಂ ದದಾಮಿ;

ಅಜ್ಜೇವ ತ್ವಂ ಕುರೂನಂ ಹೋಹಿ ರಾಜಾ, ಮಾ ಪಬ್ಬಜೀ ಪಬ್ಬಜ್ಜಾ ಹಿ ದುಕ್ಖಾ.

೨೨೪. ಕಿನ್ನೂಧ ದೇವ ತವಮತ್ಥಿ ಭೋಗಾ, ಪುಬ್ಬೇವಹಂ [ಪುಬ್ಬೇ ಚಹಂ (ಕ.)] ದೇವಲೋಕೇ ರಮಿಸ್ಸಂ;

ರೂಪೇಹಿ ಸದ್ದೇಹಿ ಅಥೋ ರಸೇಹಿ, ಗನ್ಧೇಹಿ ಫಸ್ಸೇಹಿ ಮನೋರಮೇಹಿ.

೨೨೫. ಭುತ್ತಾ ಚ ಮೇ [ಭುತ್ತಾ (ಸೀ. ಪೀ.)] ಭೋಗಾ ತಿದಿವಸ್ಮಿಂ ದೇವ, ಪರಿವಾರಿತಾ [ಪರಿಚಾರಿತಾ (ಕ.)] ಅಚ್ಛರಾನಂ ಗಣೇನ [ಅಚ್ಛರಾಸಂಗಣೇನ (ಸ್ಯಾ. ಪೀ. ಕ.)];

ತುವಞ್ಚ [ತವಞ್ಚ (ಸೀ. ಪೀ.)] ಬಾಲಂ ಪರನೇಯ್ಯಂ ವಿದಿತ್ವಾ, ನ ತಾದಿಸೇ ರಾಜಕುಲೇ ವಸೇಯ್ಯಂ.

೨೨೬. ಸಚಾಹಂ ಬಾಲೋ ಪರನೇಯ್ಯೋ ಅಸ್ಮಿ, ಏಕಾಪರಾಧಂ [ಏತಾಪರಾಧಂ (ಕ.)] ಖಮ ಪುತ್ತ ಮಯ್ಹಂ;

ಪುನಪಿ ಚೇ ಏದಿಸಕಂ ಭವೇಯ್ಯ, ಯಥಾಮತಿಂ ಸೋಮನಸ್ಸ ಕರೋಹಿ.

೨೨೭. ಅನಿಸಮ್ಮ ಕತಂ ಕಮ್ಮಂ, ಅನವತ್ಥಾಯ ಚಿನ್ತಿತಂ;

ಭೇಸಜ್ಜಸ್ಸೇವ ವೇಭಙ್ಗೋ, ವಿಪಾಕೋ ಹೋತಿ ಪಾಪಕೋ.

೨೨೮. ನಿಸಮ್ಮ ಚ ಕತಂ ಕಮ್ಮಂ, ಸಮ್ಮಾವತ್ಥಾಯ ಚಿನ್ತಿತಂ;

ಭೇಸಜ್ಜಸ್ಸೇವ ಸಮ್ಪತ್ತಿ, ವಿಪಾಕೋ ಹೋತಿ ಭದ್ರಕೋ.

೨೨೯. ಅಲಸೋ ಗಿಹೀ ಕಾಮಭೋಗೀ ನ ಸಾಧು, ಅಸಞ್ಞತೋ ಪಬ್ಬಜಿತೋ ನ ಸಾಧು;

ರಾಜಾ ನ ಸಾಧು ಅನಿಸಮ್ಮಕಾರೀ, ಯೋ ಪಣ್ಡಿತೋ ಕೋಧನೋ ತಂ ನ ಸಾಧು.

೨೩೦. ನಿಸಮ್ಮ ಖತ್ತಿಯೋ ಕಯಿರಾ, ನಾನಿಸಮ್ಮ ದಿಸಮ್ಪತಿ;

ನಿಸಮ್ಮಕಾರಿನೋ ರಾಜ, ಯಸೋ ಕಿತ್ತಿ ಚ ವಡ್ಢತಿ.

೨೩೧. ನಿಸಮ್ಮ ದಣ್ಡಂ ಪಣಯೇಯ್ಯ ಇಸ್ಸರೋ, ವೇಗಾ ಕತಂ ತಪ್ಪತಿ ಭೂಮಿಪಾಲ;

ಸಮ್ಮಾಪಣೀಧೀ ಚ ನರಸ್ಸ ಅತ್ಥಾ, ಅನಾನುತಪ್ಪಾ ತೇ ಭವನ್ತಿ ಪಚ್ಛಾ.

೨೩೨. ಅನಾನುತಪ್ಪಾನಿ ಹಿ ಯೇ ಕರೋನ್ತಿ, ವಿಭಜ್ಜ ಕಮ್ಮಾಯತನಾನಿ ಲೋಕೇ;

ವಿಞ್ಞುಪ್ಪಸತ್ಥಾನಿ ಸುಖುದ್ರಯಾನಿ, ಭವನ್ತಿ ಬುದ್ಧಾನುಮತಾನಿ [ವದ್ಧಾನುಮತಾನಿ (ಸೀ. ಪೀ.)] ತಾನಿ.

೨೩೩. ಆಗಚ್ಛುಂ ದೋವಾರಿಕಾ ಖಗ್ಗಬನ್ಧಾ, ಕಾಸಾವಿಯಾ ಹನ್ತು ಮಮಂ ಜನಿನ್ದ;

ಮಾತುಞ್ಚ [ಮಾತುಚ್ಚ (ಪೀ.)] ಅಙ್ಕಸ್ಮಿಮಹಂ ನಿಸಿನ್ನೋ, ಆಕಡ್ಢಿತೋ ಸಹಸಾ ತೇಹಿ ದೇವ.

೨೩೪. ಕಟುಕಞ್ಹಿ ಸಮ್ಬಾಧಂ ಸುಕಿಚ್ಛಂ [ಸುಕಿಚ್ಛ (ಸೀ. ಪೀ.)] ಪತ್ತೋ, ಮಧುರಮ್ಪಿ ಯಂ ಜೀವಿತಂ ಲದ್ಧ ರಾಜ;

ಕಿಚ್ಛೇನಹಂ ಅಜ್ಜ ವಧಾ ಪಮುತ್ತೋ, ಪಬ್ಬಜ್ಜಮೇವಾಭಿಮನೋಹಮಸ್ಮಿ.

೨೩೫. ಪುತ್ತೋ ತವಾಯಂ ತರುಣೋ ಸುಧಮ್ಮೇ, ಅನುಕಮ್ಪಕೋ ಸೋಮನಸ್ಸೋ ಕುಮಾರೋ;

ತಂ ಯಾಚಮಾನೋ ನ ಲಭಾಮಿ ಸ್ವಜ್ಜ [ಸಜ್ಜ (ಸೀ. ಪೀ.)], ಅರಹಸಿ ನಂ ಯಾಚಿತವೇ [ಯಾಚಿತುಯೇ (ಕ.)] ತುವಮ್ಪಿ.

೨೩೬. ರಮಸ್ಸು ಭಿಕ್ಖಾಚರಿಯಾಯ ಪುತ್ತ, ನಿಸಮ್ಮ ಧಮ್ಮೇಸು ಪರಿಬ್ಬಜಸ್ಸು;

ಸಬ್ಬೇಸು ಭೂತೇಸು ನಿಧಾಯ ದಣ್ಡಂ, ಅನಿನ್ದಿತೋ ಬ್ರಹ್ಮಮುಪೇಹಿ ಠಾನಂ.

೨೩೭. ಅಚ್ಛೇರ [ಅಚ್ಛರಿಯ (ಸೀ. ಸ್ಯಾ. ಪೀ.)] ರೂಪಂ ವತ ಯಾದಿಸಞ್ಚ, ದುಕ್ಖಿತಂ ಮಂ ದುಕ್ಖಾಪಯಸೇ ಸುಧಮ್ಮೇ;

ಯಾಚಸ್ಸು ಪುತ್ತಂ ಇತಿ ವುಚ್ಚಮಾನಾ, ಭಿಯ್ಯೋವ ಉಸ್ಸಾಹಯಸೇ ಕುಮಾರಂ.

೨೩೮. ಯೇ ವಿಪ್ಪಮುತ್ತಾ ಅನವಜ್ಜಭೋಗಿನೋ [ಭೋಜಿನೋ (ಸೀ. ಸ್ಯಾ. ಪೀ.)], ಪರಿನಿಬ್ಬುತಾ ಲೋಕಮಿಮಂ ಚರನ್ತಿ;

ತಮರಿಯಮಗ್ಗಂ ಪಟಿಪಜ್ಜಮಾನಂ, ನ ಉಸ್ಸಹೇ ವಾರಯಿತುಂ ಕುಮಾರಂ.

೨೩೯. ಅದ್ಧಾ ಹವೇ ಸೇವಿತಬ್ಬಾ ಸಪಞ್ಞಾ, ಬಹುಸ್ಸುತಾ ಯೇ ಬಹುಠಾನಚಿನ್ತಿನೋ;

ಯೇಸಾಯಂ ಸುತ್ವಾನ ಸುಭಾಸಿತಾನಿ, ಅಪ್ಪೋಸ್ಸುಕ್ಕಾ ವೀತಸೋಕಾ ಸುಧಮ್ಮಾತಿ.

ಸೋಮನಸ್ಸಜಾತಕಂ ನವಮಂ.