೫೦೪. ಭಲ್ಲಾತಿಯಜಾತಕಂ (೮)

೧೮೬. ಭಲ್ಲಾತಿಯೋ [ಭಲ್ಲಾಟಿಯೋ (ಸೀ. ಪೀ.)] ನಾಮ ಅಹೋಸಿ ರಾಜಾ, ರಟ್ಠಂ ಪಹಾಯ ಮಿಗವಂ ಅಚಾರಿ ಸೋ;

ಅಗಮಾ ಗಿರಿವರಂ ಗನ್ಧಮಾದನಂ, ಸುಪುಪ್ಫಿತಂ [ಸಮ್ಪುಪ್ಫಿತಂ (ಸೀ. ಪೀ.)] ಕಿಮ್ಪುರಿಸಾನುಚಿಣ್ಣಂ.

೧೮೭. ಸಾಳೂರಸಙ್ಘಞ್ಚ ನಿಸೇಧಯಿತ್ವಾ, ಧನುಂ [ಧನು (ಸೀ. ಸ್ಯಾ. ಪೀ.)] ಕಲಾಪಞ್ಚ ಸೋ ನಿಕ್ಖಿಪಿತ್ವಾ;

ಉಪಾಗಮಿ ವಚನಂ ವತ್ತುಕಾಮೋ, ಯತ್ಥಟ್ಠಿತಾ ಕಿಮ್ಪುರಿಸಾ ಅಹೇಸುಂ.

೧೮೮. ಹಿಮಚ್ಚಯೇ ಹೇಮವತಾಯ ತೀರೇ, ಕಿಮಿಧಟ್ಠಿತಾ ಮನ್ತಯವ್ಹೋ ಅಭಿಣ್ಹಂ;

ಪುಚ್ಛಾಮಿ ವೋ ಮಾನುಸದೇಹವಣ್ಣೇ, ಕಥಂ ನು [ಕಥಂ ವೋ (ಸೀ. ಸ್ಯಾ. ಪೀ.)] ಜಾನನ್ತಿ ಮನುಸ್ಸಲೋಕೇ.

೧೮೯. ಮಲ್ಲಂ ಗಿರಿಂ ಪಣ್ಡರಕಂ ತಿಕೂಟಂ, ಸೀತೋದಕಾ [ಸೀತೋದಿಯಾ (ಸೀ. ಪೀ.), ಸೀತೋದಿಕಾ (?)] ಅನುವಿಚರಾಮ ನಜ್ಜೋ;

ಮಿಗಾ ಮನುಸ್ಸಾವ ನಿಭಾಸವಣ್ಣಾ, ಜಾನನ್ತಿ ನೋ ಕಿಮ್ಪುರಿಸಾತಿ ಲುದ್ದ.

೧೯೦. ಸುಕಿಚ್ಛರೂಪಂ ಪರಿದೇವಯವ್ಹೋ [ಪರಿದೇವಥವ್ಹೋ (?) ಮೋಗ್ಗಲ್ಲಾನಬ್ಯಾಕರಣೇ ೬.೩೮ ಸುತ್ತಂ], ಆಲಿಙ್ಗಿತೋ ಚಾಸಿ ಪಿಯೋ ಪಿಯಾಯ;

ಪುಚ್ಛಾಮಿ ವೋ ಮಾನುಸದೇಹವಣ್ಣೇ, ಕಿಮಿಧ ವನೇ ರೋದಥ ಅಪ್ಪತೀತಾ.

೧೯೧. ಸುಕಿಚ್ಛರೂಪಂ ಪರಿದೇವಯವ್ಹೋ, ಆಲಿಙ್ಗಿತೋ ಚಾಸಿ ಪಿಯೋ ಪಿಯಾಯ;

ಪುಚ್ಛಾಮಿ ವೋ ಮಾನುಸದೇಹವಣ್ಣೇ, ಕಿಮಿಧ ವನೇ ವಿಲಪಥ ಅಪ್ಪತೀತಾ.

೧೯೨. ಸುಕಿಚ್ಛರೂಪಂ ಪರಿದೇವಯವ್ಹೋ, ಆಲಿಙ್ಗಿತೋ ಚಾಸಿ ಪಿಯೋ ಪಿಯಾಯ;

ಪುಚ್ಛಾಮಿ ವೋ ಮಾನುಸದೇಹವಣ್ಣೇ, ಕಿಮಿಧ ವನೇ ಸೋಚಥ ಅಪ್ಪತೀತಾ.

೧೯೩. ಮಯೇಕರತ್ತಂ [ರತ್ತಿಂ (ಪೀ.)] ವಿಪ್ಪವಸಿಮ್ಹ ಲುದ್ದ, ಅಕಾಮಕಾ ಅಞ್ಞಮಞ್ಞಂ ಸರನ್ತಾ;

ತಮೇಕರತ್ತಂ ಅನುತಪ್ಪಮಾನಾ, ಸೋಚಾಮ ‘‘ಸಾ ರತ್ತಿ ಪುನಂ ನ ಹೇಸ್ಸತಿ’’.

೧೯೪. ಯಮೇಕರತ್ತಂ ಅನುತಪ್ಪಥೇತಂ, ಧನಂ ವ ನಟ್ಠಂ ಪಿತರಂ ವ ಪೇತಂ;

ಪುಚ್ಛಾಮಿ ವೋ ಮಾನುಸದೇಹವಣ್ಣೇ, ಕಥಂ ವಿನಾ ವಾಸಮಕಪ್ಪಯಿತ್ಥ.

೧೯೫. ಯಮಿಮಂ [ಯಯಿಮಂ (ಕ. ಸೀ.)] ನದಿಂ ಪಸ್ಸಸಿ ಸೀಘಸೋತಂ, ನಾನಾದುಮಚ್ಛಾದನಂ ಸೇಲಕೂಲಂ [ದುಮಚ್ಛದನಂ ಸೇಲಕೂಟಂ (ಸೀ. ಪೀ.), ದುಮಸಞ್ಛನ್ನಂ ಸೇಲಕೂಲಂ (ಕ.)];

ತಂ ಮೇ ಪಿಯೋ ಉತ್ತರಿ ವಸ್ಸಕಾಲೇ, ಮಮಞ್ಚ ಮಞ್ಞಂ ಅನುಬನ್ಧತೀತಿ.

೧೯೬. ಅಹಞ್ಚ ಅಙ್ಕೋಲಕಮೋಚಿನಾಮಿ, ಅತಿಮುತ್ತಕಂ ಸತ್ತಲಿಯೋಥಿಕಞ್ಚ;

‘‘ಪಿಯೋ ಚ ಮೇ ಹೇಹಿತಿ ಮಾಲಭಾರೀ, ಅಹಞ್ಚ ನಂ ಮಾಲಿನೀ ಅಜ್ಝುಪೇಸ್ಸಂ’’.

೧೯೭. ಅಹಞ್ಚಿದಂ ಕುರವಕಮೋಚಿನಾಮಿ, ಉದ್ದಾಲಕಾ ಪಾಟಲಿಸಿನ್ಧುವಾರಕಾ [ಸಿನ್ಧುವಾರಿತಾ (ಸ್ಯಾ. ಪೀ. ಕ.)];

‘‘ಪಿಯೋ ಚ ಮೇ ಹೇಹಿತಿ ಮಾಲಭಾರೀ, ಅಹಞ್ಚ ನಂ ಮಾಲಿನೀ ಅಜ್ಝುಪೇಸ್ಸಂ’’.

೧೯೮. ಅಹಞ್ಚ ಸಾಲಸ್ಸ ಸುಪುಪ್ಫಿತಸ್ಸ, ಓಚೇಯ್ಯ ಪುಪ್ಫಾನಿ ಕರೋಮಿ ಮಾಲಂ;

‘‘ಪಿಯೋ ಚ ಮೇ ಹೇಹಿತಿ ಮಾಲಭಾರೀ, ಅಹಞ್ಚ ನಂ ಮಾಲಿನೀ ಅಜ್ಝುಪೇಸ್ಸಂ’’.

೧೯೯. ಅಹಞ್ಚ ಸಾಲಸ್ಸ ಸುಪುಪ್ಫಿತಸ್ಸ, ಓಚೇಯ್ಯ ಪುಪ್ಫಾನಿ ಕರೋಮಿ ಭಾರಂ;

ಇದಞ್ಚ ನೋ ಹೇಹಿತಿ ಸನ್ಥರತ್ಥಂ, ಯತ್ಥಜ್ಜಿಮಂ [ಯತ್ಥಜ್ಜಮಂ (ಸೀ. ಪೀ.)] ವಿಹರಿಸ್ಸಾಮ [ವಿಹರಿಸ್ಸಾಮು (ಪೀ.)] ರತ್ತಿಂ.

೨೦೦. ಅಹಞ್ಚ ಖೋ ಅಗಳುಂ [ಅಗ್ಗಲು (ಸ್ಯಾ. ಕ.), ಅಕಲುಂ (ಪೀ.)] ಚನ್ದನಞ್ಚ, ಸಿಲಾಯ ಪಿಂಸಾಮಿ ಪಮತ್ತರೂಪಾ;

‘‘ಪಿಯೋ ಚ ಮೇ ಹೇಹಿತಿ ರೋಸಿತಙ್ಗೋ, ಅಹಞ್ಚ ನಂ ರೋಸಿತಾ ಅಜ್ಝುಪೇಸ್ಸಂ’’.

೨೦೧. ಅಥಾಗಮಾ ಸಲಿಲಂ ಸೀಘಸೋತಂ, ನುದಂ ಸಾಲೇ ಸಲಳೇ ಕಣ್ಣಿಕಾರೇ;

ಆಪೂರಥ [ಅಪೂರಥ (ಸೀ. ಪೀ.), ಆಪೂರಥೇ (ಸ್ಯಾ.)] ತೇನ ಮುಹುತ್ತಕೇನ, ಸಾಯಂ ನದೀ ಆಸಿ ಮಯಾ ಸುದುತ್ತರಾ.

೨೦೨. ಉಭೋಸು ತೀರೇಸು ಮಯಂ ತದಾ ಠಿತಾ, ಸಮ್ಪಸ್ಸನ್ತಾ ಉಭಯೋ ಅಞ್ಞಮಞ್ಞಂ;

ಸಕಿಮ್ಪಿ ರೋದಾಮ ಸಕಿಂ ಹಸಾಮ, ಕಿಚ್ಛೇನ ನೋ ಆಗಮಾ [ಅಗಮಾ (ಸೀ. ಸ್ಯಾ. ಪೀ.)] ಸಂವರೀ ಸಾ.

೨೦೩. ಪಾತೋವ [ಪಾತೋ ಚ (ಸೀ. ಸ್ಯಾ. ಪೀ.)] ಖೋ ಉಗ್ಗತೇ ಸೂರಿಯಮ್ಹಿ, ಚತುಕ್ಕಂ ನದಿಂ ಉತ್ತರಿಯಾನ ಲುದ್ದ;

ಆಲಿಙ್ಗಿಯಾ ಅಞ್ಞಮಞ್ಞಂ ಮಯಂ ಉಭೋ, ಸಕಿಮ್ಪಿ ರೋದಾಮ ಸಕಿಂ ಹಸಾಮ.

೨೦೪. ತೀಹೂನಕಂ ಸತ್ತಸತಾನಿ ಲುದ್ದ, ಯಮಿಧ ಮಯಂ ವಿಪ್ಪವಸಿಮ್ಹ ಪುಬ್ಬೇ;

ವಸ್ಸೇಕಿಮಂ [ವಾಸೇಕಿಮಂ (ಸೀ. ಪೀ.)] ಜೀವಿತಂ ಭೂಮಿಪಾಲ, ಕೋ ನೀಧ ಕನ್ತಾಯ ವಿನಾ ವಸೇಯ್ಯ.

೨೦೫. ಆಯುಞ್ಚ ವೋ ಕೀವತಕೋ ನು ಸಮ್ಮ, ಸಚೇಪಿ ಜಾನಾಥ ವದೇಥ ಆಯುಂ;

ಅನುಸ್ಸವಾ ವುಡ್ಢತೋ ಆಗಮಾ ವಾ, ಅಕ್ಖಾಥ ಮೇ ತಂ ಅವಿಕಮ್ಪಮಾನಾ.

೨೦೬. ಆಯುಞ್ಚ ನೋ ವಸ್ಸಸಹಸ್ಸಂ ಲುದ್ದ, ನ ಚನ್ತರಾ ಪಾಪಕೋ ಅತ್ಥಿ ರೋಗೋ;

ಅಪ್ಪಞ್ಚ [ಅಪ್ಪಂವ (ಸ್ಯಾ. ಕ.)] ದುಕ್ಖಂ ಸುಖಮೇವ ಭಿಯ್ಯೋ, ಅವೀತರಾಗಾ ವಿಜಹಾಮ ಜೀವಿತಂ.

೨೦೭. ಇದಞ್ಚ ಸುತ್ವಾನ ಅಮಾನುಸಾನಂ, ಭಲ್ಲಾತಿಯೋ ಇತ್ತರ ಜೀವಿತನ್ತಿ;

ನಿವತ್ತಥ ನ ಮಿಗವಂ ಅಚರಿ, ಅದಾಸಿ ದಾನಾನಿ ಅಭುಞ್ಜಿ ಭೋಗೇ.

೨೦೮. ಇದಞ್ಚ ಸುತ್ವಾನ ಅಮಾನುಸಾನಂ, ಸಮ್ಮೋದಥ ಮಾ ಕಲಹಂ ಅಕತ್ಥ;

ಮಾ ವೋ ತಪೀ ಅತ್ತಕಮ್ಮಾಪರಾಧೋ, ಯಥಾಪಿ ತೇ ಕಿಮ್ಪುರಿಸೇಕರತ್ತಂ.

೨೦೯. ಇದಞ್ಚ ಸುತ್ವಾನ ಅಮಾನುಸಾನಂ, ಸಮ್ಮೋದಥ ಮಾ ವಿವಾದಂ ಅಕತ್ಥ;

ಮಾ ವೋ ತಪೀ ಅತ್ತಕಮ್ಮಾಪರಾಧೋ, ಯಥಾಪಿ ತೇ ಕಿಮ್ಪುರಿಸೇಕರತ್ತಂ.

೨೧೦. ವಿವಿಧಂ [ವಿವಿಧ (ಸೀ. ಸ್ಯಾ.)] ಅಧಿಮನಾ ಸುಣೋಮಹಂ, ವಚನಪಥಂ ತವ ಅತ್ಥಸಂಹಿತಂ;

ಮುಞ್ಚಂ [ಮುಞ್ಚ (ಸೀ. ಪೀ.)] ಗಿರಂ ನುದಸೇವ ಮೇ ದರಂ, ಸಮಣ ಸುಖಾವಹ ಜೀವ ಮೇ ಚಿರನ್ತಿ.

ಭಲ್ಲಾತಿಯಜಾತಕಂ ಅಟ್ಠಮಂ.