೫೦೩. ಸತ್ತಿಗುಮ್ಬಜಾತಕಂ (೭)

೧೫೯. ಮಿಗಲುದ್ದೋ ಮಹಾರಾಜಾ, ಪಞ್ಚಾಲಾನಂ ರಥೇಸಭೋ;

ನಿಕ್ಖನ್ತೋ ಸಹ ಸೇನಾಯ, ಓಗಣೋ ವನಮಾಗಮಾ.

೧೬೦. ತತ್ಥದ್ದಸಾ ಅರಞ್ಞಸ್ಮಿಂ, ತಕ್ಕರಾನಂ ಕುಟಿಂ ಕತಂ;

ತಸ್ಸಾ [ತಸ್ಮಾ (ಸ್ಯಾ. ಪೀ. ಕ.)] ಕುಟಿಯಾ ನಿಕ್ಖಮ್ಮ, ಸುವೋ ಲುದ್ದಾನಿ ಭಾಸತಿ.

೧೬೧. ಸಮ್ಪನ್ನವಾಹನೋ ಪೋಸೋ, ಯುವಾ ಸಮ್ಮಟ್ಠಕುಣ್ಡಲೋ [ಕುಣ್ಡಲೀ (ಸ್ಯಾ. ಕ.)];

ಸೋಭತಿ ಲೋಹಿತುಣ್ಹೀಸೋ, ದಿವಾ ಸೂರಿಯೋವ ಭಾಸತಿ.

೧೬೨. ಮಜ್ಝನ್ಹಿಕೇ [ಮಜ್ಝನ್ತಿಕೇ (ಸಬ್ಬತ್ಥ)] ಸಮ್ಪತಿಕೇ, ಸುತ್ತೋ ರಾಜಾ ಸಸಾರಥಿ;

ಹನ್ದಸ್ಸಾಭರಣಂ ಸಬ್ಬಂ, ಗಣ್ಹಾಮ ಸಾಹಸಾ [ಸಹಸಾ (ಸೀ. ಸ್ಯಾ. ಪೀ.)] ಮಯಂ.

೧೬೩. ನಿಸೀಥೇಪಿ ರಹೋ ದಾನಿ, ಸುತ್ತೋ ರಾಜಾ ಸಸಾರಥಿ;

ಆದಾಯ ವತ್ಥಂ ಮಣಿಕುಣ್ಡಲಞ್ಚ, ಹನ್ತ್ವಾನ ಸಾಖಾಹಿ ಅವತ್ಥರಾಮ.

೧೬೪. ಕಿನ್ನು ಉಮ್ಮತ್ತರೂಪೋವ, ಸತ್ತಿಗುಮ್ಬ ಪಭಾಸಸಿ;

ದುರಾಸದಾ ಹಿ ರಾಜಾನೋ, ಅಗ್ಗಿ ಪಜ್ಜಲಿತೋ ಯಥಾ.

೧೬೫. ಅಥ ತ್ವಂ ಪತಿಕೋಲಮ್ಬ, ಮತ್ತೋ ಥುಲ್ಲಾನಿ ಗಜ್ಜಸಿ;

ಮಾತರಿ ಮಯ್ಹಂ ನಗ್ಗಾಯ, ಕಿನ್ನು ತ್ವಂ ವಿಜಿಗುಚ್ಛಸೇ.

೧೬೬. ಉಟ್ಠೇಹಿ ಸಮ್ಮ ತರಮಾನೋ, ರಥಂ ಯೋಜೇಹಿ ಸಾರಥಿ;

ಸಕುಣೋ ಮೇ ನ ರುಚ್ಚತಿ, ಅಞ್ಞಂ ಗಚ್ಛಾಮ ಅಸ್ಸಮಂ.

೧೬೭. ಯುತ್ತೋ ರಥೋ ಮಹಾರಾಜ, ಯುತ್ತೋ ಚ ಬಲವಾಹನೋ;

ಅಧಿತಿಟ್ಠ ಮಹಾರಾಜ, ಅಞ್ಞಂ ಗಚ್ಛಾಮ ಅಸ್ಸಮಂ.

೧೬೮. ಕೋ ನುಮೇವ ಗತಾ [ಕ್ವ ನು’ಮೇ’ಪಗತಾ (?)] ಸಬ್ಬೇ, ಯೇ ಅಸ್ಮಿಂ ಪರಿಚಾರಕಾ;

ಏಸ ಗಚ್ಛತಿ ಪಞ್ಚಾಲೋ, ಮುತ್ತೋ ತೇಸಂ ಅದಸ್ಸನಾ.

೧೬೯. ಕೋದಣ್ಡಕಾನಿ ಗಣ್ಹಥ, ಸತ್ತಿಯೋ ತೋಮರಾನಿ ಚ;

ಏಸ ಗಚ್ಛತಿ ಪಞ್ಚಾಲೋ, ಮಾ ವೋ ಮುಞ್ಚಿತ್ಥ ಜೀವತಂ [ಜೀವಿತಂ (ಬಹೂಸು)].

೧೭೦. ಅಥಾಪರೋ ಪಟಿನನ್ದಿತ್ಥ, ಸುವೋ ಲೋಹಿತತುಣ್ಡಕೋ;

ಸ್ವಾಗತಂ ತೇ ಮಹಾರಾಜ, ಅಥೋ ತೇ ಅದುರಾಗತಂ;

ಇಸ್ಸರೋಸಿ ಅನುಪ್ಪತ್ತೋ, ಯಂ ಇಧತ್ಥಿ ಪವೇದಯ.

೧೭೧. ತಿನ್ದುಕಾನಿ ಪಿಯಾಲಾನಿ, ಮಧುಕೇ ಕಾಸುಮಾರಿಯೋ;

ಫಲಾನಿ ಖುದ್ದಕಪ್ಪಾನಿ, ಭುಞ್ಜ ರಾಜ ವರಂ ವರಂ.

೧೭೨. ಇದಮ್ಪಿ ಪಾನೀಯಂ ಸೀತಂ, ಆಭತಂ ಗಿರಿಗಬ್ಭರಾ;

ತತೋ ಪಿವ ಮಹಾರಾಜ, ಸಚೇ ತ್ವಂ ಅಭಿಕಙ್ಖಸಿ.

೧೭೩. ಅರಞ್ಞಂ ಉಞ್ಛಾಯ ಗತಾ, ಯೇ ಅಸ್ಮಿಂ ಪರಿಚಾರಕಾ;

ಸಯಂ ಉಟ್ಠಾಯ ಗಣ್ಹವ್ಹೋ, ಹತ್ಥಾ ಮೇ ನತ್ಥಿ ದಾತವೇ.

೧೭೪. ಭದ್ದಕೋ ವತಯಂ ಪಕ್ಖೀ, ದಿಜೋ ಪರಮಧಮ್ಮಿಕೋ;

ಅಥೇಸೋ ಇತರೋ ಪಕ್ಖೀ, ಸುವೋ ಲುದ್ದಾನಿ ಭಾಸತಿ.

೧೭೫. ‘‘ಏತಂ ಹನಥ ಬನ್ಧಥ, ಮಾ ವೋ ಮುಞ್ಚಿತ್ಥ ಜೀವತಂ’’;

ಇಚ್ಚೇವಂ ವಿಲಪನ್ತಸ್ಸ, ಸೋತ್ಥಿಂ [ಸೋತ್ಥೀ (ಸ್ಯಾ.)] ಪತ್ತೋಸ್ಮಿ ಅಸ್ಸಮಂ.

೧೭೬. ಭಾತರೋಸ್ಮ ಮಹಾರಾಜ, ಸೋದರಿಯಾ ಏಕಮಾತುಕಾ;

ಏಕರುಕ್ಖಸ್ಮಿಂ ಸಂವಡ್ಢಾ, ನಾನಾಖೇತ್ತಗತಾ ಉಭೋ.

೧೭೭. ಸತ್ತಿಗುಮ್ಬೋ ಚ ಚೋರಾನಂ, ಅಹಞ್ಚ ಇಸೀನಂ ಇಧ;

ಅಸತಂ ಸೋ, ಸತಂ ಅಹಂ, ತೇನ ಧಮ್ಮೇನ ನೋ ವಿನಾ.

೧೭೮. ತತ್ಥ ವಧೋ ಚ ಬನ್ಧೋ ಚ, ನಿಕತೀ ವಞ್ಚನಾನಿ ಚ;

ಆಲೋಪಾ ಸಾಹಸಾಕಾರಾ, ತಾನಿ ಸೋ ತತ್ಥ ಸಿಕ್ಖತಿ.

೧೭೯. ಇಧ ಸಚ್ಚಞ್ಚ ಧಮ್ಮೋ ಚ, ಅಹಿಂಸಾ ಸಂಯಮೋ ದಮೋ;

ಆಸನೂದಕದಾಯೀನಂ, ಅಙ್ಕೇ ವದ್ಧೋಸ್ಮಿ ಭಾರಧ [ಭಾರತ (ಸೀ. ಸ್ಯಾ. ಪೀ.)].

೧೮೦. ಯಂ ಯಞ್ಹಿ ರಾಜ ಭಜತಿ, ಸನ್ತಂ ವಾ ಯದಿ ವಾ ಅಸಂ;

ಸೀಲವನ್ತಂ ವಿಸೀಲಂ ವಾ, ವಸಂ ತಸ್ಸೇವ ಗಚ್ಛತಿ.

೧೮೧. ಯಾದಿಸಂ ಕುರುತೇ ಮಿತ್ತಂ, ಯಾದಿಸಂ ಚೂಪಸೇವತಿ;

ಸೋಪಿ ತಾದಿಸಕೋ ಹೋತಿ, ಸಹವಾಸೋ ಹಿ [ಸಹವಾಸೋಪಿ (ಸ್ಯಾ. ಕ.)] ತಾದಿಸೋ.

೧೮೨. ಸೇವಮಾನೋ ಸೇವಮಾನಂ, ಸಮ್ಫುಟ್ಠೋ ಸಮ್ಫುಸಂ ಪರಂ;

ಸರೋ ದಿದ್ಧೋ ಕಲಾಪಂವ, ಅಲಿತ್ತಮುಪಲಿಮ್ಪತಿ;

ಉಪಲೇಪಭಯಾ [ಉಪಲಿಮ್ಪಭಯಾ (ಸ್ಯಾ. ಕ.)] ಧೀರೋ, ನೇವ ಪಾಪಸಖಾ ಸಿಯಾ.

೧೮೩. ಪೂತಿಮಚ್ಛಂ ಕುಸಗ್ಗೇನ, ಯೋ ನರೋ ಉಪನಯ್ಹತಿ;

ಕುಸಾಪಿ ಪೂತಿ [ಪೂತೀ (ಸೀ. ಪೀ.)] ವಾಯನ್ತಿ, ಏವಂ ಬಾಲೂಪಸೇವನಾ.

೧೮೪. ತಗರಞ್ಚ ಪಲಾಸೇನ, ಯೋ ನರೋ ಉಪನಯ್ಹತಿ;

ಪತ್ತಾಪಿ ಸುರಭಿ [ಸುರಭೀ (ಸೀ. ಸ್ಯಾ. ಪೀ.)] ವಾಯನ್ತಿ, ಏವಂ ಧೀರೂಪಸೇವನಾ.

೧೮೫. ತಸ್ಮಾ ಪತ್ತಪುಟಸ್ಸೇವ [ಫಲಪುಟಸ್ಸೇವ (ಸೀ. ಪೀ.), ಪಲಪುಟಸ್ಸೇವ (ಕ. ಅಟ್ಠ.), ಪಲಾಸಪುಟಸ್ಸೇವ (ಸ್ಯಾ. ಕ.)], ಞತ್ವಾ ಸಮ್ಪಾಕಮತ್ತನೋ;

ಅಸನ್ತೇ ನೋಪಸೇವೇಯ್ಯ, ಸನ್ತೇ ಸೇವೇಯ್ಯ ಪಣ್ಡಿತೋ;

ಅಸನ್ತೋ ನಿರಯಂ ನೇನ್ತಿ, ಸನ್ತೋ ಪಾಪೇನ್ತಿ ಸುಗ್ಗತಿನ್ತಿ.

ಸತ್ತಿಗುಮ್ಬಜಾತಕಂ ಸತ್ತಮಂ.