೫೦೧. ರೋಹಣಮಿಗಜಾತಕಂ (೫)

೧೦೪. ಏತೇ ಯೂಥಾ ಪತಿಯನ್ತಿ, ಭೀತಾ ಮರಣಸ್ಸ [ಮರಣಾ (ಸ್ಯಾ. ಪೀ.), ಮರಣ (ಕ.)] ಚಿತ್ತಕ;

ಗಚ್ಛ ತುವಮ್ಪಿ ಮಾಕಙ್ಖಿ, ಜೀವಿಸ್ಸನ್ತಿ ತಯಾ ಸಹ.

೧೦೫. ನಾಹಂ ರೋಹಣ [ರೋಹನ್ತ (ಸೀ. ಪೀ.), ರೋಹನ (ಸ್ಯಾ.)] ಗಚ್ಛಾಮಿ, ಹದಯಂ ಮೇ ಅವಕಸ್ಸತಿ;

ನ ತಂ ಅಹಂ ಜಹಿಸ್ಸಾಮಿ, ಇಧ ಹಿಸ್ಸಾಮಿ ಜೀವಿತಂ.

೧೦೬. ತೇ ಹಿ ನೂನ ಮರಿಸ್ಸನ್ತಿ, ಅನ್ಧಾ ಅಪರಿಣಾಯಕಾ;

ಗಚ್ಛ ತುವಮ್ಪಿ ಮಾಕಙ್ಖಿ, ಜೀವಿಸ್ಸನ್ತಿ ತಯಾ ಸಹ.

೧೦೭. ನಾಹಂ ರೋಹಣ ಗಚ್ಛಾಮಿ, ಹದಯಂ ಮೇ ಅವಕಸ್ಸತಿ;

ನ ತಂ ಬದ್ಧಂ [ಬನ್ಧಂ (ಕ.)] ಜಹಿಸ್ಸಾಮಿ, ಇಧ ಹಿಸ್ಸಾಮಿ ಜೀವಿತಂ.

೧೦೮. ಗಚ್ಛ ಭೀರು ಪಲಾಯಸ್ಸು, ಕೂಟೇ ಬದ್ಧೋಸ್ಮಿ ಆಯಸೇ;

ಗಚ್ಛ ತುವಮ್ಪಿ ಮಾಕಙ್ಖಿ, ಜೀವಿಸ್ಸನ್ತಿ ತಯಾ ಸಹ.

೧೦೯. ನಾಹಂ ರೋಹಣ ಗಚ್ಛಾಮಿ, ಹದಯಂ ಮೇ ಅವಕಸ್ಸತಿ;

ನ ತಂ ಅಹಂ ಜಹಿಸ್ಸಾಮಿ, ಇಧ ಹಿಸ್ಸಾಮಿ ಜೀವಿತಂ.

೧೧೦. ತೇ ಹಿ ನೂನ ಮರಿಸ್ಸನ್ತಿ, ಅನ್ಧಾ ಅಪರಿಣಾಯಕಾ;

ಗಚ್ಛ ತುವಮ್ಪಿ ಮಾಕಙ್ಖಿ, ಜೀವಿಸ್ಸನ್ತಿ ತಯಾ ಸಹ.

೧೧೧. ನಾಹಂ ರೋಹಣ ಗಚ್ಛಾಮಿ, ಹದಯಂ ಮೇ ಅವಕಸ್ಸತಿ;

ನ ತಂ ಬದ್ಧಂ ಜಹಿಸ್ಸಾಮಿ, ಇಧ ಹಿಸ್ಸಾಮಿ ಜೀವಿತಂ.

೧೧೨. ಅಯಂ ಸೋ ಲುದ್ದಕೋ ಏತಿ, ಲುದ್ದರೂಪೋ [ರುದ್ದರೂಪೋ (ಸೀ. ಪೀ.)] ಸಹಾವುಧೋ;

ಯೋ ನೋ ವಧಿಸ್ಸತಿ ಅಜ್ಜ, ಉಸುನಾ ಸತ್ತಿಯಾ ಅಪಿ [ಮಪಿ (ಸೀ. ಸ್ಯಾ. ಪೀ.)].

೧೧೩. ಸಾ ಮುಹುತ್ತಂ ಪಲಾಯಿತ್ವಾ, ಭಯಟ್ಟಾ [ಭಯಟ್ಠಾ (ಪೀ.)] ಭಯತಜ್ಜಿತಾ;

ಸುದುಕ್ಕರಂ ಅಕರಾ ಭೀರು, ಮರಣಾಯೂಪನಿವತ್ತಥ.

೧೧೪. ಕಿನ್ನು ತೇಮೇ ಮಿಗಾ ಹೋನ್ತಿ, ಮುತ್ತಾ ಬದ್ಧಂ ಉಪಾಸರೇ;

ನ ತಂ ಚಜಿತುಮಿಚ್ಛನ್ತಿ, ಜೀವಿತಸ್ಸಪಿ ಕಾರಣಾ.

೧೧೫. ಭಾತರೋ ಹೋನ್ತಿ ಮೇ ಲುದ್ದ, ಸೋದರಿಯಾ ಏಕಮಾತುಕಾ;

ನ ಮಂ ಚಜಿತುಮಿಚ್ಛನ್ತಿ, ಜೀವಿತಸ್ಸಪಿ ಕಾರಣಾ.

೧೧೬. ತೇ ಹಿ ನೂನ ಮರಿಸ್ಸನ್ತಿ, ಅನ್ಧಾ ಅಪರಿಣಾಯಕಾ;

ಪಞ್ಚನ್ನಂ ಜೀವಿತಂ ದೇಹಿ, ಭಾತರಂ ಮುಞ್ಚ ಲುದ್ದಕ.

೧೧೭. ಸೋ ವೋ ಅಹಂ ಪಮೋಕ್ಖಾಮಿ, ಮಾತಾಪೇತ್ತಿಭರಂ ಮಿಗಂ;

ನನ್ದನ್ತು ಮಾತಾಪಿತರೋ, ಮುತ್ತಂ ದಿಸ್ವಾ ಮಹಾಮಿಗಂ.

೧೧೮. ಏವಂ ಲುದ್ದಕ ನನ್ದಸ್ಸು, ಸಹ ಸಬ್ಬೇಹಿ ಞಾತಿಭಿ;

ಯಥಾಹಮಜ್ಜ ನನ್ದಾಮಿ, ಮುತ್ತಂ ದಿಸ್ವಾ ಮಹಾಮಿಗಂ.

೧೧೯. ಕಥಂ ತ್ವಂ ಪಮೋಕ್ಖೋ [ಕಥಂ ಪಮೋಕ್ಖೋ (ಸೀ. ಪೀ.), ಕಥಂ ತೇ ಪರೋಕ್ಖೋ (?)] ಆಸಿ, ಉಪನೀತಸ್ಮಿ ಜೀವಿತೇ;

ಕಥಂ ಪುತ್ತ ಅಮೋಚೇಸಿ, ಕೂಟಪಾಸಮ್ಹ ಲುದ್ದಕೋ.

೧೨೦. ಭಣಂ ಕಣ್ಣಸುಖಂ ವಾಚಂ, ಹದಯಙ್ಗಂ ಹದಯಸ್ಸಿತಂ;

ಸುಭಾಸಿತಾಹಿ ವಾಚಾಹಿ, ಚಿತ್ತಕೋ ಮಂ ಅಮೋಚಯಿ.

೧೨೧. ಭಣಂ ಕಣ್ಣಸುಖಂ ವಾಚಂ, ಹದಯಙ್ಗಂ ಹದಯಸ್ಸಿತಂ;

ಸುಭಾಸಿತಾಹಿ ವಾಚಾಹಿ, ಸುತನಾ ಮಂ ಅಮೋಚಯಿ.

೧೨೨. ಸುತ್ವಾ ಕಣ್ಣಸುಖಂ ವಾಚಂ, ಹದಯಙ್ಗಂ ಹದಯಸ್ಸಿತಂ;

ಸುಭಾಸಿತಾನಿ ಸುತ್ವಾನ, ಲುದ್ದಕೋ ಮಂ ಅಮೋಚಯಿ.

೧೨೩. ಏವಂ ಆನನ್ದಿತೋ ಹೋತು, ಸಹ ದಾರೇಹಿ ಲುದ್ದಕೋ;

ಯಥಾ ಮಯಜ್ಜ ನನ್ದಾಮ, ದಿಸ್ವಾ ರೋಹಣಮಾಗತಂ.

೧೨೪. ನನು ತ್ವಂ ಅವಚ [ಅವಚಾ (ಸೀ. ಪೀ.)] ಲುದ್ದ, ‘‘ಮಿಗಚಮ್ಮಾನಿ ಆಹರಿಂ’’;

ಅಥ ಕೇನ ನು ವಣ್ಣೇನ, ಮಿಗಚಮ್ಮಾನಿ ನಾಹರಿ.

೧೨೫. ಆಗಮಾ ಚೇವ ಹತ್ಥತ್ಥಂ, ಕೂಟಪಾಸಞ್ಚ ಸೋ ಮಿಗೋ;

ಅಬಜ್ಝಿ ತಂ [ಅಬಜ್ಝಿ ತಞ್ಚ (ಪೀ.)] ಮಿಗರಾಜಂ, ತಞ್ಚ ಮುತ್ತಾ ಉಪಾಸರೇ.

೧೨೬. ತಸ್ಸ ಮೇ ಅಹು ಸಂವೇಗೋ, ಅಬ್ಭುತೋ ಲೋಮಹಂಸನೋ;

ಇಮಞ್ಚಾಹಂ ಮಿಗಂ ಹಞ್ಞೇ, ಅಜ್ಜ ಹಿಸ್ಸಾಮಿ ಜೀವಿತಂ.

೧೨೭. ಕೀದಿಸಾ ತೇ ಮಿಗಾ ಲುದ್ದ, ಕೀದಿಸಾ ಧಮ್ಮಿಕಾ ಮಿಗಾ;

ಕಥಂವಣ್ಣಾ ಕಥಂಸೀಲಾ, ಬಾಳ್ಹಂ ಖೋ ನೇ ಪಸಂಸಸಿ.

೧೨೮. ಓದಾತಸಿಙ್ಗಾ ಸುಚಿವಾಳಾ, ಜಾತರೂಪತಚೂಪಮಾ;

ಪಾದಾ ಲೋಹಿತಕಾ ತೇಸಂ, ಅಞ್ಜಿತಕ್ಖಾ ಮನೋರಮಾ.

೧೨೯. ಏದಿಸಾ ತೇ ಮಿಗಾ ದೇವ, ಏದಿಸಾ ಧಮ್ಮಿಕಾ ಮಿಗಾ;

ಮಾತಾಪೇತ್ತಿಭರಾ ದೇವ, ನ ತೇ ಸೋ ಅಭಿಹಾರಿತುಂ [ಅಭಿಹಾರಯುಂ (ಕ. ಸೀ.), ಅಭಿಹಾರಯಿಂ (ಸ್ಯಾ.), ಅಭಿಹಾರಯಂ (ಪೀ.)].

೧೩೦. ದಮ್ಮಿ ನಿಕ್ಖಸತಂ ಲುದ್ದ, ಥೂಲಞ್ಚ ಮಣಿಕುಣ್ಡಲಂ;

ಚತುಸ್ಸದಞ್ಚ [ಚತುರಸ್ಸಞ್ಚ (ಸ್ಯಾ. ಕ.)] ಪಲ್ಲಙ್ಕಂ, ಉಮಾಪುಪ್ಫಸರಿನ್ನಿಭಂ [ಉಮ್ಮಾಪುಪ್ಫಸಿರಿನ್ನಿಭಂ (ಸೀ. ಸ್ಯಾ. ಪೀ. ಕ.)].

೧೩೧. ದ್ವೇ ಚ ಸಾದಿಸಿಯೋ ಭರಿಯಾ, ಉಸಭಞ್ಚ ಗವಂ ಸತಂ;

ಧಮ್ಮೇನ ರಜ್ಜಂ ಕಾರೇಸ್ಸಂ, ಬಹುಕಾರೋ ಮೇಸಿ ಲುದ್ದಕ.

೧೩೨. ಕಸಿವಾಣಿಜ್ಜಾ [ಕಸೀ ವಣಿಜ್ಜಾ (ಸೀ. ಸ್ಯಾ. ಪೀ.)] ಇಣದಾನಂ, ಉಞ್ಛಾಚರಿಯಾ ಚ ಲುದ್ದಕ;

ಏತೇನ ದಾರಂ ಪೋಸೇಹಿ, ಮಾ ಪಾಪಂ ಅಕರೀ ಪುನಾತಿ [ಅಕರಾ ಪುನನ್ತಿ (ಕ. ಸೀ. ಪೀ.)].

ರೋಹಣಮಿಗಜಾತಕಂ [ರೋಹನ್ತಮಿಗಜಾತಕಂ (ಸೀ. ಪೀ.)] ಪಞ್ಚಮಂ.