೫೦೦. ಸಿರೀಮನ್ತಜಾತಕಂ (೪)

೮೩. ಪಞ್ಞಾಯುಪೇತಂ ಸಿರಿಯಾ ವಿಹೀನಂ, ಯಸಸ್ಸಿನಂ ವಾಪಿ ಅಪೇತಪಞ್ಞಂ;

ಪುಚ್ಛಾಮಿ ತಂ ಸೇನಕ ಏತಮತ್ಥಂ, ಕಮೇತ್ಥ ಸೇಯ್ಯೋ ಕುಸಲಾ ವದನ್ತಿ.

೮೪. ಧೀರಾ ಚ ಬಾಲಾ ಚ ಹವೇ ಜನಿನ್ದ, ಸಿಪ್ಪೂಪಪನ್ನಾ ಚ ಅಸಿಪ್ಪಿನೋ ಚ;

ಸುಜಾತಿಮನ್ತೋಪಿ ಅಜಾತಿಮಸ್ಸ, ಯಸಸ್ಸಿನೋ ಪೇಸಕರಾ [ಪೇಸ್ಸಕರಾ (ಸೀ. ಪೀ.)] ಭವನ್ತಿ;

ಏತಮ್ಪಿ ದಿಸ್ವಾನ ಅಹಂ ವದಾಮಿ, ಪಞ್ಞೋ ನಿಹೀನೋ ಸಿರೀಮಾವ [ಸಿರಿಮಾವ (ಸೀ. ಸ್ಯಾ. ಪೀ.)] ಸೇಯ್ಯೋ.

೮೫. ತುವಮ್ಪಿ ಪುಚ್ಛಾಮಿ ಅನೋಮಪಞ್ಞ, ಮಹೋಸಧ ಕೇವಲಧಮ್ಮದಸ್ಸಿ;

ಬಾಲಂ ಯಸಸ್ಸಿಂ ಪಣ್ಡಿತಂ ಅಪ್ಪಭೋಗಂ, ಕಮೇತ್ಥ ಸೇಯ್ಯೋ ಕುಸಲಾ ವದನ್ತಿ.

೮೬. ಪಾಪಾನಿ ಕಮ್ಮಾನಿ ಕರೋತಿ ಬಾಲೋ [ಕರೋನ್ತಿ ಬಾಲಾ (ಸ್ಯಾ. ಕ.)], ಇಧಮೇವ [ಇದಮೇವ (ಸ್ಯಾ. ಕ. ಅಟ್ಠ.), ಇಮಮೇವ (ಕ.)] ಸೇಯ್ಯೋ ಇತಿ ಮಞ್ಞಮಾನೋ [ಮಞ್ಞಮಾನಾ (ಸ್ಯಾ. ಕ.)];

ಇಧಲೋಕದಸ್ಸೀ ಪರಲೋಕಮದಸ್ಸೀ, ಉಭಯತ್ಥ ಬಾಲೋ ಕಲಿಮಗ್ಗಹೇಸಿ;

ಏತಮ್ಪಿ ದಿಸ್ವಾನ ಅಹಂ ವದಾಮಿ, ಪಞ್ಞೋವ ಸೇಯ್ಯೋ ನ ಯಸಸ್ಸಿ ಬಾಲೋ.

೮೭. ನ ಸಿಪ್ಪಮೇತಂ ವಿದಧಾತಿ ಭೋಗಂ, ನ ಬನ್ಧುವಾ [ನ ಬನ್ಧವಾ (ಸೀ. ಸ್ಯಾ. ಕ.)] ನ ಸರೀರವಣ್ಣೋ ಯೋ [ನ ಸರೀರಾವಕಾಸೋ (ಸೀ. ಸ್ಯಾ. ಪೀ.)];

ಪಸ್ಸೇಳಮೂಗಂ ಸುಖಮೇಧಮಾನಂ, ಸಿರೀ ಹಿ ನಂ ಭಜತೇ ಗೋರವಿನ್ದಂ [ಗೋರಿಮನ್ದಂ (ಸೀ. ಪೀ.)];

ಏತಮ್ಪಿ ದಿಸ್ವಾನ ಅಹಂ ವದಾಮಿ, ಪಞ್ಞೋ ನಿಹೀನೋ ಸಿರೀಮಾವ ಸೇಯ್ಯೋ.

೮೮. ಲದ್ಧಾ ಸುಖಂ ಮಜ್ಜತಿ ಅಪ್ಪಪಞ್ಞೋ, ದುಕ್ಖೇನ ಫುಟ್ಠೋಪಿ ಪಮೋಹಮೇತಿ;

ಆಗನ್ತುನಾ ದುಕ್ಖಸುಖೇನ ಫುಟ್ಠೋ, ಪವೇಧತಿ ವಾರಿಚರೋವ ಘಮ್ಮೇ;

ಏತಮ್ಪಿ ದಿಸ್ವಾನ ಅಹಂ ವದಾಮಿ, ಪಞ್ಞೋವ ಸೇಯ್ಯೋ ನ ಯಸಸ್ಸಿ ಬಾಲೋ.

೮೯. ದುಮಂ ಯಥಾ ಸಾದುಫಲಂ ಅರಞ್ಞೇ, ಸಮನ್ತತೋ ಸಮಭಿಸರನ್ತಿ [ಸಮಭಿಚರನ್ತಿ (ಸೀ. ಪೀ.)] ಪಕ್ಖೀ;

ಏವಮ್ಪಿ ಅಡ್ಢಂ ಸಧನಂ ಸಭೋಗಂ, ಬಹುಜ್ಜನೋ ಭಜತಿ ಅತ್ಥಹೇತು;

ಏತಮ್ಪಿ ದಿಸ್ವಾನ ಅಹಂ ವದಾಮಿ, ಪಞ್ಞೋ ನಿಹೀನೋ ಸಿರೀಮಾವ ಸೇಯ್ಯೋ.

೯೦. ನ ಸಾಧು ಬಲವಾ ಬಾಲೋ, ಸಾಹಸಾ ವಿನ್ದತೇ ಧನಂ;

ಕನ್ದನ್ತಮೇತಂ ದುಮ್ಮೇಧಂ, ಕಡ್ಢನ್ತಿ ನಿರಯಂ ಭುಸಂ;

ಏತಮ್ಪಿ ದಿಸ್ವಾನ ಅಹಂ ವದಾಮಿ, ಪಞ್ಞೋವ ಸೇಯ್ಯೋ ನ ಯಸಸ್ಸಿ ಬಾಲೋ.

೯೧. ಯಾ ಕಾಚಿ ನಜ್ಜೋ ಗಙ್ಗಮಭಿಸ್ಸವನ್ತಿ, ಸಬ್ಬಾವ ತಾ ನಾಮಗೋತ್ತಂ ಜಹನ್ತಿ;

ಗಙ್ಗಾ ಸಮುದ್ದಂ ಪಟಿಪಜ್ಜಮಾನಾ, ನ ಖಾಯತೇ ಇದ್ಧಿಂ ಪಞ್ಞೋಪಿ ಲೋಕೇ [ಇದ್ಧಿಪರೋ ಹಿ ಲೋಕೇ (ಕ. ಸೀ. ಸ್ಯಾ.), ಇದ್ಧಿಪರೋ ಹಿ ಲೋಕೋ (ಸೀ. ಪೀ. ಅಟ್ಠ.)];

ಏತಮ್ಪಿ ದಿಸ್ವಾನ ಅಹಂ ವದಾಮಿ, ಪಞ್ಞೋ ನಿಹೀನೋ ಸಿರೀಮಾವ ಸೇಯ್ಯೋ.

೯೨. ಯಮೇತಮಕ್ಖಾ ಉದಧಿಂ ಮಹನ್ತಂ, ಸವನ್ತಿ ನಜ್ಜೋ ಸಬ್ಬಕಾಲಮಸಙ್ಖ್ಯಂ;

ಸೋ ಸಾಗರೋ ನಿಚ್ಚಮುಳಾರವೇಗೋ, ವೇಲಂ ನ ಅಚ್ಚೇತಿ ಮಹಾಸಮುದ್ದೋ.

೯೩. ಏವಮ್ಪಿ ಬಾಲಸ್ಸ ಪಜಪ್ಪಿತಾನಿ, ಪಞ್ಞಂ ನ ಅಚ್ಚೇತಿ ಸಿರೀ ಕದಾಚಿ;

ಏತಮ್ಪಿ ದಿಸ್ವಾನ ಅಹಂ ವದಾಮಿ, ಪಞ್ಞೋವ ಸೇಯ್ಯೋ ನ ಯಸಸ್ಸಿ ಬಾಲೋ.

೯೪. ಅಸಞ್ಞತೋ ಚೇಪಿ ಪರೇಸಮತ್ಥಂ, ಭಣಾತಿ ಸನ್ಧಾನಗತೋ [ಸಣ್ಠಾನಗತೋ (ಸ್ಯಾ. ಪೀ.), ಸನ್ಥಾನಗತೋ (ಸೀ.)] ಯಸಸ್ಸೀ;

ತಸ್ಸೇವ ತಂ ರೂಹತಿ ಞಾತಿಮಜ್ಝೇ, ಸಿರೀ ಹಿ ನಂ [ಸಿರಿಹೀನಂ (ಸೀ. ಕ.), ಸಿರೀಹೀನಂ (ಸ್ಯಾ. ಪೀ.)] ಕಾರಯತೇ ನ ಪಞ್ಞಾ [ನ ಪಞ್ಞೋ (ಸೀ.), ನ ಪಞ್ಞಂ (ಸ್ಯಾ. ಕ.)];

ಏತಮ್ಪಿ ದಿಸ್ವಾನ ಅಹಂ ವದಾಮಿ, ಪಞ್ಞೋ ನಿಹೀನೋ ಸಿರೀಮಾವ ಸೇಯ್ಯೋ.

೯೫. ಪರಸ್ಸ ವಾ ಅತ್ತನೋ ವಾಪಿ ಹೇತು, ಬಾಲೋ ಮುಸಾ ಭಾಸತಿ ಅಪ್ಪಪಞ್ಞೋ;

ಸೋ ನಿನ್ದಿತೋ ಹೋತಿ ಸಭಾಯ ಮಜ್ಝೇ, ಪಚ್ಛಾಪಿ [ಪೇಚ್ಚಮ್ಪಿ (ಸೀ. ಪೀ.), ಪೇಚ್ಚಾಪಿ (?)] ಸೋ ದುಗ್ಗತಿಗಾಮೀ ಹೋತಿ;

ಏತಮ್ಪಿ ದಿಸ್ವಾನ ಅಹಂ ವದಾಮಿ, ಪಞ್ಞೋವ ಸೇಯ್ಯೋ ನ ಯಸಸ್ಸಿ ಬಾಲೋ.

೯೬. ಅತ್ಥಮ್ಪಿ ಚೇ ಭಾಸತಿ ಭೂರಿಪಞ್ಞೋ, ಅನಾಳ್ಹಿಯೋ [ಅನಾಲಯೋ (ಪೀ.)] ಅಪ್ಪಧನೋ ದಲಿದ್ದೋ;

ನ ತಸ್ಸ ತಂ ರೂಹತಿ ಞಾತಿಮಜ್ಝೇ, ಸಿರೀ ಚ ಪಞ್ಞಾಣವತೋ ನ ಹೋತಿ;

ಏತಮ್ಪಿ ದಿಸ್ವಾನ ಅಹಂ ವದಾಮಿ, ಪಞ್ಞೋ ನಿಹೀನೋ ಸಿರೀಮಾವ ಸೇಯ್ಯೋ.

೯೭. ಪರಸ್ಸ ವಾ ಅತ್ತನೋ ವಾಪಿ ಹೇತು, ನ ಭಾಸತಿ ಅಲಿಕಂ ಭೂರಿಪಞ್ಞೋ;

ಸೋ ಪೂಜಿತೋ ಹೋತಿ ಸಭಾಯ ಮಜ್ಝೇ, ಪಚ್ಛಾಪಿ ಸೋ ಸುಗ್ಗತಿಗಾಮೀ ಹೋತಿ;

ಏತಮ್ಪಿ ದಿಸ್ವಾನ ಅಹಂ ವದಾಮಿ, ಪಞ್ಞೋವ ಸೇಯ್ಯೋ ನ ಯಸಸ್ಸಿ ಬಾಲೋ.

೯೮. ಹತ್ಥೀ ಗವಸ್ಸಾ ಮಣಿಕುಣ್ಡಲಾ ಚ, ಥಿಯೋ ಚ ಇದ್ಧೇಸು ಕುಲೇಸು ಜಾತಾ;

ಸಬ್ಬಾವ ತಾ ಉಪಭೋಗಾ ಭವನ್ತಿ, ಇದ್ಧಸ್ಸ ಪೋಸಸ್ಸ ಅನಿದ್ಧಿಮನ್ತೋ;

ಏತಮ್ಪಿ ದಿಸ್ವಾನ ಅಹಂ ವದಾಮಿ, ಪಞ್ಞೋ ನಿಹೀನೋ ಸಿರೀಮಾವ ಸೇಯ್ಯೋ.

೯೯. ಅಸಂವಿಹಿತಕಮ್ಮನ್ತಂ, ಬಾಲಂ ದುಮ್ಮೇಧಮನ್ತಿನಂ;

ಸಿರೀ ಜಹತಿ ದುಮ್ಮೇಧಂ, ಜಿಣ್ಣಂವ ಉರಗೋ ತಚಂ;

ಏತಮ್ಪಿ ದಿಸ್ವಾನ ಅಹಂ ವದಾಮಿ, ಪಞ್ಞೋವ ಸೇಯ್ಯೋ ನ ಯಸಸ್ಸಿ ಬಾಲೋ.

೧೦೦. ಪಞ್ಚ ಪಣ್ಡಿತಾ ಮಯಂ ಭದ್ದನ್ತೇ, ಸಬ್ಬೇ ಪಞ್ಜಲಿಕಾ ಉಪಟ್ಠಿತಾ;

ತ್ವಂ ನೋ ಅಭಿಭುಯ್ಯ ಇಸ್ಸರೋಸಿ, ಸಕ್ಕೋವ ಭೂತಪತಿ ದೇವರಾಜಾ;

ಏತಮ್ಪಿ ದಿಸ್ವಾನ ಅಹಂ ವದಾಮಿ, ಪಞ್ಞೋ ನಿಹೀನೋ ಸಿರೀಮಾವ ಸೇಯ್ಯೋ.

೧೦೧. ದಾಸೋವ ಪಞ್ಞಸ್ಸ ಯಸಸ್ಸಿ ಬಾಲೋ, ಅತ್ಥೇಸು ಜಾತೇಸು ತಥಾವಿಧೇಸು;

ಯಂ ಪಣ್ಡಿತೋ ನಿಪುಣಂ ಸಂವಿಧೇತಿ, ಸಮ್ಮೋಹಮಾಪಜ್ಜತಿ ತತ್ಥ ಬಾಲೋ;

ಏತಮ್ಪಿ ದಿಸ್ವಾನ ಅಹಂ ವದಾಮಿ, ಪಞ್ಞೋವ ಸೇಯ್ಯೋ ನ ಯಸಸ್ಸಿ ಬಾಲೋ.

೧೦೨. ಅದ್ಧಾ ಹಿ ಪಞ್ಞಾವ ಸತಂ ಪಸತ್ಥಾ, ಕನ್ತಾ ಸಿರೀ ಭೋಗರತಾ ಮನುಸ್ಸಾ;

ಞಾಣಞ್ಚ ಬುದ್ಧಾನಮತುಲ್ಯರೂಪಂ, ಪಞ್ಞಂ ನ ಅಚ್ಚೇತಿ ಸಿರೀ ಕದಾಚಿ.

೧೦೩. ಯಂ ತಂ ಅಪುಚ್ಛಿಮ್ಹ ಅಕಿತ್ತಯೀ ನೋ, ಮಹೋಸಧ ಕೇವಲಧಮ್ಮದಸ್ಸೀ;

ಗವಂ ಸಹಸ್ಸಂ ಉಸಭಞ್ಚ ನಾಗಂ, ಆಜಞ್ಞಯುತ್ತೇ ಚ ರಥೇ ದಸ ಇಮೇ;

ಪಞ್ಹಸ್ಸ ವೇಯ್ಯಾಕರಣೇನ ತುಟ್ಠೋ, ದದಾಮಿ ತೇ ಗಾಮವರಾನಿ ಸೋಳಸಾತಿ.

ಸಿರೀಮನ್ತಜಾತಕಂ [ಸಿರಿಮನ್ದಜಾತಕಂ (ಸೀ. ಸ್ಯಾ. ಪೀ.)] ಚತುತ್ಥಂ.