೫೦೨. ಚೂಳಹಂಸಜಾತಕಂ (೬)

೧೩೩. ಏತೇ ಹಂಸಾ ಪಕ್ಕಮನ್ತಿ, ವಕ್ಕಙ್ಗಾ ಭಯಮೇರಿತಾ;

ಹರಿತ್ತಚ ಹೇಮವಣ್ಣ, ಕಾಮಂ ಸುಮುಖ ಪಕ್ಕಮ.

೧೩೪. ಓಹಾಯ ಮಂ ಞಾತಿಗಣಾ, ಏಕಂ ಪಾಸವಸಂ ಗತಂ;

ಅನಪೇಕ್ಖಮಾನಾ [ನಾಪೇಕ್ಖಮಾನಾ (ಕ.)] ಗಚ್ಛನ್ತಿ, ಕಿಂ ಏಸೋ ಅವಹಿಯ್ಯಸಿ.

೧೩೫. ಪತೇವ ಪತತಂ ಸೇಟ್ಠ, ನತ್ಥಿ ಬದ್ಧೇ ಸಹಾಯತಾ [ಸಹಾಯಕಾ (ಸ್ಯಾ.)];

ಮಾ ಅನೀಘಾಯ ಹಾಪೇಸಿ, ಕಾಮಂ ಸುಮುಖ ಪಕ್ಕಮ.

೧೩೬. ನಾಹಂ ‘‘ದುಕ್ಖಪರೇತೋ’’ತಿ [ದುಕ್ಖಪರೇತೋಪಿ (ಕ.)], ಧತರಟ್ಠ ತುವಂ [ತವಂ (ಸೀ. ಪೀ.)] ಜಹೇ;

ಜೀವಿತಂ ಮರಣಂ ವಾ ಮೇ, ತಯಾ ಸದ್ಧಿಂ ಭವಿಸ್ಸತಿ.

೧೩೭. ಏತದರಿಯಸ್ಸ ಕಲ್ಯಾಣಂ, ಯಂ ತ್ವಂ ಸುಮುಖ ಭಾಸಸಿ;

ತಞ್ಚ ವೀಮಂಸಮಾನೋಹಂ, ‘‘ಪತತೇತಂ’’ ಅವಸ್ಸಜಿಂ.

೧೩೮. ಅಪದೇನ ಪದಂ ಯಾತಿ, ಅನ್ತಲಿಕ್ಖಚರೋ [ಅನ್ತಲಿಕ್ಖೇ ಚರೋ (ಸೀ. ಪೀ.)] ದಿಜೋ;

ಆರಾ ಪಾಸಂ ನ ಬುಜ್ಝಿ ತ್ವಂ, ಹಂಸಾನಂ ಪವರುತ್ತಮ [ಪವರುತ್ತಮೋ (ಕ. ಸೀ. ಪೀ.)].

೧೩೯. ಯದಾ ಪರಾಭವೋ ಹೋತಿ, ಪೋಸೋ ಜೀವಿತಸಙ್ಖಯೇ;

ಅಥ ಜಾಲಞ್ಚ ಪಾಸಞ್ಚ, ಆಸಜ್ಜಾಪಿ ನ ಬುಜ್ಝತಿ.

೧೪೦. ಏತೇ ಹಂಸಾ ಪಕ್ಕಮನ್ತಿ, ವಕ್ಕಙ್ಗಾ ಭಯಮೇರಿತಾ;

ಹರಿತ್ತಚ ಹೇಮವಣ್ಣ, ತ್ವಞ್ಞೇವ [ತ್ವಞ್ಚ ತಂ (ಸೀ.), ತ್ವಞ್ಚ (ಪೀ.)] ಅವಹಿಯ್ಯಸಿ.

೧೪೧. ಏತೇ ಭುತ್ವಾ ಚ ಪಿತ್ವಾ ಚ, ಪಕ್ಕಮನ್ತಿ ವಿಹಙ್ಗಮಾ;

ಅನಪೇಕ್ಖಮಾನಾ ವಕ್ಕಙ್ಗಾ, ತ್ವಞ್ಞೇವೇಕೋ ಉಪಾಸಸಿ.

೧೪೨. ಕಿನ್ನು ತ್ಯಾಯಂ [ತಾಯಂ (ಸೀ. ಸ್ಯಾ. ಪೀ.)] ದಿಜೋ ಹೋತಿ, ಮುತ್ತೋ ಬದ್ಧಂ ಉಪಾಸಸಿ;

ಓಹಾಯ ಸಕುಣಾ ಯನ್ತಿ, ಕಿಂ ಏಕೋ ಅವಹಿಯ್ಯಸಿ.

೧೪೩. ರಾಜಾ ಮೇ ಸೋ ದಿಜೋ ಮಿತ್ತೋ, ಸಖಾ ಪಾಣಸಮೋ ಚ ಮೇ;

ನೇವ ನಂ ವಿಜಹಿಸ್ಸಾಮಿ, ಯಾವ ಕಾಲಸ್ಸ ಪರಿಯಾಯಂ.

೧೪೪. ಯೋ ಚ ತ್ವಂ ಸಖಿನೋ ಹೇತು, ಪಾಣಂ ಚಜಿತುಮಿಚ್ಛಸಿ;

ಸೋ ತೇ ಸಹಾಯಂ ಮುಞ್ಚಾಮಿ, ಹೋತು ರಾಜಾ ತವಾನುಗೋ.

೧೪೫. ಏವಂ ಲುದ್ದಕ ನನ್ದಸ್ಸು, ಸಹ ಸಬ್ಬೇಹಿ ಞಾತಿಭಿ;

ಯಥಾಹಮಜ್ಜ ನನ್ದಾಮಿ, ದಿಸ್ವಾ ಮುತ್ತಂ ದಿಜಾಧಿಪಂ.

೧೪೬. ಕಚ್ಚಿನ್ನು ಭೋತೋ ಕುಸಲಂ, ಕಚ್ಚಿ ಭೋತೋ ಅನಾಮಯಂ;

ಕಚ್ಚಿ ರಟ್ಠಮಿದಂ ಫೀತಂ, ಧಮ್ಮೇನ ಮನುಸಾಸಸಿ.

೧೪೭. ಕುಸಲಞ್ಚೇವ ಮೇ ಹಂಸ, ಅಥೋ ಹಂಸ ಅನಾಮಯಂ;

ಅಥೋ ರಟ್ಠಮಿದಂ ಫೀತಂ, ಧಮ್ಮೇನ ಮನುಸಾಸಹಂ.

೧೪೮. ಕಚ್ಚಿ ಭೋತೋ ಅಮಚ್ಚೇಸು, ದೋಸೋ ಕೋಚಿ ನ ವಿಜ್ಜತಿ;

ಕಚ್ಚಿ ಆರಾ ಅಮಿತ್ತಾ ತೇ, ಛಾಯಾ ದಕ್ಖಿಣತೋರಿವ.

೧೪೯. ಅಥೋಪಿ ಮೇ ಅಮಚ್ಚೇಸು, ದೋಸೋ ಕೋಚಿ ನ ವಿಜ್ಜತಿ;

ಅಥೋ ಆರಾ ಅಮಿತ್ತಾ ಮೇ, ಛಾಯಾ ದಕ್ಖಿಣತೋರಿವ.

೧೫೦. ಕಚ್ಚಿ ತೇ ಸಾದಿಸೀ ಭರಿಯಾ, ಅಸ್ಸವಾ ಪಿಯಭಾಣಿನೀ;

ಪುತ್ತರೂಪಯಸೂಪೇತಾ, ತವ ಛನ್ದವಸಾನುಗಾ.

೧೫೧. ಅಥೋ ಮೇ ಸಾದಿಸೀ ಭರಿಯಾ, ಅಸ್ಸವಾ ಪಿಯಭಾಣಿನೀ;

ಪುತ್ತರೂಪಯಸೂಪೇತಾ, ಮಮ ಛನ್ದವಸಾನುಗಾ.

೧೫೨. ಕಚ್ಚಿ ತೇ ಬಹವೋ ಪುತ್ತಾ, ಸುಜಾತಾ ರಟ್ಠವಡ್ಢನ;

ಪಞ್ಞಾಜವೇನ ಸಮ್ಪನ್ನಾ, ಸಮ್ಮೋದನ್ತಿ ತತೋ ತತೋ.

೧೫೩. ಸತಮೇಕೋ ಚ ಮೇ ಪುತ್ತಾ, ಧತರಟ್ಠ ಮಯಾ ಸುತಾ;

ತೇಸಂ ತ್ವಂ ಕಿಚ್ಚಮಕ್ಖಾಹಿ, ನಾವರುಜ್ಝನ್ತಿ [ನಾವರಜ್ಝನ್ತಿ (ಕ. ಸೀ. ಪೀ.)] ತೇ ವಚೋ.

೧೫೪. ಉಪಪನ್ನೋಪಿ ಚೇ ಹೋತಿ, ಜಾತಿಯಾ ವಿನಯೇನ ವಾ;

ಅಥ ಪಚ್ಛಾ ಕುರುತೇ ಯೋಗಂ, ಕಿಚ್ಛೇ [ಕಿಚ್ಚೇ (ಸೀ. ಸ್ಯಾ. ಪೀ.)] ಆಪಾಸು [ಆವಾಸು (ಸ್ಯಾ.), ಆಪದಾಸು (ಕ.)] ಸೀದತಿ.

೧೫೫. ತಸ್ಸ ಸಂಹೀರಪಞ್ಞಸ್ಸ, ವಿವರೋ ಜಾಯತೇ ಮಹಾ;

ರತ್ತಿಮನ್ಧೋವ [ನತ್ತಮನ್ಧೋವ (ಸೀ. ಪೀ.)] ರೂಪಾನಿ, ಥೂಲಾನಿ ಮನುಪಸ್ಸತಿ.

೧೫೬. ಅಸಾರೇ ಸಾರಯೋಗಞ್ಞೂ, ಮತಿಂ ನ ತ್ವೇವ ವಿನ್ದತಿ;

ಸರಭೋವ ಗಿರಿದುಗ್ಗಸ್ಮಿಂ, ಅನ್ತರಾಯೇವ ಸೀದತಿ.

೧೫೭. ಹೀನಜಚ್ಚೋಪಿ ಚೇ ಹೋತಿ, ಉಟ್ಠಾತಾ ಧಿತಿಮಾ ನರೋ;

ಆಚಾರಸೀಲಸಮ್ಪನ್ನೋ, ನಿಸೇ ಅಗ್ಗೀವ ಭಾಸತಿ.

೧೫೮. ಏತಂ ಮೇ ಉಪಮಂ ಕತ್ವಾ, ಪುತ್ತೇ ವಿಜ್ಜಾಸು ವಾಚಯ [ಠಾಪಸ (ಸ್ಯಾ. ಕ.)];

ಸಂವಿರೂಳ್ಹೇಥ ಮೇಧಾವೀ, ಖೇತ್ತೇ ಬೀಜಂವ [ಖೇತ್ತಬೀಜಂವ (ಸೀ. ಪೀ.)] ವುಟ್ಠಿಯಾತಿ.

ಚೂಳಹಂಸಜಾತಕಂ ಛಟ್ಠಂ.